قەیس وەیس:

چاڤەڕێ‌ دهێتە كرن ئەڤرۆ دەست ب هەڤڕكیێن یاریێن دووماهییا قارەمانییا ڤۆلی بۆلێ‌ ل سەر ئاستێ‌ یانەیێن ئیراقێ‌ بۆ كچان ل هەولێرا پایتەخت ب پشكدارییا شەش یانەیێن ل هۆلا گرتییا یانەیا عەینكاوە بهێتە كرن، یانەیا سەنحاریب ئێكانە نوونەرا پارێزگەها دهۆكێ‌ یە و چاڤێ‌ وێ‌ ل دەستڤەئینانا ناسناڤی یە.
دهێتە چاڤەڕێ‌ كرن یاریێن وان ب شێوەیی خول ئێك قۆناغ رۆژانە دێ‌ هێنە كرن، یاریێن ئەڤرۆ دێ‌ بڤی شێوەیی بن.
یانەیا سەنحاریب- یانەیا قەرەقۆش، دەمژمێر 4:30 ئێڤاری هێتە كرن
یانەیا ئەفرۆدێت- یانەیا دەربەندیخان، دەمژمێر دو پشتی نیڤرۆ.
یانەیا ئەكاد عەنكاوە- یانەیا ئەمانەت بەغدا،
ل دۆر ڤێ‌ یەكێ‌ و دووماهی پێشهاتەیێن وان داود رەبەن سەرۆكێ‌ یانەیا سەنحاریب بۆ رۆژنامەیا ئەڤرۆ گۆت: پشتی ب دووماهی هاتنا قۆناغا ئێكێ‌ یا قارەمانیێ‌ ئەوا ل باژێرێ‌ سلێمانیێ‌ هاتییە كرن و ئەم شیایین وەكو سەركێشا سەرێ‌ لیستێ‌ دەربازبینە قۆناغا دویێ‌ و دووماهیێ‌، كادرێ‌ ڕاهێنانێ‌ و یاریزان بەردەوامبووینە ل سەر ڕاهێنانێن خوە، ل دووڤ حساباتێن قۆناغا ئێكێ‌ كادرێ‌ ڕاهێنانێ‌ ل دەستپێكێ‌ دۆڤچوونا هێز و كێماسیێن تیما خوە كرییە و پلان و بەرنامە بۆ باشتر خوە بەرهەڤكرنێ‌ دانابوو، دووڤدا دۆڤچوونا هەموو تیمێن دەربازبووكریە.
هەروەسان ناڤهاتی گۆت، قۆناغەكا بهێزە و هەموو تیم دێ‌ شەڕی بۆ دەستڤەئینانا ناسناڤی كەن، ژبەركو هەموویان باشترین یاریزانێن ئیراقێ‌ و پیشەكار ئیناینە دناڤ ڕێزێن خوە دا، دبیت ئەركێ‌ مە ب زەحمەت بیت لێ‌ ڕژدییا هەیی و مۆرالا یاریزانان یا بلندە ژبەركو ئەم تاكە یانەیا دەڤەرا بەهدینان پشكدارین ب ئۆمێدین باشتر شێوە نوونەراتییا پارێزگەهێ‌ بكەین و ناسناڤێ‌ ئیراقێ‌ ب دەستڤە بینن و ئەڤە هیڤی و ئارمانجا مەیە.
ژلایێ‌ خوەڤە حەبیت ئەللاوەندی سەرۆكێ‌ فدراسیۆنا ڤۆلی بولا ئیراقێ‌ كەیخوەشیا خوە دیار كر كو هەرێما كوردستانێ‌ هەردەم بوویە جهێ‌ سەركەڤتنا هەر قارەمانییەكا وان و گۆت: ژبەر كو ئەم پشتراست دبووین دێ‌ قارەمانییا مە ب ئارامی و سەركەڤتیانە ب ڕێڤەچیت لەوما ژی بڕیار هاتبوو دان قۆناغا ئێكێ‌ و دویێ‌ ل هەردو باژێرێن سلێمانیێ‌ و هەولێرێ‌ بهێنە كرن، هەرچەندە دبیت داخوازی هەبوون ل ناڤەڕاست و باشۆرێ‌ ئیراقێ‌ لێ‌ ژبەر خالێن سەركەڤتنێ‌ و هەبوونا ژێرخانەیا وەرزشی مە هەرێما كوردستانێ‌ هەلبژارت بوو.
هەروەسان ناڤهاتی گۆت: یارییا ڤۆلی بۆلێ‌ ل هەرێمێ‌ بەر ب پێشڤە دچیت تایبەت ل سەر ئاستێ‌ كچان، ژ شەش یانەیێن دەربازبوونە قۆناغا دووماهیێ‌ چار ژ وان یێن هەرێمێ‌ نە و ئەڤە ژی خالەكا گرنگە بۆ پێشڤەچوونێ‌، هەردەم هەرێما كوردستانێ‌ بوویە جهێ‌ پێشڤكەڤتنا یارییا ڤۆلی بۆلێ‌

