سه‌رۆكێ حوكمه‌تێ: كاودانان ئه‌م نه راوه‌ستاندین ژ بجهكرنا پرۆژه‌یێن خزمه‌تگۆزاری و دێ به‌رده‌وام بین ژی
ئه‌ڤرۆ نیوز:
ب به‌رهه‌ڤبوونا سه‌رۆكێ حوكمه‌تا هه‌رێما كوردستانێ رێ و ره‌سمێن بكارخستنا ئێسگه‌هێ كاره‌با هه‌لمی یا خه‌بات ل پارێزگه‌ها هه‌ولێرێ هاته سازكرن.
مه‌سرور بارزانی سه‌رۆكێ حوكمه‌تا هه‌رێما كوردستانێ راگه‌هاند ئه‌ڤرۆ به‌رهه‌ڤ بووین بