عەلی حاجی:

چاڤه‌ڕێ دهێته‌ كرن تیما فوتبۆلا یانه‌یا زاخۆ ئێك ژ بهێزترین یاریێن خوه‌ ژ چارچووڤه‌یێ خولا كوردستانێ دگه‌ل یانه‌یا شێروانه‌ ل شه‌مبییا بهێت یاریگه‌ها خوه‌ ئه‌نجامبده‌ت، شێروانه‌ خودانا سه‌رێ لیستێ یه‌ ب46 خالان و زاخۆ 42 خال هه‌نه‌ رێزا سێیێ دهێت، شه‌ش یاری ماینه‌ دێ خول ب دووماهی هێت، ئه‌نجامێ ڤێ یاریێ بۆ كوڕێن خابووری وه‌كو چاره‌نڤیسه‌ ژبۆ هه‌ڤڕكییا ناسناڤێ خولێ، ل دۆر ڤێ یه‌كێ به‌ناڤ ئه‌حمه‌د ڕاهێنه‌رێ تیما زاخۆ دیار كر ئه‌ڤ یارییه‌ ب هێزترین و زه‌حمه‌ترین یارینه‌ لڤی وه‌رزی و دێ شه‌ڕێ سێ خالان كه‌ن.
زێدەتر ناڤهاتی بۆ رۆژنامه‌یا ئه‌ڤرۆ گۆت : ئه‌ڤ یارییه‌ دێ به‌لانسێ هه‌ڤڕكیێ ل سه‌ر ناسناڤی بۆ مه‌ دیاركه‌ت، له‌وما ژی سەرکەڤتن ل سەر شێروانە دێ مە هێلیتە د ناڤ هەڤرکییا ناسناڤی دا،هەکە مە خول بڤێت نابیت ژبلی سەرکەڤتنێ ب چو ئەنجامەکێ دیتر رازی ببین، هەمی یاریزانێن مە بەرهەڤن بۆ وێ یاریێ و هەر یاریزانەک ل جهێ خوە بەرپرسیارەتیا خوە بۆ وێ یاریێ دزانیت، تیما شێروانە خودانا سه‌رێ لیستێ یه‌ و یاری ب زەحمەتە لێ ئەم حەز ژ یاریێن ب زەحمەت دکەین، مە باوەرییەکا مەزن ژی ب یاریزانێن خوە هەیە کو دێ باشترین ئاستێ خوە پێشکێش کەن.
به‌ناڤ ئه‌حمه‌د گۆت ژی: یا گرنگە جەماوەرێ مە بۆ ڤێ یاریێ ڕولەکێ ئەرینی هەبیت و پشتەڤانیەکا باش هەتا دووماهی خولەک ل تیما خوە بکەن و نابیت ڤێ دەلیڤەیا گرنگ یا سالێ ژ دەست بدەین.

