ئه‌ڤرۆ نيوز:

بەرپرسێ ھێزا پێشمەرگەی ل چیایێ شنگالێ ئاشکرا کر، نوکە ل شنگال گرۆپێن سیاسی دەست ب دانانا زالگەھیێن ھەڤپێشک کریە، د ناڤبەرا کۆمەلگەھا خانەسوری و گۆندێ بارێ دا ل قەزا شنگال، قائیمقامێ شنگال ژی دیارکر، پیلانەکا مەترسیدار ل سەر شنگال ھەیە ل گۆڕ وێ پیلانێ بەغدا یا کار دکەت بتنی شنگال وەکو دیموگرافی وناڤ بمینت و بچوو رەنگەکێ ژیان ل شنگال نەمینت.

شێخ مەجەدل، بەرپرسێ ھێزا پێشمەرگێ ل چیایێ شنگال بۆ رۆژناما ئەڤرۆ راگەھاند، دانانا زالگەھیێن ھەڤپێشک ژلایێ پەکەکێ و حەشدا شەعبی ڤە ل قەزا شنگال بوویە ئەگەرێ خەلک نەشین ھاتن وچوونێ بکەن، چونکو وەلاتی بێزاربووینە ل وان زالگەھان ھەتا نوکە پەکەکە خوە ل شنگال نەڤەکێشایە، نوکە ل گەل حەشدا شەعبی زالگەھان دانن ھەر ئەڤە بوویە ئەگەر ترس بۆ خەلکێ دروست بیت ھیچ کەسەک نەشێت ب شەڤی ھاتن وچوونێ بکەت، ب رۆژی ژی ھاتن وچوون گەلەک یا کیمە ژبەر وان.

عیسا شەمعون، ئەندامێ جڤاتا قەزا شنگال بۆ ئەڤرۆ گۆت: رەوشا شنگال گەلەک ب زەحمەت بوویە، کەس دکەسێ ناگەھیت حوکمەتا عیراقێ یا بوویە سەر ئێش بۆ دەڤەری ب ڤی دستوداری نوکە، دوور نێنە جینوسایدەکا دێ ل شنگال دروست ببیت.

مەحما خەلیل قائیمقامێ قەزا شنگال دیارکر، کو رێ ناھێتە دان دام ودەزگەھیێن شەرعیی یێن شنگال ڤەگەرن، ودەست ب ژیانێ ل شنگال بھێتە کرن، پتر ژ 16 ھزار خانیێن وەلاتیان زەرمەندبووینە ژوانا ژی گەلەک یێن ھاتینە پەقاندن ھەتا ئەڤرۆکە بەغدا ھیچ ھەڤکاریەک بۆ ئاڤەدانیێ وژیانا ل شنگالێ نەکریە، ئەم وەسا یێ دبینن پیلانەکا مەترسیدار ل سەر شنگال ھەیە ل گۆڕ وێ پیلانی بەغدا یا کار دکەت، بتنی شنگال وەکو دیموگرافی وناڤ بمینت وھیچ رەنگەکێ شنگال ل شنگال نەمینت.

ئه‌ڤرۆ نيوز:

چادێرەکێ سیاسی خوەیاکر، ھەموو کێشە و ئاستەنگێن و رێگریا ھەمبەری سەربخوەیا مللەتێ کوردستانێ ب رێیا شاشک و عەمامێن تەھرانێ نە، ھەروەسا دووپاتکر، ھەکە ئیران نەبیت عیراقا شیعان گەلەک ژ مێژە یا ژ ناڤچووی و پارچەبوویە.

چاڤدێرێ سیاسی بلند شوانی بۆ رۆژناما ئەڤرۆ راگەھاند، بەری نوکە من ئاماژەدا بوو کو بەریتانا ھەتا ھەیڤا پێنچ ژی ژ بەر پەیوەندیێن ئابۆری یێن خوە بەرەڤانی ژ تەھرانێ دکر، نەخاسمە پشتی خیانەتا 16 ئوکتۆبەرێ بەریتانیا پەترۆلا کەرکووکی داگیر کر و دەست ب ھنارتنا پەرتۆلێکر ب رێیا تەھران، بەلێ پشتی ھەیڤا پێنچ یا ئەڤ سالە بەریتانیا دەستبەرداری بەرژوەندیێن خوە بوویە ل گەل تەھران و گلۆپا کەسەک بۆ ئەمریکا و ئیسرائیل بۆ ژناڤبرنا ئیرانێ ھەلکر، رازیبوونا بەریتانیا ژی ھاتیە پشتی کو وەلاتێ سعودیێ ئامادەیا خوە دەربڕیە ھەموو زیان و زەرەرێن بەریتانیا قەرەبوو بکەت.

