ئه‌ڤرۆ نیوز:

رێڤه‌به‌رێ فه‌رمانگه‌ها كۆمسیۆنا هه‌لبژارتن وراپرسى ل پارێزگه‌ها هه‌ولێرێ راگه‌هاند، كۆمسیۆن ب رێیا چه‌ند لژنێن خوه‌ڤه‌ ل پارێزگه‌هان مژوولى رێكخستن وپێداچوونا لیستێن تۆمارا گشتى یا ده‌نگده‌رانه‌، چه‌ند كۆمبوون یێن هاتینه‌ ئه‌نجامدان وبۆچوون وپێشنیازێن گرنگ هاتینه‌ به‌رچاڤكرن، كو د قۆناغا داهاتى دا دێ هه‌لسه‌نگاندنێ  بۆ پێشنیازان كه‌ین.

ئارام برادۆستى، رێڤه‌به‌رێ فه‌رمانگه‌ها كۆمسیۆنا هه‌لبژارتن وراپرسی ل هه‌ولێرێ زێده‌تر بۆ مالپه‌ری فه‌رمیێ پارتى گۆت” كۆمسیۆن یا هووربینیێ وڤه‌كۆلینێ بۆ چار بژارده‌یان دكه‌ت بۆ وێ چه‌ندێ بگه‌هن بۆ تۆماره‌كا پاقژ ودروست ودوور ژ هه‌موو جۆره‌ كێشه‌ وگرفته‌كا ته‌كنیكى ومه‌یدانى، ئه‌و بژارده‌ ژى پێك دهێن ژ، پشت به‌ستنێ ب كارتا نیشتمانى یا عیراقى، سیسته‌مێ بایۆمه‌تریێ مووچێن فه‌رمانبه‌رێن هه‌رێمێ، تۆمارا گشتیێ ده‌نگده‌رێن عیراقێ، یان ژى سه‌ر ژنوو دروستكرنا تۆماره‌كا دى یا ده‌نگده‌ران بۆ هه‌لبژارتنێن داهاتى، ئه‌ڤه‌ ژى پێدڤى ب بودجه‌كا مه‌زن ولایه‌نێ ته‌كنیكى یا هه‌ى، دبیت د ده‌مێ پێدڤى دا به‌رهه‌ڤ نه‌بیت”.

گۆت ژى” بۆ هه‌ر هه‌لبژارتنه‌كێ ل هه‌رێما كوردستانێ، كۆمسیۆنێ پێدڤى ب شه‌ش هه‌یڤێن به‌رهه‌ڤیێ هه‌یه‌، بۆ وێ چه‌ندێ ژ هه‌موو روویه‌كى ڤه‌ كۆمسیۆن ب باشى یا به‌رهه‌ڤ بیت”.

دیاركر” د بزاڤێ داینه‌ كو كۆمسیۆنا بلند یا هه‌رێمێ ببیته‌ خودان تۆماره‌كا بێ گرفت وجهێ رازیبوونا هه‌موو لایه‌نێن سیاسى وهه‌موو خه‌كێ هه‌ریما كوردستانێ بیت”.

ئاماژه‌ كر ژى”مه‌ پلان یا هه‌ى سیسته‌مێ هه‌لبژارتنێن هه‌رێما كوردستانێ هه‌ڤشێوێ وه‌لاتێن پێشكه‌فتى، به‌لكو زێده‌تر ژى بلند بكه‌ین وسیسته‌مێ ئه‌لكترۆنى بكاربینین و پێشبینیێ دكه‌ین سالا 2026 هه‌لبژارتنێن هه‌رێما كوردستانێ ب سیسته‌مێ ئه‌لكترۆنى یێ پێشكه‌فتى بهێنه‌ ئه‌نجامدان”.

