وەزارەتا خواندنا بلند ل گەل بەغدا ل دۆر زانکۆیێن ئەھلی گەھشتیە رێکەفتنێ
ئه‌ڤرۆ نيوز، قائید میرۆ:
ھێشتا ل سەر ھژمارەک کۆلیژ و زانکۆیێن ئەھلی ئاریشە د ناڤبەرا ھەرێم و بەغدا دا ھەیە و پەیڤدارێ وەزارەتا خواندنا بلند ژی ئاشکرا کر، ھەردو وەزارەت گەھشتینە رێکەفتنەکێ و ھەر زانکۆیەکا مەرجێن ستاندەرد تێدا نەبن باوەرنامێن وان ژ لایێ وەزارەتا خواندنا بلند ڤه دێ هێنە رەتکرن.
عەباس ئەکرەم، پەیڤدارێ وەزارەتا خواندنا بلند و ڤەکۆلینێن زانستی ل حوکمەتا ھەرێما کوردستانێ بۆ رۆژناما ئەڤرۆ گۆت: “چارەسەرکرنا ئاریشەیێن زانكۆیێن ئەھلی یێن د ناڤبەرا ھەرێم و بەغدا ب ھەلاویستی ماینە، گرێدایی کوالێتى و مەرج و رێنمایێن وەرگرتنێ یە ل ئەڤان زانکۆیان پشتی ھەردو وەزارەتێن خواندنا بلند یێن ھەرێم و بەغدا یاداشتەکا لێک تێگەھشتنێ ئیمزاکری کومەکا مژارێن گرنگ ل خۆ دگریت ژ وانا بابەتێ ئەکادیمی و زانستی و مەشق و رەوشنبیری و گەشەپێدان، پشتی پێک ئینانا ھەردو حوکمەتێن ھەرێما کوردستانێ و بەغدا دێ ل سەر چاوانیا ئەڤان خالێن رێکەفتن ل سەر ھاتیەکرن کار کەن.
عەباس ئەکرەم دا زانين ژى كو زانکۆیێن ئەھلی یێن سنورێن دەرڤەيی ئیدارەیا حوکمەتا ھەرێمێ، ھژمارەکا کۆلیژان پێکھاتینە بۆچوونا فەرمیا وەزارەتێ ئەڤە مەرجێن زانستی ب سەردا بھێنە سەپاندن و بێی ھەبوونا مەرجێن زانکۆ و کۆلیژێن ئەھلی ئەم باوەرنامێن وانا پەسەند ناکەین و کار پێناکەین ل ھەرێما کوردستانێ، ھەر دەمێ ئەڤان زانکۆ و کۆلیژان شیا خوە بگونجينن ل گەل رێنمایێن وەزارەتا خواندنا بلندا ھەرێما کوردستانێ وی دەمی ئەم دێ پەسەند کەین و مینا زانکۆیێن ھەرێما کوردستانێ دێ دانپێدان پێ ھێتەکرن، بەروڤاژی رازی نابین و پێدڤیە دەرچوویێن 12ی ئامادەیی یێن ھەرێما کوردستانێ ئاگەھداری مەرجێن وەرگرتنێ بن ل زانکۆ کۆلیژێن وەزارەتێ ھێشتا پەسەند نەکريه.