سەرۆك وەزیرێن ئیراقێ یێ بەرێ دبێژیت: ئیراق پێدڤی ب سیستەمێ سەرۆكایەتیێیە و دانا كۆنفیدرالیێ ب كوردان هەیە.
مستەفا كازمی، سەرۆك وەزیرێن ئیراقێ یێ بەرێ د داخۆیانییەكا رۆژنامەڤانیدا ئاشكراكر» سیستەمێ پەرلەمانی ل سەردەمێ پاشایەتیێ ل ئیراقێ یێ سەركەفتی نەبوویە، بۆ پەیڕەوكرنا سیستەمێ سەرۆكایەتیێ، دشیاندایە ب پێدانا كۆنفیدرالیێ، پشتڕاستبوون ب كوردان بهێتە دان».
ل دووڤ گوتنا سەرۆك وەزیرێن ئیراقێ یێ بەرێ» پشكەكا مەزن ژ سەركردەیێن ئیراقێ ل گەل سیستەمێ سەرۆكایەتیێ نە، دبیت ب ئاشكرا باس ل وێ چەندێ نەكەن، بەلێ ئەوێ ژ سیستەمێ سەرۆكایەتیێ زیاندار، تنێ كوردن. بلا بهێین پشتڕاستبوونێ ب كوردان بدەین و سیستەمێ سەرۆكایەتیێ پەیڕەو بكەین، ئازادییەكا زێدەتر ژی ب كوردان بدەین، بەلێ د دوو پرساندا دخوازین هەڤپشك بن د گەل مەدا، ئەوژی سیاسەتا دەرڤە و بەرگریكرن ژ وەلاتی».
مستەفا كازمی پرسیار دكەت و دبێژیت» بۆچی ئازادییەكا زێدەتر ب كوردان نەهێتە دان، كو پەیوەندیێن د ناڤبەرا هەولێرێ و بەغدایێدا هەردەم ئالۆزی و كێشە ب خوەڤە دیتینە؟ بۆچی پەیوەندیێن مە ل گەل هەرێما كوردستانێ ژ فیدرالیێ ڤەنەگوهێزین بۆ كۆنفیدرالیێ، یان فیدرالییەكا بەرفرەهتر ب كوردان نەدەین؟ كوردان پشتڕاست بكەین كو مافێن وان د پاراستی نە، نەكو وەك نوكە هەی هەڤشێوەیێ بابەتێ مووچەیێن فەرمانبەرێن هەرێما كوردستانێ».

بڕیارا وەزیرا داراییا ئیراقێ ب بڕین و نە هنارتنا مووچەیێن فەرمانبەرێن كوردستانێ، كارڤەدانێن مەزن ب دووڤ خوەدا ئیناینە و ئێكهەلوەستییا فراكسیۆنێن كوردستانی ل ئیراقێ و رایا گشتییا كوردستانێ رەت دكەت و ب نە قانوونی و دژایەتیكرنا مافێن دستووری و بێرێزیكرن ب كەرامەتا فەرمانبەران و برسیكرنا خەلكێ كوردستانێ دزانیت، هەروەسا هەژمارەكا سیاسەتمەدارێن عەرەبێن ئیراقی ژی ل دژی بڕیارا وەزارەتا داراییا ئیراقێ بۆ نەهنارتنا مووچەیێن فەرمانبەرێن كوردستانێ هاتنە دەنگ و ئاماژێ دكەن كو ئەڤ پێنگاڤە پێشهاتەكا مەترسیدارە ژ ئالیێ حوكمەتا بەغدایێ ڤە هاتییە هاڤێتن و نە ئارامییا سیاسی ل ئیراقێ پەیدا دكەت.
سالح موتلەك، سكرتێرێ حزبا بەرەیێ دیالۆگا نیشتمانییا ئیراقی گوت» مووچە مافێ هەموو ئیراقییانە و پێدڤییە د دەمێ خوەدا ب وان بهێتە دان و بۆ كەسێ ژی نینە منەتێ ب سەر وان فەرمانبەران بكەت كو ل ئیراقێ كار دكەن».
سالح موتلەكی هیڤی خواست هەموو ئەو كێشە بهێنە چارەسەركرن كو رێكێ ل بەرامبەر بەلاڤكرنا مووچەیێن فەرمانبەرێن هەرێما كوردستانێ د دەمێ خوە دا دگرن و گوت» خەمساری ژ ئالیێ حوكمەتا فیدرالیڤە یا هەی و دبیت ئەڤ چەندە بزڤریت بۆ وێ ئێكێ داهاتێ وەلاتی ب گۆڕەی قانوونەكێ كو ب وەكهەڤی نەهاتییە بەلاڤكرن».
