ئه‌ڤرۆ  نیوز، مه‌حمود نهێلى:

به‌رپرسێ هوبا چاندنێ ل دێره‌لۆك بۆ ئه‌ڤرۆ نیوز دیار كر، كو ئه‌وان دڤان رۆژان دا ده‌رمانێ چاندنێ و شه‌مایا هنگڤینى ب سه‌ر جوتیارێن سنورێ هوبا وان دا پارڤه‌كرینه‌.

ئه‌ندازیار عسمه‌ت ئیبراهیم به‌رپرسێ هوبا چاندنێ ل دێره‌لۆك دیار كر، كو ئه‌و ده‌رمانێن ژلایێ هوبا وان ڤه‌ هاتیه‌ پارڤه‌كرن ده‌رمانێن دژى كرم و كێزان بوویه‌ و ب سه‌ر چه‌ندین جوتیارێ ده‌ڤه‌رێ دا دهێته‌ پارڤه‌كرن و گۆت: ( ئه‌ڤ ده‌رمانه‌ هه‌م بو ره‌شاندنا داروبارى و هه‌م ژى بو ره‌شاندنا ده‌رامه‌تێن دى یێن چاندنێ بۆ پاراستنێ ژ پیچبوونێ و نه‌خوه‌شیان دهێته‌ بكار ئینان و ب نرخێ نیڤ بها بو جوتیارێن سنورێ ناحیا دێره‌لۆك و شێلادزێ كو دكه‌ڤنه‌ سه‌ر ب هوبا وان ڤه‌ هاتیه‌ دابینكرن).

و دیاركر، زێده‌بارى ڤان جورێن ده‌رمانى ئه‌و شه‌مایا مێشێن هنگڤینى ب سه‌ر مێشه‌ڤێن ده‌ڤه‌رێ دا دابه‌ش دكه‌ن و تا نوكه‌ چه‌ندین جوتیارێن ده‌ڤه‌رێ مفادار بووینه‌ ژ ڤێ شه‌مایێ.

ناڤهاتى ئاشكراكر، كو د هه‌یاما چوویى دا زێده‌بارى قه‌دغه‌یا هاتن و چوونێ ئه‌و به‌رده‌وام بووینه‌ ل سه‌ر كارێ خوه‌ و هاریكارى بۆ خودانێن پرۆژێن خودانكرنا مریشكان و چیچه‌لوكان ئه‌نجامداینه‌، و ده‌ستوریا هاتن و چوونێ بو جوتیارێن پێدڤى ب هاتن و چوونێ و هه‌روسا خودانێن پرۆژه‌یان دا دابینكرینه‌.

ئەڤرۆ نیوز، عەلی حاجی :

رێڤەبەرێ چاندنێ ل زاخۆ د داخویانیەکێ دا بۆ ئەڤرۆ نیوز ئاشکەرا کر ب کوژمێ ٤٠٧ ملیون دیناران دەرمانەکێ تایبەت یێ قرکرنا سنکێ دناڤ بەرهەمێ گەنمێ جۆتیاران ژلایێ حکومەتا هەرێما کوردستانێ ڤە بۆ جوتیارێن کوردستانێ هاتیە دابین کرن.

