مەسرور بارزانی، سەرۆكێ حوكمەتا هەرێما كوردستانێ ب هەلكەفتا 50 سالییا دامەزراندنا پارتا سۆسیال دیموكراتا كوردستانێ پەیامەكا پیرۆزباهیێ ئاراستەی محەمەد حاجی مەحموود، سەرۆكێ وێ پارتێ كر و هیڤیخواست د خەباتا خۆ دا سەركەفتی بن .
مەسرور بارزانی، سەرۆكێ حوكمەتا هەرێما كوردستانێ د پەیاما خۆ دا گەرمترین پیرۆزباهی ئاراستەی محەمەد حاجی مەحموود، سەرۆكێ پارتا سۆسیال دیموكراتا كوردستانێ و سەركردایەتی و تەڤایا ئەندام و لایەنگرێن وێ كر.
سەرۆكێ حوكمەتێ هیڤیخواست پارتا سۆسیال دیموكراتا كوردستانێ ل گەل ئالیێن كوردستانی د خەباتا خۆ دا سەركەفتی بن د پێخەمەت داكۆكیكرنێ ژ دەستكەفتێن نیشتمانی یێن خەلكێ كوردستانێ.

شیرەتكارێ ئاسایشا نیشتمانییا ئیراقێ و سەرۆكێ نوونەراتییا حوكمەتا هەرێما كوردستانێ ل بەغدایێ، گرنگییا هەماهەنگییا د ناڤبەرا بەغدایێ و هەولێرێ دا بۆ پاراستنا ئاسایشا سنۆران و رێگریكرن ژ قاچاخچیەتیێ گەنگەشە كر.
قاسم عەبوودی، شیرەتكارێ ئاسایشا نیشتمانییا ئیراقێ، پێشوازی ل فارس عیسا، سەرۆكێ نوونەراتییا حوكمەتا هەرێما كوردستانێ ل بەغدایێ كر.
ل گۆرەی راگەهاندنا نڤیسینگەها شیرەتكارێ ئاسایشا نیشتمانییا ئیراقێ، د وێ كۆمبوونێ دا، پێشڤەبرنا هەماهەنگی و هەڤكارییا بەردەوام یا د ناڤبەرا بەغدایێ و هەولێرێ دا ب مەرەما بهێزكرنا ئاسایش و ئارامیێ ل سەر ئاستێ ئیراقێ و دەڤەرێ هاتە باسكرن.
هەروەسا د وێ كۆمبوونێ دا، هەردو ئالییان ئاستەنگێن سەرەكی ل سەر ئاستێ دەڤەرێ باسكرن، و دوپاتی ل سەر گرنگییا پاراستنا ئاسایشا سنۆران، رێگریكرن ژ ئینان و هنارتنا نەیاسایی و قاچاخچیەتیێ كر، د هەمان دەم دا دوپاتی ل سەر بەردەوامبوونا لێكگۆهارتنا پێزانینێن ئەمنی بۆ رووبڕووبوونا تیرۆرێ و تاوانێن رێكخستی هاتە كرن.
ل گۆرەی راگەهاندنێ، عەبوودی ئاماژە ب پێدڤییا بەردەوامبوونا ڤێ هەماهەنگیێ دا د چوارچۆڤەیێ كارنامەیا فەرمی یا كابینەیا حوكمەتێ دا، كو تێدا دوپاتی ل سەر گرنگییا ئێكڕێزییا نیشتمانی و تەماوكارییا رۆلێ د ناڤبەرا هەموو هەڤپشكێن سیاسی دا دهێتە كرن.

جەعفەر ئێمینكی ئەندامێ كۆمیتەیا ناڤین یا پارتی دیموكراتی كوردستان د بەرپەرێ خۆ ل سەر تۆرا جڤاكییا فەیسبووكی دا رۆناهی ئێخستە سەر وێ هەوا بەردەوام یا بۆ نەشیرینكرنا حوكمەتا هەرێما كوردستانێ و پایتەختێ هەولێرێ دهێتە كرن.
ئێمینكی بەراوردەكا د ناڤبەرا هەولێرێ و بەغدایێ دا دكەت و ئاماژە ب وێ چەندێ دكەت كو سەرەڕای گەندەلییا جیهانی بەلێ تیرێن رەخنێ بتنێ ئاراستەی هەولێرێ دهێنە كرن و ب دیتنا وی هەولێرێ مۆدێلەكێ دەگمەن و حێبەتیێ ئاڤەدانكرنێ پێشكێش كریە.
