دلڤین رەشید:

دكتور خەلەف شنگالی، شیرەتكارێ‌ سەرۆك وەزیرێن ئیراقێ‌ بۆ كاروبارێن ئێزدیان بۆ رۆژناما ئەڤرۆ دیاركر، ل دویڤ راسپاردەیا سەرۆك وەزیرێن ئیراقێ‌ كار ل سەر بەلاڤكرنا پارچەیێن ئەردی ل سەر رزگاربوویێن ئێزدی ل شنگالێ‌ دهێتە كرن و دبێژیت: 100 دۆنەمێن ئەردی ل دەڤەرداریا شنگالێ دێ‌ هێنە بەرهەڤكرن، داكو ببنە پارچەیێن ئەردی و ل سەر رزگاربوویێن ئێزدی بهێنە بەلاڤكرن.
ناڤهاتی گۆت: «بجهئینانا رێنمایێن سەرۆك وەزیران ژ بۆ پشتەڤانی و ب هێزكرنا رزگاربوویانە، ئەڤ كارە ب هەماهنگی ل گەل وەزیرێ ئاڤەدانكرن و ئاكنجیكرنێ‌ و باژێرڤانی و پارێزگارێ‌ نەینەوا و رێڤەبەریا گشتی یا كاروبارێن رزگاربوویان ل نەینەوا دێ‌ هێتە كرن».
گۆت ژی: «ئەڤە پێنگاڤەكا گرنگ و باشە ژ بۆ رزگاربوویان، كو جهێ‌ ئاكنجیبوونێ‌ ژبۆ وان بهێتە دابینكر و قەرەبوویان وان بهێتە كرن، لەو پێدڤیە رزگاربوویێن ئێزدی خۆ تۆمار بكەن، دیسا داخوازێ‌ ژ كەسوكارێن رزگاربوویان دكەین پێزانینێن خۆ تۆمار بكەن و رێكارێن پێدڤی تەمام بكەن، چونكی سەرۆك وەزیران رازیبوونا خۆ دیاركریە، كو كەسوكارێن رزگاربوویان ژی پارچەیێن ئەردی وەربگرن».

هەولێر، قائید میرۆ:

سەرۆكێ سەندیكا شوونوارێن كوردستانێ خویاكر، فرەنسا دێ هەژمارەكا جهێن شوونواری ل دەڤەرا ئامێدیێ سەخبێر كەت و دبێژیت: ئەم نەشیاین ل وەرزێ زڤستانێ دەست ب پڕۆسێسا سەخبێركرنێ بكەین، لەو ل وەرزێ‌ بهارێ یان هاڤینێ دێ دەست ب كارێ‌ سەخبێركرنێ كەن.
دكتۆر عەبدوللا خورشید، سەرۆكێ سەندیكا شوونوارێن كوردستانێ بۆ رۆژناما ئەڤرۆ دیاركر، قۆنسۆلخانەیا فرەنسا ب هەماهەنگی ل گەل رێكخراوا ئەلیف یا فرەنسی بودجەیەك بۆ سەخبێركرنا هەژمارەكا شوونوارێن دەڤەرا ئامێدیێ دابین كریە و گۆت: «ئەو جهێن دهێنە سەخبێركرن: مزگەفتا قوبەهان و منارا مزگەفتا ئامێدیێ و سێریجێ و گۆڕا سولتان حوسێن وەلی، قووناغا ئێكێ دیكۆمێنتكرنا ئەڤان جهێن شوونواریە، قووناغێن دویڤدا دەست ب سەخبێریكرنا ئەڤان شوونواران دێ هێتە كرن».
دكتۆر عەبدوللا خورشید گۆت ژی: «سەخبێركرنا ئەڤان جهێن شوونواری ئەگەر سەدێ سەد ژی نەبیت، ئەڤە كارەكێ باشە بۆ رەوشا نوكە یا شوونواران، ئەم پێشبینی دكەین، ئەڤ سالە دەست ب سەخبێریكرنا وان جهێن ئامێدیێ بهێتە كرن و بەری نوكە ژی كار تێدا هاتیە كرن، وەكی: پێداچوون ب شوونواران، ئەز باوەرم بهارا ئەڤ سالە یان هاڤینێ دێ پرۆسێسا كاری بڕێڤەچیت، سەقایێ دەڤەرێ نەیێ گونجای بوو، كو د وەرزێ زڤستانێ دا كار تێدا بهێتە كرن».

