ئه‌ڤرۆ:

هژماره‌كا زێده‌ ژ ره‌وشه‌نبیر و نڤیسه‌رێن تورك و كورد دیار كرن كو نها پرسا كوردی بوویه‌ پرسه‌كا هه‌ری مه‌زن بۆ توركیا و ژ به‌ر پرسا كوردی زیانێن گه‌له‌ك مه‌زن ژی گه‌هشتینه‌ توركیا، ژ به‌ر هندێ ژی دخواز ژ سه‌رۆك كۆمارێ توركیا كرن كو ده‌ست ب قۆناغه‌كا نوو بۆ چاره‌سه‌ركرنا پرسا كوردی بكه‌ت.

هژماره‌كا به‌رچاڤ ژ نڤسیه‌ر و ره‌وشه‌نبیرێن تورك و كورد د نامه‌كا ڤه‌كری دا داخواز ژ سه‌رۆك كۆمارێ توركیا ره‌جه‌ب ته‌یب ئه‌ردۆگانی كرن كو ده‌ست ب قۆناغه‌كا نوو بۆ چاره‌سه‌ركرنا پرسا كوردی بكه‌ت، چونكو هه‌تا پرسا كوردی ل توركیا نه‌هێنه‌ چاره‌سه‌ركرن دێ ئالۆزیێن نها به‌رده‌وام بن و ژ به‌ر پرسا كوردی هه‌تا نها زیانێن گه‌له‌ك مه‌زن گه‌هشتینه‌ توركیا و دڤێت ده‌ست ب قۆناغه‌كا نوو بهێته‌ كرن.

ل ئالیێ دی كه‌مال كلچدار ئوگلۆ سه‌رۆكێ گشتی یێ پارتا كۆماریا گه‌ل ژی دیار كر كو سه‌رۆك كۆمارێ توركیا و ده‌ستهه‌لاتا وی چو به‌رنامه‌ بۆ چاره‌سه‌ركرنا پرسا كوردی نینن و دڤێت پرسا كوردی ل په‌رله‌مانێ توركیا بهێته‌ چاره‌سه‌ركرن و ژ به‌ر هندێ ژی دڤێت به‌ری هه‌ر تشته‌كێ سیسته‌مێ توركیا ببیته‌ سیسته‌مێ په‌رله‌مانی و گۆت: (هه‌تا بریارێن توركیا و پاشه‌رۆژا مه‌ هه‌موویان د ده‌ستێ كه‌سه‌كێ دا بیت بێگومان دێ ره‌وش گه‌له‌ك خراب بیت، به‌ری نها ژی مه‌ گه‌له‌ك جاران دیار كریه‌ كو سیسته‌مێ سه‌رۆكاتیێ ل گه‌ل راستیا توركیا ناگونجیت و دڤێت سیسته‌مێ توركیا بهێته‌ گوهۆرین، ده‌م یێ هاتی گه‌لێ توركیا پێكڤه‌ بریاره‌كا گرنگ بده‌ن و ئه‌ردۆگانی ژ ده‌ستهه‌لاتێ دوور بكه‌ن و هه‌روه‌سا سیسته‌مێ توركیا ژی دڤێت جاره‌كا دی ببیته‌ سیسته‌مێ په‌رله‌مانی).

ژ ئالیێ خوه‌ ڤه‌ ئه‌حمه‌د داوود ئوگلۆ سه‌رۆك وه‌زیرێن به‌رێ یێ توركیا و سه‌رۆكێ پارتا پاشه‌رۆژێ ژی دوهی راگه‌هاند كو ئه‌و یێ رژد بوو قۆناغا چاره‌سه‌ریێ ل توركیا به‌ر ب پێشڤه‌ بچیت و گۆت: (ده‌مێ ئه‌ز بوومه‌ سه‌رۆك وه‌زیرێن توركیا وی ده‌می به‌رێز ئه‌ردۆگانی گۆته‌ من دڤێت قۆناغا ئاشتیێ یا به‌رده‌وام بیت و من ژی گۆته‌ وی كارێ من یێ سه‌ره‌كی دێ به‌رده‌وامیا قۆناغا ئاشتیێ بیت، لێ پاشی گه‌له‌ك تشت هاتنه‌ گوهۆرین و ئه‌ردۆگانی ژی قۆناغا ئاشتیێ ژبیر كر، دڤێت نها ئه‌ردۆگان به‌رسڤا گه‌لێ توركیا بده‌ت كا بۆچی قۆناغا ئاشتیێ هاته‌ راگرتن).

