زنار تۆڤی:

هونه‌رمه‌ند زوبێر سالح، خه‌لكێ رۆژئاڤایێ كوردستانێ یه‌ و نوكه‌ ل وه‌لاتێ ئه‌لمانیا دژیت، د دیداره‌كێ دا بۆ رۆژناما ئه‌ڤرۆ دبێژیت: به‌ری نوكه‌ ل ئورۆپا و ل وه‌لاتێ مه‌، جوداهیه‌كا گه‌له‌ك مه‌زن هه‌بوو، ده‌مێ مه‌ ڤیابا به‌رهه‌مه‌كێ تۆماربكه‌ین، په‌یداكرنا مۆزیكژه‌نه‌كی گه‌له‌ك كاره‌كێ ب زه‌حمه‌تبوو، ژبه‌ركو ل سالا 2000 ێ، ژ رۆژئاڤایێ كوردستانێ ئه‌ز په‌نابه‌ربووم و هاتمه‌ ئه‌لمانیا، ل وی ده‌می په‌یداكرنا مۆزیكژه‌نان ل ئورۆپا گه‌له‌ك یا ب زه‌حمه‌تبوو و موزیكژه‌ن گه‌له‌ك ژێكدووربوون، دیسا ل وی ده‌می په‌یداكرنا ستۆدیۆیێ و تۆماركرنا ده‌نگی ژی كاره‌كێ ب زه‌حمه‌تتربوو، ل ئه‌لمانیا موزیكژه‌نێن كورد چ ستۆدیۆیێن تۆماركرنا سترانان ژی نه‌بوون، له‌وما مه‌ گه‌له‌ك ئاسته‌نگی د دیتن و هه‌تا نێزیكی سالا 2015 ێ، ئه‌م نه‌چاردبووین، مه‌ په‌یوه‌ندی ب مۆزیكژه‌نێن رۆژئاڤا دكر و مه‌ مۆزیكا سترانێن خوە ل سه‌رێ كانیێ و حه‌سه‌كێ و قامیشلۆ و عامۆدێ چێدكرن و مه‌ ده‌نگ و مۆزیك ل وێرێ تۆمار دكرن، ب ڤی ره‌نگی ئه‌م دشیاین به‌رهه‌مێن خوە تۆماربكه‌ین، هه‌روه‌سا ده‌مێ ئه‌م ل رۆژئاڤا ئه‌م هه‌موو نێزیكی ئێكبووین و مه‌ هونه‌رمه‌ندان هه‌ڤكاریا ئێكدو دكر.
ناڤهاتی گۆت ژی: به‌لێ ده‌مێ ئه‌م هاتینه‌ ئورۆپا، ئه‌م ژ هه‌ڤال و مۆزیكژه‌ن و هونه‌رمه‌ندێن كورد دووركه‌فتین، دیسا ئه‌م چووینه‌ دناڤ جڤاكه‌كێ دیتر دا، له‌وما ده‌مێ مرۆڤ دووری جڤاكێ خۆ بیت، ئه‌و ژی ئاریشه‌كه‌، به‌لێ مه‌ به‌رده‌وامی دا هونه‌رێ خوە، من چه‌ندین به‌رهه‌م به‌لاڤكرن، هه‌روه‌سا هه‌تا سالێن 2015 ێ وێڤه‌، گه‌له‌ك هونه‌رمه‌ند و مۆزیكژه‌نێن كورد یێن رۆژئاڤا هاتنه‌ ئه‌لمانیا و وه‌لاتێن دیتر یێن ئورۆپی، ب ڤی ره‌نگی چه‌ندین ستۆدیۆ هاتنه‌ ڤه‌كرن و ئێدی ئاسته‌نگ ل هه‌مبه‌ری كارێ مه‌ نه‌ماینه‌، به‌لێ مه‌زاختن بۆ تۆماركرنا به‌رهه‌مان گه‌له‌ك زێده‌بووینه‌، هه‌ر چه‌نده‌ ل رۆژئاڤایێ كوردستانێ موزیك ب ره‌نگه‌كێ ئه‌رزانتر دهاته‌ چێكرن، به‌لێ ل ئورۆپا وه‌سا نینه‌ و هه‌ر تشت ب حسابه‌، ژبه‌ر وێ چه‌ندێ كارێ چێكرنا سترانان ب زه‌حمه‌ت كه‌فتییه‌ و ره‌وشا ئابۆری ژی وه‌كو پێدڤی نینه‌.