ئه‌ڤرۆ نيوز:

مه‌سرور بارزانى سه‌رۆك وه‌زيرێن هه‌رێما كوردستانێ ب هه‌لكه‌فتا بورينا پێنج سالان ل سه‌ر داگيركرنا شنگالێ و جينوسايدكرنا ئێزيديێن ڤێ ده‌ڤه‌رێ په‌يامه‌ك به‌لاڤ كر دياركر دێ ب هه‌موو شيانێن خوه‌ دگه‌ل حوكمه‌تا عێراقێ كاركه‌ين بۆ قه‌ره‌بوووكرن و ڤه‌گه‌راندنا زيانڤێكه‌فتيێن كوردێن ئێزدى.

ديسان مه‌سرور بارزانى دياركر  ئه‌ڤرۆ سالرۆژا جينوسايدكرنا كوردێن ئێزدى يێن شنگالێ و ده‌وروبه‌رانه‌ ل سه‌ر ده‌ستێ تيرورستێن داعش و هه‌تا نوكه‌ ژى چه‌ندين كه‌س ل ناف ده‌ستێ وان دا هاتينه‌ ره‌ڤاندن و نه‌هاتينه‌ رزگاركرن و ده‌ربه‌رده‌ركرن.

سه‌روك وه‌زيرێن كوردستانێ ئه‌و چه‌نده‌ ژى دياركر گه‌لێ كوردێن ئێزدى ب درێژاهيا مێژوويێ تووشى چه‌ندين فه‌رمانان بووينه‌ كو دووماهى جار ژى ل سه‌ر ده‌ستێ تيرورستێن داعش تووشى كومكوژيێ بوون سه‌ره‌راى هه‌موو ڤان فه‌رمان و جينوسايدكرنێ دا ئێزديان به‌رگرى ژ ناسناما خوه‌ يا ئاينى و نه‌ته‌وه‌يى يا ره‌سه‌ن يا گه‌لێ كورد كريه‌.

ل دووماهيێ مه‌سرور بارزانى گۆت: پێدڤيه‌ رولێ سه‌رۆك مه‌سعود بارزانى يێ مه‌يدانى ژبيرنه‌كه‌ين كو دگه‌ل پێشمه‌رگه‌ى هه‌تا شنگال ژ ده‌ستێ تيرورستان رزگاركرى و سوزێ ده‌ت ل ماوێ بهێت كار بكه‌ت بۆ رزگاركرنا و هه‌موو وان ئافره‌تێن ئێزدى يێن ده‌ستێ تيرورستان دا ماين.

ئەڤرۆ نیوز:

پەرلەمانێ کوردستانێ 3\8\2014 وەکو رۆژا جینوسایدا کوردێن ئێزدی ناساند.

ئەڤرۆ رۆژا شەمبی رێکەفتی 3ی تەباخا 2019ێ پەرلەمانێ کوردستانێ خواندنا سیێ بۆ پرۆژێ پێشنیازا ب جینوسایدناساندنا کەیسێ کوردێن ئێزدی ب پتریا دەنگێن پەرلەمانتاران پەسەند کر.

پشتی دانوستاندنا ناڤبەرا لژنا قانوونی و پەلەمانتاران ب 87 دەنگێن ئەندامێن پەرلەمانێ کوردستانێ ئەڤ پرۆژە پێشنیازە هاتە پەسەندکرن.

ئه‌ڤرۆ نيوز:

وه‌زيرێ ناڤخوه‌ ل هه‌رێما كوردستانێ دووپاتيێ ل سه‌ر وێ چه‌ندێ دكه‌ت كو رێ ناهێته‌ دان هيچ كه‌سه‌ك ده‌ستدرێژيێ بكه‌ته‌ سه‌ر مولكێ گشتى وپێدڤيه‌ ب كريار قانوون يا سه‌روه‌ر بيت.