هه‌رچه‌نده‌ به‌ری نها رۆژناما یێنی شه‌فه‌ق یا سه‌ر ب ئاكپارتیێ دیار كربوو كو ئه‌ردۆگان و كه‌سێن نێزیكی وی ل سه‌ر ده‌ستپێكرنا قۆناغا ئاشتیێ كار دكه‌ن لێ هه‌تا نها تشته‌ك وه‌سا د رۆژه‌ڤا توركیا دا نینه‌ و چاڤدێرێن سیاسی یێن توركیا ژی دیار دكه‌ن كو هه‌كه‌ ئاكپارتی و ئه‌ردۆگان ل سه‌ر داخستنا هه‌ده‌پێ د رژد بن ئه‌و یه‌ك ژی رامانا هندێ دده‌ت كو قۆناغه‌كا دژوار ل پێشیا توركیا یه‌ و ده‌ستهه‌لاتێ نه‌ڤێت پرسا كوردی چاره‌سه‌ر بكه‌ت.

ده‌زگه‌هێن راگه‌هاندنا توركیا ژی دیار دكه‌ن كو ده‌مه‌كه‌ ئاكپارتی و پارتا بزاڤا نه‌ته‌وه‌په‌رست كار بۆ داخستنا هه‌ده‌پێ دكه‌ن، چونكو د چه‌ندین راپرسیێن كو به‌ری نها هاتینه‌ كرن دا دیار بوویه‌ كو ئاكپارتی و پارتا بزاڤا نه‌ته‌وه‌په‌رست نه‌شێن ڤێجارێ پرانیا ده‌نگان بده‌ستڤه‌ بینن و نها ئه‌و ل سه‌ر چه‌ندین به‌رنامێن نوو كار دكه‌ن و داخستنا هه‌ده‌پێ ژی ئێكه‌ ژ وان خالێن كو مه‌هه‌پێ دڤێت ب رێیا داخستنا هه‌ده‌پێ ده‌نگێن خوه‌ زێده‌ بكه‌ت.

ل ئالیێ دی دوهی میتحات سینجار هه‌ڤسه‌رۆكێ هه‌ده‌پێ ژی راگه‌هاند كو ب داخستنا هه‌ده‌پێ دێ ره‌وشا ناڤخوه‌یی یا توركیا ئالۆزتر لێ هێت و هه‌كه‌ به‌ری هه‌لبژارتنان بریارا داخستنا هه‌ده‌پێ ژی بهێته‌ دان، وان خوه‌ بۆ هه‌ر ئه‌گه‌ره‌كێ به‌رهه‌ڤ كرینه‌ و دێ پشكداریێ د هه‌لبژارتنێن داهاتی یێن توركیا دا كه‌ن.

ئه‌ڤرۆ، عه‌زیز هه‌ورامی

ژ ئه‌گه‌رێ رێك نه‌كه‌فتنا لایه‌نێن سیاسی، هه‌له‌بجه‌ نه‌بوو حودانا جڤاتا پارێزگه‌هێ و رێڤه‌به‌ریێن گشتی ب وه‌كاله‌ت دهێنه‌ ب رێڤه‌برن، به‌پرسه‌كێ بزاڤا گۆران ل هه‌له‌بجه‌ دبێژیت، ئێكه‌تی نیشتمانی كوردستان ئه‌گه‌رێ رێك نه‌كه‌فتنێ یه‌.

نزار مه‌حموود، به‌رپرسێ بزاڤا گۆران ل پارێزگه‌ها هه‌له‌بجه‌ بۆ رۆژناما (ئه‌ڤرۆ) گۆت” ل سالا 2014 لایه‌نێن سیاسی ل هه‌له‌بجه‌ كۆمبوون و بابه‌تێ دروستكرنا جڤاتا پارێزگه‌ها هه‌له‌بجه‌ هاته‌ به‌رهه‌ڤكرن بۆ رێكه‌فتنێ ل سه‌ر زێده‌باری به‌لاڤكرنا پۆستێن ئیداری، هه‌موو لایه‌نان ژبلی پارتی داخوازكر هه‌لبژارتنێن سالا 2014  ببنه‌ بیڤه‌ر بۆ به‌لاڤكرنا كورسیێن جڤاتا پارێزگه‌هێ، به‌لێ ده‌مه‌كی پێكئینانا جڤاتا ناڤبری گیروبوو، پاشی چه‌ند رێككه‌فتنێن دی هاتنه‌ ئه‌نجامدان، تاكو دووماهی جار هه‌موو لایه‌ن ل سه‌ر دروستكرنا جڤاتا پارێزگه‌هێ و به‌لاڤكرنا پۆستێن ئیداری رێككه‌فتین، به‌لێ ئێكه‌تی نیشتمانی كوردستان په‌شێمان بوو ژ وێ رێككه‌فتنێ و راگه‌هاند كو پێگیر نابیت، دده‌مه‌كی دا ده‌ستپێشخه‌ریا ئێكه‌تیێ ب خوه‌ بوو”.

