رەمەزان زەكەریا:
پشتی كاركرن ل پڕۆژەیێ جۆتسایدێ بەردەڕەشێ بۆ كەلەكێ هاتیە راوەستاندن، بڕیارە د دەمەكێ نێزیك دا، دوبارە دەست ب كاركرن و تەمامكرنا پڕۆژەی بهێتە كرنەڤە.
دو رۆژە كاركرن ل رێكا د ناڤبەرا بەردەڕەشێ بۆ كەلەكێ ب رەنگەكێ دەمكی راوەستیایە، بەلێ هەر دەمێ سۆلفە بۆ كۆمپانیا بجهئینەر هاتە مەزاختن، دێ جارەكا دی دەست ب تەمامكرنا پڕۆژەی هێتە كرن ڤە، بڕیارە د دەمەكێ نێزیك دا سولفە بهێتە مەزاختن و پڕۆژە بهێتە تەمامكرن.
دهۆك، لەزگین جۆقی:
رێڤەبەرێ باژێرڤانیا زاویتە راگەهاند، هەوا راكرنا هەمی زێدەگاڤیێن سەر دارستانا زاویتە دەستپێكریە و دبێژیت: ئەڤ هەوە بۆ پاراستنا دارستانا زاویتە دێ یا بەردەوام بیت.
نەوزاد عەبدوللا، رێڤەبەرێ باژێرڤانیا ناوچەداریا زاویتە بۆ ئەڤرۆ گۆت: «دەست ب راكرنا هەمی زێدەگاڤیێن سەر دارستانا زاویتەی هاتە كرن، هەمی جهێن بێ دەستووری و رازیبوون هاتینە چێكرن دێ هێنە خرابكرن، هندەك كەسان دار چاندینە هەمی دێ هێنە راكرن و هندەك جهێن دارستانا زاویتە هاتینە پەرژانكرن هەمی دێ هێنە راكرن و نابیت دارستانا زاویتەی بهێتە تێكدان».
گۆتژی: «باشترە پرۆژەك بۆ پەرژانكرنا دارستانا زاویتەی هەبیت، ژ بەركو جهەكێ گشتیێ گەشتیارییە، ئەڤ هەوا راكرنا زێدەگاڤیێن سەر دارستانا زاویتەی دێ یا بەردەوام بیت».
ب، سه‌رجان مەحمود:
بسپۆرەکێ کاروبارێن سیاسی دیار دکەت، ل سووریێ راستیەکە هەیە و دڤێت بهێتە قەبوول کرن، نە ئەحمەد شەرع و نە ژی چو کەسەکێ دی نەشێت وەکو بەری نها هەموو سووریێ برێڤە ببەت و دڤێت سیستەمێ سیاسی یێ سووریێ بهێتە گوهۆڕین و تورکیا ژی نەشێت ببیتە ئاستەنگ.
حوسنی ماهالی بسپۆرێ کاروبارێن سیاسی ل تورکیا د داخویانیەکێ دا بۆ دەزگەهێن راگەهاندنێ دیار کر، دەستهەلاتا نها یا ل سووریێ کو ئەحمەد شەرع سەرۆکاتیا وێ دکەت دەستهەلاتەک جیهادی و توندرەوە و هەکە رێگری لێ نەهێتە کرن دێ جیهادیێن ل سووریێ بنە بەلا بۆ تورکیا و هەموو رۆژهەلاتا ناڤین ژی، مخابن دەستهەلاتا ئاکپارتیێ تنێ ژ بەر کوردان بێی مەرج پشتەڤانیێ ل ئەحمەد شەرعی دکەت و گۆت: (ئەردۆغان و بەرپرسێن دی یێن تورکیا وەسا دبینن دێ شێن یا وان دڤێت ب ئەحمەد شەرعی دەنە کرن، لێ وەسا نینە، چونکی نها ل سووریێ گەلەک تشت هاتینە گوهۆڕین و شام بێی رازیبوونا ئسرائیلێ نەشێت چو تشتەکێ بکەت، مە دیت کا چاوا ژ بەر دورزیان ئسرائیلێ ئێرشی کۆچکا شەرعی ژی کر، ئەو یەک ژی پەیامەک ئاشکرا بوو هەکە ئەحمەد شەرع ل دژی ئسرائیلێ کار بکەت دێ هەر زوو هێتە کوشتن).
