سەرۆكێ حوكمەتا هەرێما كوردستانێ، د چارچۆڤەیێ ڤەكرنا پێشانگەها تەكنۆلۆژیا HITEX ل هەولێرێ راگەهاند: هەر سال دبینم كو پێشكەفتنا زێدەتر هەیە و خەلكەكێ شارەزا د ناڤ كوردستانێدا پەیدابوویە.
دوهی سێشەمبی 7/10/2025، مەسرور بارزانی، سەرۆكێ حوكمەتا هەرێما كوردستانێ، د چارچۆڤەیێ ڤەكرنا پێشانگەها تەكنۆلۆژیا HITEX ل هەولێرێ، بۆ دەزگەهێن راگەهاندنێ گوت» ئەڤە چەندین سالە پشكدار دبم، هەر سال دبینم و پێشكەفتنا زێدەتر هەیە و خەلكەكێ شارەزا دناڤ كوردستانێدا پەیدابوویە، گەنجێن مە ب خوە شیاینە هەم داهێنانێ بكەن و هەم د ڤێ پێشكەفتنا تەكنۆلۆژیایێ كو ل سەرانسەری جیهانێ هەیە، پشكداربن. جهێ دلخوەشیێیە و من هیڤییەكا مەزنە یا هەی كو دێ كوردستانێ پاشەڕۆژەكا گەش هەبیت».
سەرۆكێ حوكمەتا هەرێما كوردستانێ ئەوژی بەرچاڤكر» حوكمەت پشتەڤانە بۆ وێ چەندێ هاریكارییا هەموو وان بزنسمان و داهێنەران بكەت كو د بەرهەڤن كار بكەن، بێگومان دێ حوكمەت پشتەڤان بیت و دێ بەردەوام بین د ڤێ چەندێدا».
زێدەتر ژ 120 كۆمپانیێن ناڤخوە و بیانی تایبەت ب تەكنۆلۆژیایێڤە، پشكداریێ د پێشانگەها هایتێكسدا دكەن كو بۆ دەمێ سێ رۆژان دێ بەردەوام بیت.
كۆمپانیێن ناڤبری نووترین بەرهەمێن خوە د وارێ تەكنۆلۆژیایێ و ژێرییا دەستكرد نیشاددەن، هەروەسا 40 پسپۆر د وارێ تەكنۆلۆژیایێ دێ ل سەر ستەیچێ پێشانگەهێ ئاخڤن.
بۆ ئەڤسالە ژ سەرجەمێ 100 بزنسێن پێشكێشكری، 20 بزنس هاتینە هەلبژارتن و پشتەڤانییا دارایی لێ دهێتە كرن، بۆ جارا ئێكێیە ژی 37 كۆمپانیێن بیانی، 11 كۆمپانیێن ناڤخوەیا هەرێما كوردستانێ پشكداریێ د پێشانگەهێدا دكەن.

سەرۆكێ لیستا پارتی دیموكراتی كوردستان ل سلێمانیێ راگەهاند: سەركردەیێن پارتی هەردەم ل سەنگەرێ بەراهییێ یێ داكۆكیكرنێ ژ مافێن خەلكێ كوردستانێ ل بەغدایێ بوویە و رۆلێ وێ یێ كاریگەر بوویە، هەڤدەم دبێژیت: پێشبینیێ دكەین هەمبەركرن ل گەل هەلبژارتنێن بۆری، دەنگێن پارتی ل سلێمانیێ زێدە بكەن.
