د. عارف حیتۆ

ئاوڕا تە.. سترانبێژەکا «ڕاپ»ێیە
نەشێم پەیڤێن وێ ڤاڤێرم، لێ دوێرم
گوهێن خوە ل بەر دانم ڕادار
ئاوازا ڕویت گەردیلەیێن بای دشەقینیت
سەرێ من ل دۆر وێ دزڤڕینیت.
چاڤێن مە بۆ چرکەیەکێ کەفتنە سەرێک
خەندەیەکا بلەز و سەرپێ، ژیندۆستیێ دتەیسینیت.
*
ل وێ ئێڤارێ.. من ل بەر نەبوو ژ مال دەرکەڤم
بێهنا قەهوێ و تیڕۆژکەکا ب بیستانیڤە گیرۆبووی
بنێ پێن من خوڕاندن و فڕاندمە بەر ئاسمانی
یا ڕوهن نەبوو کا دێ چەوا و بۆ کیڤە کەڤم
هەکو عەردی ب بای ڕانای و دیدار دانای،
من خوە دیت یێ ل «مێدیا سەرای»
قەهوێ ڤەدخۆم و دبشکڤم.
*
سوحبەتەکێ.. سوحبەتەکا دی دکێشا و
ب خوەنەویستی گەهشتینە هنداڤ ئێشا
ژ گریا وێ، باران بارین و کەنیا وێ..
ئەڤینی ل بەر متایێ دنیایێ دکێشا..!
ما دێ چ ل ڤێ هەبوونێ کەم؟!
تەڤ سۆزێن وێ ژ سەر پشتا هەسپی کەفتن و
ب هەڤڕانێ ماییڤە بەقەم.
*
کەس چ جاران..
ب پلەکێ ناگەهیتە سەر ملەکێ
زویرک ل هیڤیا مە بەهین
ناتۆرڤانێ باغێ میری، میر د دۆشت و
گلی دکرن ژ فەلەکێ
ئەگەر تو ل باوەشا من بای، بەس مەهەکێ
دا پرتکینم (..).
*
لێڤێن تە مشەختینە ل سەر ڕێ
لێڤێن من ژی هەر چاڤەڕێ
هەکو ڕۆناهییا گلۆپان ژ جاددا ڤەدبیت
کاروانەکێ خەریبیێ ب هیڤیێڤە ڕبیتە دبیت
لێڤێن من ب خوەشی، خوە داردەستی مشەختان دکەن
هەمی خەون ڤەدوەریێنە سەر دیتنێ و
پەیڤێن نەگۆتی سەماڤان، ل سەر سککەیەکێ ڕاستەڕێ.
*
وەکو هەر سەربازێ ب سەرکەفتن ڤەگەڕایی
من تو ب توندی هەمبێزکری، هاکەزایی
بێهنا بارووتێ ژ جلکێن من یێن نەشووشتی دفڕی و
ئەڤینییەک د چاڤێن هنگڤینیدا دنڕی
ڕۆژێ خوە ل سەر توخیبی متکر و کەرەکێ حەساوی
ل وێ مێرگا ب ژڤانەکێ کەل ڕازایی، د زڕی..!
نە هەر تشتێ هاتییە گۆتن، یان بێتە گۆتن ڕاستییە.
*
تە هێلینەکا خوەشک دانا و ل سەر پشتا،
ئایەتەکا نەشرۆڤەکری ل کۆتانا.. کرە نیرڤانا
ل وی دەمێ بانگێ سپێدێ، گوهێن گوهدار گرانکرین
من دەست دا تویرکێ ڕامانا، دا ببارینمە سەر پەیمانا
لێ پۆلیسان ئەز گرتم و ب قەیدێن ئاسنین بەستم
نەهێلان بەندۆشکا بدانێمە بەر ددانا
ئەزەکێ ب گەهینا تە مەستبوویی، ب تەڤە شکەستم.
*
ببۆرە جان..
من نەگۆتبوو تە.. کو کەسەکێ خەفەتبارم
ب زەوجینا ل گەل پەیڤان… تۆمەتبارم!
نەچارم کو هەردەم ژ دیدارێ ڕەڤیمە و بێ قەرارم
وەلێ هەکو پۆلیسان تو ل سەر کانیێ گرتی
ئەز ب پێژنا تەڤە دیتم، ئێدی نەما ژێ بڕەڤم..
چونکو هەردەم د دەلنگا تە دهەلنگڤم.
*
هەر سوبەهییەکا بهێت
دبێژم بەلکو کەنی ل گەل بێت
عەمر بۆری و هەمی سوباهی وەکهەڤن
خەمان دهاڤێژنە سەر خەمان
ل سەر ڕێ دچینن، بەرپێک و کەلەمان
ئو دیدارا مە یا کو دێ هێتە کرن، دکەنە تەڤن.
*
ئەز پرت پرت بووم و هشیار نەبووم
ل بەر دەنگێ دێوێ ئاسمانی
چیای پرتێن من ڤێدان و کرنە تابڕک
ژبۆ دیدەڤانێن کەڕ و لال
زیندانی یێن ڕاستی هەڤال،
خوە حەشاندە د خەیالێدا و نە زڤڕین مال
نزا بۆچی ئەز هندە مایمە ل ژڤانی و
ژڤانێ من، سۆتماکێ کوچکێ ئیزیسێ!

عبدولرەحمان بامەرنی

هەردەما كەفتە ناڤ نڤینێن خوە، ئێكەم تشتێ رێگرییێ ل خەوەكا خۆش دكەت، دەستێن وینە. ئەڤە رۆژا سەیدایی گۆتییێ دەستێن تە وەك یێن هەمیا نینن! هەر شەڤ دەستەك دهێت و خەوێ ژ چاڤێن وی ڤەدرەڤینیت. وێ شەڤێ دەستێن چایچییەكی بەلا خوە ژێڤەنەدكرن و ل دەك پەیالە رادكرن، پێنج پەیالە و شەش پەیالە و حەفت پەیالە و هەمی ژی دتژی چا. گۆتە خوە، ئەڤە ژی وەك نەخۆشیەكێ یە و هەڤالەكێ وی بۆ پێشنیارا سەرەدانا نوژدارەكێ تایبەتمەند كر. ئەرێ دڤێت نۆژدارەك پشكنینا من بكەت، چ تیشكەكێ بۆ من بگریت یان پشكنینا خوینا من بكەت، چ زانم، ئەڤە كارێ وییە و یا ل سەر من ئەز بكەم، ددەمێ پێدڤی دا ئەز ل كلینیكا وی یێ بەرهەڤ بم و هەر گاڤا سكرتێری ناڤێ من گازی كر، ئەز بەرەڤ دەرگەهێ نۆژدار تێڤە بچم و هەر پرسیارا وی ژمن كر، ئەز دێ بەرسڤێ دەم. ئەرێ دێ بەرسڤا هەمی پرسیارێن وی دەم. مانێ ئەز ژ هەڤالێ خوە دزانم، دەما ئەز دگەل وی چوویمە كلینیكا نۆژاری و گۆتییێ ددانێ من یێ دئێشیت. پشتی پشكنینێ، نۆژداری گۆتێ ددانێ تە چ تێنەمایە و دڤێت بهێتە هلكێشان! نەخێر ئەز ب پێشنیارا هەڤالێ خوە ناكەم و دترسم نۆژدار دەستێن من ژ قوقلكێ بینتە دەرێ و مانێ سەیدا ژمن و هەڤالێ من و نۆژداری ژی باشتر دزانیت. یا گۆتی دەستێن وە یێن مەنە و ئەو دبن كۆنترۆلا مەڤەنە. هەر گاڤا مە ڤییا دێ پێكڤە دەستێ خوە بلندكەن و هەر گاڤا مە ڤیا دێ ئیننە خوارێ و دەما من گۆتییێ: قوربان، ئەڤە ژوێ رۆژا جەنابێ تە گۆتی دەستێن تە وەك یێن هەمیان نینن، خەو ب چاڤێن من نەكەفتییە و هەر شەڤ دەستەك لمن دبیتە مێهڤان و ناهێلیت خەو نێزیكی چاڤێن من ببیت.؟ گۆت: دەما دنڤی دەستێن خوە ل بن بالیفكێ دانە و بكەڤە خەوێ. ڕاستی ژی ئەڤە هزرەكا جوانە. ئەرێ بۆچی دێ قەستا نۆژداری كەم و سكرتێرێ وی پارێ كلینیكێ ژمن وەربگریت، ژنوی بەرێ من بدەتە دەرمانخانێ و ئەو پارێ دەرمانان ژمن وەربگریت، بتنێ دا كو بنڤم! نەخێر ئەز پێدڤی ڤێ هەمییێ نینم و دێ قەستا دكانەكێ كەم، یا باشتر دێ قەستا هۆستایەكێ لاندكا كەم، ئەوان شارەزایی ددروستكرنا لاندكان دا هەیە. مانێ ئەو هەمی شۆلا دزانن، ئەو دێ رێكەكێ بۆ من پەیدا كەن كو هەر شەڤ دەستێن خوە ژێڤەكەم و سپێدێ دوبارە بێخمە جهێ وانڤە و هەر شەڤ ژی من ئەڤە دكر، من دەستێن خوە ددانانە بن بالیفكێ و من سەرێ خوە ددانا، هێشتا چاڤێن من نەكەفتینە سەر ئێك، وەكی پشیكێ خەوێ خوە ل چاڤێن من ددا. تا رۆژەكێ ل دەنگێ دویكلی هشیار بوویم و ئێكەم تشتێ هاتییە سەر هزرا من، بەری بچمە سەر دەستئاڤێ دڤێت دەستێن خوە بەمە جهێ وان و من بالیفك قولپاند، ئەرد كون بوو و دەستێن من دیار نەبوون. رابوومە ژ قۆنڤە و من گازێ دەیكا خوەكر.
ـ دادێ دەستێن من ددیار نینن؟
ـ ما سەیدایی نەگۆتبوو دەستێن وە یێن مەنە، هەما تەنا بنڤە، دەستێن وە یێ ل جهەكێ ئەمین.
دەیكا من راست دبێژیت، دەستێن مە یێ ل جهەكێ ئەمین و ما دێ بۆچی لێگەرم!
ئێ باشە سەیدا، تە گۆت دەستێن وە یێ دبن كۆنترۆلا مەڤە، ئو پا ل چوونا دەستئاڤێ؟! باشە ئەگەر دەستێن مە دبن كۆنترۆلا وە ڤەبن، دەستێن نڤیسەری و یێن گوشتفرۆشی و یێن شوفێری و یێن مامۆستایی و یێن نانپێژی تێكەلی ئێك بوون، كی دێ شێت هەر دەستەكی دانیتە جهێ وی یێ دروست و باشە كی دێ گرەنتییێ دەت، كو دەستێ دزیكەری، چەكۆچێ دادوەری نەهلگریت؟!! ئێ باشە دزی ژی ب سەرێ خوە، رێڤەبرنا سەقەت ژی ب سەرێ خوە، بەرەللایی ب سەرێ خوە، مانە دڤێت پاریەكی بەرێڤەیی گەرییا خوە بكەین؟!