دوپاتكر ژی» دەمێ قانوونەك بۆ بەلاڤكرنا داهاتی ب سەر ئیراقێ و هەرێما كوردستانێ و پارێزگەهان هەبیت، دێ كێشە كێمتر بن».
ئاشكراكر ژی» ڤەكێشانا پارتی دیموكراتی كوردستان ژ پرۆسەیا سیاسی ل ئیراقێ دێ كارەكێ مەترسیدار بیت و ل دووماهیێ دێ ئیراق ژی ژناڤچیت».
سكرتێرێ حزبا بەرەیێ دیالۆگا نیشتمانییا ئیراقی گوت ژی» هەكە ئیراق ل سەر هەمان سیاسەتا نوكە بەردەوام بیت د رێڤەبرنا قەیراناندا، ل پاشەڕۆژێ دێ تووشی پارچەبوونێ بیت».
میسال ئالۆسی، سیاسەتمەدارێ ئیراقی ل دۆر نەهنارتنا مووچەیێن فەرمانبەرێن هەرێما كوردستانێ ژ ئالیێ بەغدایێ ڤە، گوت» پرسیارا من ژ وەزیرا داراییا ئیراقێ تەیف سامی و سەرۆك وەزیرێن ئیراقێ محەمەد شیاع سۆدانی ئەوە: هەوە و سەدرییان ناكۆكییا هەی، ئایا هوون دشێن مووچەیێن سەدرییان ببڕن؟ یان دێ پیڤازان ل سەر گوهێن هەوە سووركەن؟».
ئالۆسی پرسیارێ ژ سەرۆك وەزیرێن ئیراقێ و وەزیرا داراییا ئیراقێ دكەت و دبێژیت» ئایا هوون دشێن مووچەیێن سوننەیان ل پارێزگەها ئەنبارێ ببڕن كو كەسوكارێن منن؟ هەكە هوون وێ چەندێ بكەن، دێ د دەمێ دو رۆژاندا حوكمەتا هەوە ژناڤبەن، چونكە سوننە دێ خوە ژ حوكمەتێ ڤەكێشن».
وی سیاسەتمەدارێ ئیراقی دیاركر ژی» سیاسەتا بكارئینانا سیاسەتێ و ناكۆكیێن سیاسی بۆ برسیكرنا هەڤوەلاتییان، سیاسەتەكا فاشییانەیە».
مەشعان جبووری، سیاسەتمەدارێ ئیراقێ، ل پێگەهێ خوە ل سەر تۆرا جڤاكییا (ئێكس) سەبارەت وێ چەندێ دبێژیت» كورد هەڤپشكێن سەرەكی نە د پرۆسەیا ژناڤچوونا رژێما سەدامی دا و ڤەكرنا دەرگەهێن نێڤدەولەتی بۆ ئۆپۆزسیۆنا ئیراقێ».
مەشعان جبووری گوت ژی» ب ڤەكێشانا كوردان ژ پرۆسەیا سیاسییا ئیراقێ دێ بیڤەلەرزەكێ ل ئارامییا ئیراقێ دەت».
جبووری ل دۆر ئەگەرێ خوەڤەكێشانا كوردان ژ پرۆسەیا سیاسییا ئیراقێ، دبێژیت» خوەڤەكێشانا كوردان ژ پرۆسەیا سیاسی تنێ دووركەفتنا پێكهاتەیەكی نینە، بەلكو دێ بیتە ئەگەرێ ژ ناڤچوونا پشكەك ژ شەرعییەتا نیشتمانی، كو گەلەك ب زەحمەتە ئیراق بشێت خوە ل بەر دەرئەنجامێن وێ چەندێ بگریت».
دیاركر ژی» تنێ دانوستاندن چارەسەرە و چو تشتەكێ دی نەشێت ببیت ب جهگرێ وێ چەندێ».
