ب ئامادەبوونا د. عەلی تەتەر، پارێزگارێ دهۆكێ و خەلیل مەحمود، دەڤەردارێ سێمێلێ و چەند بەرپرسێن حزبی و ئیداری و كەسوكاران، دوهی 25/3/2025 تەرمێ خودێ ژێ رازی لیوا روكن دكتۆر «خەلیل ئەحمەد خەلیل عوبەیدی» ل گۆڕستانا دهۆكێ یا نوو ل دەڤەرا سەرتەنگێ هاتە ڤەشارتن.
پشتی رێورەسمێن ڤەشارتنێ پارێزگارێ دهۆكێ پەیڤەك پێشكێشكر و رۆلێ خودێ ژێ رازی لیوا روكن دكتۆر خەلیل ئەحمەد د ناڤ هێزێن پێشمەرگەی دا و هەلویستێن وی یێن نیشتمان پەروەری دپرسێن نەتەوەیی و نیشتمانی دا بلند هەلسەنگاند و گۆت: «خودێ ژێ رازی لیوا خەلیل كەسەكێ نێزیكی جەنابێ سەرۆك بارزانی بوو، جهێ رێزێ بوو، بناڤێ حكومەتا هەرێما كوردستانێ و خەلكێ پارێزگەها دهۆكێ سەرەخوشیێ‌ ل بنامالا خودێ ژێ رازی دكەین و دخوازین خودایێ مەزن جهێ وی بكەتە بەهەشتا بەرین و سەبر و هەدارێ بدەتە هەموو كەسوكار و هەڤال و دوستان».
هەژی گۆتنێ یە خودێ ژێ رازی لیوا روكن دكتۆر خەلیل ئەحمەد خەلیل عوبەیدیی ل سالا 1954 ل ل باژێڕێ تەلەعفەر ژ دایك بوویە و ل سالا 1972 كۆلیژا سەربازی ل بەغدا ب دوماهی ئینایە، ل سالا 2004ێ و هەتا نوكە ب پلەیا لیوا روكن ل سەر میلاكێ وەزرەتا پێشمەرگەی خزمەت كریە، هەروەسا دكتۆرا ب یاسایێ ژی وەرگرتیە، خودێ‌ ژێ‌ رازی پێر 24/3/2025 ل نەخۆشخانا ئازادی ل باژێرێ دهۆكێ وەغەركر و دوهی 25/3/2025 ل گوڕستانا نوو یا دهۆكێ‌ ل سەرتەنگێ‌ هاتە ڤەشارتن.

دهوك، لەزگین جوقی:

سەرۆكێ لیژنا ساخلەمیێ ل پەرلەمانێ ئیراقێ دیاركر، دەنگ ل سەر قانوونا ژێكجوداكرنا كەرتێ گشتیێ ساخلەمیێ و كەرتێ تایبەت یێ‌ ساخلەمیێ دێ هێتەدان و دبێژیت: هەردو كەرتێن ساخلەمیێ دێ ژێك هێنە جوداكرن.
د. ماجد شنگالێ، سەرۆكێ لیژنا ساخلەمیێ ل پەرلەمانێ ئیراقێ بۆ رۆژناما ئەڤرۆ ئاشكرا كر، خواندنا دویێ بی پێشنیارا راستڤەكرنا قانوونا چارێ یا رێزبەندیا نۆشداری یا هژمارە 6 یا سالا 2000 هاتە كرن و گەنگەشە ل دۆر راپۆرتا تایبەت و بەرسڤدانا پێشنیارێن پەرلەمانتاران هاتە كرن و گۆت: «د 15 ڕۆژان دا ئەو قانوون دێ یا ئامادەبیت بۆ دەنگدانێ و دێ بیتە بنیاتەك بۆ ئاڤاكرنا سیستەمەكێ نوو یێ ساخلەمیێ ل ئیراقێ كو كار ل كەرتێ تایبەت و گشتیێ ساخلەمیێ‌ ژێكجودا بن».

هەولێر، قائید میرۆ:

سەرۆكێ دەستەیا گشتیا وەبەرهێنانێ ل هەرێما كوردستانێ ئاشكرا كر، هەموو پڕۆژەیێن وەبەرهێنانێ یێن هاتینە راگرتن دێ هێنە تەمامكرن و وەبەرهێنەرێن پێگیر نەبن، ل گورەی قانوونێ دێ هێنە سزادان.
دكتۆر محەمەد شوكری، سەرۆكێ دەستەیا گشتیا وەبەرهێنانێ بۆ رۆژناما ئەڤرۆ دیاركر، هژمارەكا پڕۆژەیێن وەبەرهێنانێ هاتینە راگرتن و بڕیارە ئەڤ سالە دو پڕۆژە ل هەولێرێ و پڕۆژەیێن دی ژی ل دهۆكێ و دەڤەرێن دی بهێنە تەمامكرن و گۆت: «نوكە كار ل سەر تەمامكرنا وان دهێتەكرن، بەری نوكە ژی ل چەند سالێن بۆری ئاریشەیا چەندین پڕۆژەیێن راگرتی هاتیە چارەسەركرن و هندەك ژ وان هاتینە تەمامكرن و هندەكێن دی ژی كار تێدا یێ بەردەوامە».
دكتۆر محەمەد شوكری گۆتژی: «هندەك پڕۆژەیێن وەبەرهێنانێ نەهاتینە راگرتن، بەلێ ژ بەر قەیرانا دارایی كارێن وان ب سستی بڕێڤە دچن، بزاڤ دهێنە كرن، هەموو پڕۆژەیێن وەبەرهێنانێ بهێنە تەمامكرن و رێكارێن قانوونی هەمبەری وان پڕۆژەیان دێ هێنە وەرگرتن یێن وەكو پێدڤی كار نەكەن، چونكی دەستەیا وەبەرهێنانێ دووڤچوونا وان پڕۆژەیان دكەت یێن مۆهلەت وەرگرتی و دەست ب كاربووین، لەو پێدڤیە د دەمێ خۆ دا بهێنە تەمامكرن».

ئامێدیێ، مەحمود نهێلی:

ژ بۆ پتر گرنگیدان ب كەرتێ چاندنێ و گەهاندنا پڕۆژەیێن خزمەتگوزاری بۆ جۆتیاران، دەست ب چێكرنا جۆیا گوندێ بەرچی ل سنوورێ ناوچەدارییا دێرەلۆكێ‌ هاتە كرن و پارێ پێدڤی بۆ هاتیە تەرخانكرن.
رێبەر سادق، رێڤەبەرێ ناوچەدارییا دێرەلۆكێ‌ بۆ رۆژناما ئەڤرۆ دیاركر، ژ بۆ پتر خزمەتكرنا جۆتیاران و پێشڤەبرنا كەرتێ چاندنێ، زێدەباری رەوشا ئالۆزا دەڤەرێ و شەڕێ بەردەوام ل ڤێ ناوچەیێ، دەست ب چێكرنا جۆیا گوندێ بەرچی هاتە كرن و گۆت: «ئەڤ پڕۆژەیە ژ چێكرنا جۆیا گوندێ ناڤهاتی ب درێژاهیا دو هزار و 100 مەتران پێك دهێت و گوژمێ 212 ملیۆن دیناران بۆ هاتینە تەرخانكرن».
ناڤهاتی گۆتژی: «نوكە دەست ب چێكرنا پڕۆژەی هاتیە كرن، ب داوی هاتنا ڤی پڕۆژەی خزمەتەكا باش یا جۆتیارێن ڤێ دەڤەرێ دێ هێتە كرن».

زنار تۆڤی:

رێڤەبەرێ گشتییێ چاندنێ ل پارێزگەها دهۆكێ بۆ رۆژناما ئەڤرۆ دیار كر، مەترسییا هشكەسالییێ ل سەر پڕانییا زەڤیێن گەنمی ل پارێزگەها دهۆكێ نەمایە، ب تنێ ئەو مەترسییە د دەمەكی دایە، كو ل ڤی وەرزێ بارنبارینێ، ب تنێ 109 میلیمەترێن بارانێ ل دهۆكێ بارینە، بەلێ ل وەرزێ بارینا بۆری هەتا ڤی دەمی 509.3 ملیمەترێن بارانێ ل دهۆكێ باریبوون.
ئەحمەد جەمیل، رێڤەبەرێ گشتییێ چاندنێ ل پارێزگەها دهۆكێ گۆت: «ژ بلی سێمێلێ، هەموو دەڤەرێن دیتر یێن پارێزگەها دهۆكێ مەترسییا هشكەسالییێ ل سەر نەمایە، راستە باران كێم بارینە، بەلێ وەكو پێدڤی و د دەمێ پێدڤی دا باران بارییە، لەوما رەوشا گەنمی یا باشە».
ناڤهاتی ئەو ژی گۆت: «ل سنۆرێ پارێزگەها دهۆكێ نێزیكی 900 هزار دۆنەمێن ئەردی بۆ چاندنا گەنمی هەنە، هەروەسا نێزیكی 150 هزار دۆنەمێن ئەردێ چاندنێ ل سنۆرێ قەزا سێمێلێ هەنە، ژ ئەگەرێ كێم باران بارینێ رەوشا ئەوان زەڤیێن گەنمی گەلەك یا خرابە، هەروەسا ئەڤ سالە، ژ ئەگەرێ كێم باران بارینێ، مەترسییا هشكەسالییێ ل سەر ژێدەرێن ئاڤێ ژی ل پارێزگەها دهۆكێ دێ هەبیت».

