مەكتەبا رێكخستنا پارتی ل پارێزگەها دهۆكێ‌ ب هەلكەفتا بۆرینا 21 سالان ل سەر كارەساتا 1ی شواتا 2004 پەیامەك بەلاڤكر و تێدا هاتیە: 21 سالان بەری نوكە و د رۆژەكا پیرۆز دا و ل جەژنا قوربانێ، دەستێ رەشێ تیرۆرێ گەهشتە ناڤ هەڤلێڕا پایتەخت، د پیلانەكا چەپەل و تیرۆرستی دا، هەردو بارەگایێن لقێ دو یێ پارتی و مەلبەندێ سێ یێ ئێكەتیێ كرنە ئارمانج، د وێ‌ كریارا تیرۆرستیا هوڤانە و دوور ژ هەمی بنەما و رەوشتێن مرۆڤایەتی و ئایینی هەژمارەكا سەركردێن قەهرەمان و هەڤوەلاتیێن بێ گونەهـێن كوردستانێ شەهید و بریندار كرن.
دیسا د پایاما مەكتەبا رێكخستنێ‌ دا هاتیە: «كریارا تیرۆرستیا 1ی شواتێ‌ پەیامەكا رۆهن بوو، ئارمانجا وان ئەو بوو، ئەزموون و قەوارەیێ‌ هەرێما كوردستانێ ژناڤ ببەن، لەوما ژ بوی ژناڤبرانا خەون و هیڤیێن دوژمنان هەردەم تەكەزیێ ل سەر گیانێ ئێكرێزیێ و پێكەڤەژیانێ و برایەتیێ دكەین، چونكی هەمی ئەو قوربانیێن هاتینە دان ل پێناڤ ئاشتی و ئێمناهیا هەرێما كوردستانێ دا بووینە».
د پەیاما مەكتەبا رێكخستنا پارتی دا هاتیە: «سلاڤ بۆ گیانێ شەهـیدێن كارەساتا ئێكی شواتێ و تەڤایا شەهـیدێن دەستێ تیرۆرێ و رێكا رزگاریخوازیا كوردستانێ، سەر كاروانێ وان بارزانیێ نەمر و كاك ئدریسێ جوانەمەرگ».

دهۆك، لەزگین جوقی:

رێڤەبەرێ گشتیێ ساخلەمیا پارێزگەها دهۆكێ دیاركر، د ڤێ مەهێ‌ دا نەخۆشخانەیا 100 تەختی یا هێتیتێ دێ هێتە ڤەكرن و دبێژیت: هەمی خزمەت بۆ وەلاتیان دێ د ناڤ نەخۆشخانێ دا هێنە كرن.
د. ئەفراسیاب موسا، رێڤەبەرێ گشتیێ ساخلەمیا پارێزگەها دهۆكێ بۆ رۆژناما ئەڤرۆ خویا كر، ئامادەكاری بۆ ڤەكرنا نەخۆشخانەیا 100 تەختی ل دەڤەرا ئامێدیێ‌ دهێنە كرن و گۆت: «د كابینەیا نەهێ دا ب فەرمانا سەرۆكێ حكومەتا هەرێما كوردستانێ بەرێ بنیاتی بۆ نەخۆشخانەیا 100 تەختی ل ئامێدیێ‌ هاتە دانان، ئەڤ نەخۆشخانە ب گوژمێ 43 ملیۆن دۆلاران هاتە ئاڤاكرن».
گۆتژی: «هەمی خزمەتێن ساخلەمیێ‌ د ناڤ ڤێ‌ نەخۆشخانەیێ‌ دا هەنە، ئیدی پێدڤی ناكەت خەلكێ دەڤەرێ بچنە نەخۆشخانەكا دوور بۆ وەرگرتنا چارەسەریێ، هەمی خزمەت و چارەسەریا خەلكێ دەڤەرێ د ناڤ ڤێ‌ نەخۆشخانەیێ‌ دا دێ‌ هێنە پێشكێشكرن».