عەلی حسێن، ئەندامێ مەكتەبا سیاسی و بەرپرسێ رێكخستنا پارتی دیموكراتی كوردستان ل سلێمانیێ و هەلەبجە و سەرۆكێ لیستا پارتی ل سلێمانیێ گوت» مە دەست ب بانگەشەیا هەلبژارتنان كریە و پەیاما مە ئەوە، هەلبژارتنێن شارستانی بهێنە ئەنجامدان كو دەربڕینێ ژ پەیاما پارتی و سەرۆك بارزانی بكەت و رێز ل ئالیێن دی بگرن و بزاڤێ بكەن ژێنگەها گوند و باژێر و باژێركان بپارێزین و رێزێ ل پۆستەر و بەرنامەیێ ئالیێن سیاسی ژی بگرین بۆ وێ چەندێ ب شێوەیەكێ شارستانی و دیموكراسی پرۆسە بڕێڤەبچیت».
عەلی حسێن گوت ژی» ئەم پشت گەرمێن وێ خەبات و هەلوەستێ نەتەوەیی، نیشتمانی، خەلكێ مە دلسۆز، مالباتێن شەهیدان و پێشەرگەیێن مە یێن قەهرەمان، ب هەموو ئەوێن نیشتمانپەروەر».
ئاماژە كر ژی» پارتی د حوكمڕانیێ و خزمەتكرنا كوردستانێ ژ روویێ دیپلۆماسی ل سەر ئاستێ نێڤدولەتی و هەرێمایەتی رۆلەكێ سەركەفتی هەبوویە».
سەرۆكێ لیستا پارتی دیموكراتی كوردستان ل سلێمانیێ باس ل وێ چەندێ ژی كر» رۆلێ سەركردەیێن پارتی دیموركاتی كوردستان ل پێداگیریێ ل مافێن وەلاتیێن هەرێما كوردستانێ ل گەل بەغدایێ، یێ كاریگەر بوویە، هەڤدەم پارتی و سەرۆك بارزانی ل سەنگەرێ بەراهیێ یێ داكۆكیكرنێ بوون ژ مافێن خەلكێ كوردستانێ».
ئەندامێ مەكتەبا سیاسی و بەرپرسێ مەكتەبا رێكخستنا پارتی دیموكراتی كوردستان ل سلێمانیێ و هەلەبجە ئەوژی بەرچاڤكر» سەرۆك بارزانی گەلەك گرنگیێ ب سنۆرێ هەلەبجە و گەرمیان و سلێمانیێ ددەت و مەسرور بارزانی، سەرۆكێ حوكمەتا هەرێما كوردستانێ ژی چەندین جاران سەرەدانا ڤێ دەڤەرێ كریە و دووڤچوون بۆ كارێن هەلەبجە كریە و بەرنامەیێ تایبەت بۆ ڤێ دەڤەرێ هەیە، ب شێوەیەكی ل بەرە خزمەتگوزاری ل ئاستێ قوربانیێن خەلكێ ڤێ دەڤەرێ بیت».
عەلی حسێن گوت ژی» ل هەلبژارتنێن پەرلەمانێ كوردستانێ هەژمارا دەنگێن پارتی ب رێژەیەكا بەرچاڤ ل ڤی سنۆرێ زێدەببوون و بۆ ڤان هەلبژارتنان ژی چاڤەڕێ دكەین زێدەتر ژی ببن، چونكە تنێ لایەنگرێن پارتی دەنگ ب پارتی نادەن، بەلكو گەلەك كەس یێن هەین باوەرییەكا مەزن ب حوكمڕانییا پارتی هەیە».
سەبارەت كۆمبوونێن پارتی دیموكراتی كوردستان و ئێكەتی نیشتمانی كوردستان، گوت» كۆمبوون د بەردەوامن و پێنگاڤێن باش یێن هاتینە هاڤێتن، ئەم هەموو بزاڤا وێ چەندێ دكەین كابینەیا نوو یا حوكمەتا هەرێما كوردستانێ ب زووترین دەم بكەڤیتە كاری و پێگەهەكێ ب هێز بۆ خوە هەم ل ناڤ كوردستانێ و هەم بەرانبەر بەغدایێ دروست بكەین».

