ئەڤرۆ نیوز:

سەرۆک مەسعود بارزانی پێشوازی ل ماتیۆ تولەر بالیۆزێ ئەمریکا ل عیراقێ کر و د کۆمبوونێ دا بەحسێ رەوشا عیراقێ و ئالۆزیێن ل دەڤەرێ هاتە کرن.

د کۆمبوونا سەرۆک بارزانی ل گەل بالیۆزێ ئەمریکا دا بەحسێ لڤینێن ڤێ دووماهیێ یێ داعشێ ل عیراقێ و دەڤەرێن کوردستانی یێن دەرڤەی ئیدارا هەرێما کوردستانێ ژی هاتە کرن.

بالیۆزێ ئەمریکا ب گرنگی بەحسێ پێکڤەژیانا ل هەرێما کوردستانێ کر و هێڤی خواست ئاریشێن د ناڤبەرا هەرێما کوردستانێ و بەغدایێ دا بهێنە چارەسەر کرن.

ئەڤرۆ نیوز:

رێبەر ئەحمەد وەزیرێ ناڤخوە یێ حوکمەتا هەرێما کوردستانێ پشتی کۆمبوونا لیژنا بلند یا بەرهنگاریا کۆرۆنایێ راگەهاند کو ل گەلەک دەڤەران وەکو پێدڤی پێگیری ب رێنمایان ناهێتە کرن و ژ بەر هندێ ژی هژمارا تووشبوویێن کۆرۆنایێ ل هەرێما کوردستانێ رۆژ ب رۆژێ زێدەتر دبیت.

وەزیرێ ناڤخوە ئەو یەک ژی دیار کر کو چو گوهۆرین د قەدەغەیا هاتنوچوونێ دا ناهێتە کرن و دێ قەدەغە وەکو خوە یا بەردەوام بیت و گۆت: (مە داخواز ژ پارێزگارێن هەرێما کوردستانێ ژی کریە کو ب توندی کار بۆ هندێ بکەن دا قەدەغەیا هاتنوچوونێ ب باشی برێڤە بچیت و هەر کەسەک سەرپێچیەک ژی بکەت ب توندی سزا دەن).

وەزیرێ ناڤخوە یێ حوکمەتا هەرێما کوردستانێ ئەو یەک ژی دیار کر کو هەکە ئەم پێگیریێ ب رێنمایان نەکەین و قەدەغەیا هاتنوچوونێ وەکو خوە نەهێتە بجهئینان دێ کارەساتێن مەزن ل هەرێما کوردستانێ روو دەن.

وەزیرێ ناڤخوە ئەو یەک ژی دیار کو ئەو وەکو وەزارەتا ناڤخوە پشتەڤانیێ ل داخوازیێن خەلکی دکەین و گۆت: (ئەم دێ بۆ هندێ ئاسانکاریێن پێدڤی ژی کەین).

ئەڤرۆ نیوز:

نێچیرڤان بارزانی سەرۆکێ هەرێما کوردستانێ ل گەل جەمیس سۆرنتن کونسولێ گشتی یێ بریتانیا ل هەولێرێ کۆمبوو و د کۆمبوونێ دا بەحسێ رەوشا نها ل عیراقێ  و هەرێما کوردستانێ هاتە کرن.

سەرۆکێ هەرێما کوردستانێ راگەهاند کو رەوشا نها وەسا دخوازیت هەموو ئاریشێن د ناڤبەرا هەرێما کوردستانێ و بەغدا دا ل سەر بنەمایێ دستووری بهێنە چارەسەر کرن و گۆت: (هێڤیدارین هەرێما کوردستانێ ل گەل حوکمەتا کازمی هەموو ئاریشێن نها چارەسەر بکەت).

کونسولێ گشتی یێ بریتانیا ژی دیار کر کو بریتانیا دخوازیت هەرێما کوردستانێ و عیراق هەموو ئاریشێن خوە چارەسەر بکەن، چونکو ئەو یەک د بەرژەوەندیا هەر دو ئالیان دایە.

ئەڤرۆ نیوز:

نەبەز عەبدولحەمید قایمقامێ هەولێرێ راگەهاند کو قەدەغەیا هاتنوچوونێ بۆ پاراستنا هەموو وەلاتیانە، چونکو ئامارێن ڤێ دووماهیێ ل سلێمانیێ جهێ دلگرانیێ بوون و زەنگا مەترسیێ بوو، ژ بەر هندێ ژی بریارەکا وەسا هاتە دان، چونکو هەکە وەکو پێدڤی پێگری ب رێنمایان نەهێتە کرن دێ رەوش ژ کۆنترۆلێ دەرکەڤیت.

قایمقامێ هەولێرێ داخواز ژ هەموو وەلاتیان ژی کر کو پایبەندی رێنمایان بن و ژ بۆ ساخلەمیا خوە و کەسوکارێن خوە ل مال بمینن.