ناڤهاتی ئەو یەک ژی دیار کر، نها ل سووریێ سێ هێز هەنە، ئەو ژی هەسەدە، شام و دورزی نە، کەس نەشێت هەبوونا هەسەدێ و دورزیان ل سووریێ رەت بکەت و بێی رازیبوونا هەسەدێ و دورزیان چ ل سووریێ بهێتە کرن ژی دێ بێی ئەنجام بیت، چونکی نها د ئاستێ نێڤدەولەتی دا پشتەڤانی ل کوردان و دورزیان دهێتە کرن و گۆت: (دڤێت تورکیا راستیا ل سووریێ قەبوول بکەت، دڤێت تورکیا باش بزانیت ئێدی کەس نەشێت وەکو بەری نها حوکمی ل هەموو سووریێ بکەت، دەستهەلاتەکا ناڤەندی ل سووریێ ئێدی ناهێتە دروست کرن، چونکی نە ئسرائیل رێ ددەت و نە ژی کورد و دورزی تشتەک وەسا قەبوول دکەن، ژ بەر ڤێ یەکێ ژی دڤێت ل گۆر راستیا نها ل سووریێ سیاسەت بهێتە کرن، مخابن هەتا نها ژی دەستهەلاتا ئاکپارتیێ راستیێن هەی قەبوول ناکەت).
حوسنی ماهالی د دووماهیا ئاخڤتنا خوە دا ئاماژە ب ڤێ یەکێ ژی کر، دەستهەلاتا شەرعی ب هاریکاریا تورکیا دڤێت هەلبژارتنێن پەرلەمانی ل سووریێ بهێنە کرن، لێ ل دەڤەرێن کوردان و دورزیان هەلبژارتن ناهێنە کرن، ئەو یەک ژی نیشا ددەت هەلبژارتن تنێ بۆ خاپاندنا رایا گشتی نە، هەلبژارتنێن ل سووریێ چو کاریگەریا خوە ل سەر پرۆسیسا سیاسی ل سووریێ نابیت، چونکی نها ل سووریێ راستیەک هەیە و دڤێت بهێتە قەبوول کرن، ئەو ژی بێی رازیبوونا کوردان و دورزیان چو دەستهەلاتەک ل سووریێ یا سەرکەفتی نابیت.
عەباس ئیراقچی وەزیرێ دەرڤە یێ ئیرانێ دیار کر، ئسرائیل رۆژ ب رۆژێ پێگەهێ خوە ل رۆژهەلاتا ناڤین بهێز دکەت، هێزێن ئسرائیلێ رۆژانە ئێرشی یەمەنێ، غەززە، سووریێ و لوبنانێ دکەن و تاوانێن مەزن ل دژی مرۆڤایەتیێ ئەنجام ددەن، مخابن هەتا نها ژی وەلاتێن رۆژهەلاتا ناڤین ل هەمبەر مەترسیا ئسرائیلێ بێدەنگن، چونکی یا نها ئسرائیل دکەت کار بۆ پرۆژەیەکێ وان یێ مەترسیدارە کو ئەو دبێژنێ ئسرائیلا مەزن و هەکە تشتەک وەسا بهێتە کرن دێ بیتە مەترسی بۆ هەموو رۆژهەلاتا ناڤین.
وەزیرێ دەرڤە یێ ئیرانێ سەبارەت ب ئەگەرێ ئێرشەکا نوو یا ئسرائیلێ ل سەر ئیرانێ ژی دیار کر، هەکە ئسرائیل ڤێجارێ ئێرشی ئیرانێ بکەت دێ ئیران ب موشەکێن نوو و دێ ب هێزەکا مەزنتر بەرسڤا ئسرائیلێ دەت و ئیرانێ ئەو شیان ژی هەنە دشێت دربێن کوژەک ل ئسرائیلێ بدەت.
رێڤەبەریا خوەسەر یا رۆژئاڤایێ کوردستانێ دوهی د داخویانیەکێ دا راگەهاند، دەستهەلاتا نها یا شامێ یاریێ ب چارەنڤیسێ گەلێن سووریێ دکەت، بریارا شامێ یا ل دۆر هەلبژارتنان گەلەک مەترسیدارە و ژ بەر ڤێ یەکێ ژی رێڤەبەریا خوەسەر ئەنجامێن هەلبژارتنێن پەرلەمانێ سووریێ رەت دکەت و دڤێت جڤاکێ نێڤدەولەتی ژی ل هەمبەر شامێ بێدەنگ نەمینیت.