ناڤبری رەخنێ ل گۆهۆڕینا ئاوازێن نیشتمانی دگریت و دبێژیت شیعە سەرەڕای گەندەلیێ دەست ژ مەزهەبێ خۆ بەرنادەن و سوننە ل گەل بێسەروبەریێ بۆ پێگەهێ خۆ سست نابن و بەردەوامن و توركمان و مەسیحی ژی خەونان ب دەڤەرێن خۆڤە دبینن بەلێ وی ب حێبەتی ڤە پرسیاركر : ئەرێ بتنێ كوردان خەونا خۆ یا دێرین و كەركووك و شنگالێ و كوردستانا سەربخۆ ژ بیر كریە؟.
وی ئەندامێ كۆمیتەبا ناڤین یا پارتی وێ شەڕێ دەروونیێ ل گەل خەلكێ كوردستانێ دهێتە كرن پرۆتەستۆ دكەت و دبێژیت پۆپۆلیزمێ هەموو سنۆر دەرباز كرینە.
ئێمینكی ئاماژە ب هەزاران پێگەهێن سەختە دكەت كو كار بۆ بێهیڤیكرنا گەنجان و لێدان ل پێكڤەژیانێ و رێبازا بارزانی دكەن و ب توندی رەخنێ ل وان كەسان دگریت كو پرسا خزمەتگوزاریێ كریە جهگرێ پرسا نەتەوەیی د دەمەكێ دا پێشمەرگە ل دژوارترین بارودۆخان دا پارێزگاریێ ل ئاخێ دكەت و گەشبینییا خۆ بۆ پاشەڕۆژێ دیاركدكەت و پێشبینیێ دكەت كو قەیرانێن جیهانی د ڤێ سالێ دا دووماهی بهێن كو دێ كاریگەرییا ئەرێنی ل سەر بازاری و كارەبێ و بەنزینێ هەبیت و پەیامەكا توند ئاراستەی نەیارێن دۆزا كوردی دكەت كو دەمێ قەیران دووماهی دهێن ئەو كەسێن ب درەو خۆ كرینە وەكیلێن وەلاتییان چو كارتەك ب دەستێ وان نامینیت و پشتڕاستیێ ددەت كو هەر بزاڤەك بۆ لێدان ل پێكڤەژیانێ دێ شكەستنێ ئینیت چنكی پێكڤەژیانا ل كوردستانێ ریهوریشالێن دیرۆكی و خۆرسكی هەیە.

دژوار فایق، نوونەرێ حوكمەتا هەرێما كوردستانێ د لیژنەیا جێبەجێكارا مادەیا 140ێ ل بەغدایێ، ب توندی بەرسڤا داخۆیانیێن محەمەد سەمعان، پارێزگارێ كەركووكێ ددەت.
دژوار فایق، داخۆیانییا پارێزگارێ كەركووكێ كو گۆت بوو «مادەیا 140ێ شاشییەكا ستراتیژی یا دەولەتێ بوو» ب «شاشییەكا ستراتیژی» یا پارێزگاری ناڤ كر و راگەهاند كو مادەیا 140ێ مادەیەكا دەستووری یە بۆ چارەسەركرنا كێشەیا ب ئەرەبكرن و دەربەدەركرنا زۆرەملی.
فایقی دوپاتی ل وێ چەندێ كر كو مادەیا 140ێ تنێ بۆ كوردان نینە، بەلكو بۆ هەموو پێكهاتەیێن ئیراقێ یە و توركمان ژی ژێ مفادار بووینە. ناڤبری گۆت «ل سالا 2005ێ، 63% ێ خەلكێ كەركووكێ ب بەلێ دەنگ ب دەستووری دان، كو پشكەكا مەزن یا توركمانان ژی دناڤدا بوون، چونكە مافێن وان د دەستووری دا هاتینە پاراستن».
د پشكەكا دی یێ پەیاما خۆ دا، دژوار فایق داخواز ژ پارێزگارێ كەركووكێ كر كو گرنگیێ بدەتە بجهئینانا وێ نڤیسارا فەرمی یا كو بۆ پارێزگارێ هاتیە هنارتن، ژ بۆ دابینكرنا ئەردی بۆ دەربەدەران، و گۆت «باشترە وی كارێ د دەستێ تە دا بجهبینی».
