پشتی دەربازبوونا مەهەكێ ل سەر داخۆیانیێن بەرپرسێن حوكمەتا ئیراقێ یێن گرێدای دەستپێكرنا دانوستاندنان ل گەل میلیشیێن چەكدار ل وەلاتی بۆ رادەستكرنا چەكێن خوە و ئێكخستنا وان ل گەل هێزێن قانوونی یێن ئیراقی، رۆژنامەیا (ئەلعەرەبی ئەلجەدید) یا لەندەنی ژ زاردەڤێ ژێدەرەكێ ئاگەهدار ژ ڤی بابەتی ئاشكراكر» هیچ رێككەفتنەك د ناڤبەرا حوكمەتا ئیراقێ و میلیشیێن چەكدار نەهاتیە كرن، ئەڤ چەندە ژ ئەگەرێ رەتكرنا میلیشیا بۆ پرسا ئێكگرتنا وان ل گەل دەزگەهێن ئەمنی یێن ئیراقی، یان رادەستكرنا چەكێن وان و ئێخستنا وان د بن دەستهەلاتا دەولەتێدا».
محەمەد شیاع سودانی، سەرۆك وەزیرێن ئیراقێ ل 21/1/2025 دوپاتكربوو كو دێ كاركەت بۆ تێكهەلكرنا گرۆپێن چەكدار ل ئیراقێ د چارچۆڤەیەكێ قانوونی و دەزگەهیدا و هەڤدەم دوپاتكربوو ژی كو حوكمەتا وی دەست ب دانوستاندنان ل گەل میلیشیا كریە ب مەبەستا رازیكرنا وان ب دەستبەرداربوونێ ژ چەكێن وان وتێكهەلكرنا وان د ناڤ هێزێن ئەمنی یێن ئیراقیدا».
سەبارەت ڤێ چەندێ رۆژنامەیا (ئەلعەرەبی ئەلجەید) ژ زاردەڤێ بەرپرسەكێ دیار یێ میلیشییەكا چەكدار یا ئیراقی بەلاڤكر» میلیشیا داخوازا حوكمەتا ئیراقێ یا رەتكری و د بەرهەڤ نینن چەكێن خوە رادەستی دەولەتێ بكەن».
بەرپرسەكێ (دەستەیا هەماهەنگییا بەرەیێ موقاوەمێ) كو ئەو بەرەیێ یێ پێكهاتییە ژ میلیشیێن سەر ب ئیرانێ ڤە و ژوان ( كەتائیب حزبوللا و ئەلنوجەبا و سەیدولشوهەدا و ئەلبەدلە و ئەلوەفعە) بۆ وێ رۆژنامەیێ دیاركر» د دەمی بۆریدا دانوستاندن د ناڤبەرا حوكمەتا ئیراقێ و نوونەرێن میلیشیاندا دوور ژ چاڤكێن كامیرەیان بڕێڤەچوو و حوكمەتێ ب رێكا وان دانوستاندنان بزاڤكر فشارێ بێخیتە سەر میلیشیان تاكو دەستبەرداری چەكێن خوە ببن و ببنە پشكەك ژ هێزێن فەرمی یێن دەولەتی».
وی بەرپرسێ (دەستەیا هەماهەنگییا بەرەیێ موقاوەمێ) د وێ دیدارێدا ئاماژە كر كو ئالییان بەرسڤا خوە گەهاندە حوكمەتا ئیراقێ كو ب هیچ شێوەیەكی دەست ژ چەكێن خوە بەرنادەن. هەروەسا هزرا ئێكگرتنا وان ل گەل دەزگەهێن لەشكری و ئەمنیدا رەت كریە.
ناڤبری دوپاتی ل وێ چەندێ ژی كر» هەتا وی دەمێ داگیركارییا ئەمریكا و گەفێن ئیسرائیلێ هەبن، دێ میلیشیا د بەرگریێدا بەردەوام بن».