زێدەتر ئەحمەد سامی گوت: (ئەو دەرمانە بۆ هەمی پارێزگەهـ و قەزایێن کوردستانێ هاتیە دابین کرن و بارا زاخۆ ژی دو تەنێن وی دەرمانی نە، د ئێکەم هەوا مە ژی دا پشتی تیمێن مە بەردەوام لێگەریان کرین دیار بوو ئەو سنکە دناڤ بەرهەمێ جوتیارێن کومەلگەها دێرەبوونێ دا پەیدا بوویە لەورا ئەو دەرمانە دناڤ ٤٠٠ دونەمێن ئەردی دا هاتە رەشاندن بۆ ژناڤبرنا وی جوری سنکی ژبەر کو ئەو جورێ سنکی دبیت ئەگەرێ ژناڤ چوونا بەرهەمێ گەنمی و ئەو دەرمانە ژی ب رێژەیا ٨٠٪ هاریکاری دگەل جوتیاری دا دهێتە کرن ئانکو ب وێ رێژێ پارە ژ جوتیاری ناهێتە وەرگرتن،ئەڤ هەوە دێ بەردەوام بیت هەتا کو بزانین ئەو سنکە ب ئێکجاری هاتیە ژناڤ برن،ئەو جورێ دەرمانی ژ جورێن گەلەک باشە و دناڤ بازاری دا ب دەست جوتیاران ناکەڤیت ژبەر کو ئەو جورە دناڤ بازاری دا نینە).

ناڤهاتی دیار ژی کر تیمێن مە دێ روژانە سەرەدانا هەمی گوند و گومەلگەهـ و ناحیێن سەر ب قەزا زاخۆ ڤە بکەن هەر بەرهەمەکێ گەنمی بزانین توشی وی جوری سنکی بویە دێ رابین ب رەشاندنا دەرمانی دا کو بهێتە ژناڤبرن.

ئه‌ڤرۆ نیوز، ره‌مه‌زان هه‌رنی:

به‌رهه‌مێ‌ رێڤاسا ل وه‌رزێ‌ بهارێ‌ شین دبیت خواسته‌كا باش لسه‌ر هه‌یه‌ به‌لێ‌ ئه‌ڤساله‌ ژبه‌ر به‌لاڤبوونا ڤایرۆسێ‌ كۆرۆنا بازارێ‌ به‌رهه‌مێ‌ رێڤاسا ل كوردستانێ‌ سفر بوو.

كه‌ریم عه‌باس وەلاتیه‌كێ‌ ده‌ڤه‌را ئاكرێ‌ یه‌ بۆ ئه‌ڤرۆ نیوز گوت: (رێڤاس ل هه‌یڤا نیسانێ‌ ده‌ما باران به‌ره‌ف كێمبوونێ‌ ڤه‌ دچین شین دبن و دگه‌هنه‌ خوارنێ‌ و سالانه‌ ب كۆم دچین بۆ كرنا رێڤاسا ل چیایا ده‌ستپێكی رێڤاس ل چیایێن بلند شین دبن، به‌لێ‌ مخابن ئه‌ڤساله‌ به‌رهه‌مێ‌ ریڤاسا نه‌هاته‌ فرۆتن ژبه‌ر قه‌ده‌غه‌یا هاتنوچوونێ‌ و نه‌بوونا رێكا ئه‌و رێڤاس رۆژانه‌ كۆم دكه‌ین ژی ب تنێ‌ پشكا خوارنێ‌ یه‌ نه‌ك فرۆتنێ‌).

خه‌لیل محه‌مه‌دفرۆشیاره‌كێ‌ گیایێن بهاریه‌ بۆ ئه‌ڤرۆ نیوز گوت: (ل كوردستانێ‌ سالانه‌ ل وه‌رزێ‌ بهارێ‌ بازارێ‌ گیایێن بهاری خواسته‌كا زۆر لسه‌ر هه‌یه‌ به‌لێ‌ ئه‌ڤساله‌ ژ به‌ر نه‌بوونا بازاری و ڤایرۆسێ‌ كۆرۆنا چو بازار نه‌بوون هه‌تا نوكه‌ رێژه‌كا كێم رێڤاس گه‌هشتنه‌ مه‌ بۆ فرۆتنێ‌ ژبه‌ر كو قه‌ده‌غه یە و وەلاتی نه‌شێن وه‌ك پێدڤی به‌رهه‌مێ‌ چیایی كۆم بكه‌ن و بفرۆشن، له‌ورا ئه‌ڤساله‌ به‌رهه‌مێ‌ ریڤاسا زۆر كێم دهێته‌ بازاری).