رێڤەبەریا خوەسەر ئەو یەک ژی دیار کریە، شامێ دڤێت ب رێیێن جودا جودا کار بۆ لاوازکرنا رێڤەبەریا خوەسەر بکەت، لێ دڤێت بەرپرسێن شامێ باش بزانن هەتا سیستەمەک دیموکراتی ل سووریێ نەهێتە ئاڤاکرن و کورد و هەموو پێکهاتەیێن ل سووریێ نەگەهنە مافێن خوە رەوشا سووریێ ژی ئارام نابیت، چونکێ پێدڤیا سووریێ ب سیستەمەک نە ناڤەندی هەیە کو تێدا هەموو خەلکێن ل سووریێ دژین بشێن بگەهنە مافێن خوە یێن رەوا، مخابن دەستهەلاتا نها یا شامێ راستیێن هەی قەبوول ناکەت و ئەو یەک ژی دێ بیتە ئەگەرێ روودانا ئالۆزیێن نوو ل سووریێ.
هه‌رهین محه‌مه‌د:
نه‌سرین عه‌بدین، ده‌رهێنه‌را رۆژئاڤایێ كوردستانێ كو نوكه ل وه‌لاتێ ئه‌لمانیا دژیت ددیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: ئه‌ڤ ساله پشكداری فلمه فێستیڤالا كوبانێ بووم وه‌كو لژنا ژووری بۆ فلمێن بیانی و نێزیكی دوهزار فلمان ل به‌رده‌ستێ مه‌بوون و ئه‌م یازده ده‌رهێنه‌ربووین و مه فلم هه‌لبژارتن و فلمێن وان گه‌له‌ك دباش بوون و من گه‌له‌ك حه‌زژ فلمێن وان كر و دبینم فێستیڤالا كوبانێ دێ كه‌ڤیته سه‌ر پێن خوه و دێ كارێن باشتر كه‌ن گۆت: ئه‌ڤه پێنچ ساله ل وه‌لاتێ ئه‌لمانیا دژیم و نوكه زمانی دخوینم و دبه‌را ژی كارێ خوه دكه‌م و گه‌له‌ك جاران ژی دترسم كارێ خوه بهێلم، یان ژی ب كه‌ڤمه دناڤ هنده‌ك كارێن دی دا، چونكو وه‌كو ده‌رده‌كی یه بۆ من و دسالێن ده‌ربازبووی دا گه‌له‌ك ئاسته‌نگ من دیتن و بۆ من چێبوون و ب درێژاهیا ده‌می من ده‌ربازكرن و نوكه من گه‌له‌ك كارو هونه‌رمه‌ندێن باش ل به‌راهیا خوه دبینم و گه‌له‌ك حه‌زدكه‌م هه‌رده‌م یا بكاربم و كارێن نوكه ل سه‌ركاردكه‌م چێكرنا دوو فلمایه و هه‌ردیسان من ژڤان هه‌یه ل گه‌ل تیپه‌كا سه‌مایێ یا عه‌فرینێ یه و دێ فلمه‌كی ل سه‌ر وان چێكه‌م كا چه‌وا ژیانا خوه ل ئه‌وروپا ده‌رباز دكه‌ن وئه‌ندامێن ئه‌وێ تیپێ ژی گه‌له‌ك ئێش و ئازار دیتینه و ته‌كه‌زا من دێ ل سه‌ر ئه‌وێ چه‌ندێ بیت كو ئه‌وان وه‌لاتێ خوه هێلایه و ل وه‌لاتێن بیانی ژی لدووڤ كارێ خوه یێ هونه‌ری كه‌فتینه و ژبه‌ر ناڤێ عه‌فرینێ ژی دێ كاركه‌م وه‌كو ده‌رهێنه‌ر و دبینم ئه‌ڤه گه‌له‌ك باره‌كێ گرانه ژی، به‌لێ بۆ من گه‌له‌ك یا خوه‌شه ئه‌ڤی كاری بۆ وه‌لاتێ خوه بكه‌م و ئه‌و فلمێ من ل سه‌رمیدیا نوكه دقوناغا مونتاژێ دایه و كوردستان تیڤی ب سپونسه‌ریێ رابوویه و هڤیا من ئه‌وه ل وه‌لاتێ ئه‌لمانیا ب دووماهی بینم و دیسان فلمه‌كێ دیژی چار خوله‌كن و ناڤه‌روك ل سه‌ر نیقابێ یه.
