رێڤەبەریا خوەسەر راگەهاند کۆنگرێ نشتیمانی یێ سووریێ نوونەراتیا گەلێ سووریێ ناکەت و ئەنجوومەنێ نشتیمانی یێ کوردی ژی نەرازیبوونا خوە ل هەمبەر سازکرنا کۆنگرێ نشتیمانی یێ شامێ دیار کر و وەزیرێ دەرڤە یێ ئسرائیلێ ژی راگەهاند دڤێت سیستەمێ سووریێ ببیتە فیدرالی.

کۆنگرێ نشتیمانی یێ سووریێ بێی پشکداریا کوردان و پێکهاتەیێن دی یێن ل سووریێ هاتە ساز کرن و رێڤەبەریا خوەسەر یا رۆژئاڤایێ کوردستانێ د داخۆیانیەکێ دا راگەهاند کو ئەو کۆنگرە نوونەراتیا گەلێ سووریێ ناکەت و وەکو رێڤەبەریا خوەسەر ئەو پێگیریێ ب چو بریارێن وێ کۆنگرێ ژی ناکەن.
ل ئالیێ دی ئەنجوومەنێ نشتیمانی یێ کوردی ل سووریێ ژی بەری سازکرنا کۆنگرێ دیار کربوو کو گەلەک لەز د گێرانا کۆنگرەی دا هاتە کرن و ئەو کۆنگرە نەشێت ببیتە ژێدەرێ چارەسەریا پرسێن نها یێن ل سووریێ و دڤێت کورد و هەموو پێکهاتەیێن دی یێن ل سووریێ د بریاردانێ دا پشکدار بن و بێی پشکداریا کوردان و پێکهاتەیێن دی یێن ل سووریێ چو پرسەک ناهێتە چارەسەرکرن و دێ بیتە ئەگەرێ ئالۆزیێن نوو ل سووریێ.
بەرپرسێن دەستهەلاتا نوو یا سووریێ ژی پشتی کۆنگرەی دیار کرن دڤێت چەک تنێ د دەستێ دەولەتێ دا بیت و هەروەسا ئەو رێ نادەن چو هێزەک ببیتە مەترسی ل سەر ئێکپارچەیا ئاخا سووریێ.
ل ئالیێ دی گیدۆن سار وەزیرێ دەرڤە یێ ئسرائیلێ ژی دیار کر، سازکرنا کۆنگرێ نشتیمانی یێ سووریێ بێی پشکداریا کوردان و دروزیان و پێکهاتەیێن دی نیشا ددەت کو دەستهەلاتا نها یا شامێ دڤێت وەکو بەشاری و دەستهەلاتێن دی ب تنێ حوکمێ ل سووریێ بکەت، بێگومان ئەو یەک دێ ئەنجامێن خوە یێن گەلەک خراب هەبن، ئێدی ل سووریێ رەوشەکا نوو هاتیە پێش و دڤێت سیستەمێ سووریێ ببیتە فیدرالی، ب ئاڤاکرنا سیستەمەک ناڤەندی ل سووریێ دێ رەوش خرابتر لێ هێت و بێگومان دڤێت کورد، دروزی و هەموو پێکهاتەیێن دی یێن سووریێ د بریاردانێ دا پشکدار بن.
هەروەسا ئەمریکا و وەلاتێن ئێکەتیا ئۆرۆپا ژی نەرازیبوونا خوە ل هەمبەر شیوەیێ برێڤەچوونا کۆنگرێ نشتیمانی یێ سووریێ دیار کرن و راگەهاندن، دڤێت کورد و پێکهاتەیێن دی ژی د دەستهەلاتا نوو دا پشکدار بن، هەروەسا بێی ئامادەبوونا کوردان و پێکهاتەیێن دی دەستهەلاتا نوو یا شامێ نەشێت دستوورەکێ نوو ژی ئامادە بکەت.
چاڤدێرێن سیاسی دیار دکەن، هەموو بریارێن کۆنگرەی ل دژی کوردانە، چونکی مەرەما دەستهەلاتا نوو یا شامێ ئەوە کورد دەست ژ چەکی بەردەن و هەتا نها ژی دەستهەلاتا نوو یا سووریێ بەرهەڤ نینە دانپێدانێ ب مافێن رەوا یێن گەلێ کورد ل سووریێ بکەت، ژ بەر ڤێ یەکێ ژی دڤێت کورد ل سووریێ بشێن دەست ب بزاڤەکا مەزن یا دبلۆماسیێ بکەن و ب پشتەڤانیا ئەمریکا، ئێکەتیا ئۆرۆپا و ئسرائیلێ شامێ نەچار بکەن دەست ژ دژبەریا کوردان بەردەت.