گۆت ژی” مه‌ چه‌ندین رێككه‌فتن یێن ل گه‌ل ئێكه‌تیێ هه‌ین، به‌لێ هیچ ژ وان رێككه‌فتنان نه‌هاتینه‌ بجهئینان، ل سالا 2016 بزاڤا گۆران پۆستێ پارێزگه‌رێ هه‌له‌بجه‌ راده‌ستی ئێكه‌تیێ كر ب گۆره‌ی رێككه‌فتنا د ناڤبه‌را مه‌ دا هاتیه‌ كرن، پێدڤی بوو جێگرێ پارێزگه‌ری و قایمقامێ هه‌له‌بجه‌ بۆ گۆران بیت، به‌لێ هه‌تا نوكه‌ ئه‌و پۆسته‌ نه‌داینه‌ مه‌ د ده‌مه‌كی دا مه‌ ناڤێن به‌ربژارێن خوه‌ بۆ وان هه‌ردو پۆستان بۆ حوكمه‌تێ (جێگرێ سه‌رۆكێ وه‌زیران) بلند كربوون”.

زێده‌تر گۆت” جڤاتا پارێزگه‌هێ بۆ هه‌له‌بجه‌ یا گرنگه‌، داخوازێ ژ حوكمه‌تا عیراقێ دكه‌ین هه‌له‌بجه‌ وه‌كو پارێزگه‌ ب هه‌ژمێریت، به‌لێ هه‌تا نوكه‌ د شیان دا نه‌بوو هه‌له‌بجه‌ خودانا جڤاتا پارێزگه‌هێ بیت”.

گۆت ژی”  نوكه‌ هه‌له‌بجه‌ تنێ ب ناڤ پارێزگه‌هه‌ و ب دیتنا مه‌ هنده‌ك كه‌س یێن هه‌ین كو ناخوازن جڤاتا پارێزگه‌هێ ل هه‌له‌بجه‌ هه‌بیت و نوكه‌ هه‌موو رێڤه‌به‌ریێن بووینه‌ رێڤه‌به‌ریێن گشتی ژی تنێ تابلۆیێن وان یێن هاتینه‌ گوهۆرین”.

ئه‌ڤرۆ:

شیره‌تكارێ مه‌كته‌با سیاسی یا پارتی دیموكراتی كوردستان راگه‌هاند، كۆنگرێ پارتی دێ ل ژڤانێ بۆ هاتیه‌ ده‌ستنیشانكرن ل هه‌یڤا داهاتێ ل پارێزگه‌ها دهۆكێ دێَ هێته‌ ئه‌نجامدان و به‌رهه‌ڤی ژی بۆ كۆنگره‌ یێن ب دووماهی هاتین .

عارف روشدی، شیره‌تكارێ مه‌كته‌با سیاسی یا پارتی دیموكراتی كوردستان، گۆت” هه‌تا نوكه‌ ژڤانێ ئه‌نجامدانا كۆنگرێ نوو یێ پارتی دیموكراتی كوردستان وه‌كو خوه‌ یێ مای ودێ ل ده‌مێ خوه‌ یێ دیاركری دا هێته‌ ئه‌نجامدان كو ئه‌و ژڤانێ بۆ كۆنگره‌ی هاتیه‌ ده‌ستنیشانكری ژی 26 گۆلانێ یه‌”.

عارف روشدی گۆت ژی” پارتی دیموكراتی كوردستان به‌رده‌وام مژوولی به‌رهه‌ڤیان بوو ژبۆ ئه‌نجامدانا كۆنگره‌ی و ئاماده‌كاریێن تمام ژی بۆ هاتینه‌ كرن و تنێ چاڤه‌رێ ژڤانی دكه‌ین، بۆ وێ چه‌ندێ ده‌ست ب ئه‌نجامدانا كۆنگره‌ی بهێته‌ كرن، چونكی كۆنگره‌ گه‌له‌ك یێ پێدڤیه‌”.

وی شیره‌تكارێ مه‌كته‌با سیاسی یا پارتی به‌حس ل وێ چه‌ندێ ژی كر كو بریاره‌ كۆنگرێ پارتی هه‌روه‌كو چاوان پێشتر بریار ل سه‌ر هاتبوو دان، ل دهۆكێ بهێته‌ ئه‌نجامدان.

بریار بوو سالا 2020 كۆنگرێ پارتی دیموكراتی كوردستان بهێته‌ ئه‌نجامدان، به‌لێ ژبه‌ر به‌لاڤبوونا نه‌خوه‌شیا كرۆنا، بۆ ئه‌ڤ ساله‌ هاته‌ پاشخستن و هه‌تا نوكه‌ بریار ئه‌وه‌ ل هه‌یڤا داهاتی ب رێڤه‌ بچیت.

