قەیس وەیس:

ب دووماهی هاتنا یاریێن گەڕا ئێكێ‌ و دەستپێكا وەرزێ‌ نوو یا خولا ستێرێن ئیراقێ‌ یا فوتبۆلێ‌ هەر پێنج یانەیێن كوردستانی دهۆك، زاخۆ، هەولێر، نەورۆز و غازئەلشیمال ب ئەنجامێن جودا دەست ب كاروانێ‌ خوە كرن.

دهۆك بێ‌ بەهربوو ژ سێ‌ خالان
دناڤ ئەرد و جەماوەرێ‌ خوە دا تیما یانەیا دهۆكێ‌ دو خالێن گرنگ بەرانبەر مێڤانا خوە یانەیا ئەلغراف ژ دەستدان پشتی ب گۆلەكێ‌ وەكهەڤبووی، دڤێ‌ یاریێ دا هێرشبەرێ‌ دهۆكێ‌ یونس حەموود د خولەكا 12ێ‌ دا پەنەلتیەك ژ دەستدا، د خولەكا 41ێ‌ پیشەكارێ‌ ئەلغراف برێتس شیا گۆلا ئێكێ‌ بۆ تیما خوە بنیت، دنیڤا دویێ دا دەرئەنجامێ‌ گڤاشتنێن بەردەوام كارساز غازی دۆسكی گۆلا وەكهەڤیێ د خولەكا 79ێ‌ دا بۆ دهۆكێ‌ ئینا، یاری ب وەكهەڤی ب دووماهی هات.
زاخۆ سەركەڤتنەكا گرنگ ئینا
ژلایێ خوەڤە تیما یانەیا زاخۆ سەركەڤتنەكا گرنگ ل سەر مێڤانا خوە و مێڤانا نوو یا خولێ‌ یا كوردستانی غاز ئەلشیمال یا كەركووكی ب گۆلەكێ‌ بێ‌ بەرانبەر ئینا، گۆلا كوڕێن خابووری ژلایێ یاریزانێ‌ وێ‌ موستەفا سەعدن د خولەكا 70ێ‌ دا ئینا.
هەولێرێ‌ ژی جەماوەرێ‌ خوە كەیفخوەشكر
تیما یانەیا هەولێرێ‌ سەركەڤتنەكا گرنگ ل سەر یانەیا كارەبا یا بەغدایی ئینا ب دو گۆلێن پاقژ و دلێ‌ جەماوەرێ‌ خوە د ئێكەم یارییا خولێ‌ دا كەیفخوەشكر، هەردو گۆلێن هەولێریان ژلایێ یاریزانان میلتۆن ناسان د خولەكا 23ێ‌، دووڤدا پشتی بۆرینا پێنج خولەكان ئاكۆ خزێر گۆلا دویێ ئینا.
نەورۆز و هەلگرا ناسناڤی وەكهەڤبوون
ژلایەكێ‌ دووڤە یانەیا نەورۆز ئەوا ڕێورەسمێن ڤەكرنا خولێ‌ ڕێكئێخستی دناڤ ئەرد و جەماوەرێ‌ خوە دا دو خال ژ دەستدان بەرانبەر هەلگرا ناسناڤێ‌ وەرزێ‌ بۆری یانەیا جەوییە ئەوا یاری ب سێ‌ گۆلان ب وەكهەڤی ب دووماهی هاتی، هەرسێ‌ گۆلێن نەورۆزێ‌ ژلایێ یاریزانێن وێ‌، حەمەد دلاوەر، ئیبراهیم غازی و سیمۆن مۆسۆڤا تۆماركرن.
ژ ئەنجامێن یاریێن دی
شورتە 1-1 كەربەلا، زەورا چنە-چنە مینا، دیالا 2- 1تەلەبە، نەفت2- چنە كەرخ، ئەلگەرمە 1-1 مووسل، نەفت میسان چنە-چنە جولان.
لدۆر ئەنجامێن یاریێن گەرا ئێكێ‌ سادق سەعدۆن شرۆڤەكارێ‌ وەرزشی یا خولا ستێرێن ئیراقێ‌ گۆت: بنەمایەكێ‌ د ناڤا وەرزشێ‌ دا هەیی كو یاریێن ئێكێ‌ یێن هەر قارەمانیەكێ‌ پترترین ئەنجامێن وێ‌ بووینە سۆپرایز و ئەڤە ژی نابنە پیڤەرەك بۆ ئەوێ‌ یانەیێ ژبەر چەند ئەگەران ئەوژی، دبیت ئەوێ‌ یانەیێ هێشتا نەگەهشتییە بەرهەڤیێن باش ژلایێ چەستەیی و هزری یا یاریزانان كو دبەرهەڤبن، هەروەسان گوهۆڕینێن گەلەك دپلانا ڕاهێنەری دا د یارییا ئێكێ‌ دا ژبۆ باشتر زانین و بەرهەڤییا یاریزانی، هەروەسان ئەو مۆرالا بلند یا دەستپێكی دناڤا هندەك یانە و یاریزانان دا دبیت كونترۆلا ئاستێ‌ خوە یێ‌ دروست ژ دەست بدەت، هەروەسان ترسا ئەوان یانەیێن مەزن ژ خوسارەتییا یاریێن ڤەكرنا دەستپێكا خولێ‌ كود بیت ئەو ئاستێ‌ یاریزانی ژی دیار نەكەت، ژبەر ئەڤان ئەگەران ئەم نەشێن بێشن یاریێن ئێكێ‌ پیڤەرە بۆ ئاست و شیانێن ئەوێ‌ تیمێ‌.
یاریێن گەڕا دویێ بڤی شێوەیی نە:
رۆژا پێنجشەمبی 20-8-2026
نەفت میسان- نەفت، یاریگەها میسان، 6:30ێ‌ بەری مەغرەب.
غازئەلشیمال- كارەبا، یاریگەها نەورۆز، 6:30 بەری مەغرەب.
جولان- كەرخ، یاریگەها جولان، نەهی شەڤ هێتە كرن.
مینا- زاخۆ، یاریگەها مینا، نەهی شەڤ هێتە كرن.
رۆژا ئەینی 21-8- 2026ێ‌
مووسل- دیالا، یاریگەها شەهید فرانسۆ حەریری، 5:30 ئێڤاری.
كەربەلا- زەورا، یاریگەها نەجەف، 6:30 بەری مەغرەب.
ئەلگەرمە- شورتە، یاریگەها جولان، نەهی شەڤ.
هەولێر- جەوییە، یاریگەها شەهید فرانسۆ هەریری، 9:30 شەڤ.
شەمبی ڕێكەفتی 22-8- 2026
ئەلغراف- نەورۆز، یاریگەها ناسریە، 6:30 بەری مەغرەب.
دهۆك- تەلەبە، یاریگەها دهۆكێ‌، نەهی شەڤ.

