ئورۆپی دخوازن مفایی ژ قەیرانا ئابووری یا تورکیا وەربگرن
ئه‌ڤرۆ نيوز:
رەوشا ئابووری یا تورکیا و پرسێن د ناڤبەرا تورکیا و ئەمریکا دا د رۆژەڤا سەرکردێن وەلاتێن جیھانێ دانە و د ڤێ مژارێ دا ئیمانوێل ماکرۆن سەرۆک کۆمارێ فرەنسا راگەھاند کو دڤێت ل تورکیا دادگەە و بەنکا ناڤەندی سەربخوە بن و پرسێن ل گەل ئێکەتیا ئورۆپا و ئەمریکا ب رێیا دبلۆماسیێ بھێنە چارە کرن و گۆت: (ئەم دخوازین د چارچۆڤێ ھەڤپەیمانیا ئەتلانتیک (ناتۆ) دا پرسێن ل گەل تورکیا بھێنە گەنگەشە کرن و دەستێوەردانێن دەستھەلاتدارێن تورکیا د بەنکا ناڤەندی و دادگەھان دا نەمینیت و د وارێن سیاسی و ئابووری دا ریفۆرمێن پێدڤی بھێنە کرن).
سەباستیان کورز سەرۆک وەزیرێن نەمسا ژی راگەھاند کو گرنگە تورکیا پێنگاڤێن ئەرێنی بۆ چارەکرنا قەیرانا ئابووری ب ھاڤێژیت و رێنماییێن ئێکەتیا ئورۆپا د وارێن مافێن مرۆڤی، دیمۆکراسیێ و ئابووریێ دا ب جدی وەربگریت و گۆت: (نابیت ھەموو دەستھەلات ل وەلاتەکی بکەڤیتە دەستێ کەسەکی دا و تایبەت ژی گرنگە کو بەنکا ناڤەندی و دادگەە ھەردەم سەربخوە بن و دەستھەلاتدار دەستێوەردانێ د کارێن دادگەھان و بەنکا ناڤەندی دا نەکەن).
ھەر د ڤێ مژارێ دا ئەنجێلا مێرکەل شیرەتکارا ئەلمانیا ژی راگەھاند بو وان گرنگە کو ئابووریا تورکیا بھێز بیت و دیمۆکراسی و مافێن مرۆڤی د ئاستا ھەری بلند دا بن و گۆت: (تێکچونا ئابووریا تورکیا ئانکۆ قەیرانێن ئابووری و سیاسی یێن تورکیا نە د بەرژەوەندیا چ وەلاتەکی جیھانێ دانە و بۆ ڤێ یەکێ ژی دڤێت حوکمەتا تورکیا ژی پێنگاڤان ب ھاڤێژیت و خوە د ھەموو ئالیان دا نێزیکی ئورۆپا بکەت، ژ بەر کو ئەم گرنگیێ ددەینە ئارامیێ و رەوشا ئابووری و سیاسی یا تورکیا و بۆ رزگاربوونا ژ قەیرانا ئابووری ژی پێدڤیە بەنکا ناڤەندی سەربخوە بیت و دادگەە بێ ئالی بن و نە د بن کۆنترۆلا دەستھەلاتێ دا بن).
شیرەتکارا ئەلمانیا راگەھاند ژی کو د رۆژێن داھاتی دا دێ سەرۆک کۆمارێ تورکیا سەرەدانا ئەلمانیا کەت و گۆت: (بەرنامێ مە یێ گەنگەشێ ل گەل سەرۆک کۆمارێ تورکیا دیارە و ئەم دخوازین ھەموو پرسێن د ناڤبەرا خوە دا ب دانوستاندنان و دبلۆماسیێ چارە بکەین و بۆ ڤێ چەندێ پێدڤیە حوکمەتا تورکیا پێنگاڤان ب ھاڤێژیت و دێ ل گەل بەرێز ئەردۆگانی رەوشا ئابووری، سیاسی، رەوشا مافێن مرۆڤی، دیمۆکراسیێ، گرتنا رۆژنامەڤان و سیاسەتمەداران گەنگەشە کەین و دیسان رەوشا سووریێ ژی دێ بابەتەکا دی یا گەنگەشا مە بیت).