ئه‌ڤرۆ نیوز، ره‌مه‌زان هه‌رنی:

ل ده‌ڤه‌را ئاكرێ‌ سالانه‌ ل ده‌ستپێكا بهارێ‌ بنكه‌ گیا شین دبیت كو ل ده‌مێ‌ فرۆتنێ‌ بهایێ‌ وێ‌ گه‌له‌ك یێ‌ زۆره ‌و سالانه‌ وەلاتی بۆ كۆمكرنا ڤی به‌رهه‌می چه‌ند رۆژا دچنە چیایێن ده‌ڤه‌رێ‌ و پشتی هشككرنێ‌ ب بهایه‌كێ‌ گران دفرۆشن.

رزگار زه‌كه‌ریا هاولاتیه‌كێ‌ ده‌ڤه‌را ئاكرێ‌ یه‌ بۆ ئه‌ڤرۆ نیوز راگه‌هاند  سالانه‌ ل وه‌رزێ‌ بهارێ‌ بنكه‌گیا ل ده‌ڤه‌رێن چیایی ب رێژه‌كا باش شین دبیت و هنده‌ك سالا ئه‌ڤ بنكه‌گیایه‌ یێ‌ نێره‌ هنده‌ك سالا مێ‌، به‌لێ‌ ب گشتی ئه‌ڤساله‌ رێژا بنكه‌گیایی گه‌له‌ك زێده‌ بوویه‌، ژبەر‌كۆ كه‌ش و هه‌وایێ‌ ڤان سالا ب گشتی باشبوویه‌ بۆ  به‌رهه‌مێن چیایی، ره‌نگێ‌ گۆلا بنكه‌گیای چه‌ند ره‌نگه‌كن و ب ساناهی دهێته‌ دیتن به‌لێ‌ كۆمكرنا وی ب ساناهی نینه‌ .

گوتژی ئه‌ڤ جوره‌ گیایه‌ پتر ب هشكی دهێته‌ فروتن كیلو ب 100 بۆ 120 هزارادینارایه، ل هه‌موو ده‌ڤه‌را نینه‌ به‌لێ‌ ئه‌ڤساڵه‌ جودا ل سالێن بوری بنكه‌گیا یێ‌ زوره‌ و هێشتا چۆ بهایێ‌ دیاریكری لسه‌ر نینه‌، پشتی  دئینن مال دهێته‌ شوشتن و پاقژكرن پاشی ل گه‌ل شیری دكه‌لینین هه‌تا ره‌نگێ‌ خوه‌ دگوریت ره‌نگه‌كێ‌ زێری دگریت و لبه‌ر روژی و گه‌رماتیێ‌ هشك دكه‌ین  گه‌له‌ك جارا 5 كیلویێن ته‌ر دبنه‌ كێلویه‌ك هه‌تا هشك دبیت .

تاهر سالح شاره‌زایێ‌ گیایێن سروشتی و بنكه‌گیایی بۆ ئه‌ڤرۆ نیوز راگه‌هان بنكه‌گیا جۆره‌ گیایه‌كێ‌ سروشتیه‌ و ل وه‌رزێ‌ بهارێ‌ شین دبیت ب كێر خوارنێ‌ ناهێت بۆ مرۆڤا  و تاما وی یا نه‌خوشه‌ و هنده‌ك دبێژن ئه‌ڤ جوره‌ گیایه‌ بۆ هێڤینێ‌ دوندرمێ‌ دهێته‌ ب كارئینان ب هشكی و هنده‌كێن دژی بۆ چونێن جودا هه‌نه‌ ژ به‌ر كو تامه‌كا تیژ و نه‌خوش هه‌یه‌، ئه‌ڤ جوره‌ گیایه‌ ب هشكی ب رێكا ده‌رگه‌هێن سنوری دچیته‌ ژ ده‌رڤه‌ی كوردستانێ‌ ب مه‌به‌ستا بازرگانی كرنێ‌ .