ل سنۆرێ لقێ نەهێ پارتی دیموكراتی كوردستان، رێوڕەسمەك بۆ دانەنیاسینا بەربژارێن لیستا 275 یا پارتی دیموكراتی كوردستان هاتە رێكخستن، تێدا بەرپرسێ لقێ نەهێ پارتی دیموكراتی كوردستان گوت» ب پشتەڤانییا جەماوەرێ خوڕاگرێ ئاكرێ و بەردەرەش، دێ سەركەفتنەكا دی د ڤان هەلبژارتناندا بۆ پارتی تۆماركەین و دانینە ل گەل سەركەفتنێن دی».
مەردان خدر، بەرپرسێ لقێ نەهێ ئاكرێ یێ پارتی دیموكراتی كوردستان راگەهاند» پشتبەستن ب رێبازا پیرۆزا بارزانیێ نەمر و سیاسەتا حەكیمانەیا سەرۆك بارزانی و ب پشتەڤانییا نێچیرڤان بارزانی، سەرۆكێ هەرێما كوردستانێ و خۆڕاگرییا كابینەیا نەهێ یا حوكمەتا هەرێما كوردستانێ ب سەرۆكاتییا مەسرور بارزانی، ل ئاكرێ یا خۆڕاگر و ل سنۆرێ لقێ نەه، ل هەردو قەزایێن ئاكرێ و بەردەرەش ل بن درووشمێ هەڤپشكی، هەڤسەنگی و لهەڤهاتن، دەست ب هەوا بانگەشەیا لیستا 275 یا پارتی دیموكراتی كوردستان، لیستا شەهیدان، لیستا پێشمەرگە و سەرۆك و لێڤەگەرێ كوردستانێ سەرۆك بارزانی دكەین».
مەردان خدر گوت ژی» ڤێجارێ ژی ب پشتبەستن ب خەلكێ كوردسانێ و دلسۆز و كوردپەروەرێن هەردو قەزایێن ئاكرێ و بەردەرەشێ و ئەندام و لایەنگرێن پارتی، بەر ب هەلبژارتنێن خولا شەشێ یا جڤاتا نوونەرێن ئیراقێ دچین، ب پشتەڤانییا هەوە ڤێجارێ ژی دێ سەركەفتنەكا دی دانینە سەر سەركەفتنێن د دیرۆكێدا مە تۆماركرین. ئەڤجارە پشتڕاستین ژ وێ خزمەتا بەردەوام د وارێ سیاسی، كوردایەتی، خزمەتگوزاری، ئاڤەدانی، خۆڕاگرییا پارتی و نوونەرێن وێ ل حوكمەتێ و سەرۆكاتییا هەرێمێ و ل حوكمەتا ئیراقێ و جڤاتا نوونەرێن ئیراقێ هاتینە پیشكێشكرن، دێ سەركەفتنەكا دی تۆماركەین و پێگەهێ كوردان ل بەغدا ب هێزتر كەین، ژ بەر كو چەند پارتی ب هێز بیت و كورسیێن وێ زێدەتر بن، پێگەهێ كوردان دێ زێدەتر ب هێز بیت و دێ مە ژ دەستكەفتێن گەلێ كورد نێزیكتر كەت».
دیاركر ژی» ڤێجارێ ژی ب شێوەیەكێ ئارام و ل سەرخوە، بۆ هەلبژارتنێن خولا شەشێ یا جڤاتا نوونەرێن ئیراقێ دێ بانگەشەیێ كەین و دێ رێزێ ل هەموو بیر و بۆچوونان گرین، ئەڤە ژی ب پشتبەستن ب وێ خزمەتا 76 سالی یا پێشكێشی خەلكی دكەین، ب پشتبەستن ب خوونا شەهیدان و پێشمەرگە و ئەنفالكرییان، دەست ب بانگەشەیێ دكەین. مەزنییا پارتی د وێ چەندێ دایە رێزێ ل بۆچوونێن جودا دگریت و بانگەشەیەكا سەردەمیانە ئەنجام ددەت، لەوما داخوازێ ژ ئەندام و لایەنگرێن پارتی دكەم، بانگەشەیەكێ نەكەن یا دوور بیت ژ پرنسیپێن دیموكراسی و پرنسیپێن رێبازا پیرۆزا بارزانی. ل گەل وێ چەندێ نینین پەنا بۆ لادان و دڕاندنا درووشم و وێنەیێن بەربژارێن دی بهێتە برن، چونكە ئەو چەندە ل گەل سیاسەتا پارتی و رێبازا بارزانی ناگونجیت».

