دهۆك، لەزگین جوقی:

رێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ بۆ رۆژناما ئەڤرۆ دیار كر، ژ بەر بڕیارەكا ئەمریكا، دوهی 11/2/2025 وان ل گەل هژمارەكا رێكخراوان ب درێژی بەحسی چاوانیا بەردەوامیدانا هاریكاریان د وارێ ساخلەمیێ دا بۆ ئاوارە و پەنابەران كرن ب تایبەتی ژی دابینكرنا خزمەتێن ساخلەمیێ و دەروونی بۆ ئاوارە و پەنابەران.
پیر دەیان جەعفەر، رێڤەبەرێ كۆچ و كۆچبەران و بەرسڤدانا قەیرانان ل پارێزگەها دهۆكێ گۆت: «ژ ئەگەرێ كێمبوونا هاریكاریێن ساخلەمیێ‌ ژ لایێ‌ رێكخراوان ڤە بۆ ئاوارە و پەنابەرێن ل سنوورێ‌ پارێزگەها دهۆكێ‌ دژین، بارگرانی ل سەر نەخۆشخانە و بنگەهێن ساخلەمیێ ل پارێزگەها دهۆكێ دروستبوویە، مە داخواز ژ هەموو رێكخراوان كر پلان و بەرنامەیێ خۆ بدەنە رێڤەبەریا گشتی یا ساخلەمیا پارێزگەها دهۆكێ، بۆ وێ چەندێ ب یەكسانی خزمەت د ناڤ هەموو كەمپان دا بهێتە كرن».
ناڤهاتی گۆتژی: «بڕیارەكا ئەمریكا دێ گەلەك كارتێكرنێ ل ئەنجامدانا خزمەتان، ب تایبەت ژی د وارێ ساخلەمیێ دا بۆ ئاوارە و پەنابەران كەت، ژ بەركو هێشتا گەلەك ئاوارە و پەنابەر ل دهۆكێ ماینە».

زنار تۆڤی:

ل بارەگایێ دادگەها تێهەلچوونا دەڤەرا دهۆكێ، كۆمبوونەك د ناڤبەرا سەندیكا رۆژنامەڤانێن كوردستانێ – لقێ دهۆكێ‌ و رێڤەبەریا گشتییا ئەوقاف و كاروبارێن ئایینی ل دهۆكێ ب سەرپەرشتیا خانم (هەدار)، سەرۆكا ئۆفیسا داواكارییا گشتی ل دهۆكێ هاتە ئەنجامدان، د وێ كۆمبوونێ دا بەحسێ ئەوێ بڕیارا كارگێری هاتە كرن، ئەوا ل ڤێ دووماهیێ ژ لایێ رێڤەبەرییا گشتییا ئەوقاف و كاروبارێن ئایینی ڤە هاتییە دەركرن و تێدا هاتییە قەدەغەكرن، كو دەزگەهێن راگەهاندنێ گۆتارێن ئەینیان ڤەگوهێزن.
هەروەسا دیار كرییە، پشتی گەنگەشە ل سەر چەندین بەندێن قانوونێ یێن گرێدایی ب كارێ رۆژنامەڤانی ڤە هاتیە كرن، تێگەهشتنەك د ناڤبەرا ئالیێن ئامادەبوویی دا پەیدابوو، بڕیار هاتەدان، كو پێداچوون ل سەر وێ‌ بڕیارا كارگێری بهێتە كرن، ب رەنگەكی، كو مافێن هەردو لایەنان بهێنە پاراستن، ل دەمەكێ نێزیك دێ بڕیارەكا دیتر یا نوو دەركەڤیت.

رەمەزان زەكەریا:

پشتی ل مەها 10 یا سالا بۆری و د قووناغا ئێكێ دا هزار و 59 پارچەیێن ئەردی ل ئاكرێ ل سەر (پێشمەرگە، فەرمانبەر، رۆژنامەڤان، پێشنڤێژان، زیندانیێن سیاسی، خانەنیشین، وەلاتی، پێشمەرگەیێن خانەنشین، كێم ئەندام و نەخۆشێن تەلاسیمیا) هاتینە بەلاڤكرن، بڕیارە ل ڤان نێزیكان قووناغا دویێ یا بەلاڤكرنا پارچەیێن ئەردی ل ئاكرێ دەستپێ بكەت.
دهێتە زانین ئەو پارچە ئەردێن كو د ڤان نێزیكان دا دێ هێنە بەلاڤكرن، پتر ژ هزار پارچە ئەردانە، ل هەردو تاخێن سۆسنا و رەزۆك ل رۆژئاڤایێ‌ سەنتەرێ ئاكرێ دێ‌ هێنە بەلاڤكرن.
دیسا حكومەتا هەرێما كوردستانێ د راگەهاندنەكێ‌ دا ئاشكرا كریە كو مامەلەیێن وەرگرتنا گەرا دویێ یا پارچە ئەردان بۆ 27 وەزارەت و فەرمانگەهان تەمامبوویە و د ڤێ گەرێ دا دێ 240 هزار و 111 فەرمانبەر پارچە ئەردان وەرگرن.
د راگەهاندنا حكومەتا هەرێما كوردستانێ دا هاتیە: فەرمانبەرێن هەمی دەڤەرێن كوردستانێ دهۆك، هەولێر، سلێمانی، هەلەبجە، زاخۆ، سۆران، گەرمیان دێ ژ ڤێ گەرێ مفاداربن.
ل رۆژا 27ێ ئادارا سالا 2024 جڤاتا وەزیران بڕیارا دانا پارچەیێن ئەردی ل سەر فەرمانبەران دایە.