ب فەرمی دەستەیا گشتی یا فدراسیۆنا كیك بۆكسینگا ئیراقێ‌ كوڕێ‌ باژێرێ‌ دهۆكێ‌ مەحفۆز ئیبراهیم وەكو جێگرێ‌ سەرۆك فدراسیۆنا خوە دەست نیشانكر، پشتی د كۆمبوونا خوە یا گشتی دا ئەوا ل دووشەمبییا بۆری ل باژێرێ‌ بەغدا هاتییە ڕێكخستن كو دبیتە جارا ئێكێ‌ كوردستانییەك دگەهیتە ڤێ‌ پۆستی د فدراسیۆنا ناڤهاتی دا.
ل دۆر ڤێ‌ یەكێ‌ مەحفۆز ئیبراهیم جێگرێ‌ سەرۆك فدراسیۆنا ئیراقێ‌ بۆ رۆژنامەیا ئەڤرۆ گۆت: پێخوەشحالم بوویمە جهێ‌ ڕازیبوونا دەستەیا گشتی یا فدراسیۆنێ‌، پێنەڤێت ئەڤ پێنگاڤە ژی ب سانەهی نەهاتییە بەلكو دەرئەنجامێ‌ كارێ‌ مە یێ مەزن ب ڕێكخستنا هەر قارەمانییەكێ‌ و سەربۆرا مە یا چەندین سالان دناڤ فدراسیۆنێ‌ و چالاكیێن ڤێ‌ یاریێ‌ كو بوویمە جهێ‌ باوەرییا دەستەیا گشتی و وەكو جێگرێ‌ سەرۆك فدراسیۆن ئەز هەلبژارتیم، بۆ من گەلەك گرنگە ئەڤ پێنگاڤە پێخەمەت زێدەتر خزمەتا وەرزشا كیك بۆكسینگێ‌ یا هەرێما كوردستانێ‌ و ئیراقێ‌ بكەم و تایبەت وەرزشڤانێن پارێزگەها دهۆكێ‌.
هەروەسان ناڤهاتی ئەوچەندە ژی دیار كر قۆناغا بهێت یا وی دێ‌ درێژە پێدانبیت بۆ كارێن باشتر و دێ‌ هەموو بزاڤان كەت زێدەتر خزمەتا وەرزشڤانا بكەت و گۆت: ئەڤ پێنگاڤە دێ‌ بیتە درێژەپێدانا خزمەتا ڤێ‌ وەرزشێ‌ ل ئیراقێ‌ و كوردستانێ‌ لێ‌ دێ‌ بشێوەیەكێ‌ باشتر ب پلان و بەرنامە خزمەتا وەرزشڤانان كەم.
بۆ زانینمەحفۆز ئیبراهیم هەر ژ سالا 2008ێ‌ وەكو ئەندامێ‌ فدراسیۆنا كیك بۆكسینگا پارێزگەهێ‌ هاتبوو دەستنیشانكرن هەتا 2016ێ‌، دووڤدا پشتی پێنج سالێن دووركەفتنێ‌ ل 2021ێ‌ دوبارە وەكو ئەندام هاتییە وەرگرتن ژبەر رۆلێ‌ وی یێ‌ كاریگەر دناڤ چالاكیێن فدراسیۆنێ‌ دا دەستەیا گشتی ب ڕازیبوونا سەرجەم ئەندامان وەكو چێگرێ‌ سەرۆكێ‌ فدراسیۆنێ‌ هاتە دەستنیشان كرن.

شاهۆ فەرید:

تیما فوتسالا یانەیا ئافرەتێن دهوكێ یا پشكدار د خولا فوتسالا كچێن كوردستانێ‌ دا بەردەوامن ل سەر بەرهەڤیێن خوە بۆ یاریێن مایی ژ چارچووڤەیێ‌ كۆما ئێكێ‌ ئەوا بڕیارە ل حەفتییا بهێت دەستپێبكەن، پشتی بۆ ماوەیێ‌ مەهەكێ‌ یە هاتییە ڕاوەستاندن، ئەوا د نوكە دا سەرێ لیستا كوما خوە دهێت ب 12 خالان و دەربازبوون بۆ چارگۆشەیا زێرین مسۆگەر كرییە، د وەرزێ‌ ئەڤ سالە دا هیڤیێن وان و ڕژدی بۆ پاراستنا ناسناڤێ‌ خوە یێ‌ پارسالن.
ل دۆر ڤێ‌ یەكێ‌ ئاراز سالح راهێنەرێ تیما دهۆكێ‌ بۆ رۆژنامەیا ئەڤرۆ گۆت: هیڤی و ئارمانجامێن مە د دیارن ئەوژی پاراستنا ناسناڤێ‌ خوەیە، هەرچەندە ب سانەهی نابیت و هەڤڕكی دێ‌ هەبیت، لێ‌ دنوكە دا ئەم یێ‌ هزر دكەین و خوە بەرهەڤكەین پتر بۆ یاریێن چوارگوشا زێرین، هەرچەندە مە دو یاریێن مایی ژكۆما خوە لێ‌ ڕادەیەكێ‌ باش ئەم یێن دەربازبووین، دماوەیێ‌ ڕاوەستیانا خولێ‌ دا ئەم بەردەوام بووینە ب شێوەیێن جودا راهێنانێن تەكتیكێ و هۆنەری دكەین، بزاڤا مە ئەو بوویە چارەسەركرنا خالێن لاوازییا تیمێ‌ و دەلڤە بخوە بینین كارسەر بكەین، من باوەریەكا باش ب یاریزانێن خوە هەیە ئەڤی وەرزی ژی پاراستنێ لسەر ناسناڤێ خولێ بكەین نەهێلین ناسناڤ ژ دهۆكی دەركەڤیت.
ژلایەكێ‌ دووڤە ڕأهێنەرێ‌ ئافرەتێن دهۆكێ‌ گۆت: ئاستێ خولێ هاتیە گوهۆڕین و ب هێزترلێهاتیە ژ سالێن بوری، هەموو تیمێن دی خوە باشی بەرهەڤكرینە و هەڤڕكی بۆ چارگۆشەیا زێرین ئاگرین بوویە، یاریزانێن من ژی هەموو خودان شیانن ئێك ژوان یاریزانا هەلبژارتیێ ئیراقێ یە، رۆزنامەیا فێدراسیونێ كارتێكرن لسەر مە كر پشتی چەندین كێشە پەیدابووین، لێ ئەز یێ هیڤی بووم ژ تیما خوە دێ ئەڤی ئاستی نیشاندەن و پڕانییا یاریزانێن مە بچووكن و پشكداری د قارەمانییا پێلستانك كربوو و شەش ژوان یاریزانان نوكە پێكهاتێ تیمێ دانە و شیام پێكهاتیەكێ‌ باش پەیدابكەم، سوپاسیا كارگێریا یانەیێ ژی دكەم چ كێماسی نەهێلاینە هەموو شیانێن خوە مەزێختینە بۆ تیمی، هەروەسا سۆپاسییا جەنابێ‌ د. عەلی تەتەر پارێزگارێ‌ دهۆكێ‌ دكەین كو بەردەوام هاریكار و پالپشتە دگەل یانەیێ‌.