د كۆمبوونه‌كێ دا ل گه‌ل بريكارێ وه‌زاره‌تێ وپارێزگه‌رێن هه‌ولێرێ وسلێمانيێ ودهۆك وهه‌له‌بجه‌ و راوێژكاران وهه‌موو رێڤه‌به‌رێن گشتى يێن وه‌زاره‌تێ، كو يا تايبه‌ت بوو ب دانانا پلانا چار سالێن داهاتى، رێبه‌ر ئه‌حمه‌د، وه‌زيرێ ناڤخوه‌ ل هه‌رێما كوردستانێ راگه‌هاند” ل بن رۆناهيا رێنمايێن سه‌رۆكێ حوكمه‌تا هه‌رێمێ وبه‌رنامێ كابينا نه‌هێ يا حوكمه‌تێ، ئارمانج خزمه‌تكرنا زێده‌تر يا وه‌لاتيانه‌ و ب رێڤه‌برنا كارايه‌ ب زووترين ده‌م وب باشترين شێوه‌”.

رێبه‌ر ئه‌حمه‌د ئاماژه‌ ب وێ چه‌ندێ ژى كر كو رێ ناهێته‌ دان هيچ كه‌سه‌ك ده‌ستدرێژيێ بكه‌ته‌ سه‌ر مولكێ گشتى وپێدڤيه‌ ب كريار قانوون سه‌روه‌ر بيت.

ئه‌ڤرۆ نیوز:

فراكسیۆنا پارتى دیموكراتى كوردستان ل په‌رله‌مانێ عیراقێ پێشنیازه‌كا نوو بۆ فراكسیۆنێن كوردستانى ل به‌غدا به‌رچاڤ دكه‌ت.

ڤیان سه‌برى، سه‌رۆكا فراكسیۆنا پارتى ل په‌رله‌مانێ عیراقێ د داخۆیانیه‌كا رۆژنامه‌ڤانى دا گۆت” فراكسیۆنا پارتى پێشنیاز دكه‌ت هه‌موو ف اكسیۆنێن كوردستانى ( هه‌ڤپه‌یمانیا كوردستانى) ل په‌رله‌مانێ عیراقێ دروست بكه‌ن، چونكى گه‌له‌ك پرسێن گرنگ د ناڤبه‌را هه‌ولێرێ و به‌غدا یێن ماین وپێدڤیه‌ ب ئێكگرتى پێنگاڤان بۆ بهاڤێژین”.

ڤیان سه‌برى زێده‌تر بۆ باسمیۆز گۆت” فراكسیۆنێن كوردستانى ل په‌رله‌مانێ عیراقێ كو ژ 58 په‌رله‌مانتاران پێك دهێن، ب ئێكده‌نگیێ دێ بسه‌ركه‌ڤن وده‌نگێ كوردستانێ دێ ل به‌غدا ب هێز كه‌ن”.

ئەڤرۆ نيوز:‏

قایمقامێ قەزا شنگالێ دیار کر کو ژ ئەگەرێ جینوسایدا شنگالێ و مانا خەلکی د بن خیڤەتان دا و نەبوونا ‏تەناھیێ ل شنگالێ گەلەک خێزانێن شنگالێ ژێکڤەبووینە ھەر ھندەک ئەندامێن خێزانەکێ یێن چووینە ‏وەلاتەکی.‏

مەحما خەلیل، قایمقامی قەزا شنگالێ بۆ رۆژناما ئەڤرۆ دیار کر کو حوکمەتا عیراقێ یا رژد نینە ل سەر ‏چارەسەرکرنا کەیسا شنگالێ لەورا ژی ھەتا نوکە رەوشا شنگالێ ئالوز مایە و خەلک نەشێن ڤەگەڕن و رەوشا ‏خەلکێ شنگالێ ژی بەر ب نەباشیێ و چارەنڤیسەکی نەدیارڤە دچیت و گەلەک جاران مە بزاڤ کرینە رەوشا ‏شنگالێ چارەسەر بکەین، لێ ئاستەنگ ھەبووینە ژ لایی گرۆپێن چەکدار و حەشدا شەعبی ڤە، چونکو وان نەڤێت ‏رەوش خوەش بیت و خەلک ڤەگەڕن داکو ئەو بەردەوامیێ ب کارێن خوە یێن نەقانوونی بدەن ھەتا نوکە ‏تشتەکێ وەسا بۆ شنگالێ نەھاتیەکرن ئەو ماستەر پلانا ژ لایی حوکمەتا ھەرێما کوردستانی ڤە بۆ شنگالێ ھاتیە ‏دانان گرۆپێن چەکدار و حەشدا شەعبی نە ھێلا بجە بھێت.‏

