نێچیرڤان بارزانی:بڕیارا دادگه‌ها فیدرالی یا نه‌دادپه‌روه‌ر و سته‌مكارانه‌یه‌

نێچیرڤان بارزانی:بڕیارا دادگه‌ها فیدرالی یا نه‌دادپه‌روه‌ر و سته‌مكارانه‌یه‌

ئه‌ڤرۆ:

سه‌رۆكێ هه‌رێما كوردستانێ په‌یامه‌ك ل دۆر بڕیارا دادگه‌ها فیدرالی یا ئیراقی به‌لاڤكر و تێدا دبێژیت، بڕیاره‌كا تمام نه‌ دادپه‌روه‌ر و سته‌مكارانه‌یه‌.

نێچیرڤان بارزانی، سه‌رۆكێ هه‌رێما كوردستانێ د پشكه‌كا په‌یاما خوه‌ دا دبێژیت” بڕیارا دادگه‌ها فیدرالی یا ئیراقی ب نه‌دروستیا هنارتنا شایسته‌یێن دارایی و مووچێ مووچه‌خۆرێن هه‌رێما كوردستانێ ژ ئالیێ حوكمه‌تا فیدرالی یا ئیراقێ ڤه‌ ل سالێن 2021 و 2022 ، بڕیاره‌كا تمام نه‌دادپه‌روه‌ر و سته‌مكارانه‌یه‌”.

گوت ژی” ئه‌و بڕیاره‌ نه‌ تنێ مووچه‌خۆر و خه‌لكێ كوردستانێ كو وه‌لاتیێن ئیراقێ نه‌، به‌لكو هه‌موو پرۆسه‌ و سه‌قامگیریا سیاسی و وێ ڕێككه‌فتنه‌ ژی دكه‌ته‌ ئارمانج كو حوكمه‌تا نوو یا فیدرالی یا ئیراقی ل سه‌ر هاتیه‌ دامه‌زراندن”.

نێچیرڤان بارزانی ئاماژه‌كر” ئیراق ب پرۆسه‌یه‌كا درێژ و ئالۆز یا سیاسی و نه‌ سه‌قامگیردا ده‌رباز بوو هه‌تاكو ل دووماهیێ حوكمه‌ته‌ك ل به‌غدا هاتیه‌ دروستكرت كو خه‌لكێ ئیراقێ هیڤی و ئومێد ل سه‌ر قۆناغه‌كا سه‌قامگیر و باشتر هه‌بوون، هه‌موو چاڤه‌ڕێیه‌ك ژ دادگه‌ها فیدرالی یا ئیراقی ئه‌وبوو كو بۆ پاراستنا به‌رژه‌وه‌ندیا هه‌موو پێكهاته‌یێن ئیراقێ و لبه‌رچاڤ وه‌رگرتنا ڕه‌وشا سیاسی، نه‌بیته‌ ئه‌گه‌رێ شێواندنا وێ ده‌لیڤه‌ و سه‌قایێ ئه‌رێنی ئه‌وێ دروست بووی بۆ چاره‌سه‌ركرنا كێشه‌یێن وه‌لاتی، ب تایبه‌تی كێشه‌یێن هه‌ولێر – به‌غدا و سه‌قامگیریا سیاسی یا ئیراقێ نه‌ ئێخیته‌ د مه‌ترسیێ دا”.

سه‌رۆكێ هه‌رێما كوردستانێ ل دۆر بڕیارا دادگه‌ها فیدرالی یا ئیراقی د ڤی ده‌می دا ئه‌وژی ڕۆهنكر” ژبلی وێ چه‌ندێ گومان و ده‌هان پرسیارێن مه‌زن دروست دكه‌ت، هه‌روه‌سا بابه‌تێ له‌زكرن د ده‌ركرنا قانوونه‌كا نوو بۆ دووباره‌ دامه‌زراندنا وێ دادگه‌هێ دئینیته‌ پێش، وه‌كو پشكه‌كا گرنگ و سه‌ره‌كی ژ ڕێككه‌فتنا ئالیێن سیاسی بۆ دامه‌زراندنا حوكمه‌تا فیدرالی یا نوو ل ئیراقی”.

کۆمێنتا تە