وەزیرێ دەرڤە یێ رۆسیا سەرەدانا ئیرانێ کر و ل گەل سەرۆک کۆمارێ ئیرانێ و وەزیرێ دەرڤە یێ وی وەلاتی کۆمبوو و پشتی کۆمبوونێ ژی لاڤرۆڤی بۆ دەزگەهێن راگەهاندنێ دیار کر، ل رۆژهەلاتا ناڤین گوهۆڕینێن گەلەک مەزن روو ددەن ب تایبەتی ژی ل سووریێ، وەکو رۆسیا ئەو ژ نێزیکڤە دووڤچوونا گوهۆڕینێن ل دەڤەرێ دکەن و گۆت: (ئیران و رۆسیا بەرژەوەندیێن مەزن هەنە و هەر دو وەلاتی هەڤپەیمانن و دڤێت پەیوەندیێن خوە باشتر و بهێزتر ژی لێ بکەین).
مەسعود پزیشکیان سەرۆک کۆمارێ ئیرانێ ژی دیار کر، وەکو ئیران وان دڤێت پەیوەندیێن خوە د هەموو بیاڤەکێ دا ل گەل رۆسیا بهێز بکەن، چونکی رەوشا نها وەسا دڤێت رۆسیا و ئیران پتر ژ هەر دەمەکێ هاریکاریا هەڤدو بکەن و ئەو یەک د بەرژەوەندیا هەر دو وەلاتان دایە.

دەزگەهێن راگەهاندنا ئۆرۆپا دیار دکەن، بزاڤێن ترامپی یێن بۆ راگرتنا شەڕی ل ئۆکرانیایێ ب تەمامی د خزمەتا رۆسیا دایە و هەکە ئاگربەست بهێتە راگەهاندن دێ پشکەک مەزن ژ ئاخا ئۆکرانیایێ کەڤیتە بن کۆنترۆلا رۆسیا، ئەو یەک دێ بیتە ئەگەرێ بهێزبوونا رۆسیایێ و بێگومان پۆتین دێ پشتی ئۆکرانیایێ بزاڤا داگیرکرنا هندەک ژ وەلاتێن ئێکەتیا ئۆرۆپا ژی کەت و ژ بەر ڤێ یەکێ ژی سەرکردێن ئۆرۆپا ژ بزاڤێن نها یێن ترامپی دلگرانن.
چاڤدێرێن سیاسی ژی دیار دکەن ئارمانجا پۆتینی زندیکرنا ئێکەتیا سۆڤیەتێ یە، پۆتینی دڤێت پێگەهێ رۆسیا ل ئۆرۆپا بهێز بکەت و سەرکەفتنا وی ل ئۆکرانیایێ دهێتە رامانا مەترسیەکا مەزن ل سەر ئۆرۆپا، ژ بەر ڤێ یەکێ ژی وەلاتێن ئێکەتیا ئۆرۆپا ل دژی پلانا ترامپی نە، لێ هەتا نها وەلاتێن ئێکەتیا ئۆرۆپا نەشیاینە پێکڤە پرۆژەکێ بۆ بهێزکرنا ئۆکرانیایێ پێشکێش بکەن و پلانا ترامپی ژی بوویە ئەگەرێ دلگرانیا ئێکەتیا ئۆرۆپا.