دەزگەهێ‌ روانگە ئێڤاریەكا رێزلێنانێ‌ و دانەنیاسینێ‌ بۆ بەرهەمێن هۆزانڤانێ‌ ناڤدار یێ‌ كورد «هەژارێ‌ موكریانی» سازكر.

رەمەزان زەكەریا:

ل سنوورێ دەڤەرداریا ئاكرێ هژمارەكا پڕۆژەیێن رێك و پران ل گوندێن دەڤەرێ د قووناغا بجهئینانێ دانە.
ئەندازیار محسن میرانی، رێڤەبەرێ رێك و پران و سەخبێركرنێ ل ئاكرێ بۆ ئەڤرۆ گۆت: «كاروانێ ئاڤەدانكرنێ ب پشتەڤانیا كابینەیا نەهێ یا حكومەتا هەرێما كوردستانێ بەردەوامە، نوكە هژمارەكا پڕۆژەیێن خزمەتگوزاری ل گوندێن دەڤەرێ د قووناغا بجهئینانێ دانە».
ناڤبری گۆتژی: «كارێ سەخبێركرنا بلەز یا بەردەوامە و كار دهێتە كرن بۆ سەخبێركرنا ڕێكێن سەرەكی و لاوەكی، كو ب رەنگەكێ ڕاستەوخۆ ژ لایێ ڕێڤەبەریا رێك و پران ل ئاكرێ دهێتە بجهئینان».

زنار تۆڤی:

فیراس سەدیق، رێڤەبەرێ سامانێ گیانەوەران ل هەرێما كوردستانێ، بۆ رۆژناما ئەڤرۆ دیار كر، تیمێ وەزارەتا چاندنێ یێ هەرێمێ ل گەل تیمێ چاڤدێرییا وەزارەتا چاندنا ئیراقێ ڕێككەفتینە، كو هنارتنا مریشك و هێكان بۆ ناڤەراست و ژێرییا ئیراقێ دەستپێ بكەتەڤە، هەروەسا پشتی پشكنینا كێلگەهێن پەلەوەران ل هەرێما كوردستانێ ژ لایێ لژنەكێڤە ل بەغدا، كو پشكنین دروست دەرچووین و ئێدی بەرهەمێ پەلەوەرێن كوردستانێ بۆ ناڤەراست و ژێرییا ئیراقێ دێ هێتە هنارتن.
ناڤهاتی گۆت: «ل ڤان رۆژێن بۆری لژنێن وەزارەتا چاندنێ یێن ئیراقێ سەرەدانا كێلگەهێن پەلەوەرێن هەرێما كوردستانێ كربوون و پشكنیین ب سەركەفتییانە هاتینە ئەنجامدان، ئێدی مریشك و هێكێن كوردستانێ بۆ دەڤەرێن ناڤەراست و ژیریا ئیراقێ دێ هێنە هنارتن، هەروەسا سالانە ل هەرێما كوردستانێ 270 هزار تەنێن مریشكان دهێنە بەرهەمئینان و سالانە وەكو هەرێم مە پێدڤی ب 150 هزار تەنان هەیە، دیسا سالانە 20 هزار كارتۆنێن هێكان ل هەرێما كوردستانێ دهێنە بەرهەمئینان و سالانە مە پێدڤی ب حەفت هزار كارتۆنان هەیە».
ل 27ی كانوونا دویێ 2025 ێ، وەزارەتا چاندنا عیراقێ هەموو پەلەوەر و بەرهەمێن پەلەوەرێن هەرێما كوردستانێ قەدەغەكربوون، كو بگەهنە پارێزگەهێن ئیراقێ، ئەو ژی ژ ئەگەرێ مەترسییا ڤەگوهاستنا نەخۆشییان ژ پەلەوەر و گییانەوەران بۆ مرۆڤان.