زێده‌تر گۆت: گه‌له‌ك ده‌رهێنه‌رێن ژن ل رۆژئاڤا هه‌نه و دنوكه دا ژن گه‌له‌ك بزاڤێ دكه‌ن ده‌ستبكارێ فلێن سینه‌مایی بكه‌ن و گه‌له‌ك ده‌رهێنه‌رێن ژن دنیاسم و گه‌هشتینه ئاستێ ناڤده‌وله‌تی و چه‌وا دێ ده‌رفه‌ت بۆ ژنێ هه‌بیت بهێته دوارێ سینه‌مایێ دا، به‌لی چهێشتا ئه‌م گرێدای داب و نه‌ریتێن خوه‌ینه، یان ده‌رفه‌ت چێنه‌بوویه بۆ ژنا كورد خوه ب بینت دئاسته‌كێ دی یێ بلندتردا و دڤێت پشته‌ڤانیا ژنێ ژلایێ مادی و مه‌عنه‌ی وی ڤه بهێته‌كرن و هه‌كه ئه‌و چه‌نده نه‌بیت ژن دێ چه‌وا شێت كاركه‌ت و نوكه ئه‌و فلمێت من ئه‌ز بخوه دنڤیسم و گه‌له‌ك سیناریوژی بۆ من دهێن و ئه‌و سیناریویێن دهێنه به‌رده‌ستێ من ژی گه‌له‌ك بهێزو كاربۆ دڤێت
سندس سالح سلێڤانه‌یی:
سترانبێژ(هوزان حه‌یده‌ر) د دیداره‌كێ دا بۆ رۆژنامه‌یا ئه‌ڤرۆ گۆت: ل 2009 من و كاك (بێكه‌س) ی، گرۆپه‌ك ب ناڤێ (گرۆپێ بێ ده‌نگ) پێكڤه دامه‌زراند و ل سالا 2010 مه هنده‌ك ستران تۆماركرن بێی كلیپكرن و ل سالا 2011 كلیپا مه یا ئێكێ به‌لاڤ بوو و هه‌تا نوكه د به‌رده‌وامین ل سه‌ر خزمه‌تكرنا هونه‌رێ كوردی.
هه‌روه‌سا گۆت: دبیت هنده‌ك هونه‌رمه‌ندێن نه‌مر وه‌ك (ته‌حسین تەها و محه‌مه‌د شێخۆیی) و یێن هه‌ڤچه‌رخ ژی گوهداریا گه‌له‌كان دكه‌م، هونه‌رمه‌ندێن زیره‌ك یێن هه‌ین و كارێن جوان دكه‌ن كارتێكران ل سه‌ر من هه‌بیت كو ئه‌ز ته‌ڤلی هونه‌ری كرم، وه‌كی دی چو سترانبێژان كارتێكرن ل من نه‌كریه، ئانكو ئه‌ز هوزانم و ب ستایلێ خوه ڤه گرێدایمه و وه‌كی خۆمه، بۆ زانین ئه‌ز حه‌زژ دۆ جۆرێن مۆزیكێ دكه‌م، یا ئێكێ مۆزیكا كوردی یه و یا دویێ ژی مۆزیكا پۆپه، چونکۆ جارا ئێكێ من ب وێ مۆزیكێ ده‌ستپێكربوو، ئانكو پۆپ تێكه‌لی راپێ كر و من خوه د وێ مۆزیكێ دا دیت و ئه‌ز پێشكه‌فتم، له‌ورا هه‌موو سترانێن من بۆ من دگرنگن، هه‌ر ئێك بۆ من وه‌كو زارۆكه‌كی یه، له‌ورا هه‌موو دعه‌زین و حه‌زژ هه‌موویان دكه‌م.
دلایه‌كێ دی دا سترانبێژ (هوزان حه‌یده‌ر) گۆت: په‌یا من د هونه‌ری دا ئه‌وه هنده‌ك ره‌وشت و تیتال دكۆمه‌لگه‌هێ دا بهێنه گوهۆڕین، چونکۆ ب دیتنا من هونه‌رمه‌ند تاكه كه‌سه دشێت هنده‌ك ره‌وشت و تیتالان بگوهۆڕیت، نه سیاسی دشێن نه یاریكه‌ر دشێن، به‌لكو به‌س هونه‌رمه‌ند دشێن و مه بزاڤا كری جوانیا كچا كورد بده‌ینه دیاركرن، له‌ورا مه سترانێن ئه‌ڤینی، هه‌روه‌سا سترانێن ب خیانه‌تێ ژی هاتینه گۆتن مه گۆتینه و دێ دبه‌رده‌وام بین.