هەروەسا دژوار فایق وەك بەلگە بۆ كوردستانیبوونا كەركووكێ، ئاماژە ب چەند داتایێن دیرۆكی كر:
١. تۆمارێن 1957: كو داتایێن فەرمیێن دەولەتا ئیراقێ بوون و سەلماند كو زۆرینە كورد بوون.
٢. بەلگەیێن بیانی: ئاماژە ب راپۆرتێن كۆمپانیایێن ئەلمانی یێن سالا 1875 و قاموسێن دیرۆكی كر كو نیشاددەن سێ ژ چارێ خەلكێ رەسەنێ كەركووكێ كورد بووینە.
٣. ئەنجامێن هەلبژاردنان: دیار كر كو سەرەرای هەموو بزاڤێن ب ئەرەبكرنێ ، د هەموو هەلبژارتنێن پشتی 2003ێ هەتا نها، كورد ل كەركووكێ زۆرینە بووینە.
فایقی ل دوماهیێ رەخنە ل پارێزگاری گرت كو بۆچی د پرۆسەیا سەرژمێریێ دا ئەو دژی نڤیسینا نەتەوەی بوون، و گۆت «باش دزانن هەكە نەتەوە بهێتە نڤیسین، دێ دەركەڤیت كو زۆرینە كوردن».

سەرۆك مەسعود بارزانی ب هەلكەفتا 24 سالییا دەرچوونا رۆژنامەیا «مەدا»پەیامەك بەلاڤكر و تێدا دبێژیت: وەك رێزگرتنەك بۆ گەشەیا پیشەیی و نیشتمانپەروەرییا دیار یا هەوە، ب هەلكەفتا 24 سالییا رۆژنامەیا «مەدا»، گەرمترین پیرۆزباهیێ ئاراستەیێ «فەخری كەریم» سەرۆكێ دەزگەهێ راگەهاندن و رەوشەنبیری و هونەری یێ مەدا و دەستەیا نڤیسەرێن رۆژنامەیێ دكەم.
سەرۆك بارزانی گۆت ژی: رۆژنامەیا «مەدا» پشكدار بوویە د دامەزراندنا بهایێن رۆژنامەگەرییا ئازاد، هەستكرن ب بەرپرسیارییا نیشتمانی و دەولەمەندكرنا رەوشەنبیری و میدیایی د ئیراقێ دا.
هەروەسا ڤێ هەلكەفتێ ب شانازییەك ناڤ دكەت بۆ دەزگەهەكێ میدیایی كو پتر ژ 20 سالانە ئامادەیی و كارتێكرنا خۆ پاراستییە، هیڤۆیا سەركەفتن و بەردەوامیێ بۆ «مەدا» و ستافێ وێ ژی دخواست و هیڤیخواست ژی د خزمەتا نیشتمانی و راستییان دا هەر یا بەردەوام بیت.

نێچیرڤان بارزانی سەرۆكێ هەرێما كوردستانێ د سالڤەگەڕا 93 یا رۆژا شەهیدێ ئاشووری دا پەیامەك بەلاڤكر و تێدا دوپاتی ل سەر پاراستنا كولتوورێ پێكڤەژیانێ و هەڤدووقبوولكرنێ ل هەرێما كوردستانێ كر و سلاڤێن رێز و وەفاداریێ بۆ گیانێ شەهیدان و قوربانیێن بێتاوان یێن كۆمكوژییا سێمێلێ هنارتن و راگەهاند كو د سالا 1993ێ دا ئاكنجیێن زێدەتر ژ 60 گوندێن پارێزگەهێن نەینەوا و دهۆكێ بوونە قوربانیێن دەستێ دەستهەلاتا وێ دەمێ یا پاشایەتییا ئیراقێ. دیاركرژی كو ئەڤ هەلكەفتا پڕ ژ ئازار دەرفەتەكە بۆ دوپاتكرنێ ل سەر پاراستن وبهێزكرنا كولتوورێ فرەیی و پێكڤەژیانێ.
سەرۆكێ هەرێمێ دیاركر ژی كو كوردستان هەموو دەمان ب نیشتمانێ هەڤپشكێ هەموویان دمینیت و دڤێت ئەڤ بنەمایێ پێكڤەژیانێ ل هەرێمێ وەكو كولتوورەكێ نەتەوەیی و مرۆڤی بهێتە پاراستن و گەشەپێدان.

