بەرپرسێ دەستەیا كارگێرییا مەكتەبا سیاسییا پارتی ب پێدڤی زانی هەموو ئالیێن سیاسی ل هەرێما كوردستانێ پێكڤە پشتەڤانییا جۆتیارێن شەناغە بكەن، هەروەسا دیاركر، نابیت ئەو پرسە بهێتە پشت گوه هاڤێتن،، ژ بەر كو پرس یا ئاخێیە.
دوهی سێشەمبی 18/2/2025، فازل میرانی، بەرپرسێ دەستەیا كارگیرییا مەكتەبا سیاسییا پارتی دیموكراتی كوردستان، د رێوڕەسمێ سالڤەگەرا دامەزراندنا هەردو رێكخراوێن ئێكەتییا قوتابیێن كوردستانێ و ئێكەتییا لاوانێن دیموكراتا كوردستانێ، ل دۆر روودانا گوندێ شەناغە ل كەركووكێ ئاخڤت.
فازل میرانی ل دۆر وێ روودانێ و رەفتارا لەشكرێ ئیراقێ دژی جۆتیارێن كورد، گۆت» ئەڤە دیرۆكا نەخوازیارا كوردایە، بەردەوام كورد تووشی چەوساندنێ بووینە و مافێن وان یێ هاتیە خوارن، بەلێ بەرگرییا كری. ئەم هەموو ب حوكمەت، پەرلەمان و حزبێن سیاسیڤە، دڤێت بەرگریێ ژ جۆتیارێن خوە بكەین».
بەرپرسێ دەستەیا كارگیرییا مەكتەبا سیاسییا پارتی ئاماژە ب وێ چەندێ ژی كر» دڤێت ئەم وەكو هەرێمەك ب هەموو پێكهاتە و حزبێن خوەڤە، ب تایبەت پارتی و ئێكەتی، ب هەموو شیانێن خوە یێن لەشكری و سیاسی و دپلۆماسی پشتەڤانییا جۆتیاران بكەین، چونكە ئەڤە پرسا جۆتیاران نینە، ئەڤە پرسا ئاخێیە».
میرانی د پشكەكا دی یا ئاخڤتنێن خوە دا، باس ل دیرۆكا رزگاریخوازا گەلێ كورد كر و گۆت» د بۆریدا پارتی دیموكراتی كوردستان، ژ بەر ئاخێ شۆڕەشەك یا ژدەستدای. نابیت ئەڤرۆ داگیركرنا ئاخا خوە پشت گوه ب هاڤێژین. نەك بهێتە داگیركرن، هەتاكو رێكێ نەدەن جۆتیارێن مە بچنە سەر زەڤیێن خوە و ب كێلن».

سەرۆكا فراكسیۆنا پارتی ل جڤاتا نوونەرێن ئیراقێ راگەهاند: زەڤیێن سنۆرێ كەركووكێ ب قانوون بۆ جۆتیاران زڤرین و نابیت لەشكرێ ئیراقێ رێگریێ لێبكەت و زوریێ ل خەلكی بكەت، چونكە دستوور رێكێ ب وێ چەندێ نادەت، هەڤدەم مافێ وانە ژی زەڤیێن خوە بكاربینن.
د. ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ گۆت» مە ل جڤاتا نوونەرێن ئیراقێ هەموو بزاڤ كرن و قانوونا ڤەگەراندنا مولكان بۆ خودانێن وان هاتە پەسەندركرن و سەرۆككۆمارێ ئیراقێ ژی ئیمزاكر و نوكە بوویە قانوون و پێدڤییە هەموو زەڤیێن خەلكێ كەركووكێ بۆ خودانێن وان بهێنە زڤراندن، چونكە ب قانوونێ مافێ وانە و نابیت لەشكرێ ئیراقێ بۆ رێگریكرنێ ل جۆتیاران بهێتە بكارئینان و مافێ وانە زەڤیێن خوە بكاربینن».
سەرۆكا فراكسیۆنا پارتی ل جڤاتا نوونەرێن ئیراقێ دوپاتكر» ئەم داكۆكییا تمام ژ مافێن جۆتیاران دكەین و ئەوا ل كەركووكێ دژی جۆتیارێن كورد هاتیە كرن، جهێ قەبوولكرنێ نینە و ئەم بزاڤێن جدی دكەین بۆ وێ چەندێ ئەو كێشەیە بهێتە چارەسەركرن و جۆتیار ژی بگەهنە مافێن خوە، چونكە نابیت لەشكری دژی خەلكێ سڤیل بكاربینن، ژ بەر كو ب قانوون ئەو زەڤی بۆ جۆتیاران یێن زڤرین و ئەو مولكێ وانە، لەوما داخوازێ ژ سەرۆك وەزیرێن ئیراقێ دكەین ب زووترین دەم بهێتە سەر هێل و ئێدی رێك نەهێتە دان لەشكر دژی جۆتیاران بهێتە بكارئینان».
د. ڤیانی گۆت ژی» ئەوا هاتیە كرن ستەمەكا مەزنە دژی جۆتیاران و نابیت حوكمەت ل ئاستێ وێ تەعداییكرنێ ل خەلكێ كورد و جۆتیاران بێدەنگ بیت و پێدڤییە ئەوێن تەعدایی ل جۆتیاران كری، بگەهنە سزایێ خوە و ب گۆڕەی قانوونێ ژی رەفتار د گەلدا بهێتە كرن، لەوما دخوازین ئەو كێشە ب ئێكجاری چارەسەر ببیت و ئێدی دوبارە نەبیتەڤە، چونكە ب گۆڕەی دستووری نابیت لەشكر تەعدایێ ل خەلكی بكەت و تێكهەلی كارێ سیاسی ببیت.