زنار تۆڤی:

مەتین جەمیل، پەیڤدارێ رێڤەبەرییا گشتییا ساخلەمییا پارێزگەها دهۆكێ، بۆ رۆژناما ئەڤرۆ دیار كر، ژ ئەگەرێ كەفتنە خوارا ئەسانسۆرەكێ ل پڕۆژەكێ ئاكنجیبوونێ ل تاخێ ئێتیتێ ل دهۆكێ، كو شەش كەس د وێ ئاسانسۆرێ دابوون، هەر شەش كەس برینداربووینە و هەموو هاتینە ڤەگوهاستن بۆ نەخۆشخانا هەو‌ارهاتنێ ل دهۆكێ.
مەتینی گۆت: «پشتی ئەو بریندارە هاتینە ڤەگوهاستن بۆ نەخۆشخانێ و چارەسەرییا پێدڤی بۆ هاتییە كرن و نوكە ئەو كەسە‌ ل ژێر چاڤدێرییا نۆشداران دانە، هەروەسا ئەو ئەسانسۆرە ژ قاتێ‌ یازدێ كەفتییە خوارێ.

ئامێدیێ، مەحمود نهێلی:

قاهر میكائیل، كەسایەتیێ دەڤەرا ئامێدیێ و هەلبژێرێ گوندێ سپیندارا خەلفۆ بەرگارەی و پێشمەرگەیێ شۆڕەشا ئیلۆن و گولانێ دوهی 1/2/2025 د ژیێ 74 سالیێ دا مالئاڤایی كر.
قاهر میكائیل ل گوندێ سپیندارێ دەڤەرا بەرێ گارێ ل سنوورێ ناوچەدارییا دێرەلۆكێ‌ ل سالا 1951 ژ دایكبوویە، ل سالا 1967 بوویە پێشمەرگە، ل سالا 1988 دەربەدەری توركیا و ئیرانێ بوویە، پشتی سەرهەلدانا بهارا 1991 ڤەگەریایە كوردستانێ و بوویە پێشمەرگە و هەتا هاتیە خانەنشینكرن ل سەر پلا عەقید، خودێ‌ ژێ‌ رازی دوهی ژ ئەگەرێ نەخوشیا پەنجەشێرێ مالئاڤایی كر.

زاخۆ، دلۆڤان هالۆ:

ل تاخێ تلكەبەرێ یێ سەر ب ئیدارەیا سەربخوە یا زاخۆ ڤە مەزنترین پارك دهێتە دروستكرن.
سالح كۆڤلی، وەبەرهێنەرێ پڕۆژەی بۆ ڕۆژناما ئەڤرۆ دیار كر كو ئەو پاركە ب گوژمێ 12 ملیۆن دۆلاران دهێتە دروستكرن، كو مەزنترین پاركە و ل سەر ڕووبەرێ 91 دۆنەمێن ئەردی دهێتە دروستكرن.
سالحی گۆت: «ئەڤ پاركە ژ ئۆتێلەكا پێنج ستێر و مۆلەكا مەزن و نێزیكی 50 ڤیللەیان پێك دهێت، دێ گەلەك جۆرێن یاریێن زاڕۆك و مەزنان و خوارنگەهـ و مەلەڤانگەهێن سار و گەرم یێن ڤەكری و گرتی و باخچە و جهێن ئەنجامدانا فەستیڤالان تێدا هەبن».
گۆتژی: «ژ بۆ مەرەما زێدەكرنا ڕێژا كەسكاتیێ ل زاخۆ، مە گرنگیەكا مەزن دایە چاندنا داروبار و كەسكاتیێ».

هەولێر، قائید میرۆ:

بریكارێ وەزارەتا كارەبێ ئاشكراكر، ل گورەی پلانا حوكمەتا هەرێما كوردستانێ و ل سەر راسپاردەیا مەسرور بارزانی، سەرۆكێ‌ حوكمەتێ‌ هەتا دوماهیا سالا 2026ێ پڕۆژەیێ رۆناهی تەمام بیت و كارەبا نیشتیمانی ل سەرانسەری هەرێما كوردستانێ دێ‌ بیتە 24 دەمژمێری.
كامل قەزاز، بریكارێ وەزارەتا كارەبێ بۆ رۆژناما ئەڤرۆ دیاركر، سەرۆكێ حوكمەتا هەرێما كوردستانێ مەسرور بارزانی یێ رژدە ل سەر بجهئینانا پڕۆژەیێ 24 دەمژمێری و د دەمێ نوكە دا ل چەندین تاخ و دەڤەرێن هەرێما كوردستانێ پڕۆژەیێ رۆناهی دهێتە ئەنجامدان و یێ سەركەفتی بوویە و گۆت: «ل گورەی پلانێ هەتا دوماهیا سالا بهێت دێ كارەبا سەرانسەری هەرێما كوردستانێ بیتە 24 دەمژمێری».
كامل قەزاز گۆتژی: «ل گەل ئەنجامدانا پڕۆژەیێ رۆناهی بەرهەمئینانا كارەبێ ژی دێ هێتە زێدەكرن و پڕۆژەیێن ستراتیژی بۆ زێدەكرنا بەرهەمی هەنە، ژ وان ژی: وەستگەها خۆرمەلە، كو بڕیارە ل بهارا ئەڤ سالە تەمام ببیت و 500 میگاواتێن كارەبێ دێ بەرهەم ئینیت».

رەمەزان زەكەریا

دەمێ چەندین سالایە خەلكی ئاكرێ چاڤەرێ تمامبوونا پرۆژێ شارێ یاریان دكەن، بۆ وێ چەندێ رۆژێن بهێنڤەدان و سەر سال و جەژنا  دەمێن خو ل ناڤ دا دەرباز بكەن، بەلێ هەتا نوكە بەلێندەرێ پرۆژەی نەشیایە دووماهیێ ب وێ چاڤەرێبوونێ بینیت.

عەباس ئەحمەد، وەلاتیەكێ دەڤەرا ئاكرێیە بۆ ئەڤرۆ گۆت: دەما پرۆژە دهێنە چێكرن، دڤێت دووڤچوونەك هەبیت ژلایێ حكومەتێ و كابینێن بوری، نە یا بەرئاقلە بەلێندەرەك بهێت كارەكی بكەت ١٠ سالان دا ١٠ ژ سەدێ كار نەكەت، دڤێت دووڤچوون بهێتەكرن كا بۆچی پرۆژە راوەستیایە و بەلێندەر ل كیڤەیە و ئەگەر چنە.
سدقی سالح ، وەلاتیەكێ دن یێ دەڤەرێیە بۆ ئەڤرۆ گۆت: بۆ مە گەلەك گرنگە، ژبەر كو ئەم وەك خێزان دەمێن خۆ ل وێرێ ببورینن و دخوازن ئەو پروژێ شارێ یاریان بهێتە تەمامكرن كو هەم زارۆ و خێزان بشێن سەرەدانێ لێ بكەن.
محەمەد ئەمین ، وەلاتیەكێ دەڤەرێیە بۆ ئەڤرۆ گۆت: باژێرێ ئاكرێ باژێرەكێ رەنگێن و سەرنجا گەشتیاران بۆ خۆ رادكێشیت و ژبلی ناڤخۆ گەشتیارێن باشور و ناڤەراستا عیراقێ ژی قەست دكەنێ، ئەم وەك خەلكێ دەڤەرێ و گەشتیار زور دخوازین دەمێن خۆ ل ئاكرێ ب بورینین، بەلێ دەما پرۆژەێ شارێ یاریان تەمام دبیت دێ پتر گەشتیار مفای لێ بینن.
بلند رەزا، سەرۆكێ باژێرڤانیا ئاكرێ بۆ ئەڤرۆ گۆت: د نوكە دا ئەم كار لسەر دكەین بەری نوكە كومپانیایەكا دیتر هات مە هەولدان كو ئەو كومپانی بهێتە جێبەجێ بكەی، بەلێ وێ خۆ ڤەكێشا، نوكە كومپانیا كوردلاند دووماهی نڤیسار هاتیە كو ئەو كومپانی ڤی پرۆژەی جێ بە جێ بكەت، بەلێ ل دەستپێكا نڤیسارا خۆ دا داخوازا زێدەتر ژ دونەمێن ئەردی كریە كو بۆ تەرخان بكەین.