ئەڤرۆ نيوز:
رۆژناما تایمز یا بریتانی د راپۆرتەکێ دا راگەھاند پشتی کو ب ھزاران کەس ژ رۆژھەلاتا ناڤین بەرێ خوە دانە ئورۆپا و داخوازا مافێ پەنابەریێ کرن نھا رەوشەکا نەئاسایی ل ئورۆپا دروست بوویە و وەلاتێن ئورۆپا ژی پێداچوونەکا مەزن د دانا مافێ وەلاتبوونێ بۆ کەسێن بیانی دا دکەن و یێن کو پێداگیریێ ب قانوونێن نوو نەکەن نابنە وەلاتی و پشتی چەندین سالان ژی حوکمەتێن وان وەلاتان دێ شێن وان کەسان دیسان ڤەگەریننە وەلاتێ وان.
د پشکەکا دی یا راپۆرتا تایمز دا ھاتیە دیار کرن کو ژ بەر مەترسیا تیرۆرێ و کریارێن توندوتیژی و بەلاڤبوونا موسولمانان ل ئورۆپا ھزرمەندێن ئورۆپی ھۆشداری داینە حوکمەتێن خوە کو ژ بەر رەوشا نھا یا خراب ل رۆژھەلاتا ناڤین بلا ئەو بۆ چەند سالەکان خەلکی خوەدان بکەن، لێ دەمێ رۆژھەلاتا ناڤین ئارام بوو بلا دیسان پرانیا وی خەلکی ڤەگەریننە جھێ وان یێ بەرێ و ھژمارەک کێم ژ کەسێن کو مەرجێن قانوونی ژ وان بگریت بلا ئەو ماف ھەبیت کو بشێن ببنە وەلاتی، چونکو ھەکە مافێ وەلاتیبوونێ بۆ ھەموو کەسەکێ بھێتە دان پشتی چەند سالان خەلکێ ئورۆپا دێ د وەلاتێ خوە دا ببنە کەمینە و ئەو یەک دێ مەترسیێ ل سەر ئورۆپا ب گشتی دروست کەت.
ل ئالیێ دی وەزیرێ ناڤخوە یێ دانیمارکێ ژی دوھی د پرێس کۆنفرانسەکێ دا راگەھاند کو ئەو مافێ وەلاتیبوونێ نادەنە ھەر کەسەکێ، یێن کو ھەری کێم ٥ سالان ل وەلاتێ وان بژیت، فێرێ زمان و کەلتورێ وان ببیت و د ناڤ وان ٥ سالان دا چو کریارەک توندوتیژی ئەنجام نەدابیت و پێگیری ب قانوونان کربیت دێ ئەزموونەک بۆ وان ھێتە دانان و یێن بشێن د ئەزموونان دا سەرکەڤتی بن دێ مافێ وەلاتیبوونێ وەرگرن و یێن دیتر دێ دیسان بۆ وەلاتێ وان ھێنە ھنارتن و گۆت: (نابیت ل ژێر ناڤێ مافێ مرۆڤی و ئازادیان ئەم مەترسیێ بۆ ئاسایشا وەلاتێ خوە دروست کەین، چونکو ھەموو کەسێن کو بەرێ خوە ددەنە ئورۆپا مرۆڤێن باش نینن، زانیاری د دەستێ مە دا ھەنە کو د ناڤ کەسێن دھێنە ئورۆپا دا ئەندامێن رێکخراوێن تیرۆرستی ژی ھەنە و دڤێت ئەم پێرابوونێن توند ل ھەمبەر وان وەربگرین و ژ بەر ھندێ ژی دێ قانوونێن نوو بۆ پەنابەران و مافێن وان ل وەلاتێ مە ھێنە دەرخستن و نھا ئەم کار ل سەر پرۆژەکێ باش دکەین و دێ د زووترین دەم دا بەینە پەرلەمانی دا بھێتە پەسەند کرن).