سەرۆكایەتییا هەرێما كوردستانێ ل دۆر رەفتارا لەشكرێ ئیراقێ بەرانبەر جۆتیارێن كورد راگەهاند: ب تمامی رەفتارەكا رەتكریە و جهێ قەبوولكرنێ نینە.
سەبارەت وێ رەفتارا ژ ئالیێ هندەك ژ سەربازێن لەشكرێ ئیراقێ دژی جۆتیارێن كورد ل سنۆرێ كەركووكێ هاتیە كرن، دلشاد شەهاب، پەیڤدارێ سەرۆكایەتییا هەرێما كوردستانێ گۆت» سەرۆكایەتییا هەرێما كوردستانێ ژ نێزیك ل دووڤ وی بابەتی چوویە و داخواز ژ ئالیێن پەیوەندیدار یا كری پێرابوونێن پێدڤی بەرانبەر ئەنجامدەرێن وی كاری وەربگرن و رێكێ ل دوبارەبوونا وی بگرن».
پەیڤدارێ سەرۆكایەتییا هەرێمێ گۆت ژی» ئەڤ رەفتارە زیانێ دگەهیننە پێكڤەژیانێ و ئاشتییا جڤاكی و دڤێت هەموو ئالییەك وان جۆرە رەفتاران رەت بكەن وئەنجامدەرێن وان روو ب روویێ دادگەهێ بكەن».

پارتا گەلێ توركمان بەیاننامەیەك ل دۆر رێگریكرنا لەشكرێ ئیراقێ ل جۆتیارێن كورد ل دەڤەرێن پارێزگەها كەركووكێ بەلاڤكر و تێدا داخواز ژ ئالیێن بەرپرس كر ڤەكۆلینەكا زەلال و دادپەروەرانە ل روودانێ بكەن و لێپرسین ل گەل ئەوێن بەرپرس ژ بكارئینانا توندوتیژیێ دژی جۆتیاران بهێتە كرن و پێرابوونێن پێدڤی بهێنە وەرگرتن بۆ پشتڕاستبوون ژ دوبارەنەبوونا ڤان جۆر روودانان ل پاشەڕۆژێ.
د وێ بەیاننامەیێدا هاتیە» ب ناڤێ پارتا گەلێ توركمانی، ب بكارئینانا توندوتیژیێ دژی جۆتیارێن كورد ل گوندێ شەناغە یل قەزا دوبز ب توندی شەرمزار دكەین، كو بزاڤا زڤرینێ بۆ سەر زەڤیێن خوە و كێلانا وان ددا كو ژ ئالیێ جڤاتا نوونەرێن ئیراقێ ڤە بۆ هاتینە زڤراندن، پشتی كو ل سەردەمێ رژێما بەرێ دا ب زۆری دەست ب سەردا هاتبوو گرتن و هاتبوونە بەلاڤكرن ل سەر هاوردەیان ژ پارێزگەهێن دی».
هەروەسا ئاماژەكر» ئەم ل پارتا گەلێ توركمانی دوپاتیێ ل سەر مافێن هەموو پێكهاتەیان دكەین بۆ زڤراندنا زەڤیێن وان ب گۆڕەی چارچۆڤەیێن قانوونی و هەر كریارەكا سەركوتكارانە رەت دكەین دژی هەڤوەلاتیێن بێ چەك كو بزاڤا ڤەگەراندنا مافێن خوە یێن رەوا دكەن، هەروەسا دوپات دكەین ل سەر پێدڤییا دەست تێوەردانا لەشكری دڤان كێشەیاندا، چونكە ئەكرێ لەشكری پاراستنا سنۆرێن وەلاتییە و بەرگریكرنە ژێ، نەكو دەستتێوەردان د كێشەیێن مەدەنیدا كو دڤێت ب رێكا كەنالێن قانوونی و كارگیری یێن تایبەتمەند بهێنە چارەسەركرن».