چادڤێرێ سیاسی ھەروەسا رونکر، لەوڕا ل حەفتیا بۆری ھەموو وەلاتێن جیھانی ئاگەھدار کرینە، ھەتا ھەیڤا 11 یا ئەڤە سالە چو وەلات ئێدی پەترۆلا وەلاتێ ئیرانێ نەکڕن و سەرەدەریێ ل گەل ئیرانێ نەکەن، و ھەر کۆمپانیەکا سەرەدەریێ ل گەل ئیرانێ بکەت دێ تووشی سزایێن گران بیت.

بلند شوانی ھەروەسا گۆت: ئێک ژوان بەلگەیان کو بەریتانیا گلۆپا کەسک بۆ ئەمریکا و ئیسرائیل بۆ ژناڤبرنا ئیرانێ ھەلکریە، ئەوە بەریتانیا ھەتا نوکە ل سەر ڤەگەراندنا داعشێ ل سنۆرێن کەرکووک یا بێدەنگە، ئەڤە ددەمەکی دا کۆمپانیا (BP) یا بەریتانی ( برێتش پترۆلیۆم) ل سەر کارێ بیرێن پەترۆلێ ل کەرکووک یا بەردەوامە، و پەترۆلا کەرکووکێ بۆ ئیرانێ رەوانە دکەت.

چاڤدێرێ سیاسی ھەروەسا دیار کر، ژئالیەکێ دیتر ڤە، ئیران یا ل سەر دیوارێ نەمانێ، خوەپێشاندانێن باژێرێن ئیرانێ وەرچەرخانەکا مەزنە دشۆرەشا مللەتێ ئیرانێ دا دژی دەستھەلاتێ، تۆڕەبوونا مللەتێ ئیرانێ گەھشتیە بازاڕێن سەرەکی و ناڤەراستا تەھرانێ، ئابۆرێ ئیرانێ نێزیکی ژناڤچوونەکا تەمام بوویە و ب ھەزاران بازرگانان دەست ب مانگرتنێ کریە و خوەپێشاندانێن نەرازیبوونێ ب ئەگەرێ تێکچوونا رەوشا ئابۆری یا ئیرانێ.

چاڤدێرێ ناڤبری ھەروەسا خوەیاکر، رێبەرێ ئیرانێ عەلی خامەنائی دبێژیت، دخوازم ئیرانێ نەکە سووریا و عیراق و دەستان ژ خوەپێشاندانان بەردەن، ھەکە نە دێ ب ئاسن و ئاگری بەرھنگاریا ھەوە کەین، ژ ئالیەکێ دیتر ڤە مەریەم رەجەوی دبێژیت، ئیران ژ ھەموو ئالیەکێ ڤە یا ژناڤچووی، نوکە بتنێ ئەو رێگریا ژناڤچوونا ئیرانێ دکەت، ئەوە کو تیرۆرێ رەوانەی وەلاتێن دیتر دکەن.

ب دیتنا چاڤدێرێ سیاسی، ئیران دێ دەستبەرداری پەترۆلا کەرکووک بیت، و ئێدی بەرەڤانیکرن و پشتەڤانیێ ژ حەشدا شەعبی ژی ل وی باژێری ناکەت، چونکو بەری نوکە کار ب پەترۆلێ ھەبوو، ئەڤە پەترۆلا ئیرانێ ژی چو وەلاتەک لێ ناکڕیت، لەورا ھەکە ئیران بزانیت وەریسێ سێدارەدانێ گەھشتە قڕکا وێ و نێزیکی مەرگێ خوە بوویە، دوور نینە ب کارێن تیرۆرستی رابیت ژوان ژی پەقاندنا بیرێن پەرتۆلا کەرکووکێ و بێختە ستویێ جەکدارێن داعشێ، ئیران ل ھەر جھەکی بیت بڤێت دێ تێکدەتن، نەخاسمە ئەگەر بزانیت کورد و پێشمەرگە جارەکا دیتر دێ ڤەگەرن کەرکووک، وی دەمی ب ھزاران ھێجەتان دێ ھەلێخیت بۆ تێکدانا رەوشا باژێرێ کەرکووکێ و رێگیرکرنا ل ڤەگەریانا ھێزا پێشمەرگەی و سەربخوەیا کوردستانێ.

لەورا دڤێت سەرکردێن کوردان ئاگەھداربن و ھێزا پێشمەرگەی دئامادەباشیێ دابن، بۆ ڤەگەراندنا کرەکووکی و پاراستنا خەلکێ سڤیلێن کورد بەری ئیران باژێرێ وێ کاڤل و ێران بکەت.

ل دووماھیێ ژی گۆت: خیانەتکارێن 16 ئوکتۆبەرێ ژی پشکەکا پیلانا وەلاتێ ئیرانێ نە، دوور نینە ئەو ژی کەرکووکێ وێران بکەن، چونکو ھەر دەمێ ھێزا پێشمەرگە و کورداینی و مەردانی و ریفرادۆمچیان ڤەگەرنە کەرکووک وی دەمی بەرژەوندیا خیانەتکاران ل کەرکووکێ دێ ب دووماھی ھێت.