ئه‌ڤرۆ نیوز ، زنار تۆڤى:

پشتی بۆ ماوێ 13 رۆژان ده‌رگه‌هێ گۆمركا سه‌رزێرى یێ كو دكه‌ڤیته‌ دناڤبه‌را هه‌رێما كوردستانێ و وه‌لاتێ توركیا دا، ژ ئالیێ توركیا ڤه‌ هاتیه‌ گرتن، کو ئه‌ڤ ده‌رگه‌هه‌ دكه‌ڤیته‌ گوندێ سه‌رزێرى ل ناحیا كانى ماسێ، کو رۆژانه گەلەک ژ خەلکێ کوردستانێ و یێ باکور ژی هاتنوچوونێ دڤی دەرگەهی را دکەن، ئەڤرۆ ب فەرمی ئەڤ دەرگەهە هاته ڤەکرن.

سه‌ربه‌ست سه‌برى ئاكره‌یى رێڤه‌به‌رێ ناحیا كانى ماسێ بۆ ئه‌ڤرۆ نیوز دیاركر: ژ ئه‌گه‌ره‌كێ نه‌دیار بۆ ماوێ چەندین رۆژان ده‌رگه‌هێ گۆمركا سه‌رزێرى ل ناحیا كانى ماسێ ژ ئالیێ توركیا ڤه‌ هاتبوو‌ گرتن، لێ هه‌ر فەرمانبەرێن مە رۆژانە دچوونە سەر کارێ خوە، ئەم ب هیڤی بووین کو ل دەمەکێ نێزیک بهێته ڤەکرن، هەروەسا پشتی بزاڤێن بەردەوام یێن حوکمەتا هەرێمێ ل گەل ئالیێ تورکیا، ئەڤرۆکە دوشەمبی و ل دەمژمێر 8:30 سپێدێ ب رەنگەکێ فەرمی دەرگەهێ سەرزێری هاتە ڤەکرن و نوکە خەلکێ مە ب رەنگەکێ ئاسایی تێدا هاتنوچوونێ دکەن.
ناڤهاتى زێده‌تر گۆت: هەر چەندە گرتنا ڤى ده‌رگه‌هى دڤی ماوەی دا زیان گه‌هاندیه‌ خه‌لكێ مه‌، چونكى خه‌لكێ ڤێ ده‌ڤه‌رێ گه‌له‌ك دوكان و ماركێت ڤه‌كرینه‌ و گه‌له‌ك كه‌لوپه‌ل ژى كرینه‌، لێ ژ ئه‌گه‌رێ گرتنا ڤى ده‌رگه‌هى ئه‌و دۆكان و ماركێت هه‌موو مابوونە راوه‌ستیاى، لەوما پشتی ڤەکرنا ڤی دەرگەهی جارەکادی دێ بزاڤا بازرگانی ل ڤێ دەڤەرێ دەست پێکەتە ڤە.

ئەڤرۆ نیوز، رێوار مزیری:

سەرۆکێ سەندیکا نۆشدارێن کوردستانێ تایێ دھۆکێ بۆ ئەڤرۆ نیوز دیار کر کو ژبەر ئینانا نۆشدارێن بیانی بۆ ھەرێما کوردستانێ نەخۆشخانا (ماکس) یا تایبەت ل دھۆکێ ئەڤرۆ رۆژا ٤/٢/٢٠١٩ێ ھاتە داخستن.
دکتور ئەحمەد موختار، سەرۆکێ سەندیکا نۆشدارێن کوردستانێ تایێ دھۆکێ دیار کر کو نەخۆشخانا (ماکس) یا تایبەت ل دھۆکێ بێ رازەمەندیا سەندیکا نۆشداران و لایەنێن پەیوەندیدار نۆشدار ژ دەرڤەی وەلاتی دئینانە ھەرێما کوردستانێ و گۆت: “ل ڤێ دووماھیێ ژی نەخۆشخانا ناڤھاتی بێ رازیبوونا لایەنێن پەیوەندار پێنج نۆشدار ژ وەلاتێ ھندێ ئینابوونە و ٥٠ ھزار دینار ھەمبەر پشکنینا ھەر نەخۆشەکی دھاتنە وەرگرتن ژ بەر ڤێ چەندێ ئەڤ نەخۆشخانە ھاتە داخستن و پاسۆرتێن وان نۆشداران ژی ژێ ھاتنە وەرگرتن و دێ پێرابوونێن قانوونی ھەمبەر ھێنە وەرگرتن”.