چاڤدێرێن سیاسی یێن ئورۆپا دیار دکەن کو دەزگەھێن ھەوالگێریا ئەمریکا، ئەلمانیا و بریتانیا ڤەکۆلینێن باش ل دۆر وان کەسان دکەن یێن کو دچنە ئورۆپا و بۆ وان ئاشکرا بوویە کو گەلەک کەسێن توندرەو ژی د ناڤ خەلکێ پەنابەر دا ھەنە و پشتی چەند سالان ئەو کەسە دێ شێن مەترسیێ بۆ ئورۆپا دروست کەن و ژ بەر ھندێ ژی نابیت سەرەدەریا کو ل گەل کەسەکێ پەنابەر دھێتە کرن ل گەل وان ژی بھێتە کرن.

ئه‌ڤرۆ نيوز:
رۆژنامەکا ئەمریکی د راپۆرتەکێ دا دیار دکەت کو ھێرشێن ڤێ دووماھیێ یێن روسیا ل سووریێ ھەموو پیلانێن تورکیا ژناڤبرن، چونکو تورکیا دخواست ب رێیا ھێزێن بەرھنگاریێ و شەرێ داعشێ رژێما بەشاری ژناڤ بچیت و ئەو پێگەھێ خوە ل سووریێ ب ھێز بکەت لێ روسیا ئەو یەک ژناڤبر و نھا کورد ل سووریایێ ب ھێز دکەڤن و ئەو یەک ژی نیشانا شکەستنا پیلانێن ئەردۆگانی نە.
رۆژناما واشنتۆن پۆست یا ئەمریکی دوھی د راپۆرتەکێ دا بەحسێ ھێرشێن ڤێ دووماھیێ یێن روسیا ل سووریێ کر و راگەھاند کو تورکیا پتر ژ ھەر وەلاتەکێ ژ ھێرشێن روسیا خەمگین بوویە و ئەردۆگانی ژی گەلەک شەپرزە بوویە و رۆژانە داخۆیانیێن دژوار ددەت لێ کەس گوە نادەتە وی، چونکو پۆتینی باش دزانی ھەکە نھا دەستێوەردانێ د سووریا دا نەکەت مەترسیەکا مەزن ھەیە کو رژێما بەشاری ژناڤ بچیت و ئەو ھێزێن کو تورکیا ھاریکاریا وان بکەت بھێنە سەر دەستھەلاتێ و تیرۆر ل سووریێ پتر بەلاڤە بیت و ژ بەر ھندێ ژی ھێرشی داعشێ ھاتە کرن، ھەرچەندە کو ھندەک بەلگە نیشا ددەن کو روسیا ل گەل داعشێ ھێرشی بنگەھێن ھێزێن بەرھنگاریا سووریێ ژی کریە، چونکو روسیا بزاڤێ دکەت ب بەرەکێ ل دو ئارمانجان بدەت و نەھێلیت رژێما بەشاری ژناڤ بچیت.
د پشکەکا دی یا راپۆرتێ دا ھاتیە دیار کرن کو ئەڤە چەند سالن تورکیا ب ھەموو رەنگەکێ بزاڤا ھندێ دکەت کو رژێما بەشاری ژناڤ بچیت، ئارمانجا سەرەکی یا تورکیا ئەو بوو کو بشێت ئەو گرۆپێن کو نھا ل تورکیا نە بھینتە سەر دەستھەلاتێ و سووریایێ ب تەمامی بکەتە د دەستێ خوە دا، لێ روسیا ھەر زوو ھەست ب بەرنامێ تورکیا کر و ب رێیا ئیرانێ و ھێزێن دی یێن شیعە بەرەڤانی ل رژێما بەشاری کرن و ئەڤرۆکە ژی بەشار ئەسەد ل سەر دەستھەلاتێ ما و پشتی بۆرینا دەمەکێ ھێزێن رۆژئاڤایێ ژی گەھشتنە ڤێ باوەریێ کو ھەکە نھا رژێما بەشاری ژناڤ بچیت دێ چارەنڤیسێ سووریایێ خرابتر لێ ھێت و ئەو ژی نھا تا رادەیەکێ پشتەڤانیێ ل مانا ئەسەدی ب مەرج دکەن.