سەرۆك بارزانی هاتنا جەژنا جەمایێ پیرۆز كر و دوپاتكر «ئێزدی پشكەكا خوەشتڤی و نەڤەقەتیایێن گەلێ كوردستانێ نە.
دوهی دوشەمبی 6/10/2025، سەرۆك بارزانی د پەیامەكێدا راگەهاند»ب هەلكەفتا جەژنا جەمایێ، پیرۆزباهیێن خوەیێن گەرم ئاراستەی هەمی ئێزدیێن كوردستانێ و جیهانێ دكەم».
سەرۆك بارزانی گۆت ژی» ئێزدی پشكەكا خوەشتڤی و نەڤەقەتیایێن گەلێ كوردستانێنە. پشتی وان هەموو نەخوەشی و زەحمەتیێن ب سەر خوشك و برایێن مەیێن ئێزدی دا هاتین و پاشی ئەو رەوشا نە یاسایی و نە ئاسایییا چەندەها سالە ب سەر شنگالێ و دەڤەرێن واندا هاتینە سەپاندن كو جهێ دلتەنگییا مەیە، بەلێ ب باوەڕی و خوەڕاگرییەكا مەزنڤە كوردێن ئێزدی جەژن و هەلكەفتێن خوە یێن ئۆلی ب ئارامی و ئازادانە ب رێڤە دبەن. ب ڤێ هەلكەفتێ داكۆكیێ دكەم كو ئەركێ هەموو ئالیەكییە كاربكەن ژبۆ پاراستن و بهێزكرنا فەرهەنگ و كلتوورێ پێكڤەژیانێ و ئێكڕێزییا د ناڤبەرا هەموو پێكهاتێن ئۆلی و نەتەوەیی ل كوردستانێ».
ژ ئالیێ خوەڤە نێچیرڤان بارزانی، سەرۆكێ هەرێما كوردستانێ د پەیامەكێدا پیرۆزباهییا هاتنا جەژنا جەمایێ ل كودرێن ئێزدی كر.
نێچیرڤان بارزانی سەرۆكێ هەرێما كوردستانێ، د پەیاما خوە یا پیرۆزباهیێ دا جەژنا جەمایێ ل ئێزدییان پیرۆزكر وراگەهاند» ب گەرمی و ژ دل جەژنا جەمایێ ل هەموو ەڤوەلاتی یێن مە یێن ئێزدی پیرۆز دكەم، هیڤیدارم جەژنەكا ئارام و تەنا دەرباز بكەن و هەرسال هەموو جەژن و هەلكەفتنێن وان و هەموو پێكهاتێن كوردستانێ ب خێر و خۆشی ڤەگەڕن».
گۆت ژی» د ڤێ جەژنێدا جارەكا دی وەلاتیێن مە یێن ئێزدی و هەموو پێكهاتێن كوردستانێ پشتڕاست دكەین كو وەك هەرگاڤ دێ پشتەڤان و پارێزەرێن مافێن وان بین و كوردستان بۆ هەموویان دێ هەر مینیت وەلاتێ پێكڤەژیانا ئاشتییانە».