زاخۆ، دلۆڤان هالۆ:

ل سالا 2020ێ ل كۆمەلگەها چەمكویركێ یا سەر ب ناحیا ڕزگاری ڤە ل ئیدارەیا سەربخوە یا زاخۆ، گۆڕەپانا ڕاوەستاندنا تڕۆمبێلێن بارهەلگر ژ لایێ خودانێ ئەردی ڤە و ب بڕیارا ڕێڤەبەرێ پێشتر یێ ناحیا ڕزگاری دبنە 53 پارچە زەڤی، و هەر پارچەیەكا وی ئەردی ب گۆژمێ 110 هزار دولاران ب وەلاتیێن زاخۆ دهێنە فرۆتن، پشتی وان وەلاتییان ب نڤیسارا فەرمی و ب بڕیارا ڕێڤەبەرێ پێشتر یێ ناحیا ڕزگاری ئەو پارچەیێن ئەردی بۆ خوە كڕینە، پشتی سێ هەیڤان ئەڤ بڕیارە دهێتە ڕاوەستاندن و هەتا نوكە چارەنڤیسێ وان پارچەیێن ئەردی نەیێ‌ دیارە.

حەمید مستەفا، ئێكە ژ خودانێ پارچەیا ئەردی بۆ ڕۆژناما ئەڤرۆ دیار كر، ئەڤە ژ سالا 2020 وەرە من و چەند كەسێن دی ئەڤ پارچەیێن ئەردی ب نڤیسارا فەرمی و ب بڕیارا ڕێڤەبەرێ پێشتر یێ ناحیا ڕزگاری و قایمقامیا قەزا ناڤەندی یا زاخۆ كڕینە، لێ پشتی هینگێ ب سێ هەیڤان ئەڤ بڕیارە هاتە ڕاوەستاندن، گۆتنە مە چێنابیت هوون ڤان پارچەیێن ئەردی ئاڤا بكەن چونكی زێدەگاڤینە، لەوما هەتا نوكە ئەڤ ئاریشە مایە هەلاویستی و ئەم نەشێن پارچە ئەردێن خوە ئاڤا بكەین.
حەیدەر شوكری، ئێكە ژ خودانێن پارچەیا ئەردی دبێژیت:»ژ سەرجەمێ 53 پارچەیێن ئەردی ب تنێ 13 هاتینە ئاڤاكرن، یێن پارچەیێن خوە یێن ئەردی ئاڤاكرین ژی، هەر ئێك ژ وان ب گۆژمێ سێ ملیۆن دیناران دێ هێتە سزادان، و خودانێن ڤان پارچەیێن ئەردی هەمی كرێدارن و پێشمەرگە و زیندانیێن سیاسی و زاڕۆكێن شەهیدانن، ئەڤە پێنج سالە پارێن خوە هەموو داینە ب ڤان پارچەیێن ئەردی».
ئەدیب جەعفەر، ڕێڤەبەرێ ناحیا ڕزگاری ل زاخۆ، گۆت:»مە ئاگەهـ ژ ئاریشا خودانێن وان پارچەیێن ئەردی هەیە، و چەندین جاران سەرەدانا مە كرینە و نڤیسارێن فەرمی ژ لایێ مەڤە هاتینە بلند كرن بۆ قایمامیا قەزا ناڤەندی یا زاخۆ، هەتا نوكە ژی ئەڤ ئاریشە ل دادگەهێ ب دووماهی نەهاتییە، ئەم ژی یێ ل هیڤییا بڕیارا دوماهیێ یا دادگەهێ كو چارەنڤیسێ وان پارچە زەڤییان بهێتە ئێكلاكرن».