ل دووماهیێ گۆت: هه‌كه ب دروستی سه‌رده‌ری ل گه‌ل مۆزیكا كوردی بهێته‌كرن مۆزیكا كوردی نه‌كێمتره ژ چو مۆزیكێن جیهانێ، به‌لكو گه‌له‌كا مه‌زن و به‌رفره‌هه و هه‌ر گونده‌كی یان هوزه‌كێ تشته‌كی تایبه‌ت ب مۆزیكێ ڤه یێ هه‌ی و ئه‌ز پێشبینی دكه‌م ل پاشه‌رۆژێ مۆزیكا كوردی دێ بیته سه‌ركێشا مۆزیكا جیهانێ، ب مه‌رجه‌كی ب دروستی كاری ل سه‌ر بكه‌ن و چاڤێ خوه بده‌نێ، راسته ئاسته‌نگ یێن هه‌ین، به‌س خودێ ده‌رد یێ دای و ده‌رمان ژی یێن داین و ئه‌ز ل دووف ده‌رمانان دگه‌ڕم و خوه دوه‌ستینم هه‌تا ب سه‌ردكه‌ڤم و دگه‌همه ئارمانجه‌كێ و سوپاس بۆ خوه دێ ئه‌ز یێ ب هێزم و من هه‌موو قوناغ ده‌ربازكرن و په‌یوه‌ندیا من دگه‌ل حه‌زژێكه‌رێن ده‌نگێ من دئاسته‌كێ باش دایه و گه‌له‌ك جاران دانوستاندنان دگه‌ل وان دكه‌م و هزرێن وان وه‌ردگرم و كاری ل سه‌ر وان دكه‌م و ئه‌ز ب هه‌بوونا وان یێ دلخۆشم، شیره‌تان من بۆ وان گه‌نجێن ژنوو ده‌ست ب سترانگۆتنێ دكه‌ن، به‌ری هه‌ر تشته‌كی حه‌ز ژ هونه‌ری بكه‌ن و خوه پێڤه ب وه‌ستین و ره‌وشه‌نبیریا هونه‌ری هه‌بیت دێ ب سه‌ركه‌ڤیت، هه‌روه‌سا باشه ئامیره‌كێ مۆزیكێ بژه‌نیت و شاره‌زایی د ستایلێن مۆزیكێ دا هه‌بیت، هه‌روه‌سا گرنگیێ ب سه‌روبه‌رێ خوه بده‌ت، زێده‌باری شاره‌زایێ د سترانێن فولكلۆری دا، من سترانێن نوو دڕێ دا هه‌نه، سترانه‌ك ل دۆر خازگینیا نه ژ په‌یڤێن من و هه‌ڤژینا منن، هه‌روه‌سا چه‌ند سترانێن دی، زێده‌باری سترانه‌كا كه‌ڤن مه یا نوو كری، نه‌ڤێت زێده‌ر به‌حسێ ناڤه‌رۆكا وان بكه‌م و من دڤێت بكه‌مه سۆپرایز بۆ حه‌زژێكه‌رێن ده‌نگێ خوه.
زاخۆ، دلۆڤان هالۆ:
هونەرمەندێ گەنج یێ باژێڕێ زاخۆ شڤان ئەکرەم د دیدارەکێ دا بۆ ڕۆژناما ئەڤرۆ دیارکر کو هەر ل ژییێ زارۆکینیێ من حەز ژ سترانان دکر و ل قووناغا سەرەتایی ل قوتابخانێ من ستران د گۆتن، هەتا ل قووناغا ناڤنجی من پشکداری د ئاهەنگێن قوتابخانێ دا کرن، ئەڤ چەندە بۆ من بوونە پالدەر کو ب شێوەیەکێ ڕژد بهێمە د ناڤ هونەرێ کوردی دا، و ل سالا 2000 بۆ ئێکەم جار ل سەر دەپێ شانوویێ من ستران گۆتن، و ل سالا 2003 من ئێکەم ئەلبۆما خوە یا سترانان بناڤێ نزانم بەلاڤکر و ل سالا 2004 من ئەلبۆما خوە یا دووێ بەلاڤکر.
ناڤهاتی ئاماژە ب وێ چەندێ ژی کر کو خێزانا من گەلەك هاریکار و پشتەڤانێن من بوون ب تایبەت برایێ من چونکی ئەگەر خێزانا من نەبیت ئەز نەشێم چو کاران بکەم، هەر دیسان هەڤالەکێ من ژی گەلەك هاریکار بوو لگەل من و وی ئەز پالدام کو ئێکەم ئەلبۆما خوە بەلاڤکەم.