مەسرور بارزانی، سەرۆكێ حوكمەتا هەرێما كوردستانێ ب هەلكەفتا هاتنا جەژنا جەمایێ یا تایبەت ب كوردێن ئێزدی ڤە پەیامەكا پیرۆزباهیێ بەلاڤكر و تێدا هاتیە» ب هەلكەفتا جەژنا جەمایێ، پیرۆزباهییەكا گەرم ل تەڤایا خوشك و برایێن ئێزدی ل كوردستانێ و جیهانێ دەكەم و هیڤیدارم رۆژێن جەژنێ ب خێر و خۆشی ببورینن».
سەرۆكێ حوكمەتا هەرێمێ د پەیاما خوە یا پیرۆزباهیێدا گۆت ژی» دوپاتییێ ل سەر پشتەڤانیا مافێن رەوایێن خوشك و برایێن ئێزدی و خزمەتكرنا وان دكەین. جەژنا جەمایێ ل هەموویان پیرۆز بیت و هەر د خۆشیان دا بن».

سەرۆك بارزانی ل پیرمام ل گەل محەمەد حاجی مەحموود، سەرۆكێ پارتا سوسیال دیموكراتا كوردستانێ رەوشا سیاسی یا هەرێمێ و دەڤەرێ گەنگەشەكر.
بارەگەهێ بارزانی بەلاڤكر» ل رۆژا دوشەمبی 6/10/2025، سەرۆك مەسعود بارزانی ل پیرمام پێشوازی ل محەمەد حاجی مەحموود، سەرۆكێ پارتا سوسیال دیموكراتا كوردستانێ كر».
بارەگەهێ بارزانی دیاركر ژی» د دیدارەكێدا باس ل رەوشا سیاسی یا دەڤەرێ ب گشتی هاتە كرن، هەروەسا پرۆسەیا سیاسی ل هەرێما كوردستانێ هاتە گەنگەشەكرن».

دوهی دوشەمبی 6/10/2025، مەسرور بارزانی، سەرۆكێ حوكمەتا هەرێما كوردستانێ ل هەولێرێ، پێشوازی ل حەیدەر عەبادی، سەرۆكێ هەڤپەیمانییا نەسر كر.
حوكمەتا هەرێما كوردستانێ د بەیاننامەیەكێدا گۆت» د كۆمبوونەكێدا دوماهی گوهۆڕین و پێشهاتێن رەوشا گشتییا ئیراقێ و هەڤبەندیێن هەرێما كوردستانێ و حوكمەتا فیدرال هاتنە گەنگەشەكرن.
ئاماژە ب وێ چەندێ ژی هاتە كرن» هەردو ئالییان دوپاتی ل گرنگییا چارەسەركرنا كێشەیان ل سەر بنەمایێ دەستووری و رێزگرتنێ ل قەوارەیێ فیدرالیێ هەرێما كوردستانێ كر. هەروەسا باس ل بەرهەڤیێن هەلبژارتنێن جڤاتا نوونەرێن ئیراقێ هاتە كرن».

سەرۆكێ حوكمەتا هەرێما كوردستانێ ب هەلكەفتا ب دوماهی هاتنا ئەركێ وی، سوپاسییا قونسلێ گشتیێ كۆمارا چیكێ كر بۆ وی دەمێ كار بۆ ب هێزكرنا هەڤبەندیێن دوقۆلی كری.
دوهی دوشەمبی 6/10/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل كارل كۆرتانیك، قونسلێ گشتیێ كۆمارا چیكێ كر ب هەلكەفتا ب دوماهی هاتنا ئەركێ وی ل هەرێما كوردستانێ.
سەرۆكێ حوكمەتا هەرێما كوردستانێ سوپاسییا قۆنسلێ چێكێ كر بۆ وی دەمێ كار بۆ ب هێزكرنا هەڤبەندیێن دوقۆلی كری و هیڤییا سەركەفتنێ د ئەركێ وی یێ داهاتیدا بۆ خواست.
قۆنسلێ گشتیێ چیكێ، رێزا خوە بۆ هاریكاری و هەماهەنگییا ئالیێن پەیوەندیدارێن حوكمەتا هەرێما كوردستانێ ل گەل قونسلخانەیا وەلاتێ خوە دەربڕی.