ژ ئالیێ خوەڤە، سالم جومەیلی، نڤیسەر و سیاسەتمەدارێ ئیراقێ، هەر سەبارەت ب پرسا دەرئەنجامێن بڕیارێن حوكمەتا ئیراقێ دژی هەرێما كوردستانێ و ئەگەرێ خوەڤەكێشانا كوردان ژ پرۆسەیا سیاسی ل ئیراقێ، ل پێگەهێ خوە ل تۆرا جڤاكییا (ئێكس) نڤیسی» خوەڤەكێشانا كوردان ژ پرۆسەیا سیاسی هەر تنێ ڤەكێشان و دووركەفتنا پێكهاتەیەكی نینە، بەلكو رامانا وێ چەندێ ئەوە كەفتنا دستووری، ژ ناڤچوونا حوكمەتێ و ژناڤچوونا شەرعییەتا هەلبژارتنایە ل ئیراقێ».

سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: ل ڤان رۆژان وەزیرێن كورد ل بەغدا، ل گەل سەرۆك وەزیرێن ئیراقێ، ب ئارمانجا چارەسەركرنا كێشەیا مووچەیێن فەرمانبەرێن هەرێما كوردستانێ، دێ كۆمبن.
د. ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ گوت» دانوستاندنێن مە د بەردەوامن بۆ وی ئارمانجی بەری جەژنا قوربانییا پیرۆز مووچەیێن مەها گولانێ یێن فەرمانبەرێن هەرێما كوردستانێ بهێنە هنارتن».
سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ دوپاتی ل وێ چەندێ ژی كر « فراكسیۆنێن كوردستانی ل بەغدا، ئێك هەلوەستن و د هەڤڕانە، ل سەر وێ چەندێ كو بڕیارا وەزارەتا داراییا فیدرالیا تایبەت ب راگرتنا هنارتنا مووچەیێن فەرمانبەرێن هەرێما كوردستانێ، بڕیارەكا دستووری نینە».
بڕینا مووچەیێن فەرمانبەرێن هەرێما كوردستانێ، نەرازیبوونا خەلكێ كوردستانێ و ئالیێن سیاسی یێن كوردستانی و پشكەكا ئیراقێ ژی ژێ پەیدابوویە، ل هەرێما كوردستانێ 43 حزب و ئالیێن سیاسی بەیاننامەیەكا نەرازیبوونێ دژی حوكمەتا فیدرال بەلاڤكر و بڕیارا حوكمەت و وەزارەتا داراییا فیدرال ب بڕیارەكا شۆڤینی هەژمارت. ژ ئالیێ خوەڤە پێشەوا هەورامانی، پەیڤدارێ حوكمەتا هەرێما كوردستانێ دوپاتكر» ئیراق رێزێ ل رێككەفتنان ناگریت و بەردەوام دستوور بنپێكرییە و هەكە بەغدا بەری جەژنا قوربانییا پیرۆز مووچەیێن فەرمانبەرێن هەرێما كوردستانێ نەهنێریت، وی دەمی سەركردایەتییا سیاسییا هەرێما كوردستانی ل ئاستێ بلند دێ بڕیارا خوە دەت».

بریكارێ وەزارەتا بازرگانی و پیشەسازی ل حوكمەتا هەرێما كوردستانێ راگەهاند: بژاردەیەك ل ناڤ وەزارەتێن حوكمەتا ئیراقێ هەیە، ناخوازیت هەرێما كوردستانێ مفادار بیت، جۆرەكێ ئاخڤتنان دكەن كو ئەو ناڤەندن نەك حوكمەت.
سەروەر هاواری، بریكارێ وەزارەتا بارزگانی و پیشەسازی ل حوكمەتا هەرێما كوردستانێ گوت» حوكمەتا ئیراقێ چەندین كێشە بۆ هەرێما كوردستانێ دروستك كرینە، كو هەتا نوكە هەڤوەلاتیێن هەرێما كوردستانێ ئاگەداری وان كێشەیان نینن. بۆ نموونە بابەتێ لڤینا بازرگانی و بازرگانییا گەنمی، هەروەسا بابەتێ مۆلەتا ئینانێ و هنارتنێ. رێك نەدان ب بەرهەمێن كارگەهان، پشت نەبەستن ب كارێ بازرگانی و كۆمپانییان».
بریكارێ وەزارەتا بازرگانی و پیشەسازی ل حوكمەتا هەرێما كوردستانێ د داخۆیانییەكا رۆژنامەڤانیدا گوت ژی» هەژمارا كارگەهان ل هەرێما كوردستانێ دگەهیتە چار هزار كارگەهان ب هەموو جۆرێن خوەڤە و هەموو ژی د خۆمالی نە، تنێ هندەك نەبن كو رەگەز بیانی نە، 75% ژ بەرهەمێ ڤان كارگەهان بۆ باشوور و ناڤەڕاستا ئیراقێ دچیت».