گۆت ژی:»هونەر ژیانە و کەلتوورێ مللەتانە، و هونەر بەهرەیەکە خودێ ددەتە هندەك کەسان، و ستران هەستە و ئەگەر ستران ب هەست نەهێتە گۆتن ل دەف من نە سترانە، ئەز گەلەك حەز ژ شێوێ سترانێن سلۆ یێن ئەڤینی دکەم، ئەڤ شێوە بۆ من گەلەك خوەشه چونکی ئەز خوە پتر تێدا دبینم».
زێدەتر ژی گۆت:»من 2 ئەلبۆمێن سترانان هەنە و نێزیکی هەشت کلیپان هەنە، و چەندین سترانێن کتە کتە ژی تۆمارکرینە، ژبلی سترانێن ئاهەنگ و شەهیانان، و ئەز ب سترانا نزانم ئەڤرۆ بۆچی بەرنیاس بووم کو ژ ئەلبۆما من یا ئێکێ بوو، ستران ژ پەیڤێن من و ئاوازا بیانی بوو، و کۆپلەك ژ وێ سترانێ فۆلکلور بوو، هەر دیسان هندەك ژ سترانێن من یێن دی ژی دەنگڤەدان وەکو سترانا نەمام ئەڤیندار، و ئەڤینا تە دەلالا من، و بەهرا پتریا سترانێن ژی من ژ پەیڤ و ئاوازێن من بخوەنە».
هه‌ولێر، قائید میرۆ:
شاره‌زایه‌كا قانوونی د دیدارەکێ دا بۆ رۆژنامەیا ئەڤرۆ دیار کر کو سۆشیال میدیا بشێوه‌یه‌كێ شاش دهێته بكارئینان ژلایێ خه‌لكه‌كی ڤه و گۆت؛ بتایبه‌تی هندەک بەرنیاسێن سۆشیالێ و تیك تۆكی هه‌موو سنوره‌ك ده‌رباز كریه.
رۆژگار محسن، شاره‌زایا قانوونی و چالاكڤانا مافێ مرۆڤی دیار كر، ته‌كنه‌لۆژیا بێی پێداچوون و شاره‌زایی هاتیه دناڤا هه‌رێما كوردستانێ، ئه‌ڤه‌ژی بۆیه ئه‌گه‌رێ زیانێن مه‌زن بۆ سه‌ر جڤاكێ كوردستانێ و گۆت؛ چونكه خه‌لكێ مه هشیار نه‌بوویه لسه‌ر بكارئینانا ته‌كنه‌لۆژیایێ بگشتی و ئامیرێن گه‌هاندنێ و سۆشیال میدیایێ بتایبه‌تی، ماده‌م خه‌لك یێ هشیار نینه دێ كاریگه‌ریێن نه‌رێنی ژی هه‌بن لسه‌ر خه‌لكی.
شارەزایا قانوونی دیار کر ژی کو مخابن نوكه سه‌رده‌مێ په‌یداكرنا پاره‌یه ئه‌ڤه‌ژی بۆیه ئه‌گه‌رێ بكارئینانا تۆرێن جڤاکی بۆ په‌یداكرنا پاره‌ی، راسته زۆربه‌یا خه‌لكی نوكه تۆڕێن جڤاکی بكار دئینن و راسته‌وخۆ دگه‌ل خه‌لكی دئاخڤن و گۆت؛ به‌لێ ئایا ئه‌و كه‌س هه‌تا چه‌ند مفایه‌كی دگه‌هینن به‌رامبه‌ری خۆ، واته چو زانست و زانیاریه‌ك هه‌یه پێشكێشی خه‌لكی بكه‌ن ب رێیا تۆڕێن جڤاکی؟.
ڕۆژگارێ د بەردەوامیا ئاخفتنێن خۆدا گۆت؛ هنده‌ك كه‌س یێن بووینه قوربانی، مخابن سفكاتی زۆر ب خه‌لكی دهێنه كرن و ئاخفتنێن نه‌هه‌ژی دهێنه گوتن و ب سه‌دان ئاریشه‌یێن جڤاكی په‌یدابووینه بۆ نموونه زه‌لام هه‌نه پاره‌ی ل مال و زارۆكێن خۆ نامه‌زێخن، به‌لێ یێ به‌رهه‌ڤه پاره‌ی بۆ خه‌لكی فڕێکەت ل تۆرێن جڤاكی و چه‌ندین خێزان تێكداینه.