ئەندامەكا مەكتەبا سیاسی یا پارتی دیموكراتی كوردستان دبێژیت: ب هێز دێ پشكداریێ د بانگەشەیا هەلبژارتناندا كەین، هەروەسا دیاركر: بەغدا رادەستی خەلكەكێ لاواز ناكەین.
ئامینا زكری، ئەنداما مەكتەبا سیاسی یا پارتی دیموكرایت كوردستان ل دۆر بانگەشەیا هەلبژارتنێن خولا شەشێ یا جڤاتا نوونەرێن ئیراقێ گۆت» پارتی دیموكراتی كوردستان ب فەرمی بانگەشەیا هەلبژارتنان دەستپێكریە، ژ روویێ رێكخستنێ ژی ڤە بەرهەڤیێن گەلەك باش هاتینە كرن، هەموو میحوەر و بازنە كارێن خوە دكەن».
ئامینا زكری گۆت ژی» پارتی پشتبەستنێ ب دیرۆكا پڕسەروەرییا خوە و دەنگێ جەماوەرێ كوردستانێ دكەت. ئەم ب باوەری ب خوەبوونێ دێ پشكداریێ د ڤێ پرۆسەیا هەلبژارتناندا كەین و بەرهەڤی ژی دهێنە كرن بۆ وێ چەندێ ئاهەنگەكا دەستپێكی بۆ بانگەشەیێ ساز بكەین».
وێ ئەنداما مەكتەبا سیاسی یا پارتی دیموكراتی كوردستان باس ل كێشەیا د ناڤبەرا هەولێرێ و بەغدایێ دا كر و ب باشی زانی پارتی (كو سەرۆكێ حوكمەتا هەرێما كوردستانێ ژ وێ یە) ب هێز بچیتە د ناڤ ململانێیا هەلبژارتناندا و گۆت» سەرەرای هەموو ئالۆزییان و ئەو گرفتێن حوكمەتا ئیراقێ بۆ حوكمەتا هەرێما كوردستانێ و خەلكێ كوردستانێ دروستكرین، ئەم د وێ باوەریێداینە دڤێت پارتی ب سەنگ و هێزەكا مەزن پشكداریێ د پرۆسەیا هەلبژارتناندا بكەت. داخوازێ ژ هەموو جەماوەر و خەلكێ خوە دكەین كو ئەڤ هەلبژارتنە د چارەنڤیسسازن و مە كێشەیەكا كوور ل گەل بەغدایێ هەیە، ئەوژی بابەتێ بجهئینانا دەستووری و مافێن رەوا یێن خەلكێ كوردستانێیە، لەوما درووشمێ پارتی دیموكراتی كوردستان ژی د چارچۆڤەیێ هەڤپشكی، هەڤسەنگی و لهەڤهاتندایە، كو سێ بنەمایێن سەرەكینە».
ئامینا زكری، كێشەیێن د ناڤبەرا هەولێرێ و بەغدایێ دا ب (كوور) هەژمارتن و ئاماژە ب وێ چەندێ كر» ئەو كێشەیێن من باسلێكرین ل گەل ئیراقێ گەلەك د كوورن، دروستكرنا حوكمەتا نوو یا ئیراقێ پشتی ژناڤچوونا رژێما سەدامی ل سەر سێ بنەمایان بوویە، سەركردایەتییا سیاسی یا كوردی ل گەل سەركردایەتییا وی دەمی یا ئیراقێ ل سەر دەستوورێ رێككەفتبوون كو ل سەر بنەمایێ هەڤپشكیێ، هەڤسەنگیێ و لهەڤهاتنێیە. كێشەیێن بنەڕەتی یێن ئیراقێ دێ وی دەمی چارەسەر بن كو ئەو هەرسێ بنەمایێن دەستووری بهێنە بجهئینان».