قەیس وەیس:

فدراسیۆنا باسكێت بۆلا ئیراقێ‌ ب فەرمی ژڤان و جهێ‌ ئەنجامدانا قۆناغا دووماهیێ‌ ژ خولا پلا ئێك دەربازبوون بۆ پلا نایاب دیاركرن و تیما دهۆكێ‌ تاكە یانەیا پارێزگەهێ‌ یە پشكدارە و هیڤیێن دەربازبوونێ‌ ل بەردەست هەنە.
د. خالد نەجم جێگرێ‌ دویێ‌ یێ‌ سەرۆكێ‌ فدراسیۆنا باسكێت بۆلا ئیراقێ‌ دیار كر ل حەفتی نیسانا بهێت باژێرێ‌ هەولێرێ‌ دێ‌ مێڤاندارییا قۆناغا دووماهیێ‌ یا خولا پلا ئێك كەن دەربازبوون بۆ پلا نایاب -پیشەكاران- ئەوا بڕیارە شەش یانە پشكداربن ئەو ژی دهكۆ، سابیس، ئەلیەقزە، نەفت ئەلشیمال، ئالیات ئەلشورتە و نەفت میسان، یاریێن وان دێ‌ ب شێوەیێ‌ خول ئێك قۆناغ هێنە كرن كو هەر تیمەك پێنج یارییان كەت و سێ‌ تیمێن ئێكێ‌ دێ‌ پلێتا دەربازبوونێ‌ بۆ نایاب- پیشەكاران- وەرگرن.
ل دۆر ڤێ‌ یەكێ‌ و دووماهی بەرهەڤیێن وان میقداد ڕەعدی ڕاهێنەرێ‌ تیما دهۆكێ‌ بۆ رۆژنامەیا ئەڤرۆ گۆت: پشتی مە پێنگاڤێن باش د خولا پلا دو و ئێك دا هاڤێژتی د نوكە دا ئەم یێ‌ د قۆناغەكا هەستیار و دیرۆكی دا، ئەركێ‌ مە ب سانەهی نابیت لێ‌ هیڤی و ئارمانجێن مە ب دەستڤە ئینانا ئێك ژ پلێتێن دەربازبوونێ‌، هەرچەندە ئەم یێ‌ نێزیكی ب دەستڤە ئینانا ئێك ژ پلێتێن دەربازبوونێ‌ بووینە، لێ‌ ڕامانا وێ‌ ئەو نینە ب سستاهی وەربگرین و دێ‌ هەموو بزاڤان كەین باشترین شێوە بۆ ڤێ‌ قۆناغێ‌ بەرهەڤبن، هەرچەندە یاریزانێن مە هەموو كوڕێن باژێرێ‌ دهۆكێ‌ نە، لێ‌ هەكە پێدڤی كر ئەم دێ‌ بزاڤێ‌ كەین بۆ ئینانا یاریزانەكێ‌ دەرڤەیی باژێرێ‌ كە ژبۆ مفا وەرگرتن و ب هێزكرنا رێزێن تیما خوە، هەموو ئۆمێدا مە ئەوە ڤەگەڕاندنا باسكێت بۆلا دهۆكێ‌ بۆ خولا پیشەكارێن ئیراقێ‌ یە.