دیاركر ژی» هەتا نوكە ئیراقێ نەشیایە بەرهەمەكێ پیشەسازی بۆ ناڤخوەییا خوە دروست بكەت، هەرێما كوردستانێ هاریكار بوویە بۆ حوكمەتا ئیراقێ، بەلێ حوكمەتا ئیراقێ كێشەیان بۆ بەرهەمێن هەرێما كوردستانێ دروست دكەت ژ ئەگەرێ وێ بژاردەیا د ناڤ حوكمەتا ئیراقێدا هەی».
سەروەر هاواری راگەهاند ژی» بژاردەیەك د ناڤ وەزارەتێن حوكمەتا ئیراقێدا هەیە، ناخوازیت هەرێما كوردستانێ مفادار ببیت، جۆرەكێ ئاخڤتنان ل گەل هەرێما كوردستانێ دكەن كو ئەو ناڤەندن نەك حوكمەت، ئانكو، ب هیچ شێوەیەكی ناخوازن كار ب دستووری بكەن و بزڤرن بۆ دستووری، بەلێ حوكمەتا هەرێما كوردستانێ بەرۆڤاژی حوكمەتا ئیراقێ، خودان پەرلەمان و داهات و وەزارەتێن خوەیە، پێدڤییە كارێ دەولەتدارییا خوە بكەت» .

سەرۆكایەتییا هەرێما كوردستانێ راگەهاند، نێچیرڤان بارزانی، سەرۆكێ هەرێما كوردستانێ وماركۆ روبیۆ، وەزیرێ دەرڤەیێ ئەمریكا د پەیوەندییەكا تەلەفۆنیدا دوپاتی ل پێشڤەبرنا پەیوەندیێن ستراتیژی د ناڤبەرا ئەمریكا و هەرێما كوردستانێ كر.
سەرۆكایەتییا هەرێمێ بەلاڤكر ژی، نێچیرڤان بارزانی و ماركۆ روبیۆ باس ل هاریكاریێ د وارێ ئابۆری و وزەیێ دا و گرنگییا بەردەوامبوونا هەماهەنگیێ د ناڤبەرا واندا كر بۆ پشتەڤانییا ئارامیێ ل ئیراقێ، سووریێ و دەڤەرێ ب گشتی .
وەزیرێ دەرڤەیێ ئەمریكا سوپاسییا سەرۆكێ هەرێما كوردستانێ كر بۆ رۆل و بزاڤێن وی د چارەسەركرنا كێشەیێن د ناڤبەرا حوكمەتا ئیراقا فیدرال و حوكمەتا هەرێما كوردستانێدا ب رێكا تێكگەهشتنێ و دانوستاندنێن ئاڤاكەر.
سەرۆكایەتییا هەرێما كوردستانێ گوت ژی، رربیۆی دوپاتكر كو پشتەڤانییا ئەمریكا بۆ هەرێما كوردستانێ، ب بنەمایەكێ سەرەكیێ پەیوەندیێن ستراتیژی یێن ئەمریكا ل گەل ئیراقێ دێ مینیت. د بەرانبەر دا نێچیرڤان بارزانی، رێزا خوە بۆ پشتەڤانییا ئەمریكا ل ئیراقێ و هەرێما كوردستانێ دوپاتكر.

دوهی شەمبیێ 31/5/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل سیناتۆرا ئەمریكی جاكی رۆزن، كر.
د دیدارەكێدا دوپاتی ل پێدڤییا پێشڤەبرنا پەیوەندیێن هەرێما كوردستانێ و ئەمریكا د وارێن ئەمنی و ئابۆری هاتە كرن، سەبارەت ڤێ چەندێ ئاماژە ب گرنگییا سەرەدانا سەركەفتی یا ڤێ دووماهیێ یا شاندێ حوكمەتا هەرێما كوردستانێ ب سەرۆكایەتییا سەرۆكێ حوكمەتێ بۆ ئەمریكا و دیدار و كۆمبوونێن ل گەل بەرپرسێن بلند یێن كرنگرێسی و ئیدارەیا ئەمریكی هاتە كرن.
د پشكەكا دی یا دیدارێدا، هەردو ئالی د هەڤڕابوون ل سەر رێزگرتن و پاراستنا قەوارەیێ فیدرالیێ هەرێما كوردستانێ و دابینكرنا مافێن دستووری و شایستەیێن دارایی یێن خەلكێ كوردستانێ.