خورشید تەوفیق باكۆزی

نزانم تو
بەر باهۆز بووی
كینا بەڕیێ تو دزڤرۆكێن
رەمۆلتەیا خۆدا پێچای
یان پێلەكا لەهیا كەربێ
سەرپێ هات و دكەربێ ڤەدای
چەند دەم بۆرین
یاهندای و خویا نەبووی..
ل پەلەژانێن برینێن من
ڤان برینێن ئازارگرتی نەڤەگەڕیای..
راستە ب چاڤان تە نابینم
بەلێ دچاڤێن دلێ مندا
نازدارەكا شۆخ و شەیدای..
شرینا من بێرییا تەدكەم
د بەفر و با و بارانێ دا
د هەموو گەشتێن بهارێ دا
د ئادارێ دا بێریا تە دكەم
بیرییا تە دكەم
بەری ڕۆژ ژئاڤابوونێ ڤەگەڕیێت.
بەری ڕۆژ د ئەنییا دلێ مندا بهەلێت
تە ب رۆنییا ڕۆژێ هەمبێزكەم..
دا تێنا خەریبییا من ب تێنێ بشكێت
هەدارا من ب بیرهاتن و
ب بیرییا تە بێت..
ب بیرییا تە بێت..

ئەلند مزووری

یارێ ئەگەر چووی نەزڤڕە
تە نامینیت سەنگ و بها
باوەربكە گەر بزڤڕی
لتە ناڤەكەم رێ و دەرگەها
دویف تە هاتم گەلەك گەلەك
تە ئەز خستم ژپییا و گەها
ئێدی نەشێی ڤەگەڕینی
ئەوێ عەشقا سال و مەها

من تو دانابووی پێشیا
هەمی شاهجان و دلبەرا
چبكەم هەر تو ڕازی نەبووی
لێ تە دل دا بەر كەسەرا
تە هزردكر بەس تو یا هەی
شاهزادەیی ل كۆچك و سەرا
لێ عەشقا دلان نە هوویە
كو بژین لبەندا قەدەرا
ئێدی هەرە ژمن دویركەڤە
نەهێژایی تە ب بینم
نە دبی زین و خەج و لەیلا
كو ژ جان و دل تە ب ئەڤینم
بۆ ژینا من نابی بوهار
كولیلكا لێ بخەملینم
ئەڤ دوماهی گۆتنا منە
گەر دەست ڤالا ل دنێ ب مینم.