سەرەكردەیەكێ دی یێ میلیشیێن چەكدار یێن ئیراقێ د چەڤپێكەفتنەكێدا ل گەل رۆژنامەیا (ئەلعەرەبی ئەلجەدید) هەمان تشت پشتڕاستكر و پێنگاڤێن حوكمەتا ئیراقێ ب شكەستی هەژمارتن.
عەلی فەتلاوی، سەركردەیێ بزاڤا (ئەنساروللا و ئەلئەوفیا) ب وێ رۆژنامەیێ راگەهاند» میلیشیێن ئیراقی نەشێن دەست ژ چەكێن خوە بەردەن یان رازی ببن ب هەلوەشاندنا خوە د حالەتێ بەردەوامبوونا هەبوونا هێزێن ئەمریكی ل ئیراقێ».
راپۆرتێن سیاسەتمەداران و شیرەتكارێن حوكمەتا ئیراقێ، باس ل فشارێن نێڤدەولەتی و فشارێن ئەمریكا ل سەر حوكمەتا ئیراقێ و سەرۆكێ وێ محەمەد شیاع سودانی دكەن بۆ وێ چەندێ میلیشیێن چەكدار ژ چەك بكەت و حەشدا شەعبی ب هەلوەشینیت كو نێزیكی 70 گرۆپێن چەكدارن و پترییا وان پەیوەندی ب ئیرانێ ڤە یا هەی.
د دەمەكیدا حوكمەتا ئیراقێ ب فەرمی هیچ پێرابوونەك سەبارەت وێ چەندێ رانەگەهاندیە، سەرەرای وێ چەندێ شیرەتكارەكێ محەمەد شیاع سودانی دانپێدان ب وان فشاران كر و گۆت» هەكە ئیراق داخوازیێن ئەمریكا بجه نەئینیت، دبیت پەنایێ بۆ هێزێ و كریارێن لەشكری ببەت».
سەبارەت ڤێ چەندێ (ئەحمەد شەریفی) پسپۆرێ كاروبارێن ئەمنی و ستراتیژی بۆ رۆژنامەیا (ئەلعەرەبی ئەلجەدید) دیاركر» ئەو پێزانینێن كەو هەتا نوكە ل بەردەستێ مەنە پشتڕاست دكەن كو حوكمەتا ئیراقێ شكەستن یا ئینای د پرسا ژ چەككرن یان هەلوەشاندنا میلیشیا ل دووڤ خواستەكا ئاشكرا یا ئەمریكا بۆ ئەنجامدانا وی كاری، ب تایبەتی كو پڕۆژە و چەكێن وان گرۆپان راستەوخوە پەیوەندی ب ئیرانێ و لەشكەرێ پاسدارانڤە یا هەی و ئەڤە بۆ كەسێ یا ڤەشارتی نینە».
شەریفی ئاماژەكر ژی كو میلیشیا ب توندی یا رەتكری چەكێن خوە رادەستی حوكمەتێ بكەن وسەرەرای وێ چەندێ ژی سودانی بزاڤێ دكەت زێدەتر دەمی ب دەستڤەبینیت بۆ پەیداكرنا ئارامیێ ل دەف ئەمریكا بەلێ د وێ باوەریێدا كو ئەڤ چەندە ل گەل واشنتۆنێ سەرناگریت و ئیراق یا كەفتیە د ناڤ بازنەیێ مەترسییا سزایاندا ژ ئەگەرێ میلیشیا و چەكێن وان لەوما چاڤەڕێ دهێتە كرن ئیراق بكەڤیتە پێشبەری كۆمەكا سزایێن ئەمریكا ژ ئەگەرێ بجهنەئینانا حوكمەتا ئیراقێ بۆ پێگیریێن خوە سەبارەت چەكێ میلشیا و هەروەسا راگرتنا قەچاخچییەتا دۆلارێ بۆ ئیرانێ، لەوما بڕیارا داهاتی یا ئەمریكا سەبارەت ئیراقێ د دەمەكێ نێزیكدا دێ دیاربیت».