پێشهاتێن رەوشا گشتییا ئیراقێ، سووریێ و دەڤەرێ ب گشتی، پشكەكا دی یا دانوستاندنان بوون.

مەسرور بارزانی، سەرۆكێ حوكمەتا هەرێما كوردستانێ، پێشوازی ل خەمیس خەنجەر، سەرۆكێ هەڤپەیمانییا (سیادە) كر.
ب گۆڕەی بەیاننامەیەكا حوكمەتا هەرێما كوردستانێ» د كۆمبوونەكێدا گەنگەشە ل دۆر رەوشا گشتییا ئیراقێ و بەرهەڤیێن هەلبژارتنێن جڤاتا نوونەرێن ئیراقێ هاتە كرن كو بڕیارە ل مەها (11) د ئەڤسالەدا بهێنە ئەنجامدان».
دیاركر ژی» د پشكەكا دی یا دیدارێدا، دوپاتی ل گرنگییا رێزگرتنێ ل سیستەمێ فیدرالی و مافێن هەموو پێكهاتەیێن ئیراقێ و قەوارەیێ دستووریێ هەرێما كوردستانێ و هنارتنا شایستەیێن دارایی یێن خەلكێ كوردستانێ هاتە كرن».

مەكتەبا سیاسییا پارتی دیموكراتی كوردستان بەیاننامەیەك ل دۆر نڤیسارا وەزارەتا داراییا فیدرال سەبارەت نەهنارتنا مووچەیێن فەرمانبەرێن هەرێما كوردستانێ بەلاڤكر.
د بەیاننامەیا مەكتەبا سیاسییا پارتی دا هاتیە» رایا گشتییا ئیراقێ و هەرێما كوردستانێ ئاگەهدار دكەین كو حوكمەتا فیدرالی یا بەردەوامە ل سەر پنپێكرنا مافێن دستووری یێن هەرێما كوردستانێ، دوماهی پنپێكرنێ نڤیسارا وەزارەتا داراییە كو دژی دشتووری و بنەمایێن رێككەفتنا پێكئینانا حوكمەتێیە و سیاسیكرنا قووتێ خەلكییە».
مەكتەبا سیاسییا پارتی باس ل وێ چەندێ ژی كر» ئەڤ بابەتە ل كۆمبوونا داهاتی یا كۆمیتەیا ناڤەندییا پارتییا مە ل 2/6/2025 دێ ئێخینە بەر باس و بڕیار وەرگرتنێ و هەكە هەتا بەری جەژنا قۆربانی یا پیرۆز، ماف و شایستەیێن دارایی یێن خەلكێ هەرێما كوردستانێ نەهێنە هانرتن دێ مە هەلوەستێ جدی هەبیت و دێ راگەهینین».

دوهی شەمبیێ 31/5/2025، كۆمبوونا گرنگ وبەرفرەه یا حزب و ئالیێن سیاسی یێن هەرێما كوردستانێ ب سەرپەرشتییا دەستەیا كارگێرییا مەكتەبا سیاسییا پارتی دیموكراتی كوردستان ل پیرمام هاتە ئەنجامدان.
پشتی كۆمبوونێ، ئالیێن سیاسی یێن پشكدار بەیاننامەیەكا هەڤپشك بەلاڤكر و ئەڤە دەقێ وێ یە:
ل رێككەفتی 31/5/2025 ل مەكتەبا سیاسییا پارتی دیموكراتی كوردستان ل پیرمام، هێز و ئالیێن سیاسی یێن كوردستانی كۆمبوونەكا هەڤپشك ئەنجامدان ب مەبەستا گەنگەشەكرنا رەوشا سیاسییا كوردستانێ و ئیراقێ و كێشە و گرفتێن د ناڤبەرا هەرێمێ و حوكمەتا فیدرالدا، ب تایبەتی دووماهی بڕیارا نەدستووری و نەقانوونی یا وەزارەتا داراییا حوكمەتا فیدرال و راگرتن و نە هنارتنا مووچەیێن مووچەخۆرێن هەرێما كوردستانێ، پشتی دانوستاندنێ و لێكگۆهارتنا بیر و بۆچوونێن پێدڤی ل سەر ڤی بابەتی، هەموو ئالی د هەڤڕابوون ل سەر وێ چەندێ كو ئەڤ بڕیارا بڕیارەكا سیاسییە دژی ئیرادەیا گەلێ كوردستانێ و قەوارەیێ سیاسی و قانوونیێ هەرێما كوردستانێ.