مەسرور بارزانی، سەرۆكێ حوكمەتا هەرێما كوردستانێ د چاڤپێكەفتنەكێ دا ل گەل كەنالێ (ئەلجەزیرە) یێ قەتەری دیاركر كو هەرێما كوردستانێ نابیتە پشكەك ژ ململانێیێن دەڤەرێ و پشتەڤانییا حوكمەتا ئیراقێ ژی دكەت بۆ كۆنترۆلكرنا چەكی د بن دەستێ هێزێن فەرمی دا. مەسرور بارزانی د وێ چاڤپێكەفتنێ دا دوپاتكر كو هەرێما كوردستانێ رووبرڕووی زێدەتر ژ هەزار هێرشێن مووشەكی و درۆنی بوویە كو ئەڤ هێرشە راستەوخۆ ژ ئالیێ ئیرانێ ڤە یان ژ ئالیێ چەند گرۆپێن چەكدار یێن ناڤ ئیراقێ ڤە هاتینە ئەنجامدان.
هەروەسا سەرۆكێ حوكمەتا هەرێما كوردستانێ هەبوونا هەر پەیوەندییەكێ د ناڤبەرا هەرێما كوردستانێ و ئیسرائیلێ دا ب تەمامی رەتكر و دوپاتی ل وێ چەندێ كر كو بڕێڤەبرنا سیاسەتا دەرڤە د دەستهەلاتا حوكمەتا فیدڕالی دایە، هەروەسا هەبوونا سەربازێن ئەمریكی ل بنگەهێ هەریر یێ ئەسمانی رەتكر و گۆت» ئەو بنگەهە دەمێ دەهـ سالانە چو هێزێن ئەمریكی تێدا نینن».
سەبارەت پەیوەندیێن هەرێما كوردستانێ ل گەل وەلاتێن دەوروبەر، سەرۆكێ حوكمەتا هەرێما كوردستانێ ئاماژە كر كو پەیوەندیێن وان ل گەل سووریایێ د باشن و بەرەڤ پێشڤە دچن و پەیوەندیێن ل گەل توركیایێ ژی ب گەلەك باش هەمژارتن و ئاماژە ب وێ دا كو هەماهەنگی د ناڤبەرا هەردو ئالییان دا هەیە.
مەسرور بارزانی دیاركر ژی كو چو ئالییەكێ گڤاشتن نەئێخستینە سەر حوكمەتا هەرێما كوردستانێ بۆ چوونا د ناڤ شەڕان دا و رۆهنكر كو ئارمانجا سەرەكی یا وان پاراستنا هەرێما كوردستانێ و دوورئێخستنا وێ یە ژ ئالۆزیێن دەڤەرێ و حوكمەتا هەرێما كوردستانێ ژی بەردەوام د بزاڤان دا بوویە هەڤسەنگییا دیپلۆماسی ب پارێزیت و پەیوەندیێن ئابۆری و سیاسی ل سەر بنەمایێ رێزگرتنا هەڤپشك پێشڤەببەت دا كو هەرێمێ ژ مەترسیێن شەڕێن رۆژهەلاتا ناڤین ب پارێزیت.

سەرۆكێ حوكمەتا هەرێما كوردستانێ د پەیوەندییەكا تەلەفۆنی دا، هەڤخەمی و سەرەخۆشییا خۆ ئاراستەی بەیان سامی عەبدولڕەحمان، شیرەتكارا بلند یا سەرۆكێ حوكمەتا هەرێمێ كر، ژ بەر وەغەركرنا هەڤژینێ وێ.
نڤیسینگەها سەرۆكێ حوكمەتا هەرێما كوردستانێ بەیاننامەیەك بەلاڤ كر و تێدا هاتییە، مەسرور بارزانی، سەرۆكێ حوكمەتا هەرێما كوردستانێ، د پەیوەندییەكا تەلەفۆنی دا، سەرەخۆشی ل بەیان سامی عەبدولڕەحمان، شیرەتكارا بلند یا سەرۆكێ حوكمەتێ بۆ كاروبارێن دەرڤە و گوهۆڕینێن سەقای كر، بۆ وەغەركرنا هەڤژینێ وێ، هونەرمەند و شانۆڤانێ كورد «موزەفەر شافعی».
د راگەهاندنێ دا هاتییە، سەرۆكێ حوكمەتێ بەهیداری و سەرەخۆشی و هەڤخەمییا خۆ گەهاندێ و هیڤیخواست خودایێ مەزن گیانێ وی ب بەهەشتێ شاد بكەت و ئارامی ژی ب بنەمالا وان ببەخشیت.
بەیان سامی عەبدولڕەحمان، سوپاس و پێزانینا خۆ و یا بنەمالا خۆ بۆ پەیوەندی و هەڤخەمییا سەرۆكێ حوكمەتا هەرێمێ دیار كر.