د داخویانیەكێ‌ دا سەرۆكێ‌ یانەیا ئافرەتێن دهۆكێ‌ یا وەرزشی دیار كر تیما وان ل سەر ئاستێ‌ تازەپێگەهشتییان بەرهەڤییان بۆ قارەمانییا پیلیستانگ یا یارییا فوتسالێ‌ دكەن و چاڤ ل ڕیزێن ئێكێ‌ نە، ئەوا بڕیارە هەڤڕكیێن وێ‌ ل دەستپێكا مەها بهێت هەولێرا پایتەخت مێڤاندارییا وێ‌ بكەت
زێدەتر سەردار سالح بۆ رۆژنامەیا ئەڤرۆ گۆت: ل دووڤ پلانا كارگێرییا یانەیێ‌ و ژبۆ بەردەوامی دان ب پشتەڤانییا یاریزانێن خوە یێن كچێن پارێزگەهێ‌ مە بڕیار دابوو تیما تازەپێگەهشتیێن مە ل سەر ئاستێ‌ یارییا فوتسالێ‌ پشكداریێ‌ د قارەمانییا پیلسیتانگ بكەن ئەوا دهێتە هژمارتن ئێك ژ قارەمانیێن بهێز ژبەر پشكدارییەكا بەرچاڤ یا یانەیان و پرانییا وان خودان یاریزانێن شیانن، پشكدارییا تیما مە ژی نە بتنێ‌ بۆ وەرگرتنا شارەزاهیێ‌ یە، بەلكو بزاڤێن مە ب دەستڤە ئینانا ڕێزێن باشە.
هەروەسان ناڤهاتی گۆت: تیما مە ب سەرپەرشتییا ڕاهێنەرێ‌ خودان شیان یێ‌ پارێزگەهێ‌ ئاراز سالح ئەوێ‌ بەری دو مەهان ناسناڤێ‌ خولا كچێن كوردستانێ‌ بۆ یانەیا مە و پارێزگەها دهۆكێ‌ ب دەستڤە ئینایی، هەروەسان هەموو یاریزانێن مە ژی كچێن باژێرێ‌ مەنە و ژیێن بچووكن كو دێ‌ بنە پاشەرۆژەكا گەش بۆ یانەیێ‌ و دانانا شەنگستەكێ‌ ب هێز یێن كچێن وەرزشڤان..
هەروەسان ناڤهاتی گۆت: وەكو كارگێرییا یانەیا ئافرەتێن دهۆكێ‌ هەردەم مە بزاڤ كرینە بۆ هەر پشكدارییەكا كوردستانی و ئیراقێ‌ گرنگییەكا مەزن پێ‌ بدەین و دەلیڤەیەكا زێرین بۆ هەموو یاریزانێن كچ یێن باژێرێ‌ خوە بدەین پێخەمەت بلندكرنا ئاستێ‌ وەرزشا كچان، پێنەڤێت پشكدارییا مە ب پشتەڤانییا د. عەلی تەتەر پارێزگارێ‌ دهۆكێ‌ ئەوێ‌ هەردەم هاریكارییا یانەیێ‌ دكەت و یا مە ژی پلان دانانە ژبۆ دەستكەڤتەكێ‌ نوو بۆ ناڤێ‌ پارێزگەها دهۆكێ‌ و پێشئێخستنا ئاستێ‌ وەرزشا كچان.
ژلایەكێ‌ دووڤە ئاراز سالح ڕاهێنەرێ‌ تیما یانەیا ئافرەتێن دهۆكێ‌ گۆت: ب پێكهاتییەكێ‌ نوو و هەموو ژی یاریزانێن كچ یێن ژیێن بچووك دا ئەم بەردەوامین ل سەر بەرهەڤییان، هەرچەندە پێشوەخت دا مە بەرهەڤی كربوو لێ‌ پشت هاتییە پاشئێخستن، دەمەك بهێنڤە دان دا بوو یاریزانان و دووڤدا دەست ب ڕاهێنانان كر، پێنەڤێت ئەركێ‌ مە ب سانەهی نابیت هیڤی و ئارمانجێن كادرێ‌ راهێنانێ‌ و كارگێرییا یانەیێ‌ هەڤڕكیێ‌ ل سەر ناسناڤی بكەین، هێشتا دەم یێ‌ مایی ئەم بڕیارێ‌ ل سەر هەڤڕكیێ‌ بكەین ژبەركو دبیت زێدەتری 12 یانە و فێرگەهێن وەرزشی پشكداربن و مە پێزانین ل سەر چو تیمان نینن، بۆ مە گرنگ باشترین شێوە خوە بەرهەڤ بكەین و هەڤڕكییا ڕێزێن ئێكێ‌ بهێتە كرن.
دهێتە زانین 12 یانەیێن هەرێما كوردستانێ‌ ژ وانا یێن پارێزگەهێ‌ یانەیێن ئافرەتێن دهۆك، كچێن یانەیا زاخۆ، یانەیا ئاكرێ‌ پشكداریێ‌ د ڤێ‌ قارەمانیێ‌ دا بكەن كو تایبەتە بۆ یاریزانێن كچی ێن تازەپێگەهشتی ل هەولێرا پایتەخت دناڤبەرا دەهـ رۆژان دا بهێتە كرن.

