ئێكه‌تیا ئورۆپا: په‌یوه‌ندیێن هه‌ولێر و به‌غدا بۆ مه دگرنگن
ئه‌ڤرۆ نیوز:
سه‌رۆك مه‌سعود بارزانی ئه‌ڤرۆ پێشوازی ل شانده‌كێ ئێكه‌تیا ئورۆپا كر كو پێكهاتبوو ژ جێن كریستۆڤ بێلارد جێگرێ ئه‌میندارێ گشتی یێ ئێكه‌تیا ئورۆپا بۆ كاروبارێن سیاسی و رامۆن بلیكۆ بالیۆزێ ئێكه‌تیا ئورۆپا ل عیراقێ و كلاریس پاسۆری به‌رپرسێ نڤیسینگه‌ها ئێكه‌تیا ئورۆپا ل هه‌ولێرێ.
د دیداره‌كێ دا، ره‌وشا سیاسی یا ده‌ڤه‌رێ و په‌یوه‌ندیێن د ناڤبه‌را هه‌ولێر و به‌غدا و پرۆسا سیاسی یا هه‌رێما كوردستانێ گه‌نگه‌شه‌كرن، جێگرێ ئه‌میندارێ گشتی یێ ئێكه‌تیا ئورۆپا بۆ كاروبارێن سیاسی سه‌ره‌رای ئاماژه دانێ ب رۆلێ سه‌رۆك بارزانی د پرۆسا سیاسی یا عیراقێ دا، دیار كر كو ده‌رفته‌كا ئه‌رێنی د ناڤبه‌را هه‌ولێر و به‌غدا دا په‌یدا بوویه و گۆت:(سه‌قامگیریا هه‌رێما كوردستانێ و باشتربوونا په‌یوه‌ندیێن وێ ل گه‌ل به‌غدا ل ده‌ف ئێكه‌تیا ئورۆپا دگرنگن و ئێكه‌تیا ئورۆپا بۆ هاریكاریكرن و راوێژێ بۆ هه‌رێما كوردستانێ د وارێن كارگێری، دارایی و چاكسازی دا یا ئاماده‌یه).
گه‌فێن تیرۆرێ ل سه‌ر ئاسایشا ده‌ڤه‌رێ ته‌وه‌ره‌كێ دی یێ دیدارێ بوو و سه‌رۆك بارزانی سه‌ره‌رای ئاماژه‌دانێ ب قوربانیێن خه‌لكێ كوردستانێ د شه‌رێ تیرۆرێ دا، دوپاتكر كو پێشمه‌رگه بوو ب قه‌هره‌مانی و گیانفیدایی ئه‌فسانا داعش شكاندی.
ل دۆر ره‌وشا سووریێ، سه‌رۆك بارزانی دلگرانیا خوه ل هه‌مبه‌ر پاشه‌رۆژا كوردان و بۆچوون و پێشنیازێن خوه ل دۆر چاوانیا چاره‌كرنا كێشێن گه‌لێ كورد ل سووریی و پێشهاتێن نوو بۆ شاندێ مێهڤان دیار كرن.
هه‌ر ئه‌ڤرۆ مه‌سرور بارزانی شیره‌تكارێ جڤاتا ئاسایشا هه‌رێما كوردستانێ د دیداره‌كێ دا ل گه‌ل شاندێ ئێكه‌تیا ئورۆپا، هیڤی خوست كو ده‌لیڤه‌كا باش په‌یدا ببیت بۆ چاره‌یه‌كا بنه‌ره‌تی بۆ پرسێن هه‌لاویستی د ناڤبه‌را هه‌ولێر و به‌غدا دا، د چارچووڤێ دستووری دا و بۆ ڤێ چه‌ندێ ژی هاریكاریا ئێكه‌تیا ئورۆپا ب پێدڤی زانی.