ل دووڤ دستوورێ بەردەوامێ ئیراقێ و بڕیارا دادگەها فیدرالی و قانوونا فەرمانبەر و مووچەخۆرێن ئیراقێ و رێككەفتنێن د ناڤبەرا حوكمەتا هەرێمێ و حوكمەتا فیدرالدا، پێدڤییە حوكمەتا فیدرالی پێگیر بیت ب ئەرك و ئیلتیزاماتێن خوە بەرامبەر خەلكێ هەرێما كوردستانێ و مافێن مووچەخۆرێن هەرێمێ تێكهەلی ململانێیێن سیاسی نەهێنە كرن، هەروەسا حوكمەتا فیدرال دووركەڤیت ژ سیاسەتا برسیكرنێ و فشارئێخستنێ ل سەر هەرێما كوردستانێ، ژ بەر كو ئەڤ سیاسەتە ژ بلی زێدەكرنا گرفتان، د بەرژەوەندییا هیچ ئالییەكیدا نابیت.
ئەم وەكو هێز و ئالیێن سیاسی یێن هەموو پێكهاتەیێن كوردستانێ سەرەرای سوپاسی و رێزا مە بۆ خۆڕاگرییا مووچەخۆ و فەرمانبەر و پێشمەرگە و مامۆستایان و گەلێ سەربلندێ كوردستانێ ب گشتی، دوپات دكەین كو هەلوەست و بڕیار و پێنگاڤێن مە دێ ب ئاراستەیا بەرژەوەندییا هەڤوەلاتییان و هەرێما كوردستانێ بن و بژاردەیا دانوستاندنێ ب باشترین رێكەچارە دزانین بۆ ڤێ قۆناغێ، د هەمان دەمدا هەموو بژاردەیان ب ڤەكری دبینین ل پێشبەری خوە ژ پێخەمەت بەرژەوەندیێن بلند یێن هەرێما كوردستانێ.
حزب و ئالیێن كوردستانی: 1- ئێكەتی نیشتمانی كوردستان 2- بزاڤا گۆڕان 3- پارتا سۆسیالیستا دیموكراتا كوردستان 4- بزاڤا ئیسلامی ل كوردستانێ 5 – حزبا شیوعییا كوردستانی 6- بزاڤا پەیوەندییا ئیسلامی ل كوردستانێ 7- حزبا زەحمەتكێشێن كوردستانێ 8- پارتا پارێزگەرێن كوردستانێ 9- پارتا رەنجدەرێن كوردستانێ 10- ئێكەتییا نەتەوەییا دیموكراتی كوردستان 11- بزاڤا دیموكراتییا گەلێ كوردستانێ 12- پارتا نەتەوەییا كوردستانی 13- بزاڤا رزگارییا دیموكراتییا كوردستانی 14- حزبا پێشكەفتنخوازێن كوردستانێ 15- هەڤپەیمانییا نیشتمانی 16-حزبا رزگارییا كوردستانێ – دەستەیا سەرۆكایەتیێ 17- پارتییا دیموكراتییا توركمانی 18- پارتا نیشتمانییا توركمانی 19- پارتا ئاڤاكرنا دیموكراتییا كوردستانی 20- بزاڤا ئاشتیخوازێن كوردستانێ 21- پارتییا رزگارییا نەتەوەییا توركمانی 22- پارتا ئێكگرتنا توركمانی 23- بزاڤا توركمانییا بێلاین 24- پارتا گەشەپێدانا توركمانی 25- پارتا چاكسازییا توركمانی 26- پارتا گەلێ توركمانییا ئیراقی 27- بەرەیێ توركمانی 28- بزاڤا دیموكراتییا توركمانی 29- پارتا ئیرادەیا نیشمانییا توركمانی 30- پارتا گەزەنگا توركمانی 31- پارتا توركمان ئیللی 32- لیستا مللەت 33 – لیبرالییا توركمانی 34- پارتا ئێكەتییا دیموكراتییا كلدانی 35- پارتا جڤاتا نەتەوەییا كلدانی 36- حزبا دیموكراتی بێت نەهرێن 37- پارتا جڤاتا مللی كلدانی سریانی ئاشووری 38- رەوتا شلاما 39- پارتا بزاڤا گردبوونا سریانی 40- كۆمەلا رەوشەنبیرییا ئەرمەنی 41- دەستەیا كارگێرییا بڕێڤەبرنا تائیفا ئەرمەنی 42- رابیتەیا كلدانییا جیهانی 43- پارتی دیموكراتی كوردستان.