ئه‌ڤرۆ، عه‌زیز هه‌ورامی:

بریاره‌ ل چه‌ند رۆژێن داهاتیدا ل سه‌ر ده‌ستپێشخه‌ریا نێچیرڤان بارزانی، سه‌رۆكێ هه‌رێما كوردستانێ، ل باره‌گایێ سه‌رۆكایه‌تیا هه‌رێمێ كۆمبوونا لایه‌نێن سیاسی بهێته‌ ئه‌نجامدان، سیاسه‌تمه‌داره‌كێ كورد ژی دبێژیت، ده‌ستپێشخه‌ریا سه‌رۆكێ هه‌رێمێ یا گرنگه‌ و پێدڤیه‌ حزب و لایه‌نێن سیاسی ئاخڤتنا راشكاوانه‌ بكه‌ن ، كێشان چاره‌سه‌ر بكه‌ن،  ژبه‌ركو چاڤێ كوردان یێ ل وان.

د. مه‌حموود عوسمان، سیاسه‌تمه‌دارێ كورد بۆ رۆژناما ئه‌ڤرۆ گۆت” گرنگه‌ لایه‌نێن سیاسی یێن هه‌رێما كوردستانێ كۆمبن ژ به‌ركو ئه‌ڤه‌ ده‌مێ ساله‌كێ كۆم نه‌بووینه‌، كۆم نه‌بوون ژی هه‌ست نه‌كرنه‌ ب به‌رپرسیاره‌تیێ ل به‌رامبه‌ر خه‌لكێ خوه‌، ده‌مێ ئه‌ڤ لایه‌نه‌ به‌حسێ ملله‌تی دكه‌ن، پێدڤیه‌  ل گه‌ل هه‌ڤدو رونن  ب راشكاوی ل سه‌ر كێشان باخڤن”.

سه‌رۆكێ هه‌رێما كوردستانێ د ده‌ستپێشخه‌ریه‌كا نوو دا داخوازا كۆمبوونا لایه‌نێن سیاسی كریه‌ ل سه‌رۆكایه‌تیا هه‌رێما كوردستانێ، مه‌حموود عوسمان ل دۆر ڤێ چه‌ندێ دبێژیت” دڤێت لایه‌نێن سیاسی به‌ر ب ده‌ستپێشخه‌ریا سه‌رۆكێ هه‌رێمێ بچن و كۆمبن، ده‌ستپێشخه‌ریه‌كا باشه‌ ژ لایێ سه‌رۆكێ هه‌رێمێ ڤه‌، ژ به‌ركو سه‌رۆكایه‌تیا هه‌رێمێ چه‌تره‌كه‌ كو هه‌موویان كۆم دكه‌ت”.

خویاكر ژی” ئه‌گه‌ر لایه‌نێن سیاسی بۆ كوردان كاردكه‌ن، به‌رژه‌وه‌ندیا خه‌لكێ كورد د وێ چه‌ندێ دایه‌ ئه‌و لایه‌نه‌ كۆمبن و به‌ره‌یه‌كی دروست بكه‌ن كو هه‌ڤشێوێ به‌ره‌یێ كوردستانی بیت ئه‌وێ ل ده‌مێ سه‌رهلدانێ هه‌ی، ب دیتنا من ئێكگرتن سه‌ركه‌فتنێ ب ده‌ستڤه‌ دئینیت، ئه‌و كێشێن نوكه‌ مه‌ ل گه‌ل به‌غدا هه‌ین، كێشێن سیاسی نه‌، نه‌كو كێشا بودجه‌یه‌، ئه‌ڤه‌ 18 سال پشتی ژناڤچوونا رژێما سه‌دامی بۆرین، به‌لێ هه‌ر كێشه‌ د به‌رده‌وامن، پێدڤیه‌ شانده‌كێ بلند یێ سیاسی بهێته‌ پێكئینان و ل گه‌ل به‌غدا ل سه‌ر پرسان ب تایبه‌تی چاره‌نڤیسێ گه‌لێ مه‌ دانوستاندنان بكه‌ت”.

ل هه‌یڤا نیسانا سالا بۆری ل سه‌ر داخوازا سه‌رۆكێ هه‌رێمێ كۆمبوونا لایه‌نێن سیاسی و پاشی كۆمبوونا هه‌رسێ سه‌رۆكایه‌تیێن هه‌رێمێ و كۆمبوونا فراكسیۆنێن كوردستانی ل به‌غدا هاته‌ ئه‌نجامدان و كۆده‌نگیه‌كا باش یا ناڤخوه‌یی لێ دیار بوو، ل جه‌ژنا نه‌ورۆزا ئه‌ڤ ساله‌ ژی سه‌رۆكێ هه‌رێمێ راگه‌هاندبوو، پشتی جه‌ژنا نه‌ورۆزێ دێ كۆمبوونا لایه‌نێن سیاسی ل سه‌رۆكایه‌تیا هه‌رێما كوردستانێ هێته‌ ئه‌نجامدان.