ئهڤرۆ نيوز:
پشتی ھاتنا جۆن بۆلتۆن و ڤەکێشانا ئەمریکا ژ رێککەفتنا ئەتۆمی نھا ئەمریکا ل سەر ھندێ کار دکەت کو ھەڤپەیمانیەکا ب ھێز ل دژی ئیرانێ د ئاستێ نێڤدەولەتی دا ئاڤا بکەت و د سێ خالێن ستراتیژیا نوو یا ئەمریکا دا بەحسێ ب ھێزبوونا کوردان ھاتیە کرن، ئەمریکا دخوازیت کورد ل سووریێ، عیراقێ و ئیرانێ ل دژی ھەژمونا ئیرانێ ب ھێز بن.
لوقمان ھەژار ئەحمەدی ئەندامێ سەرکردایەتیا پارتی دیموکراتی کوردستان- ئیران کو ب سالانە ل ئورۆپا خەباتا دبلۆماسیێ دکەت راگەھاند کو ھەرچەندە بەری نھا ھەلویستێ ئەمریکا ل ھەمبەر کوردان باش نەبوو، ب تایبەتی ژی دەمێ ریفراندۆما باشورێ کوردستانێ و ھەتا نھا ژی ئەمریکا وەکو پێدڤی گرنگی نەدایە رۆلێ کوردان ل ئیرانێ، لێ پشتی ژناڤچوونا رێککەفتنا ئەتۆمی نھا ئەمریکا ستراتیژیەکا ئاشکرا بۆ ئیرانێ دانایە و دخوازیت ل سەر ستراتیژیا خوە دا کار بکەت و گۆت: (د سێ خالێن گرنگ یێن ستراتیژیا نوو یا ئەمریکا دا بەحسێ کوردان ھاتیە کرن، ئەمریکا دخوازیت کورد ل رۆژھەلاتا ناڤین گشتی ب ھێز بن، ب تایبەتی ژی ئەمریکا دخوازیت کورد ل عیراقێ، ئیرانێ و سووریێ ب ھێز بن دا بشێن ل ھەمبەر ئیرانێ راوەستن، بەری نھا ئەمریکا ھەلویستەکێ جودا ھەبوو لێ نھا ئەمریکا دخوازیت ب رەنگەکێ دی کار بکەت دا رۆلێ ئیرانێ لاواز کەت).
ناڤبری ئەو یەک ژی دیار کریە کو نھا ل باشورێ ئیرانێ ئانکو ل دەڤەرێن عەرەبی رێکخستنەکا باش ل دژی ئیرانێ ب رێیا سعوودیێ ھاتیە کرن و بزاڤەکا مەزن ژی دھێتە کرن کو ھێزێن چەکداری ژ عەرەبان بھێنە دروست کرن، بەری نھا گەلەک بزاڤ بۆ ھندێ ھەبوون کو ئیران وەکو وەلاتەکێ ئێکگرتی بمینیت لێ نھا گەلەک ھزر ل ئەمریکا ھەنە کو ئاماژە ب ھندێ دکەن دڤێت ئیران بھێتە پارچەکرن، چونکو ئیرانەکا ئێکگرتی ھەموو دەمان ئاریشە بۆ ئەمریکا دروست کریە، ل سەردەمێ شاھێ ئیرانێ ژی دەمێ شاە ب ھێز بوو ل دژی ئەمریکا دەرکەفت و د ئەنجام دا ئەمریکا نەچار ما ھاریکاریا مەلایان بکەت دا شۆرەشەکێ ل دژی شاھی بکەن و نھا ژی مەلا بووینە ئاریشەکا مەزن بۆ ئەمریکا، ژ بەر ھندێ ژی گەلەک کەس ل ئەمریکا دبێژن ھەتا ئیران پارچە نەبیت دێ مەترسیا وێ ل سەر ئەمریکا و وەلاتێن رۆژئاڤا یا بەردەوام بیت.
ئەو یەک د دەمەکێ دایە کو ھەتا نھا ئەمریکا چو تشتەک ل دژی ئیرانێ نەکریە، چھل سالن ئەمریکا و ئیران ل دژی ھەڤدو درووشمان بلند دکەن لێ د کریاری دا ئەمریکا ل دژی ئیرانێ چ نەکریە و سزایێن ئابووری یێن کو ب سالانە ل دژی سیستەمێ ئیرانێ ھاتینە سەپاندن ژی ھەموو بووینە ئەگەرێ ب ھێزبوونا سیستەمێ ئیرانێ.
چاڤدێرێن سیاسی ژی دیار دکەن کو ئەمریکا نھا ژی کار بۆ گوھۆرینا سیستەمێ ئیرانێ ناکەت، سیستەمێ نھا یێ ئیرانێ د بەرژەوەندیا ئەمریکا دایە و ئەمریکی ب چو رەنگەکێ ل گەل ھندێ نینن کو ل ئیرانێ سیستەمەکێ دیموکراتیک بھێتە ئاڤا کرن، چونکو ئەو یەک د بەرژەوەندیا ئەمریکا دا نینە، ئەمریکی ل سەر بنەمایێ ھەبوونا ئاریشان ل رۆژھەلاتا ناڤین سیاسەتا خوە برێڤە دبەن و ھەبوونا ئیرانەکا دیموکراتیک و پێشکەفتی د بەرژەوەندیا ئەمریکا دا نینە، ژ بەر ھندێ ژی ھەکە ئەمریکا ھزرەکێ بۆ کوردان بکەت ژی رەنگە ھەلویستێ ئەمریکا تەکتیکی بیت و سراتیژیک نەبیت، ژ بەر ھندێ ژی دڤێت کورد ھشیار بن و نەبنە قوربانیا بەرژەوەندیێن ئابووری و سیاسی یێن ئەمریکا و وەلاتێن دی یێن رۆژئاڤایی ب تایبەتی ژی بریتانیا، چونکو بریتانیا ب ھەموو رەنگەکێ بەرگیریێ ل سیستەمێ نھا یێ ئیرانێ دکەت و ناخوازیت چو گوھۆرین ل ئیرانێ دروست ببن.
نيشاندان