چالاکڤانا مافێ مرۆڤی گۆتژی؛ ئه‌ز دگه‌ل لێپرسینێ مه دگه‌ل وان كه‌سێن سنورێن خۆ ده‌رباز دكه‌ن و ل تۆرێن جڤاکی جڤین و ئاخفتنێن نه‌هه‌ژی دبێژن و سفكاتیێ دكه‌ن، حه‌قه سنوره‌ك بۆ بهێته دانان و یێ پێگیر نه‌بیت بهێته ده‌سته‌سه‌ركرن، بتایبه‌تی هندەک بەرنیاسێن تیك تۆكی هه‌نه زۆر سنور ده‌رباز كرینه و بۆیه به‌ره‌لایی.
ڕۆژگار محسن شارەزایا قانوونی ئەو چەندە ژی دیار کر، جڤاكێ کوردەواری تایبه‌تمه‌ندیا خۆ هه‌یه و د پێگیرین ب چه‌ندین داب و نه‌ریت و ره‌وشت و تیتالێن كورده‌واری، به‌لێ چو تشته‌ك به‌رچاف ناهێته وەرگرتن و گۆت؛ ئەو ژیانا دهێته دیتن ل سۆشیال میدیایێ ژیانا راسته‌قینه نینه و فه‌یكه، ئانکو هەکە بچیه دناڤا ژیانا وان كه‌سان یێن ل سۆشیالێ بناڤ و دەنگ كه‌سێن ئاسایی نه و ئه‌و زه‌نگینی و خۆ نیشادانا هه‌ی نینه، بتنێ بۆ سه‌ردابرنا خه‌لكی هنده‌ك ره‌فتاران دكه‌ن.
وەرگێڕان: مونا عبدالسلام
د دیداره‌كێ دا دگه‌ل دانعه‌مره‌كێ كو 50 سال دگه‌ل هه‌ڤژینێ خۆ ده‌رباز كربون و یا به‌خته‌وه‌ر بوو..
پرسیار ژ وێ دانعه‌مرێ هاته كرن ده‌رباره‌ی نهێنییا به‌خته‌وه‌رییا وێ یا دماوێ 50 سالان دا..
ئه‌رێ شارەزایی د چێكرنا خوارنێ دایه؟ یان جوانیێ؟ یان ئینانا زاروكان؟ یان ئه‌گه‌ره‌كێ دییه؟
دانعه‌مرێ گوت؛ ب ده‌ستڤه‌ئینانا به‌خته‌وه‌رییا هه‌ڤژینیێ پشتی هاریكارییا خودێ د ده‌ستێ ژنێ دایه، ژن دشێت مالا خوه بكه‌ته بهه‌شت و دشێت به‌روڤاژی ژی بكه‌ت.
نه‌بێژه پاره، چونكی گه‌له‌ك ژن یێن هه‌ین زه‌نگین لێ د بێزار و خرابن هه‌ڤژینێن وان ژێ دره‌ڤن، نه‌بێژه زاروك، ژن یێن هه‌ین 10 كوران دئینن لێ هه‌ڤژینێن وان حه‌ز ژێ ناكه‌ن دبیت به‌رده‌ن ژی، گه‌له‌ك ژوان د چێكرنا خوارنێ دا د زیره‌كن و هنده‌ك ژ وان رۆژێ هه‌موویێ خوارنێ دروست دكه‌ن دگه‌ل هندێ ژی هه‌ر گازندا ژ ره‌فتارێن خراب یێن هه‌ڤژینێ خۆ دكه‌ن.
پێشكێشكار ما مه‌نده‌هوش، ئه‌رێ پا كا نهێنی، نهێنی چییه؟
ژنا دانعه‌مر گوت؛ ده‌مێ هه‌ڤژینێ من توره دبۆ یان ئاریشه‌ك هه‌با من بێده‌نگییه‌كا تمام ب هه‌موو رێزگرتن ڤه دگرته به‌ر دگه‌ل چه‌ماندنا سه‌رێ خوه ب هه‌موو شه‌رمڤه هشیاربه ژ وێ بێده‌نگییا كو دگه‌لدا ترانه هه‌بیت، چونكی زه‌لام یێ زیره‌كه و تێدگه‌هیت.