د پرێسكۆنفرانسێ‌ رۆژنامەڤانی دا ڕاهێنەرێ‌ تیما فوتبۆلا یانەیا دهۆك ژ دەستدانا دو خالان د یارییا ئێكێ‌ یا خولا ستێرێن ئیراقێ‌ ب هەبوونا هندەك شاشیان دا دیاركر و دۆپاتكر بۆ یاریێن بهێت دێ‌ چارەسەركەن، ئەڤچەندە هات پشتی دیارییا خوە یا گەڕا ئێكێ‌ ژ خولا ستێرێن ئیراقێ‌ دناڤ ئەرد و جەماوەرێ‌ خوە دا ب گۆلەكێ‌ بەرانبەر یانەیا ئەلغراف وەكهەڤ بووی.
زێدەتر یەحیا گول محەمەد گۆت: پلان و ئارمانجا مە یا یاریێ ب دەستڤە ئینانا سێ‌ خالان بوو، ژبەركو ئەم یێ دناڤ ئەردێ‌ خوە دا دكەین دڤیابا سەركەڤتنا ئێكێ‌ پێشكێشی جەماوەری خوە كربا، ئەوێن بڕاستی ژی ژ هەژی سەركەڤتنێ‌ و سۆپاسیێ نە، ژبەركو ڕێژەیەكا هەر مەزن و جۆش و خرۆش هاتبوونە پشتەڤانییا تیما خوە بكەن، تۆمارنەكرنا گۆلا پەنەلتیێ كارتیكرنەكا نەرێنی پەیداكر، هەرچەندە سەقا و دیمەنێن گەلەك جوان و سەرنجراكێش ژلایێ جەماوەری دیاربوو، سۆپاس بۆ پشتەڤانییا وان، پێنەڤێت ئەڤچەندە دێ‌ یاریزانی و كادرێ‌ ڕاهێنانێ‌ پتر هاندەت بۆ یاریێن داهاتی ئاستێ‌ خوە باشتر لێبكەن و هزرا سەركەڤتنان بكەن.
ژلایەكێ‌ دووڤە ناڤهاتی گۆت: ئەم خەمگینن بەرانبەر ئەڤی ئەنجامێ‌ وەكهەڤیێ، تیما مە ئاستەكێ‌ باش نیشان دا و پتر گڤاشتن دكرن و نێزیكی گۆلا ئەلغراف بوو، ئارمانجا مە سێ‌ خالێن یاریێ بوو، ژبەر لەزكرنێ‌ و مێشكێ‌ سەركەڤتنێ‌ هندەك شاشی پەیدابوون، بۆ یاریێن بهێت دێ‌ هەموو بزاڤان كەین چارەسەربكەین، هەروەسان دادڤانان ژی ئاستەكێ‌ جوان نیشان دا و دروستی كارێ‌ خوە دكر.
بۆ زانین تیما یانەیا دهۆك دێ‌ یارییا خوە یا دویێ ژ خولا ستێرێن ئیراقێ‌ ل شەمبییا بهێت مێڤاندارییا یانەیا تەلەبە یا بەغدایی كەت ئەو دیارییا خوە یا گەڕا ئێكێ‌ دا بەرانبەر دیالا ب دو گۆلان بەرانبەر گۆلەكێ‌ تووشی خوسارەتیێ بووی.