ئەڤرۆ نیوز:بارزان مزووری:
میر حازم بەگ کورێ میر تەحسین بەگ،وەکیلێ میری بو دەزگەهێن راگەهاندنێ دیار کر کۆ ئەڤرۆ ب رێورەسمن دێ تەرمێ میری بۆ شێخان هێتە ڤەگوهاستن  و دێ ل قەسرا میری هێتە دانان و بریارە سوبە سپێدێ رێکەفتی 5 شوباتێ 2019 دناڤ قەسرا وی دا هێتە ڤەشارتن.

ئەڤرۆ نیوز، قائید میرۆ:

رێڤەبەرێ گشتیێ چاپ و وەشانێ ل وەزارەتا رەوشنبیری و لاوان یا حوکمەتە هەرێما وردستانێ دیار کر کو ڤێ حەفتیێ دووماھی ژڤانێ وان و کەنالێن راگەھاندنێ یە یێن کو مۆلەتا کارکرنێ نوو نەکەن و گۆت: “وەزارەتا ناڤخۆ دێ پەخشێ وان کەنالێن ئاسمانی ڕاگریت یێن پابەندی بڕیارێن وەزارەتێ نەبن”.
محەمەد گەردی، رێڤەبەرێ گشتیێ چاپ و وەشانێ ل وەزارەتا رەوشنبیری و لاوان یا حوکمەتا هەرێما کوردس بۆ ئەڤرۆ نیوز دیار کر کو دووماهی ھۆشداریا حوکمەتێ بۆ کەنالێن راگەھاندنێ یێن مۆلەتا کارکرنێ نوو نەکربیت ل ڕۆژا پێنجشەمبیا بۆری ب دووماھی ھات، بەلێ ل سەر داخوازا راگەھاندنێن پارێزگەهێن دھۆک و سلێمانی و ھەولێرێ دەمێ گرتنا وان ھاتیە درێژکرن بۆ ڤێ حەفتیێ و گۆت: “ب تنێ ل رۆژا پێنجشەمبا بۆری دوازدە کەنالێن راگەھاندنێ سەرەدانا وەزارەتا رەوشەنبیری کریە و مۆلەتا کارکرنا خوە نووکریە، لەوڕا ژی ڤێ حەفتیێ دوماھی مۆلەتە بۆ ھەموو کەنالێن ناڤخۆیی و ئاسمانی بەرۆڤاژی دێ سزایێ قانوونی بۆ ھەبیت”.

ناڤهاتی ئاماژە دا وێ چەندێ کو ھەر کەنالەکێ ناڤخۆیی و ئاسمانی پێگیریێ ب بڕیار و رێنمایی یێن وەزارەتێ نەکەت ئێک ژ سزایێن وان دێ گرتنا پەخشێ وان کەنالێن ناڤخۆیی بیت، ھەروەسا بۆ کەنالێن ئاسمانی ژی ب فەرمانا سەرۆکایەتیا جڤاتا وەزیران دێ نڤیسارەکێ دەینە وەزارەتا ناڤخۆ داکو پەخشێ وان بھێتە ڕاگرتن، چونکی وان مۆلەتا وەزارەتا ناڤخۆ ژی ھەیە و گرتنا پەخشێ وان دبیت ژلایێ وەزارەتا ناڤخۆ ڤە بیت.