زوبێر سالح هێشتا دبێژیت: ده‌مێ مرۆڤ دبێژیت، ئه‌ز هونه‌رمه‌نده‌كێ كوردستانی مه‌، مخابن، ئه‌ڤ چه‌نده‌ د فه‌رهه‌نگێ دا نینه‌، ڤێ چه‌ندێ گه‌له‌ك باندۆر ل سه‌ر من ب خوە كریه‌، هه‌رده‌م من گۆتیه‌ ئه‌ز هونه‌رمه‌نده‌كی كوردستانی مه‌ و نه‌گرێدایی چ لایه‌نا مه‌، ئه‌ز سترانێن خوە ل سه‌ر هه‌ر چار پارچێن كوردستانێ دبێژم، سه‌ركه‌فتن ل كیژ پارچا كوردستانێ چێبیت، ئه‌ز سترانان ل سه‌ر وێ سه‌ركه‌فتنێ دبێژم، ئه‌ز سترانا بۆ دۆزا كوردی دبێژم، هه‌ر چه‌نده‌ ئه‌ڤ چه‌نده‌ بۆ من بوویه‌ ئاسته‌نگ و باندۆر ل سه‌ر هونه‌رێ من كریه‌، هه‌روه‌سا هونه‌رمه‌ند ئافرێنه‌ره‌، دڤێت ب ئازادی و بێی مه‌رج هزرێن خۆ دناڤا موزیكا خۆ دا بێژیت، دیسا د بیاڤێ ئابۆری ژی دا، هه‌كه‌ وه‌كو پێدڤی مرۆڤی شیان نه‌بن، مرۆڤ نه‌شێت كارێن هونه‌ری یێن باش به‌رهه‌م بینیت و ب گشتی هونه‌رمه‌ندان گه‌له‌ك ئاریشه‌ د ڤی واری دا هه‌نه‌، له‌وما گه‌له‌ك هونه‌رمه‌ندێن ده‌نگخۆش هه‌نه‌، به‌لێوان شیانێن دارایی نینن و نه‌شیاینه‌ چ به‌رهه‌مان تۆماربكه‌ن و نه‌ شیاینه‌ چ كلیپان ژی دروست بكه‌ن، له‌وما ئه‌و هونه‌رمه‌نده‌ ل پاش ماینه‌ و نه‌شیاینه‌ ب ده‌نگێ خۆ خزمه‌تا هونه‌رێ كوردی بكه‌ن.
ئه‌و چه‌ند ژی گۆت: ب ره‌نگه‌كێ به‌رده‌وام من ستران گۆتینه‌، ل ڤێ داویێ ژی من سێ ستران چێكرینه‌، هه‌روه‌سا مالباتا من هاریكاریا من دكه‌ن د چێكرنا ڤیدیۆ كلیپان و د وارێ ده‌رهێنانێ دا، دیسا ئه‌ز ل ئه‌رشیفێ خۆ ڤه‌گه‌ریام، چونكی ده‌مێ من كاسێت چێدكرن، كو نوكه‌ كاسێت نه‌ماینه‌، له‌وما ئه‌ز وان سترانان دبێژمه‌ڤه‌ و هه‌تا نوكه‌ به‌رهه‌مێ من پتری 300 سترانانه‌، ژ وان ژی پتری 50 سترانان د كاسێتان دانه‌، من ڤیایه‌ وان سترانان بێژم وتۆماربكه‌م و دیسا من پرتووكه‌كا سترانان ژی چێكریه‌ و من 150 سترانێن خۆ د وێ پرتووكێ دا چاپكرینه‌ ل به‌رلینێ، كوئه‌و سترانێن من ل سه‌ر ده‌مه‌كێ زێرین بوون و ل وی ده‌می ئه‌ڤینی و حه‌زژێكرن ب ره‌نگه‌كێ راست و دروست هه‌بوو، به‌لێ نوكه‌ ئه‌و چه‌نده‌ نه‌مایه‌ و ئێدی نوكه‌ كه‌س گۆهداریا كاسێتان ناكه‌ت، له‌وما من ڤیایه‌ وان هه‌موو سترانێن خۆ یێن سالێن هه‌شتیان و نۆتان یێن سه‌دێ بوری تۆماربكه‌م و ل یۆتیۆبی به‌لاڤبكه‌م.

