قەیس وەیس:

فدراسیۆنا ئیراقێ‌ بۆ یارییا پایسكلان ڕاگەهاندن ئەوان ڕازیبوونا فەرمی ژ فدراسیۆنا عەرەبی یا هەمان یاری وەرگرتییە ب ڕێكخستنا مەزنترین كەرنەڤالێ‌ كۆپا عەرەبی ل سەر ئاستێن جودا و ئەڤچەندە هات پشتی ل سەر بادەكا ئیراقێ‌ ڕازیبووین.
د داخویانیەكا رۆژنامەڤانی دا عەلی حەمید سەرۆكێ‌ فدراسیۆنا پایسكلڤانێن ئیراقێ‌ گۆت: پشتی دووركەفتنا 40 سالان ژ ڕێكخستنا قارەمانیێن عەرەبی و كێشوەری و نێڤدەولەتی و دەرئەنجامێ‌ بزاڤێن مەزن یێن سەرۆك وەزیرێن ئیراقێ‌ محەمەد شیاع ئەلسودانی و سەرۆكێ‌ لژنەیا ئۆلمپی و بەرپرسێن حكومەتا هەرێما كوردستانێ‌ ئەم شیاین ڕازیبوونا فەرمی ژ فدراسیۆنا پایسكلڤانێن عەرەبی وەربگرین ب مێڤانداریكرنا مەزنترین كەرنەڤالێ‌ كۆپا عەرەبی بۆ یارییا پایسكلان ئەوا بڕیار هاتییە دان ل باژێرێ‌ سلێمانیێ‌ یا هەرێما كوردستانێ‌ ل چرییا ئێكێ‌ یا بهێت مێڤاندارییا وێ‌ بكەت.
هەروەسان ناڤهاتی گۆت: بادەكا ئیراقێ‌ یا ڕێكخستی بوو، شیا هەموو مەرجان بجهـبینت، ژ وانا جهێ‌ قارەمانیێ‌، ئارامییا كوردستانێ‌، ژێرخانەیا وەرزشی، فرۆكخانە و جهێ‌ بەریكانێ‌، لەوما ژی ب رێژەكا گەلەك باش ب سەركەفت ل سەر ئەو وەلاتێن هەڤڕكییا مە كرین ب مێڤانداریكرنێ‌، بڕیارە سەرۆكێ‌ فدراسیۆنا عەرەبی د رۆژێن بهێت دا بگەهیتە بەغدا و دووڤدا بچیتە هەرێما كوردستانێ‌ بۆ وەرگرتنا پێزانیان و دیتنا بەرچاڤ، هەروەسان سەرۆك وەزیرێن ئیراقێ‌، لژنەیا ئۆلمپی و بەرپرسێن وەرزشی ل هەرێما كوردستانێ‌ بەرهەڤییا خوە دیاركرینە بۆ هەڤكاریێ‌ پێخەمەت سەركەفتنا ڤێ‌ كەرنەڤالا عەرەبی.
بۆ زانین فدراسیۆنێن وەرزشی یێن ولاتێن عەرەبی پێشتر بۆ هەر قارەمانییەكێ‌ ل ئێك ژ باژێرێن هەرێما كوردستانێ‌ ئاسانكاری پەیداكرینە و كەیفخوەشیا خوە دیاركرینە، ل سالێن بۆری چەندی قارەمانیێن عەرەبی ل پارێزگەها دهۆكێ‌، هەولێر و سلێمانیێ‌ هاتینە كرن، ژ وانا قارەمانییا كیك بۆكسینگێ‌ ل پارێزگەها دهۆكێ‌ و قارەمانیێن شەترەنجێ‌، ڤۆلی بۆلێ‌، باسكێت بۆلێ‌، تێنسا ل سەر مێزێ‌ ل هەولێر و سلێمانیێ‌.

عەلی حاجی:

ب فەرمی هەلبژارتیێ‌ باسكێت بۆلا ئیراقێ‌ پلێتا دەربازبوونێ‌ بۆ كۆپا ئاسیا ب دەستڤە ئینا پشتی ل شەڤا دەربازبوویا رۆژا ئێكشەمبی سەركەفتن ل سەر هەلبژارتیێ‌ بەحرەینێ‌ ئینا ب 85 خالان بەرانبەر 72 خالان، د هەڤڕكیێن كۆما دەڤەرا رۆژئاڤا ئاسیا ئەوا ل وەلاتێ‌ بەحرینێ‌ هاتییە كرن.
حسێن ئەلعمێدی سەرۆكێ‌ فدراسیۆنا باسكێت بۆلا ئیراقێ‌ بۆ رۆژنامەیا ئەڤرۆ گۆت: پێخوەشحالین ئەو خەون و هیڤیێن مە یێن بۆ ماوەیێ‌ هەشت سالە دۆبارە ڤەگەڕیت و پلێتا دەربازبوونێ‌ بۆ كۆپا ئاسیا 2025ێ‌ ب دەستڤە بینن ئەوا دێ‌ هەڤڕكیێن وێ‌ ب پشكدارییا 20 هەلبژارتیێن ئاسیا ل تەباخا ئەڤ سالە ل سعۆدیێ‌ هێتە كرن، پیرۆزباهیێ‌ ل هەموو گەلێ‌ ئیراقێ‌ و كوردستانی دكەم، دێ‌ ب پشتەڤانییا لژنەیا ئۆلمپی كارەكێ‌ مەزن هێتە كرن پێخەمەت پشكدارییەكا سەرفەراز و دەستڤە ئینانا پلێتا دەربازبوونێ‌ بۆ مۆندیالا جیهانی.
لدۆر ڤێ‌ یەكێ‌ محەمەد عەلی موردا یاریزانێ‌ یانەیا زاخۆ و هەلبژارتیێ‌ ئیراقێ‌ بۆ رۆژنامەیا ئەڤرۆ گۆت: هەستەكێ‌ مەزنە دگەل هەلبژارتیێ‌ ئیراقێ‌ تیما خوە دەربازبكەینە كۆپا ئاسیا، پێنەڤێت پشكدارییا یاریزانێن كوردستانی كاریگەرییا خوە یا باش هەبوو و رۆلەكێ‌ مەزن هەبوو د تۆماركرنا خالان دا، ئەڤە ژی وێ‌ چەندێ‌ دیار كەت كو یاریزانێن كوردستانی خودان شیان، ب هیڤییا وێ‌ یەكێ‌ د كۆپا ئاسیا دا بشێن باشتر و بەر ب دەستڤە ئینانا دەستكەفتەكێ‌ باش و دەربازبینە مۆندیالا جیهانی.
بۆ زانین ل دووڤ ئەوێ‌ لیستا ڕاهێنەرێ‌ هەلبژارتیێ‌ ئیراقێ‌ یێ‌ سربی فازلین ماتیچ چار یاریزانێن كوردستانی د ناڤ دانە كو پێكهاتینە هەر ئێك ژ، محەمەد عەلی موراد ژ یانەیا زاخۆ، فەرید رەعدی خەلكێ‌ باژێرێ‌ دهۆكێ‌ ئەوێ‌ یارییا دگەل بەحرەینێ‌ ژبەر ئەگەرەكێ‌ تایبەت بەردەوام نەبوو، ژ یانەیا ئەلكەرخ یا بەغدایی، محەمەد ئەمین عەبدولخالق خەلكێ‌ هەولێرا پایتەخت ژ یانەیا غاز ئەلشیمال و رێكان عوسمان یێ‌ ڕەڤەندا كورد ل ئۆرۆپا و یانەیا شورتە یا بەغدایی.