ژ ئالیێ خوە ڤە سالم سەعید، بەرپرسێ راگەھاندێ ل بوردێ کاروبارێن مرۆڤایەتی ل پارێزگەھا دھۆکێ دیار کر ‏کو ل دەستپێکا سالا (2015) دەمێ ئاوارە ھاتینە دھۆکێ ل دووڤ ئامارێن وان بەری نوکە (27) کەمپێن ئاواران ‏و پەنابەرا ل سنوورێ پارێزگەھا دھۆکێ ھەبوون و نێزیکی 740 ھزار ئاوارە و پەنابەران تێدا د ژیان، پشتی ‏رزگارکرنا باژێرێَ مووسل ئاوارێن وێ دەڤەرێ زڤرینە ڤە و ھندەک کەمپ ڤالابوون و نھا (21) کەمپ ل ‏سنوورێ پارێزگەھا دھۆکێ ھەنە، ب گشتی ئاوارە و پەنابەر ل پارێزگەھا دھوکێ دناڤ کەمپان دا و دەرڤەی ‏کەمپان دا دگەھنە (119.172) خێزانان کو دبنە (596.350) کەس.‏

بەرپرسێ راگەھاندنێ ل بۆردی کاروبارێن مروڤایەتی ل پارێزگەھا دھۆکێ بۆ رۆژنامەیا ئەڤرۆ دیارکرکو ‏‏(109) رێکخراو د ناڤ کەمپێن ئاواران دا خزمەتێن جوراوجور ئەنجام ددەن و (57) رێکخراو د ناڤ کەمپێن ‏پەنابەران دا کو دبنە (166) رێکخراو ژوانا (22) رێکخراوان خوە ڤەکێشاینە یان کارێ وان ب دووماھی ھاتینە ‏کو نھا (144) رێکخراو بەردەوامن دناڤ کەمپان دا، لێ د گەلەک بیاڤان دا ھاریکاری دکێمن وەکی ھاریکاریێن ‏ئاھێن خوارنێ و دەرمان دکێمن ھەروەسا ھاریکاریێن دراڤی ئێک جار نەماینە بۆ نەخۆشان و کێم ئەندامان و ‏گۆت: “پشتەڤانیا زارۆیان یا ھەی، بەلێ یا کێمە و نە ل دووڤ ئاستێ پێدڤی یە”.‏

ژ ئالیێ خوە ڤە حسێن قائێدی، رێڤەبەرێ نڤیسینگەھا رزگارکرنا رەڤاندیێن ئێزدی بۆ رۆژناما ئەڤرۆ دیار کر ‏کو ل جینوسایدا شنگالێ شەش ھزار و 417 کەس ھاتبوونە رەڤاندن ژ وان ژی سێ 548 کچ و ژن بوون و دو ‏ھزار 869 زارۆ و زەلام بووینە ب پشتەڤانیا نڤیسینگەھا نێچیرڤان بارزانی، سەرۆکێ ھەرێما کوردستانێ ھەتا ‏نوکە سێ ھزار و 487 کەس ژ دەستێن تیرۆرستێن داعش رزگاربووینە ژوان ژی 337 زەلام و ھزار 186 ژن و ‏‏940 زارۆیێن کۆر و ھزار و 24 زارۆیێن کچ و گۆت: “ھەتا نوکە دو ھزار و 930 کەس د دەستێن تیرۆرستێن ‏داعش دا ماینە ژوان ژی ھزار و 592 زەلامن و ھزار و 338 ژنن و ھزار و 759 کور و کچ ماینە بێ باب و ‏‏407 ماینە دایک و 359 زارۆ ژی ماینە بێ دایک و باب و دایک و بابێن 220 زارۆیان د دەستێن تیرۆرستێن ‏داعش دانە”.‏