هەولێر، قائید میرۆ

شیرەتكارەكێ سەرۆكێ حوكمەتا هەرێما كوردستانێ ئاشكراكر، دادگەها بلندا فیدرالی بڕیار لدۆر چارەنڤیسێ مادەیا 140 یێ دەستوورێ ئیراقێ دایە و گۆت ژی، مادەیا 140 نەمریە هێشتا مادەیەكا ئەكتیفە، بەلێ ئالیێ جێبەجێكار كو حوكمەتا ئیراقێ یە یا خەمسارە هەمبەر ڤی مادەیا دەستووری، لەوڕا پێدڤییە سەرۆككۆمارێ ئیراقێ سكالایێ تۆمار بكەت.
رێبوار تالەبانی، شیرەتكارێ سەرۆكێ حوكمەتا هەرێما كوردستانێ بۆ كارۆبارێن دەڤەرێن كوردستانی یێن دەرڤەی ئیدارەیا هەرێما كوردستانێ بۆ رۆژنامەیا (ئەڤرۆ) گۆت « مادەیا 140 مادەیەكا دەستوورییە و بەری نوكەژی دادگەها بلند یا فیدرالی بڕیار لدۆر چارەنڤیسێ ئەڤی مادەیێ دەركریە كو مادەیەكا بەردەوام و ئەكتیڤە، لەوڕا چو ئاریشە لدۆر ئەڤی مادەیێ نینن، بەلێ ئالیێ جێ بەجێكار كو حوكمەتا ئیراقێ یە یا خەمسارە ل هەمبەر جێبەجێكرنا بەندێن وێ، چونكە بهایەكێ خۆ یێ دەستووری هەیە و چو داخۆیانییەك كاریگەریێ ل سەر چارەنڤیسێ وێ ناكەت».
رێبواری گۆت ژی» مخابن حوكمەتا ئیراقێ وەك پێدڤی كار ژبۆی جێبەجێكرنا مادەیا 140 نەكریە، لەوڕا ژی پێدڤییە نوونەرێن كورد ل جڤاتا نوونەرێن ئیراقێ بێدەنگ نەمینن و كار بكەن حوكمەت بهێتە پێگیریكرن ب وێ چەندێ مادەیا 140 بهێتە جێبەجێكرن وەكی خۆ چاوا دناڤا دەستووری دا هاتییە، بتایبەتی ژی سەرۆككۆمارێ ئیراقێ سكالایێ ل سەر حوكمەتا ئیراقێ یان كەس و ئالییەكی تۆمار بكەت یێن دژی ئەڤێ مادەیێ داخۆیانییان ددەن یان ژی پێگیر نینە ب دەستووری، ژ بەر كو سەرۆككۆمارێ ئیراقێ پارێزەرێ دەستوورییە و دڤێت ب ئەركێ خۆ رابیت بۆ پاراستنا دەستووری، ب دیتنامە سەرۆككۆمار بەرپرسیارە و مینا هەر مادەیەكا دی یا د ناڤا دەستووری دا مادەیا 140 مادەیەكا گرنگە».
رێبوار تالەبانی ئاماژەكر» پشتی رووودانێن 16ی ئۆكتۆبەرێ پرۆسەیا ب ئەربكرنا دەڤەرێن كوردستانێ گەلەك زێدەكریە و هەژمارەكا مەزن یا عەرەبێن هاوردە ئیناینە دەڤەرێن كوردستانی یێن دەرڤەی ئیدارەیا هەرێما كوردستانێ بۆ نموونە پشتی روودانێن 16ی ئۆكتۆبەرێ تاخێن تایبەت ب ئەرەبێن هاوردە ل باژێڕێ كەركووكێ هاتینە ئاڤاكرن و تنێ ئێك تاخ دوسەد هزار ئەرەب هاتینێ و وب ساناهیئێخستنێن تەمام هاتینەكرن بۆ هاتنا وەلاتیێن ئەرەب ژ پارێزگەهێن ئیراقێ بۆ كەركووكێ و دەڤەرێن كوردستانی، ئانكو رەوشا دەڤەرێن كوردستانی پشتی رووودانێن 16ی ئۆكتۆبەرێ هەتا نوكە یا ئاسایی نینە و مەترسییەكا مەزن ل سەر پاشەڕۆژا وان دەڤەران پەیداكریە، ئەوژی ب شێوەیەكێ نە قانوونی و بەرۆڤاژی دەستووری دەستكارییا دیموگرافییا وان دەڤەران هاتییەكرن».