ڕاهێنەرێ‌ هەلبژارتیێ‌ فوتبۆلا ئیراقێ‌ یێ‌ ئسپانی خیسوس كاساس دیار كر ل رۆژا سێ‌ شەمبیێ‌ بەرانبەر هەلبژارتیێ‌ فلەستینێ‌ یاریزان مێرخاس غازی دۆسكی یاریێ‌ ناكەت و دێ‌ هارۆن ئەحمەد یێ‌ بەرهەڤبیت، ئەوا بڕیار ژ چارچووڤەیێ‌ گەڕا حەفتێ‌ یا كۆما دویێ‌ ژ ڤاڤارتنێن دەربازبوونێ‌ بەر ب مۆندیالا جیهانی2027ێ‌.
ل دۆر ڕاگەهاندنا فەرمی خیسوس كاساسی دووركەفتنا یاریزانێ‌ ڕەڤەندا كورد و پارێزگەها دهۆكێ‌ مێرخاس غازی دۆسكی ژ پێكهاتیێ‌ هەلبژارتیێ‌ خوە دۆپات كر بەرانبەر هەلبژارتیێ‌ فلەستینێ‌ ژبەر هەبوونا چار كارتێن زەرد و ئەڤچەندە ب دەنگۆباسەكێ‌ نە خوش دا دیاركرن ژبەر پشت گەرمییا وی ب ئاستێ‌ یاریزانێ‌، لێ‌ د هەمان دەمدا بەرهەڤبوونا هەر ئێك ژ هارۆن ئەحمەد ستێرێ‌ یانەیا دهۆكێ‌ و خەلكێ‌ باژێرێ‌ ئاكرێ‌ و ڤەگەڕیانا ستێرێ‌ یانەیا زاخۆ ئەمجەد عتۆان بۆ ناڤ رێزێن پێكهاتیێ‌ تیما خوە پشت راست كرییە.
د دیدارەكێ‌ دا هارۆن ئەحمەد بۆ رۆژنامەیا ئەڤرۆ دیار كر پشكدارییا وی دگەل هەلبژارتیێ‌ ئیراقێ‌ د ڤاڤارتنێن كێشوەرێ‌ ئاسیا بۆ مۆندیالا جیهانی ئێك ژ هیڤیێن وی بوو و خەونا هەر یاریزانەكی یە ل سەر ئاستێ‌ ئاسیا ژی یاریێ‌ بكەت، هەردەمێ‌ من یاری كر ئەوا دشیان دا بیت دێ‌ ئاستێ‌ خوە نیشان دەم وەكو ئێك ژ یاریزانێن كورد دناڤ ڕێزێن هەلبژارتیێ‌ ئیراقێ‌ دا.
ژلایەكێ‌ دووڤە ڕاهێنەرێ‌ ئیراقێ‌ ترسا خوە دیار كرییە كو هەر ئێك ژ ئەیمەن حسێن، ئەمیر ئەلعماری، حسێن عەلی و زێدان ئیقبال كو چو كارتێن زەر نە وەرگرن د یارییا بەرانبەرد هەلبژارتیێ‌ فلەستینێ‌ دا، پێخەمەت یارییا بەرانبەر كوریا باشۆر ئێك ژ یاریێن چارەنڤیس د بەرهەڤبن.

سولین سلێمان
ئازاد حەمزە یاریزان و راهێنەرێ لەشجوانیێ بۆ ماوه‌یه‌كه‌ به‌رهه‌ڤییان بۆ قاره‌مانییا نێڤده‌وله‌تی كه‌ت ئه‌وا بڕیاره‌ هه‌ڤڕكیێن وێ ل ده‌ستپێكا گۆلانا بهێت ل وه‌لاتێ سوید بهێته‌ كرن كو دهێته‌ هژمارتن ئێكانه‌ یاریزانێ كورد پشكداره‌.
ناڤهاتی بۆ رۆژنامه‌یا ئه‌ڤرۆ گۆت: وەکو ئێکانە کورد دێ پشكداریێ د قاره‌مانییا نێڤده‌وله‌تی یا سوید داكه‌م، هیڤیدارم ئەڤ جارە ژی بشێم ئەنجامەکێ باش دەستڤەبینم، ژبه‌ركو ئه‌ڤ قاره‌مانییه‌ ئێکە ژ مەزنترین هه‌ڤڕكییانه‌ هەر جاران پتر ژ٣٥ هەتا٤٠ وەلاتان پشکدارن و هه‌موو یاریزانێن نیڤدەولەتی نە، وەکو کوردەک نیشا هەموو جیهانێ دەم کو مە کوردان ژی قاره‌مان هەنە دشێین وەکو هەر وەلاتەکێ دی ئاستێن بلند نیشانبدەین.
ئازاد زێدەتر گۆتژی: ل هەر قارەمانیەکێ من پشکداری تێدا کربیت ئالایێ کوردستانێ من بلند کریە، ل سێ قاره‌مانیێن پێشتر هەر ب ناڤێ کوردستانێ من پشکداری کریە، ل قارەمانیەکا سویدا ب ناڤێ Iron world open 2023 تێدا ب پشکداریا ٢٧ وەلاتێن جور ب جور دا من شیا پلا ئێکێ دەستڤەبینم، پشتێ وێ دوبارە سەر ئاستێ هەمی ئێکەما قاره‌مانیه‌ك هاتەئەنجام دان دوباره‌ بۆمە یێ ئێکێ سەر ئاستێ هه‌موویاریزانان.
ناڤهاتی ژ دایکبویێ سالا ١٩٨٩ یە ماوێ ١٨ سالانە ناڤا ڤێ وەرزشێ دایە و هه‌تا نۆکەژی یێ بەردەوامە، پشکداری چەندین قارەمانیێن جیهانیدا کرینە پلێن زۆرباش دەستڤەئینایە.