پێشكێشكاری گوت؛ بوچی ژ ژۆرا خۆ ده‌رناكه‌ڤی؟
دانعه‌مرێ گوت؛ هشیاربی، چونكی دێ هزر كه‌ت تو یا ژێ د ره‌ڤی و ته نه‌ڤێت گوهێ خۆ بده‌یێ، پێدڤییه تو بێده‌نگ ببی و گوهدار بی هه‌تا كو یا دلێ خۆ دبێژیت و ئارام دبیت، ل دیڤدا ئه‌س دبێژمێ تۆ ب دووماهیك هاتی؟ پاش ده‌ردكه‌ڤم، ژبه‌ركو ئه‌و یێ ماندییه و پێدڤی ب بهێنڤه‌دانێ یه پشتی وان هه‌واران پاش ئه‌س دچم به‌رده‌وامییێ دده‌مه كارێن خۆ یێن مالێ.
پێشكێشكاری گوت؛ پاش تو چ دكه‌ی ئه‌رێ تو دگه‌ل نائاخڤی ماوێ حه‌فتییه‌كێ یان زیده‌تر؟
دانعه‌مرێ گوت؛ نه‌خێر هشیار بی ئه‌و بخۆ یێ خه‌مگینه وه‌كی شیره‌كێ دوو سه‌ره ده‌ما تۆ ماوێ حه‌فتییه‌كێ دگه‌ل نه ئاخڤی و ئه‌و پێدڤی بته بیت دێ لسه‌ر ڤی باردوخی راهێت و به‌لكی پێدڤیێن وی بلند ببن هه‌تا بگه‌هنه راده‌كی ئێدی كه‌ربا وی گه‌له‌ك مه‌زن ببیت.
پێشكێشكاری گوت؛ ئه‌رێ پا تۆ چ دكه‌ی؟
ژنا دانعه‌مر گوت؛ پشتی دوو ده‌مژمێران یان پتر ئه‌س كوپه‌كێ شه‌ربه‌تێ یان فنجانه‌كا قه‌هوێ بۆ دبه‌م و دبێژمێ كه‌ره‌مكه ڤه‌خو، ژبه‌ركو ب راستی ئه‌ز دبینم ئه‌و یێ پێدڤی ب ڤێ چەندێ یه و به‌رده‌وام دبم هه‌روه‌كی چ چێنه‌بوی، ئه‌و دێ پسیار ژمن كه‌ت ئه‌رێ تۆ خه‌مگین بوی؟ دبێژمێ نه‌خێر، ئه‌و داخوازا لێبورینێ دكه‌ت ژ ئاخفتنێن خوه یێن زڤر و ره‌ق و ده‌ست ب ئاخفتنێن جوان و شرین دكه‌ت.
پێشكێشكاری گوت؛ و تۆ باوه‌ر دكه‌ی؟
ژنا دانعه‌مر گوت؛ به‌لێ چ پێنه‌ڤێت چونكی من باوه‌ری یا ب خۆ هه‌ی و ئه‌س نه مروڤه‌كا نه‌زانم ئه‌رێ ما یا درسته ئه‌س باوه‌ر ژ ئاخفتنێن وی یێن نه‌خوش بكه‌م ده‌مێ ئه‌و یێ توره و باوه‌ر ژ ئاخفتنێن وی نه‌كه‌م ده‌مێ یێ ئارام.
پێشكێشكاری گوت؛ و پا كه‌رامه‌ت؟
دانعه‌مرێ گوت؛ كه‌رامه‌تا من یا گرێدایه ب رازیبونا هه‌ڤژینێ منڤه و پاقژیا دناڤبه‌را مه‌دا، چ تشت نینن ب ناڤێ كه‌رامه‌ت د ناڤبه‌را هه‌ڤژینان دا.
– هەکە ژن وه‌ك بالنده هاتبا دروستكرن دا تاوس بیت
– هەکە وه‌ك گیانه‌وه‌ر هاتبا درستكرن دا خه‌زال بیت
– هەکەوه‌ك حه‌شه‌ره هاتبا دروستكرن دا په‌لاتینك بیت
به‌لێ وه‌ك مروڤ هاته دروستكرن بۆ هه‌ڤژین و دایك و خویشك و كچ، بۆ مه‌زنترین دیاری بۆ زه‌لامی لسه‌ر ئه‌ردی، هەکە ژن نه یا گرنگ با ل سه‌ر ئه‌ردی خودایێ مه‌زن پاداشتێ وێ نه دكره بهه‌شت، ل زاروكینیێ ده‌رگه‌هێن بهه‌شتێ بۆ بابێ خوه ڤه‌دكه‌ت، ل گه‌نجاتیێ ئیمانا هه‌ڤژینێ خوه تمام دكه‌ت، ده‌مێ دبیته دایك و بهه‌شت یا لبن پێت وێ.
نيشاندان