د پشکەکا دی یا راپۆرتێ دا ھاتیە دیار کرن کو ئەمریکا بەرھەڤیەکا مەزن دکەت کو ب رێیا یەکینەیێن پاراستنا گەل جەرابلوسێ و رەقایێ ژ دەستێ داعشێ دەردخینیت و ھەکە جەرابلوس کەڤتە دەستێ کوردان ئێدی چ پەیوەندی د ناڤبەرا داعشێ و تورکیا دا نامینن و دێ داعش گەلەک زوو لاواز بیت و بەر ب نەمانێ ڤە چیت، چونکو ئەمریکا و روسیا بەرژەوەندیێن ھەڤپشک ل سووریایێ ھەنە و ئەو ژی نەمانا تیرۆرێ یە و ھەر دو وەلاتێن زلھێز دشێن ل دۆر چەندین خالان رێکبکەڤن، لێ تورکیا زەرەرمەندێ سەرەکی یە د پاشەرۆژێ دا ژی چو پێگەھێ تورکیا ل سووریێ نابیت و خەلکێ سووریایێ ژی نھا ھەموو تورکیا وەک ئەگەرێ سەرەکی یێ رێتنا خوینا لاوێن خوە دبینن.
د بەردەوامیا راپۆرتێ دا ھاتیە دیار کرن کو کوردا شیان ل ھەمبەر داعشێ ل سووریێ بەرخوەدانەک بێ وێنە بکەن و روسیا و ئەمریکا ھەر دو ژی ژ وێ ھێزا کوردان د رازی نە و دژبەریا کوردان ناکەن و ژ بەر ھندێ ژی دێ د سووریا یا نوو دا کورد خوەدان پێگەھەک باش بن و ترسا مەزن و سەرەکی یا تورکیا ھەر ژ دەستپێکێ ئالۆزیێن سووریا ھەتا نھا ژی ئەو یەک بوویە.
د دووماھیا راپۆرتێ دا ئەو یەک ژی ھاتیە دیار کرن کو تورکیایێ گەلەک بزاڤ کرن کو وەک وەلاتەک ئەندامێ ناتۆ بشێت ژ ھێزا ناتۆیێ مفایێ وەربگریت دا روسیا ھێرشێن خوە ل سووریا بدەتە راگرتن، لێ پرانیا ئەندامێن ناتۆ ژی باش دبینن کو چەند سالن تورکیا پشتەڤانیا داعشێ دکەت و نھا ناتۆ ل دژی سیاسەتا تورکیایە ل سووریێ و ھەکە ئەردۆگان سیاسەتا خوە ل بەر چاڤان دەرباز نەکەت دێ پشتی سووریا ل گەلەک دەڤەرێن دیتر یێن رۆژھەلاتا ناڤین و ھەتا ل ناڤ تورکیا ب خوە ژی تووشی شکەستنەکا مەزن بیت.

ئەڤرۆ نیوز، ئەیاد بەرواری:
وەزارەتا بەرەڤانیا روسی ئەڤرۆ چارشەمبی راگەھاند، دبیت پێشنیارێن وەزارەتا بەرەڤانیا ئەمریکی ل دۆر ھەڤکاریێ د شەڕێ داعشێ دا ل سووریێ قەبوول بکەت و ئاماژە دا شارەزایێن لەشکری ئەڤرۆ دێ ڤەخواندنێ ل سەر ھووردەکاریێن ڤێ پرسێ کەن.
ئیگور کوناشینکوف نوونەرێ وەزارەتا بەرەڤانیا روسی، ل دووڤ سایتێ کەنالێ (روسیا الیوم) گوت” وەزارەتا بەرەڤانیا روسی بەرسڤا پێشنیارێن بەنتاگۆنێ دایە ل دۆر ھەڤکاریێ د شەڕێ داعشێ دا ل سەر ئاخا سووریێ و ب شێوەکێ گشتی دشیاندایە ئەو پێشنیارە بھێنە قەبوولکرن بۆ و بجھئینان”.