د پرێس كۆنفرانسەكێ‌ رۆژنامەڤانی دا ستێرێ‌ سربی نۆڤاك دیۆكۆڤێچ گەشبینییا خوە دیاركر بۆ چار قارەمانیێن بهێت یێن نێڤدەولەتی بەرهەڤە و دێ‌ هەڤڕكیێ‌ بۆ ناسناڤان كەت.
دیۆكۆڤێچی گۆت: من پلانێن خوە گوهارتن ئێدی هزر د قارەمانیێن پلەداریێ‌ كەم ئەو چار مەزنە قارەمانیێن جیهانی دا كەم، بۆ من گرنگن نینە قارەمانیێن ڤەكری یێن وەلاتان یان یێن ماستەرێ‌، ژبەركو گەلەك دەمی دبەت، گوهۆڕینا پلانا خوە ژبەركو دا زێدەتر دەلیڤێ‌ بدەمە خێزانا خوە، ئەو چار قارەمانیێن مەزن تایبەت یا ویمبلدۆن ژلایێ‌ ئاستی و خەلاتان و ڕێزبەندیێ‌ دێ‌ گەلەك مفایی گەهینتە من، راستە ژیێ‌ من 38 سالە لێ‌ مۆرالا من بۆ ناسناڤان مەزنتر لێهاتییە.

ڕاهێنەرێ‌ ئسپانی پێب گواردیۆلا و یانەیا مانچستەر ستی یا ئنگلتەرایێ‌ سۆزەك دا پشتەڤانێن تیما خوە پشتی خوسارەتییا وان بەرانبەر یانەیا توتنهام ب دو گۆلێن پاقژ، د چارچووڤەیێ‌ گەڕا دویێ‌ یا خولا پرێمەرلیگ هاتیە كرن.
د كنفرانسەكێ‌ رۆژنامەڤانی دا گواردیۆلایی گۆت: ئەز ژ تیما خوە نا ترسم و ئەڤە یارییا دویێ‌ یە، هێشتا ئەم یێ‌ ل دەستپێكا خولێ‌، حەفتییا بۆری ئەم ب سەركەڤتین، یارییا بەرانبەر تۆتنهام من چو گوهۆڕین د پلانێن پێشتر دانەكربوو بتنێ‌ دخواست یاریزان مفایی ژ بووشاتیان وەربگرن و هێرشێن هەڤدژی بكەن، نە پشكدارییا چەند یاریزانێن مە كارتیكرن هەبوو.
هەروەسان گۆت: مە شیانێن باش هەنە و سۆزێ‌ ددەینە پشتەڤانان بۆ یاریێن بهێت باشتر و ئەنجامێن سەركەڤتی بینن، ئەم ل دەستپێكا خولێ‌ نە و هێشتا زوویە بڕیارێ‌ ل سەر تیمێ‌ بهێتە دان.

بەزۆكا ئەمریكی میلیسا جیفرسۆن وودن ڕێزا ئێكێ‌ د بەریكانەیا 100م یا قارەمانییا برۆكسل یا نێڤدەولەتی بۆ یاریێن گۆرەپانێ‌ دا هات و ڕیكۆردەكا نوو ل سەر ناڤێ‌ خوە تۆمار كر.
جیفرسۆنێ‌ شیا ڕێزا ئێكێ‌ بهێت ب دەمێ‌ 10 چركە و 76 پشك ژ چەركەكێ‌ د بەریكانەیا 100م دا بهێت، د هەڤڕكیێن قارەمانیێ‌ دا ئەوا ل وەلاتێ‌ بەلجیكا هاتییە كرن و پێشكەڤت ژ هەڤوەلاتیا خوە و قارەمانا شاكاری ریچاردسۆن ئەوا رێزا دویێ‌ هاتی ب11 چركە وهەشت پشك ژ چركەكێ‌، یا بریتانی داریێل نیتا رێزا سییێ‌ هات ب11 چركە و 15 پشك ژ چركەكێ‌.
ستێرا ئەمریكا میلیسا جیفرسۆن ڕیكۆردەكا نوو تۆماركر و شیان وەكو ئێكەم یاریزانا ئەمریكی و جیهانێ‌ دڤێ‌ قارەمانیێ‌ دا بۆ ماوەیێ‌ ئێك وەرز ڕێزا ئێكێ‌ بەرنەدەت و كێمترین دەم بینت.