سندس سالح سلێڤانه‌یی:

سترانبێژ و مۆزیكژه‌ن (بێكه‌س بورهان) د دیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: ئه‌ڤه‌ نێزیكی (18) سالانه‌ ئه‌ز دبۆارێ هونه‌ری دا كاركه‌م، ل ده‌ستپێكێ من مۆزیكه‌ك ئینا و هنده‌ك په‌یڤ دانانه‌ سه‌ر و پاشی وه‌ك ستران من گۆت و پشتی خێزانا مه‌ هه‌روه‌سا هنده‌ك هه‌ڤالان گوهێ خوه‌ داینێ گه‌له‌ك حه‌زژێكرن و وان گۆتنه‌ من یێ به‌رده‌وامبه‌ تۆ دێ ده‌رحه‌ق سترانگۆتنێ ده‌ركه‌ڤی و ئێدی ئه‌ڤه‌ بۆ ئەگەرەک كو یێ به‌رده‌وامبم هه‌تا نوكه‌ و یێ دلخۆشم ل دووڤ شیانێن خوه‌ هه‌كه‌ دكێمبن ژی به‌س خزمه‌تا ستران و مۆزیكا كوردی بكه‌م.
هه‌روه‌سا گۆت: ئه‌ز د سه‌قایه‌كی دا رابوویمه‌ من گوهداریا مۆزیكێن گه‌له‌ك وه‌لاتان كریه‌، ب تایبه‌ت ژی وه‌لاتێن جیرانێن مه‌، ئانكو مۆزیكه‌یێن (عه‌ره‌بی و فاسی و توركی) و ئه‌ز دشێم بێژم ل هه‌ر وه‌لاته‌كی ژوان ئه‌ز داخباری ده‌نگێ هنده‌ك هزنه‌رمه‌ندان بوویمه‌ و یێن مه‌ كوردان ژی هونه‌رمه‌ندان (ته‌حسین تەها، ئه‌رده‌وان زاخۆیی، ئه‌یاز یوسف) ئه‌ز گه‌له‌ك پێ داخبار بوویمه‌ و ئه‌وان كارتێكرنا خوه‌ ل سه‌ر من هه‌بوویه‌، هه‌روه‌سا هنده‌كێن نوو ژی هه‌بوون من كارتێكرنا خوه‌ یا مۆزیكێ ژوان ژی وه‌رگرتیه‌، بۆ زانین ستایلێ من یێ مۆزیكێ یێ تایبه‌ت (ڕاپ و ئارامبیه‌) ئه‌ز گه‌له‌ك حه‌زژێدكه‌م و هنده‌ك جاران تێكه‌لی هه‌ڤ ژی دكه‌م، سه‌باره‌ت سترانێن من كا ئه‌ز پتر حه‌ز ژ كیژ سترانا خوه‌ دكه‌م، سترانێن من هه‌موو ل ده‌ف من دگرنگن و بێ جوداهی ئه‌ز حه‌ز ژ هه‌موو سترانێن خوه‌ دكه‌م، ب تایبه‌ت ژی دو سترانان ئه‌و ژی (ئه‌و كیه‌ ل ده‌ف ته‌ و نه‌فره‌ت بۆته‌) ب راستی ژی ئه‌ز گه‌له‌ك حه‌زژ ڤان هه‌ردو سترانێن خوه‌ دكه‌م، چنكو پشتی هاتینه‌ كلیپكرن خه‌لكی ئه‌ز ب ڤان هه‌ردو سترانان پتر نیاسم و دشێم بێژم من ژی هه‌روه‌سا خه‌لكه‌كی ژی بیرهاتنێن گه‌له‌ك خۆش یێن ل گه‌ل ڤان هه‌ردو سترانان هه‌ین.
