16 گه‌نجان پشكداری د به‌ریكانێ دا كربوون و سێ سه‌ركه‌فتیێن به‌راهیێ هاتنه خه‌لاتكرن
ئه‌ڤرۆ، شاكر ئه‌تروشی:
پشكا ره‌وشه‌نبیری ل ناڤه‌ندا خانی یا ره‌وشه‌نبیری و راگه‌هاندنێ، ب هه‌ڤكاری ل گه‌ل (نۆبارا جه‌عفه‌ر مایی) دوهی ئێڤاری27/6/2022 د رێ و رسمه‌كێ ژ هه‌ژی دا ل هولا نالبه‌ند ل پانۆرما ئازادی، ئه‌نجامێن به‌ریكانا چیرۆكێ یا گه‌نجان راگه‌هاندن و هه‌رسێ سه‌ركه‌فتیێن به‌راهیێ هاتنه خه‌لاتكرن، كو ئه‌و ژی ئه‌ڤه بوون: دلبرین عه‌بدولفه‌تاح بۆتانی سه‌ركه‌فتیا ئێكێ و عادل حسێن سه‌ركه‌فتیێ دویێ و رزگار سالح عه‌جاج سه‌ركه‌فتیێ سێیێ.
نڤیسه‌ر و رۆژنامه‌ڤان (ئیسماعیل بادی) ب نووراتیا ناڤه‌ندا خانی یا ره‌وشه‌نبیری و راگه‌هاندنێ، د په‌یڤه‌كێ دا گۆت: هزرا ئه‌نجامدانا ڤێ به‌ریكانێ یا خودێ ژێ رازی جه‌عفه‌ر مایی بوو، ناڤه‌ندا خانی خوه لێ كره خودان و مه ده‌ست ب ئه‌نجامدانا ڤێ به‌ریكانێ كر و مه‌ره‌م پێ ئه‌و بوو ئه‌م وه‌كو ناڤه‌ند خوه ل به‌رهه‌مێن گه‌نجان، ب تایبه‌ت ژی چیرۆكنڤیسێن گه‌نج بكه‌ینه خودان، هه‌روه‌سا پشته‌ڤانیێ لێ بكه‌ین، له‌ورا ئه‌ڤ بزاڤه دێ دبه‌رده‌وام بن و بۆ ده‌مێ بهێت دێ مه پرۆژه‌كێ دی ژی هه‌بیت، بۆ زانین وه‌ك ناڤه‌ندا حانی هه‌تا نوكه مه پتری چل پرتووكان چاپكرینه و نوكه ژی هنده‌ك ل ژێر چاپێ نه.
دووڤدا هه‌لبه‌ستڤان مه‌حفۆز مایی، برایێ خودێ ژێ رازی جه‌عفه‌ر مایی د په‌یڤه‌كێ دا به‌حسێ رۆلێ ره‌حمه‌تی كر د پێشخستنا بزاڤا ره‌وشه‌نبیری ب تایبه‌ت گه‌نجان و هیڤی خواستن كو ئه‌و ژی لڤێ چالاكیێ یێ به‌رهه‌ڤبا لێ ژبه‌ركو وه‌غه‌ركریه ئه‌و وه‌كو برایێ وی هاتیه.
موسه‌ده‌ق تۆڤی، به‌رپرسێ پشكا ره‌وشه‌نبیری ل ناڤه‌ندا خانی یا ره‌وشه‌نبیری و راگه‌هاندنێ د په‌یڤا خوه دا گۆت: پشتی مه راگه‌هاندنی كو دێ ئه‌ڤ به‌ریكانه هه‌بیت (16) گه‌نجان چیرۆكێن خوه بۆمه هنارتن و ژلایێ سێ چیرۆكنڤیسێن به‌رێز ڤه، كو ئه‌و ژی ( ئه‌نور محه‌مه‌د تاهر و حه‌كیم عه‌بدوللا و عسمه‌ت محه‌مه‌د به‌ده‌ل) بوون هاتینه هه‌لسه‌نگاندن، د ئه‌نجامدا دلبرین عه‌بدولفه‌تاح بۆتانی بۆ سه‌ركه‌فتیا ئێكێ و عادل حسێن بۆ سه‌ركه‌فتیێ دویێ و رزگار سالح حه‌جاج بۆ سه‌ركه‌فتیێ سێێ، دووڤدا چیرۆكێن وان هه‌رسێ سه‌ركه‌فتیان ل گه‌ل چیرۆكێن حه‌فت پشكدارێن دی كو هه‌موو دبنه ده‌ه چیرۆك كرنه پرتووكه‌ك ب ناڤێ ( ژبه‌رهه‌مێن گه‌نجان، سه‌ركه‌فتیێن به‌ریكانه‌یا چیرۆكنڤیسێن گه‌نج) چاپكر و ئه‌ڤرۆ به‌لاڤكر و سوپاس بۆ لژنا هه‌لسه‌نگاندنێ كو ب دلسۆزانه كارێ خوه ئه‌نجام دان.
دووڤدا چیرۆكنڤیس عسمه‌ت محه‌مه‌د به‌ده‌ل، ئه‌ندامێ لژنا هه‌لسه‌نگاندنا چیرۆكێن وێ به‌ریكانی ب روونی به‌حسێ چاوانیا وه‌رگرتن و هه‌لسه‌نگاندنا وان چیرۆكان كر و گۆت ژبلی هه‌ر سێ سه‌ركه‌فتیێن به‌راهیێ شه‌ش كه‌سێن دی ژی چیرۆكێن وان دباش بوون.
ل دووماهیێ خه‌لاتێ ناڤه‌ندا خانی ل سه‌ر سه‌ركه‌فتی و پشكدار و لژنا هه‌لسه‌نگاندنێ هاتنه به‌لاڤكرن و كه‌نالێ دهۆك تیڤی ب شێوه‌كی زیندی ئه‌ڤ چالاكیه د ڤه‌گوهاست.