پتر گۆت» پارتی باوەرییەكا مەزن ب جەماوەرێ خوە هەیە، دڤێت ئالیێن سیاسی یێن ئیراقێ ژی سەنگ و پێگەهێ هەرێما كوردستانێ بزانن، نابیت سەنگ و پێگەهێ وێ ل سەر بنەمایێ كورسییان بیت، بەلكو پێكهاتەیەكێ سەرەكی و قەوارەیەكێ دەستووری هەیە و دڤێت وەك پێگەهێ وێ یێ دەستووری رەفتار ل گەل بهێتە كرن».
ب دیتنا ئامینا زكری، كێشەیا سەرەكییا هەرێما كوردستانێ ئەو سێ بنەمایەنە (هەڤپشكی، هەڤسەنگی و لهەڤهاتن) و بجهئنەئینانا دەستوورییە، لەوما ئەو بووینە بنەمایێ بانگەشەیا هەلبژارتنان یا پارتی دیموكراتی كوردستان و مە هەڤپشكییەكا راستەقینا ئیراقێ دڤێت، مە هەڤسەنگی و لهەڤهاتن دڤێت بۆ دەركرنا قانوونان، ب تایبەتی ئەوێن پەیوەندی ب هەرێما كوردستانێڤە هەی، دڤێت زۆرینە و كەمینە نەبنە پیڤەر، بەلكو دڤێت پێگەهێ هەرێما كوردستانێ ل بەرچاڤ بهێتە وەرگرتن».
ئەنداما مەكتەبا سیاسی یا پارتی خویاكر» ئەم داكۆكیێ ل سەر وێ چەندێ دكەین كو د بەرژەوەندییا خەلكێ هەرێما كوردستانێدایە، ل هەر جهەكێ مافێ دەستووریێ هەرێما كوردستانێ هەبیت، دێ پارتی ب هێز ل وێرێ پشكدار بیت، لەوما ئەم ژی داخوازێ ژ دەنگدەرێ خوە دكەین ب هێز پشكداریێ د هەلبژارتناندا بكەن، هندی پرسا كوردی و كێشەیێن هەولێر و بەغدایێ هەبیت، پارتی دێ یا بەرهەڤ بیت. پارتی دەمڕاستا پرسا كورد و كوردستانێیە، لەوما ئەم بەغدایێ رادەستی خەلكەكێ لاواز ناكەین، بۆ كێشەیان ژی د پشت گەرمین ب دەنگدەرێ خەلكێ كوردستانێ».
ئامینا زكری داخواز ژ خەلكی و ئالیێن سیاسی كر» بانگەشەیا هەلبژارتنان د سەقایەكێ ئارام و دیموكراسیدا بكەن بێی ناڤزراندن. مە وەك پارتی دیموكراتی كوردستان، بڕیار دایە د سەقایەكێ ئارام و دیموكراسیدا بانگەشەیێ بكەین، چونكە مە هندە سەروەری هەنە و مە دیرۆكەكا پڕسەروەری هەیە، مە هند پڕۆژە پێشكێشی خەلكێ كوردستانێ كرینە، مە پێدڤی ب وێ چەندێ نینە د بانگەشەیا خوە دا ناڤزراندنێ ب ئالییەكێ دی بكەین. ئینشائەللا وەك جاران، مللەت دێ باوەریێ دەتە مە وەك حزبا ئێكێ ل كوردستانێ و ئیراقێ».

سەرۆكێ دیوانا جڤاتا وەزیرێن هەرێما كوردستانێ سەبارەت مووچەیێن مەهێن 8 و 9 یێن فەرمانبەرێن هەرێما كوردستانێ راگەهاند: حوكمەتا ئیراقێ بڕیارا خەرجكرنا مووچەیێن وان هەردو مەهان نەدایە ئەگەر نە ئەم د بەرهەڤین داهاتێ ناڤخوە بۆ وان هەردو مەهان بهنێرینە بەغدا.