رەمەزان زەكەریا

د داخویانیەكێ دا ئەندامێ‌ فدراسیۆنا فۆتبولا كوردستانێ ئاشكراكر خوەڤەكێشانا هەر یانەیان د كۆپا یان خولێن كوردستانێ دا تا ڕادەیەكی كاریگەریەكا خراب د گەهینە ڕێكخستنا خولێن كوردستانێ لێ ل دووماهی كۆمبوونا خوە مە مەزنترین سزا دیاركرینە بۆ وان یانەیێن خوە ڤەدكێشن یان پشكداری یاریەكێ نەبن بێ ئەگەر كۆ بهێنە دیار كرن بۆ فدراسیۆنا فوتبۆلا كوردستانێ‌، خۆ ڤەكێشانا هندەك یانەیا ل خولێن كوردستانێ زۆر كاریگەریەكا خراب ل سەر خولا دروستكریە و ئەڤە ژی دیاردەكا جوان نینە و پێڕابوونێن دژوار دهێنەكرن .
ناڤبری بۆ ئەڤرۆ گۆت: ژبۆ بەرهەنگاربوونا ئەڤێ‌ دیاردێ‌ و ل دووڤ بەند و ڕێنمایان فدراسیۆنا فوتبۆلا كوردستانێ‌ بریاردایە هەر یانەیەكا خۆ ڤەكێشێت ژ خولێ یان یارییەكێ پشكدار نەبیت ب توندی بهێتە سزادان بۆ نموونە یانەیا برایەتی گوژمەیێ دو ملیۆن دیناران هاتیە سزادان ئەگەر دوبارە بكەت دێ هێتە سزادان ب پاشڤەچوون دو پلا‌ بۆ نموونە ژ خولا نایاب دێ‌ پاشڤە چیتە پلا دو، ئەڤ بریارە بۆ هەموو خول و یانەیانە دهێنە بجهئینان، هیڤییا مە ئەوە هەموو یانە پێگیربین و پشتەڤانێن وەرزشا كوردستانێ‌ بن.
ژلایەكێ‌ دووڤە ئازاد محەمەد سەعید گۆت : بابەتێ‌ مێڤانداریا هەرێما كوردستانێ بۆ مۆندیالا كۆنیفایی جارێ هاتیە پاشئێخستن بۆ وێ چەندێ پتر خۆ رێكبێخن بزانن دێ كۆمبوون ل كوردستانێ هێتە كرن یان وەلاتەكێ دی هەتا نوكە دیار نینە دێ كۆمبوون كەنگی بیت ل كیڤە بیت، هەر وەسا ئەو كادرێ راهێنانی دێ وەك خۆ مینیت پشتی خۆل دهێتە دیاركرن فدراسیۆنا فوتبۆلا كوردستانێ دێ بریارا دووماهیێ دەت.

ڕاپۆرتێن رۆژنامەڤانی یێن ئنگلتەرایێ‌ و ئسپانیا دۆپات كرییە كو یانەیا ریال مەدرید یا ئسپانی ب شێوەكێ‌ دەستپێكی شیایە نێچیرا خوە بگریت پشتی بۆ ماوەیێ‌ ئێك وەرز ل بەر ڕاوەستایی و ستێرا ئنگلتەرایێ‌ و هێلا بەرەڤانیێ‌ یێ‌ یانەیا لیڤەرپۆل ترێنت ئەلیكسەندەر ئارنۆلد ڕازیبكەت، ئەوێ‌ دێ‌ گرێبەستا وی ل خزیرانا بهێت ب دووماهی هێت.
رۆژنامەیا سكای سپۆرت یا ئنگلتەرایێ‌ دیار كر پشتی چاڤەڕێبوونەكا درێژ یانەیا ریال مەدرید شیا ئەلیكسەردەر ئارنۆلدی ڕازیبكەت و ئەو مەرجێن هەین بۆ بجهبینت و دبیت گرێبەستا وی دگەل ریالێ‌ بگەهیتە پێنج سالان و مووچەیێ‌ سالانە بگەهیتە 15 ملیۆن یۆرۆیان دگەل دانا پاداشتان.
ژلایێ‌ خوەڤە رۆژنامەیا دیپۆرتیڤۆ لاكازیتا یا ئسپانی ئەڤچەندە ژی پشتراست كر و دیاركر ئەوا ریال مەدرید دڤیایی گەهشتێ‌ و دێ‌ ل خزیرانا بهێت ستێرێ لیڤەرپۆل ترێنت ئەلیكسەندەر ئارنۆلد گرێبەستا ریال مەدرید ئیمزاكەت، هەموو مەرجێن وی هاتینە بجهئینان.