پشتی بۆ ماوەیێ دو حەفتیێن گەنگەشە و دانۆستاندنان و ناكۆكییا ل گەل یانەیا ڕیال مەدرید، ل دووماهیێ یانەیا بەرشەلۆنا گەهشتە مرادا خوە و شیا ستێرێ‌ هەلبژارتیێ ئیسپانیا رۆدری یاریزانێ‌ یانەیا مانچستەر ستی یا ئنگلتەرایێ بینیتە دناڤ ڕیزێن تیما خوە دا.
ل دووڤ ڕاپۆرتا رۆژنامەیا مۆندۆ دیبۆرتیڤۆ یانەیا مانچستەر ستی ب فەرمی دەست بەرداری یاریزانێ‌ خوە رۆدری بوو ب كۆژمەیێ 76.8 ملیۆن یۆرۆیان بوو، ژ داخوازیا خوە یا 80 ملیۆن یۆرۆیان لێڤەبوو، هەروەسان دووماهی ئۆفەرا بەرشەلۆنا 60 ملیۆن یۆرۆ بوو، لێ‌ پشتی گەهشتینە ڕێكەڤتنێ‌ ب كۆژمەیێ 76.8 ملیۆن یۆرۆیان هاتە ئیمزاكرن، ئەوا دێ‌ گرێبەستا وی هەتا هاڤینا سالا 2030ێ‌ بەردەوامبیت.
هەما رۆژنامەیێ دیاركر ژبەر ڕژدییا یانەیا بەرشەلۆنا بۆ رۆدری بەردەوام گڤاشتن ل سەر مان ستی دكر، هەكە ڕیال مەدرید نە هاتبا دناڤ بازاری دا دڤیابا بەرشەلۆنا ب 60 ملیۆن یۆرۆیان ئیمزاكربا لێ‌ ڕیالێ‌ بەرهەڤییا خوە دیاركر زێدەتر پێ بدەت، ئەڤچەندە بوو ئەگەر رۆدری ل سەر بەرشەلۆنا گران بهێتە راوەستاندن.