زاخۆ، دلۆڤان هالۆ:

جەمال هەسن، ڕێڤەبەرێ بەڕەڤانیا باژێڕی ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو ژ بۆ پاراستانا گیانێ وەلاتیێن زاخۆ، داگرتنا غازێ ژ لایێ تڕۆمبێلێن مەزن یێن ڕاكرنا سەرنشینان ڤە هاتە قەدەغەكرن، ئانكو پێدڤیە تڕۆمبێل بێی سەرنشین ژ غازێ بهێنە پركرن.
ڕێڤەبەرێ بەڕەڤانیا باژێڕی ل ئیدارەیا سەربخوە یا زاخۆ ئاماژە ب وێ چەندێ ژی كر كو بڕیارا قەدەغەكرنا ڤی كاری پشتی وێ چەندێ هات، هەژمارەكا وەلاتیێن زاخۆ گازندەیێن خوە گەهاندینە مە، كو ب ڤی كاری مەترسی ل سەر ژیانا وان و زاڕۆكێن وان هەیە، مە ژی وەكو ڕێڤەبەری ئەڤ چەندە ب ڕژدی وەرگرت و كرە بڕیار.
جەمال گۆت: «مە ڕێنومایێن تایبەت ب ڤی كاری ڤە پێشكێشی شۆفێر و كارمەندێن داگرتنا غازێ كرینە، كو ئێدی ئەڤ كارە نەهێتە دووبارە كرن، هەر كەسەكێ پێگریێ ب ڕێنومایان نەكەت دێ هێتە سزادان».

دهۆك، دلۆڤان ئاكرەیی:

رێڤەبەرێ گشتی یێ كار و دەستەبەریا جڤاكی ل وەزارەتا كار و كاروبارێن جڤاكی یا حكومەتا هەرێما كوردستانێ دیاركر، وان هەمی خودان كار ئاگەهداركرینە، یێن زانیاریێن خۆ یێن سالانە پێشكێش نەكرین، دڤێت هەتا دووماهیا ڤێ حەفتیێ سەرەدانا رێڤەبەریا دەستەبەریا جڤاكی ل پارێزگەهـ و ئیدارەیێن سەربخۆ بكەن، بەروڤاژی دێ ڕووبڕووی رێكارێن یاسایی بن.
مەریوان بەگۆك، رێڤەبەرێ گشتی یێ كار و دەستەبەریا جڤاكی ل وەزارەتا كار و كاروبارێن جڤاكی یا حكومەتا هەرێما كوردستانێ بۆ رۆژنامەیا ئەڤرۆ گۆت: «پرۆسەیا پێشكێشكرنا زانیاریێن سالانە بۆ ئەڤ سالە ب شێوەیەكێ ئەلیكترۆنی دهێنە پێشكێشكرن، ل گۆرەی یاسایێ هەر خودان كارەك ل دەستپێكا سالێ زانیاریێن خۆ پێشكێش نەكەت، دێ ڕووبڕووی سزایێ گیرۆبوونێ و رێكارێن یاسایی بیت، هەتا دیماهیا ڤێ حەفتیێ پێدڤییە هەمی خودان پڕۆژە و كۆمپانیێن هەرێما كوردستانێ، سەرەدانا رێڤەبەریا دەستەبەریا جڤاكی ل پارێزگەهـ و ئیدارەیێن سەربەخۆ بكەن بۆ وەرگرتنا ناڤێ ب كارهێنەری (User) و پەیڤا نهێنی (Password) یێن تایبەت ب سیستمی ڤە و پشتی وەرگرتنێ دشێن خۆ تۆمار بكەن و ب شێوەیەكێ ئەلیكترۆنی داخوازنامەیەكێ پێشكێش بكەن».