ئومێد سەباح، سەرۆكێ دیوانا جڤاتا وەزیرێن هەرێما كوردستانێ د كۆنگرەیەكێ رۆژنامەڤانیدا گۆت» ئەم وەك حوكمەتا هەرێما كوردستانێ بۆ مسۆگەركرنا مووچەیێن فەرمانبەرێن هەرێما كوردستانێ د بەرهەڤین پشكا گەنجینەیا حوكمەتا فیدرالی بۆ مەهێن 8 و 9 بدەین».
گۆت ژی» هەتا نوكە حوكمەتا ئیراقێ بڕیارا خەرجكرنا مووچەیێن وان هەردو مەهان نەدایە و وەسا هاتیە بەلاڤكرن كو لەوما مووچە ناهێنە هنارتن ژ بەر كو حوكمەتا هەرێما كوردستانێ داهاتێ نەپەترۆلی ناهنێریت، لەوما ل ڤێرێ رادگەهینین، هەردەمێ پێرابوونێن مووچەیێن مەهێن 8 و 9 دەستپێكرن، ئەم د بەرهەڤین داهاتێ نە پەترۆلی رادەست بكەین».
سەرۆكێ دیوانا جڤاتا وەزیرێن هەرێما كوردستانێ راگەهاند ژی» ل دوماهی كۆمبوونا جڤاتا وەزیرێن هەرێما كوردستانێ بڕیار هاتە دان نامەیەكێ بۆ سەرۆك وەزیرێن ئیراقێ بهنێرین، كو نامە ب ئیمزایا مەسرور بارزانی، سەرۆكێ حوكمەتا هەرێما كوردستانێ بوو، كو تێدا مە داخواز كربوو پشتبەستن ب بۆچوونا جڤاتا دەولەتێ نەهێتە كرن، چونكە بنەمایێ پێگیریێ بۆ مە هەردو ئالییان تێدا نینە».
ئومێد سەباح رۆهنكر ژی» بژاردەیا مە ئەوە ب رێیا رێككەفتنەكا حكومی كو چاوان ل سەر پەترۆلێ رێككەفتین، ب هەمان شێوە ل سەر داهاتێن ناڤخوەیی ژی رێكەكەڤین. لەوما هیڤیدارین حوكمەتا فیدرالی ل دووڤ داخوازیێ بهێت».

سەرۆک مەسعود بارزانی، دوهی ل پیرمام، پێشوازی ل ژمارەكا گەنجێن پارچەیێن كوردستانێ‌ یێن خوەجهێن دیاسپۆرا كر كو د ناڤ دا چەند گەنجێن وەلاتێن ئورۆپی ژی بوون.
ب گۆرەیی بەیاننامەیەكا بارەگەهێ‌ بارزانی، ل دەستپێكا دیدارێ‌ ئیسماعیل كامل سەرۆكێ‌ كۆنفیدراسیۆنا رەڤەندا كوردستانی سوپاسیا پشتەڤانیا سەرۆك بارزانی كر بۆ پشتەڤانیا وی د بزاڤێن كۆمڤەكرنا كوردستانیێن دیاسپۆرا ل ژێر سەیوانەكا نشتیمانی.
هەر د دیدارێ‌ دا، سەرۆك بارزانی بەحس ل گرنگیا كۆمبوونا كوردستانیێن دیاسپۆرا ل بن سەیوانەكا نەتەوەیی سەخەمەراتی پاراستنا كەلتۆر و زمان و ناسنامەیا نەتەوەیی و پشتەڤانیكرنا دۆزا رەوا یا كوردستانێ.
هەروەسا داكوكی ل سەر وێ‌ چەندێ‌ كر كو پێدڤیە گەنجێن كوردستانی ژ دەرڤەیی وەلاتی پێگەه و سەنگ د ئۆرگان و دامەزراوێن ئورۆپیان دا هەبیت.