مەكتەبا رێكخستنا كەركووك-گەرمیان یا پارتی دیموكراتی كوردستان بەرسڤا گۆتنێن پارێزگارێ كەركووك ددەت و رادگەهینیت»ئاخڤتنێن بێ بەرپرسیارێن پارێزگارێ كەركووكێ ل سەر وێ چەندێ كو مادەیا 140 یا دەستووری نەمایە، ب رامانا بێ بهاكرن و نەمانا دەستووری دهێت. ئەو بخۆژی باش دزانیت هەكە دەستوور نەمینیت، ئەڤە رامانا وێ چەندێ یە كو ئیراق ژ رامانا دەولەتبوونێ دێ ڤالا بیت و نامینیت».
مەكتەبا رێكخستنا كەركووك-گەرمیان یا پارتی دیموكراتی كوردستان د بەیاننامەیەكێ دا بەرسڤا گۆتنێن «محەمەد سەمعان كەنعان» پارێزگارێ كەركووكێ ددەت و رادگەهینیت «سەبارەت ب ئاخڤتنێن ڤێ دووماهیێ یێن پارێزگارێ كەركووكێ ل سەر چارەنڤیسێ كەركووكێ و مادەیا 140ێ، پارتی دیموكراتی كوردستان هەردەم باوەرییا وێ ئەو بوویە كو پێدڤییە باژێرێ كەركووكێ ببیت ژێدەرەكێ پێكڤەژیانێ و برایەتیێ، و ژ پێخەمەت پاراستنا پێكڤەژیانێ و نەمانا ئاریشەیان، دڤێت هەموو پێكهاتەیێن ئایینی و نەتەوەیی یێن ڤی باژێڕی خودانێن ماف و ئەركێن خۆ بن».
هەروەسا ئاماژە ب وێ چەندێ كر، دەستوور و مادەیا 140ێ نەخشەرێكا دروست و سەردەمیانە بۆ چارەسەركرن و ژناڤبرنا ئاریشەیان ل پارێزگەها كەركووكێ و جهێن دی یێن ئیراقێ داناینە. ئاخڤتنێن بێ بەرپرسیارێن پارێزگارێ كەركووكێ ل سەر وێ چەندێ كو مادەیا 140 یا دەستووری نەمایە، ب رامانا بێ بهاكرن و نەمانا دەستووری دهێت.
د هەمان دەم دا د بەیاننامەیا مەكتەبا رێكخستنا كەركووك-گەرمیان یا پارتی دا هاتییە، پارێزگارێ كەركووكێ «بخۆژی باش دزانیت هەكە دەستوور نەمینیت، ئەڤە رامانا وێ چەندێ یە كو ئیراق ژ رامانا دەولەتبوونێ دێ ڤالا بیت و نامینیت، ئەڤ جورە داخۆیانییە ب چو رەنگەكی خزمەتا بەرژەوەندییا پێكهاتە و ئاكنجیێن كەركووكێ ناكەن، بەلكو د راستیێ دا ئەڤە بزاڤەكە بۆ شكاندنا تەبایی و برایەتیێ و كاركرنە بۆ فیتنەگێڕیێ و زێدەكرنا ئاریشەیان».
د بەیاننامەیێ دا دوپاتی ل سەر وێ چەندێ هاتییە كرن»هەموو ئالی باش دزانن بوونا محەمەد سەمعان كەنعان ب پارێزگارێ كەركووكێ ژ ئەنجامێ سەفقەیەكا گوماناوی ل هۆتێلا رەشید) بوویە. هەكە هەلبژاردنەكا ئازاد و دیموكراتی و سروشتی با و ئەو سەفقە نەبا، رەوش ب رەنگەكێ دی دبوو».
د دووماهیێ دا، مەكتەبا رێكخستنا پارتی ل كەركووكێ راگەهاند «ب پێدڤی دزانین پارێزگارێ كەركووكێ و هەموو ئەوێن یێن بەرپرسیارەتی ل كەركووكێ هەی، رێزێ ل دەستووری و مافێ ئاكنجیێن كەركووكێ بگرن و ژیرانە رەفتارێ بكەن، دڤێت ئەم هەموو بۆ تەبایی و پاراستنا بەرژەوەندییا كەركووكێ و كەركووكییان كار بكەین، نە بۆ تێكدان و ئاژاوەگێڕیێ».