سترانبێژ و مۆزیكژه‌ن (بێكه‌س بورهان) هێشتا گۆت: سترانێن ئه‌ز دبێژم كو ئه‌و ژی (ڕاپن) گرێدای وه‌ختی نه‌، گه‌له‌ك جاران من سترانێن نه‌ته‌وه‌یی گۆتینه‌، هه‌روه‌سا ژی ل دۆر ئێكگرتنا كوردان گه‌له‌ك جاران ژی گرێدای نه‌خۆشی و گازنده‌یێن خه‌لكه‌كی نه‌، هه‌روه‌سا ل سه‌ر كوشتنا ژنان و نامیسێ ژی من گۆتینه‌، بۆ نموونه‌ د وه‌خته‌كی دا كوشتنا ژنان مشه‌ببوو، له‌ورا من سترانه‌ك ب ناڤێ (فریشته‌) چێكر، ئانكو ئه‌ز ل دووف وه‌ختی و كاودانان دچم كا چ بابه‌تێ نوو د مه‌یدانێ دا هه‌یه‌ ئه‌ز وێ دكه‌مه‌ ستران.
سه‌باره‌ت ئاستێ مۆزیكێ ژی ل كوردستانێ گۆت: ئه‌ز دبێژم هه‌كه‌ چاڤدان ژلایێ حكومه‌تێ ڤه‌ بۆ مۆزیكژه‌نان هه‌بیت، چنكو مه‌ مۆزیكژه‌نێن گه‌نج یێن باش هه‌نه‌، هه‌لبه‌ت ل وی ده‌می دێ مۆزیكا كوردی ژی به‌ره‌ف پێشڤه‌ چیت، لێ مخابن ئه‌ڤه‌ (10) سال پترن چو پشته‌ڤانی ل مۆزیكژه‌نان ناهێته‌ كرن و ئه‌گه‌ران ژی بۆ ره‌وشا دارایی دزڤڕینن، له‌ورا هیڤیا من ئه‌وه‌ ره‌وش باشتر لێ بهێت دا چاڤدان پتر بۆ مۆزیكژه‌نان ژی هه‌بیت.
ل دووماهیێ گۆت: هنده‌ك كه‌س ب چاڤه‌كێ بازرگانی به‌رێ خوه‌ دده‌نه‌ مۆزیكێ و هنده‌ك كه‌س ژی وه‌ك هه‌ناسه‌ و من ب خوه‌ وه‌ك بازرگانی نه‌ به‌رێ خوه‌ دایێ، به‌لكو وه‌ك هه‌ناسه‌ كێشان، له‌ورا دبێژم مۆزیك دگه‌ل خوینا من تێكه‌ل بوویه‌ و هه‌كه‌ ئاسته‌نگ ژی هه‌بن ژبه‌ر حه‌زژێكرنا من یا زێده‌ بۆ مۆزیكێ خوه‌ ل گه‌ل گونجاندیه‌ و هه‌كه‌ هنده‌ك هه‌بن خوه‌ ل به‌ر ئاسته‌نگان نه‌گرت بیت، ئه‌و ئه‌ون ئه‌وێن بۆ پاره‌ی هاتینه‌ دناڤ هونه‌ری دا، ئان ب زۆری خوه‌ ل گه‌ل گونجاندینه‌، بۆ زانین ئه‌ز به‌رده‌وام حه‌زژ نووكرنێ دكه‌م و من دڤێت به‌رده‌وام خوه‌ ل گه‌ل پێشهاتان نوو بكه‌م و به‌رده‌وام تشتێ نوو بینمه‌ د هه‌بوونێ دا، له‌ورا گه‌له‌ك جاران ئه‌ز پرسیارا گه‌نجه‌كی دكه‌م كو ل به‌ر ماركێته‌كێ یان پانزیخانه‌یه‌كێ یان ل هه‌رجهه‌كی كاربكه‌ت كا وی چ هه‌یه‌ بێژیت، چونكۆ ئه‌ز په‌یڤ و ئاوازێن خوه‌ ژ بابه‌تێ وی چێدكه‌م.