بەرپرسێ مەكتەبا رێكخستنا كەركووك- گەرمیان یا پارتی راگەهاند: سەرۆك بارزانی پەیامەكا رۆهن دا بەغدا كو پێدڤییە رێگریكرن ب دووماهی بهێن ئەگەر نە ب وی شێوەی ناراوەستین.
هیوا ئەحمەد، بەرپرسێ مەكتەبا رێكخستنا كەركووك- گەرمیان یا پارتی دیموكراتی كوردستان گۆت» كێشەیا جۆتیاران ژ كەس و ئالییەكی مەزنترە و دژایەتیكرنا ئاشكرایە بۆ كوردان ل وان دەڤەران و نەبوونا ئێكڕێزییا كوردان ژی ب دەلیڤە بۆ كاری هاتیە بكارئینان».
بەرپرسێ مەكتەبا رێكخستنا كەركووك- گەرمیان یا پارتی ئاماژە ب وێ چەندێ ژی كر» سەرۆك بارزانی پەیامەكا رۆهن دایە بەغدا كو پێدڤییە رێگرییكرن ب دوماهی بهێن ئەگەر نە ب شێوەی ناراوەستین».
ل رۆژا دوشەمبییا بۆری 17 شواتا 2025، لەشكرێ ئیراقێ ل گوندێ شەناغە ل كەركووكێ، بزاڤكر رێگریێ ل كێلانا زەڤیێن جۆتیارێن كورد بكەن، جۆتیار روو ب روویێ وان بوون و گەفێن لەشكری پشت گوه هاڤێتن و دەست ب كێلانا زەڤیێن خوە كر.
لەشكرێ ئیراقێ ئاماژە ب وێ چەندێ كر، بڕیار یا بۆ هاتیە رێگریێ ل جۆتیارێن كورد بكەن كو زەڤیێن خوە بكێلن، بەلێ جۆتیارێن كورد ژی د رژدبوون ل سەر وێ چەندێ كو دڤێت زەڤیێن خوە بكێلن و ئاخا خوە بجهـ نەهێلن.

پشتی روودانا رێگریكرنا لەشكرێ ئیراقێ ل جۆتیارێن كورد ل كەركووكێ كو زەڤیێن خوە بكێلن و هێرش كریە سەر، كارڤەدانەكا ناڤخوەیی ل سەر پەیدابوو ول دۆر ڤێ چەندێ، محەمەد حاجی مەحمود، سكرتێرێ پارتا سۆسیال دیموكراتا كوردستانێ ب بەلاڤكرنا بەیاننامەیەكێ ب ناڤونیشانێن (شێرێ مال و رێڤیێ مەیدانێن شەڕی) هاتە دەنگ و راگەهاند» لەشكرێ ئیراقێ كو دیرۆكەكا پڕ ژ تاوانێ دژی كوردان یا هەی، ب ڤی هەلوەستی سەلماند درێژەپێدەرێ هەمان وی لەشكرییە، كو تاوانێن وێرانكرنا كوردستانێ و ئەنفال و كیمیاباران ئەنجامدایە و تاوانێن دژی كوردان یا بوۆ بوویە پیشە».
محەمەد حاجی مەحمود، گۆت ژی» مخابن هندەك سەربازێن لەشكرێ ئیراقێ، ب شێوەیەكێ درندانە و نە مرۆڤانە و نەبەرپرسانە و ب بێ رێزی، هێرشی جۆتیارێن كوردێن كەركووكێ ل سەر مولك و مال و گۆڕێن باب و باپیرێن وان كر، سەرەرای وێ چەندێ گەلەك ب توندی وی هەلوەستی شەرمزار دكەین، وەكو پارتییا سۆسیالیستا كوردستانێ بەرهەڤی هەموو ئەگەر و پشتەڤانییەكێ نە».