تاهر رێكانی

تیما فوتبۆلا یانه‌یا ئامه‌د سپۆر د ئێكه‌م پێنگاڤا خۆ دا سه‌ركه‌فتنه‌كا مه‌زن لسه‌ر تیما یانه‌یا ئیرزورۆم سپۆرێ ئینا ب سێ گۆلان بێ بەرانبەر د یاریا وان یا ده‌ستپێكا خولا سۆپه‌ر لیكا توركیایێ دا، بڤێ سه‌ركه‌فتنا مه‌زن ئامه‌د لسه‌رێ لیستەیا خولێ دهێت ب سێ خالان و سێ گۆلێن پاقژ، ب جوداهییا گۆله‌كێ ژ یانه‌یا به‌له‌دیا ئسته‌نبولێ ئه‌وا ل رێزا دویێ دهێت، د یاریا واندا ئه‌وا دوهی د ناڤ ئه‌رد و پشته‌ڤانێن خۆدا ل یاریگه‌ها دیاربه‌كر سپۆرێ هاتیه‌ ئه‌نجامدان، هه‌رسێ گۆلێن ئامه‌دێ ژلایێ یاریزانان زیا‌و سه‌بع دو گۆل و گۆغان گۆل گۆله‌ك.
دهێته‌ زانین كو ئه‌ڤه‌ ئێكه‌م جاره‌ یانه‌یا كوردستانی ئەوژی ئامه‌د سپۆر پشكداریێ د خولێن مه‌زن ل وه‌لاتێ توركیا دا دکەت، یاریا وێ یا بهێت دێ ژ ده‌رڤه‌ی یاریگه‌ها خۆ دگه‌ل یانه‌یا كوچالی سپۆر ئه‌نجام ده‌ت.

دوهی ب فەرمی یێ‌ ئوسترالی گێرهام ئارنۆلد گەهشتە پایتەختێ‌ ئیراقێ‌ بەغدا ژبۆ نووكرنا گرێبەستا خوە ل گەل فدراسیۆنا فوتبۆلا ئیراقێ‌ و دەست ب بەرهەڤییان بۆ كۆپا كەنداڤی ئەوا بڕیارە هەڤڕكیێن وێ‌ ل 23ێ‌ ئەیلوونا بهێت ل وەلاتێ‌ سعۆدیێ بهێتە كرن.
د داخویانیەكا رۆژنامەڤانی دا ئارنۆلدی گۆت: پشتی گرێبەستا خوە ل گەل فدراسیۆنا فوتبۆلا ئیراقێ‌ نوو دكەم دێ‌ ل ئیراقێ‌ دا مینم ژبۆ دۆڤچوونا یاریزانێن پشكدار د خولا ستێرێن ئیراقێ‌ بۆ ژێگرتنا باشترین یاریزانان پێخەمەت دروستكرنا پێكهاتیێ هەلبژارتیێ ئیراقێ‌ بۆ خوە بەرهەڤكرن بۆ كۆپا كەنداڤی، ئەڤ قارەمانییە بۆ مە گەلەك گرنگە تایبەت دێ‌ بیتە باشترین بەرهەڤی بۆ قارەمانییا كۆپا ئاسیا 2027 كو ببیتە باشترین بەرهەڤی.
ژلایەكێ‌ دووڤە ناڤهاتی گۆت: پشكدارییا كۆپا كەنداڤی دێ‌ یا جودا بیت ژ پشكداریێن دی و پتر دێ‌ پشت گەرمیێ ب یاریزانێن گەنج كەین ئەوێن دناڤ خولا ستێرێن ئیراقێ‌ دا ئاستەكێ‌ باش نیشان دەن و ئەڤە پالدەر بۆ چێكرنا تیمەكا نوو و باشتر بۆ قارەمانیێن داهاتی.