فیسته‌ڤالا لاوێن دهۆكێ دێ هێته گێڕان
ئه‌ڤرۆ، هه‌رهین محه‌مه‌د:
ل ژێر درووشمێ (نه بۆ كۆچكرنا گه‌نجان، به‌لێ بۆ به‌ژداریپَكرن د پێشخستنا وه‌لاتی دا) رێڤه‌به‌ریا لاوان ل پارێزگه‌ها دهۆكێ ب چاڤدێریا د. عه‌لی ته‌ته‌ر، پارێزگارێ دهۆكێ، ب هه‌لكه‌فتا رۆژا جیهانیا گه‌نجان دێ فیسته‌ڤاله‌كێ ل رۆژا 11/8/2022 ل ناڤه‌ندا وه‌رزش و لاوان ل دهۆكێ گێڕیت.
هه‌كار محه‌مه‌د ئه‌مین، رێڤه‌به‌رێ لاوان ل پارێزگه‌ها دهۆكێ بۆ رۆژناما ئه‌ڤرۆ گۆت: “وه‌كو دیار 12/8 ژ هه‌ر ساله‌كێ رۆژا جیهانیا لاوانه، ب ڤێ هه‌لكه‌فتێ ئه‌م ئه‌ڤ ساله دێ فیسته‌ڤالا لاوێن دهۆكێ ئه‌نجام ده‌ین، ئه‌ڤ ساله ئه‌ڤ رۆژه دكه‌ڤیته د رۆژا ئه‌ینی دا و ژ به‌ر كو گه‌نج و خه‌لكێ مه قه‌ستا سه‌یران و هاڤینگه‌هان دكه‌ن، ئه‌م دێ فیسته‌ڤالا خوه رۆژه‌كێ به‌ری هینگێ، ئانكو ل رۆژا پێنجشه‌مبی 11/8/2022 ئه‌نجام ده‌ین”.
زێده‌تر گۆت: “چه‌ندین چالاكی د ناڤ فیسته‌ڤالێ دا دێ هه‌بن، دیسا گه‌نجێن مه دێ په‌یامێن خوه یێن پیرۆزباهیێ ل سه‌ر ئاستێ پارێزگه‌هێ گه‌هینن و گه‌نجێن نموونه دێ هێنه خه‌لاتكرن، ل دووماهیا فیسته‌ڤالێ ژی راپۆرته‌ك دێ هێته پێشكێشكرن بناڤێ رێكخراوێن سڤیل یێن د وارێ گه‌نجان دا كار دكه‌ن، داخوازی و كێماسیێن هه‌ی د مافێ گه‌نجان دا و وێ راپۆرتێ دێ پێشكێشی وه‌زیرێ ره‌وشه‌نبیری كه‌ین و كۆپیه‌كێ ژی پێشكێشی پارێزگه‌رێ دهۆكێ كه‌ین”.
