هەولێر، قائید میرۆ

بەرپرسەكێ پارتی دیموكراتی كوردستان راگەهاند: پشتی روودانێن 16ی ئۆكتۆبەرێ عەرەبێن هاوردە ڤەگەڕیاینە سەر ئەردێ كوردان ل دەڤەرێن كوردستانی یێن ژ دەرڤەی ئیدارەیا هەرێما كوردستانێ و دبێژیت: چەندین ئاریشە بۆ جۆتیاران پەیدا كرینە، بەلێ پارتی و سەرۆك بارزانی بەردەوام پشتەڤانییا جۆتیارێن كورد ل دەڤەرێن كوردستانی دكەن.
سەنگەر كانەبی، بەرپرسێ لقی 23ێ پارتی دیموكراتی كوردستان بۆ رۆژنامەیا (ئەڤرۆ) گۆت « رەوشا دەڤەرێن كوردستانی پشتی روودانێن 16ی ئۆكتۆبەرا سالا 2017ێ بەر ب رەوشەكا نەخواستی چوویە، چونكە عەرەبێن هاوردە یێن د چارچۆڤەیێ هەوا ب عەرەبكرنا دەڤەرێن كوردستانی هاتینە سەر ئەردێ كوردان ڤەگەڕیاینە جهێن خوە، پشتی پرۆسەیا ئازادییا ئیراقێ ئەو عەرەبێن هاوردە ڤەگەڕیابوونە دەڤەرێن عەرەبی و جۆتیارێن كورد ژی ڤەگەڕیابوونە سەر گوند و ئەردێ خوە، بەلێ عەرەبێن شۆڤێنی روودانێن 16ی ئۆكتۆبەر وەك دەلیڤە زانی جارەكادی ئەردێ كوردان داگیربكەن و نوكە ڤەگەڕیاینە سەر زەڤیێن جۆتیارێن كورد و ئاریشەیان بۆ وان پەیدا دكەن، هەرچەندە ئەو دەڤەرێن هێزێن پێشمەرگەی تێدا چو ئاریشە لێ نینن، بەلێ ئەو دەڤەرێن د بن دەستهەلاتا هێزێن ئیراقێ ڤە عەرەبێن هاوردە دەست ب ئاریشەیان كریە، ب تایبەتی ل مەخموور و سەرگەران، هەر د كەڤندا هندەك عەرەب ل وان دەڤەران هەبوون و نموونەیەكا جوان یا پێكڤەژیانێ بوون، چونكە مە چو ئاریشە دگەل عەرەبێن رەسەن یێن دەڤەرێ نینن و وەك برا هەر د كەڤندا پێكڤە ژیاینە، بەلێ ئاریشەیا مەزن دگەل عەرەبێن شۆڤێنی یە، هیچ دەمەكی ئاریشە د ناڤبەرا كورد و عەرەبێن رەسەندا نەبوویە، بەرۆڤاژی پێكهاتەیێن دەڤەرێ ب درێژاهییا دیرۆكێ پێكڤەژیاینە و ڤێ چەندێ ل رێبازا بارزانیێ نەمر دا ژی رەنگڤەدایە و بابەتێ پێكڤەژیانێ پرسەكا گرنگ بوویە».
سەنگەر كانەبی ئاماژەكر» پارتی دیموكراتی كوردستان ب سەرۆكایەتییا سەرۆك بارزانی پشتەڤانییا جۆتیارێن كورد دكەت و ل سالێن بۆری ژی حوكمەتا هەرێما كوردستانێ ب سەرۆكایەتیا مەسرور بارزانی چەندین هاریكاری پێشكێشی وان جۆتیار كریە، پشتەڤانییا پارتی و سەرۆك بارزانی بۆ كوردێن دەڤەرێ دێ یا بەردەوام بیت، هەروەسا ل پاشەڕۆژێ دێ حوكمەتا هەرێما كوردستانێ پشتەڤانییا زێدەتر پێشكێشی جۆتیارێن دەڤەرێن كوردستانی یێن دەرڤەی ئیدارەیا حوكمەتا هەرێما كوردستانێ كەت، چونكە كەرتێ چاندنێ ئێكە ژوان كەرتێن حوكمەتا هەرێمێ و سەرۆكێ حوكمەتێ ب خوە ژی گەلەك گرنگیێ ب ڤی كەرتی ددەت و بەردەوام كار بۆ پێشڤەبرنا كەرتێ چاندنێ هاتیەكرن».

عەزیز هەورامی:

چاڤدێرەكێ سیاسی راگەهاند: رەوشا دەڤەرێ ژ كوردان دخوازیت د ئێكگرتی بن و بەرهەڤی گورانكارییان بیت، هەروەسا ب نێزیكبوونا پارتی و ئێكەتی دێ حوكمەتەكا ب هێز هێتە پێكئینان بۆ پاراستنا قەوارەیێ هەرێما كوردستانێ.
فازل بەشارەتی، چاڤدێرێ سیاسی بۆ رۆژنامەیا (ئەڤرۆ) گۆت» ئێكگۆتارییا كوردان، بۆ قۆناغا نوكە یا گرنگە ژ بەر كو هەكە بڕیارێن مە یێن سیاسی د ئێكگرتی نەبن، وی دەمی نەشێین مللەتێ خوە پشتڕاست بكەین ژ سەركەفتنا سیاسەتا مە بۆ مللەتی».
بەشارەتی گۆت ژی» گۆرانكاری ل دەڤەرێ ب لەز یێ پەیدا دبن، دڤێت خوە بەرهەڤ بكەین و خواندنەكا گرنگ بۆ روودانان بكەین لەوما پێدڤییە بەرهەڤییا مە ب رێكا ئێكگرتنا مە بیت، ب تایبەتی نێزیكبوونا پارتی دیموكراتی كوردستان و ئێكەتی نیشتمانی كوردستان».
ناڤبری ئاماژەكر» چەند پارتی و ئێكەتی ژ هەڤدو نێزیك ببن، دێ دوژمنان ژ ناڤخوە دا دەركەین و دێ شێین مللەتێ خوە پشتڕاست كەین و دلخوەش ژی كەین ب وێ سیاسەتا دكەین بۆ خزمەتا مللەت و وەلاتێ خوە، ژ بەركو هەكە هەردو ئالی نێزیكی هەڤدو نەبن، نەشێین مللەتێ خوە ژ سەركەفتنێ وئارامیێ پشتڕاست بكەین».
وی چاڤدێرێ سیاسی رۆهنكر ژی» هەتا ئەم نەبینە خودانێن حوكمەتەكا ئێكگرتی ل هەرێما كوردستانێ، نەشێین ببینە خودانێن گۆتارەكا ئێكگرتی و سەركەفتی، یان هێزەكا ئێكگرتییا دوژمن شكێن، ژ بەر كو هەردەم دوژمن د كەمینان دا نە دژی مە بۆ نەهێلانا مە».
خویاكر ژی» ئێك هەرێم،ئێك پەرلەمان، ئێك حوكمەت و ئێك هێزا پێشمەرگەی مە پشتڕاست دكەت كو دێ د راستگۆبین ل گەل وان درووشمێن مە ل دەمێ هەلبژارتنان بۆ مللەتێ خوە بلند دكرن، لەوما كابینەیا دەهێ یا حوكمەتا هەرێما كوردستانێ ب سەرۆكایەتییا مەسرور بارزانی دێ حوكمەتا ئێكگوتار و ب هێز و نێزیكبوونا پارتی و ئێكەتیێ بیت».

سەرۆکێ ئەنجوومەنێ نشتیمانی یێ کوردی ل سووریێ راگەهاند د دەمەکێ نێزیک دا دێ رێککەفتنا خوە و پەیەدێ راگەهینن و وەلاتیێن کورد ل رۆژئاڤایێ کوردستانێ ژی دیار دکەن رێککەفتنا هەر دو جڤاتێن کوردی دێ بیتە ئەگەرێ بهێزبوونا پێگەهێ کوردان ل سووریێ.

محەمەد ئیسماعیل سەرۆکێ ئەنجوومەنێ نشتیمانی یێ کوردی ل سووریێ دیار کر، د کۆمبوونا هەری دووماهیێ یا د ناڤبەرا وان و پەیەدێ دا ئەو ل سەر گەلەک خالان رێککەفتینە و دێ د دەمەکێ نێزیک دا رێککەفتن هێتە راگەهاندن و ئەو یەک دێ کاریگەریا خوە یا گەلەک باش ل سەر رۆژئاڤایێ کوردستانێ هەبیت و گۆت: (ئەم ل سەر گەلەک خالان رێککەفتینە، ئارمانجا مە بەرژەوەندیێن پارتەکا سیاسی یان ژی هەرێمەکێ نینە، بەلکو مە دڤێت مافێن گەلێ کورد د چارچۆڤەیێ سووریا نوو دا بهێنە پاراستن و ئەم بۆ پاراستنا مافێن گەلێ کورد ل سووریێ کار دکەین و هەموو خالێن کو مە و پەیەدێ رێککەفتن ل سەر کرینە ژی بێگومان دێ خزمەتا ڤێ ئارمانجێ کەن).
سەبارەت ب ناڤەرۆکا رێککەفتنێ ژی سەرۆکێ ئەنجوومەنێ نشتیمانی یێ کوردی ل سووریێ دیار کر، ئەو ل سەر خالێن گشتی رێککەفتینە، کو د بەرژەوەندیا کوردێن سووریێ دانە و بێگومان هەکە رێککەفتن وەکو خوە بهێتە بجهئینان دێ کاریگەریا خوە یا گەلەک باش ل سەر پاشەرۆژا رۆژئاڤایێ کوردستانێ کەت و گۆت: (وەکو ئەنجوومەنێ نشتیمانی یێ کوردی ل سووریێ ب سالانە ئەم کار بۆ ئارمانجێن نەتەوەیی یێن گەلێ کورد ل سووریێ دکەین و رەوشا نها د بەرژەوەندیا گەلێ کورد دایە و کورد دشێن د چارچۆڤەیێ سووریا نوو دا بگەهنە هەموو مافێن خوە).
ل ئالیێ دی وەلاتیێن کورد ل سووریێ و رۆژئاڤایێ کوردستانێ ژی دلخوەشیا خوە ل هەمبەر رێککەفتنا هەر دو جڤاتێن کوردی یێن رۆژئاڤایێ کوردستانێ دیار کرن و داخواز کرن کو رێککەفتن د زووترین دەم دا بهێتە راگەهاندن و هەر دو ئالی ژی پێگیریێ ب رێککەفتنێ بکەن، چونکی رێککەفتنا هەر دو جڤاتێن کوردی د رەوشا نها دا دێ بیتە ئەگەرێ بهێزبوونا پێگەهێ کوردان ل سووریێ.
چاڤدێرێن سیاسی ل رۆژئاڤایێ کوردستانێ ژی دیار دکەن دڤێت رێککەفتنا ڤێجارێ وەکو یێن بەری نها نەبیت، چونکی بەری نها ژی چەندین رێککەفتن د ناڤبەرا هەر دو جڤاتێن کوردی دا هاتنە کرن لێ نەهاتنە بجهئینان، دڤێت ڤێجارێ رێککەفتن وەکو خوە بهێتە بجهئینان.