ئەڤرۆ نیوز:
دەزگەھێن راگەھاندنا فرەنسا دیار دکەن کو ل گۆر رەوشا نھا یا فرەنسا و ب تایبەتی ژی پشتی چالاکیێن تیرۆرستی ل فرەنسا و سەرکەفتنا ترامپی ل ئەمریکا شانسێ بەربژێرێ پارتا سوسیالیست بۆ سەرۆکاتیا فرەنسا گەلەک کێم بوویە و پتر شانسێ پارتیا کۆماری زێدە بوویە و نھا ئێک ژ ھەر سێ بەربژێرێن وێ پارتیێ(سارکۆزی سەرۆکێ بەرێ یێ فرەنسا، ئالن ژوپی و فرانسوا فیون سەرۆک وەزیرێن بەرێ) دشێن ببنە سەرۆکێ داھاتی یێ فرەنسا.
ئاژانسا فرانس پرێس ژی د داخۆیانیەکێ دا دیار کریە کو ئێک ژ وان ھەر سێ بەربژێرێن پارتیا کۆماری یا فرەنسا دڤێت ل دووماھیێ ھەڤرکیێ ل گەل خانم مارین لوپین بەربژێرا پارتیا نەتەوی یا فرەنسا بکەن کو ئەو ژی وەکو بەربژێرەکا ب ھێز بۆ پۆستێ سەرۆکاتیا فرەنسا دھێتە دیتن. چونکو پشتی سەرکەفتنا دۆنالد ترامپ بۆ پۆستێ سەرۆکاتیا ئەمریکا مارین لوپین د داخۆیانیەکێ دا بۆ دەزگەھێن راگەھاندنا فرەنسا دیار کربوو کو سەرکەفتنا ترامپی ل ئەمریکا سەرکەفتنا من ل فرەنسایێ مسوگەر کریە.
ل ئالیێ دی چاڤدێرێن سیاسی یێن فرەنسا دیار دکەن کو سەردەمێ دەستھەلاتا پارتیا سوسیالیست ل فرەنسا ب دووماھی ھات و نە ھولاند و نە ژی چو بەربژێرێن دی نەشێن د ھەلبژارتنێن سەرۆکاتیێ دا سەرکەڤن، چونکو نھا ھەوەکا ب گشتی توند و دژوار ل جیھانێ ھەیە و سەرکەفتنا ترامپی ژی سەلماند کو ئێدی باوەریا خەلکێ وەکو جاران ب پارتێن سوسیالیست و نەرم ناھێت، ژ بەر ھندێ ژی سارکۆزی و ھەر دو بەربژێرێن دی یێن ژ پارتیا کۆماری یا فرەنسایێ دشێن ببنە سەرۆک کۆمارێ نوو یێ فرەنسا، چونکو د چەندین راپرسیێن ڤێ دووماھییێ دا ل فرەنسا دەرکەفت کو پرانیا خەلکێ وی وەلاتی ژ سیاسەتا ئابووری و ھەلویستێ پارتیا سوسیالیست و سەرۆک کۆمار ھولاندی ل ھەمبەر شەرێ ل دژی تیرۆرێ رازی نینن و دخوازن فرەنسا د روودانێن نھا ل دەڤەرێ دا پتر خوەدان رۆل بیت، ژ بەر ھندێ ژی دێ پرانیا خەلکێ د ھەلبژارتنێن داھاتی دا پشتەڤانیێ ل بەربژارێن پارتا کۆماری یا فرەنسا کەن.

ئەڤرۆ نيوز:
دبلوماتکارێ بەرێ و کارمەندێ بلندێ ئاژانسا نێڤدەولەتی یا وزێ و بریتش گاز د گۆتارەکێ دا ل سەر مالپەرێ ئەلجەزیرە یا تورکی راگەھاند، ھژمارەکا شیرەتکارێن گرنگێن دۆنالد ترامپ سەرۆکێ ھەلبژارتیێ ئەمریکا، دوستێن کوردێن ھەرێما کوردستانێ نە.
مەھمەت ئۆغچو دیار کر ژی کو جەنەرال مایک فلین یێ چاڤەرێ ببیتە شیرەتکارێ ئاسایشا نشتیمانی، مل ب ملێ پێشمەرگەی و دەزگەھێن ھەوالگیریێ یێن کوردان ئۆپەراسیۆنێن تایبەت کرینە، ھەروەسا ھەر ئێک ژ جۆن بۆلتن، نۆت گینگریچ، سیناتۆرێ ویلایەتا ئالاباما، زەلمای خەلیلزاد، مایک رۆجەرز و وەلید فارسی ژی دێ پۆستێن ھەستیار وەرگرن و ھەموو دۆستێن نێزیکی کوردانن و گۆت: “ھەکە ل سەر دەمێ ترامپی کوردان داخوازا سەربخوەیێ یان یەکسان بوونێ ژ بەغدا کر، ل واشتنتۆنێ ئیدارەیەک دێ ھەبیت ب رژدی گوھـ ل داخوازا وان بگریت و پشتەڤانیێ لێ بکەت”.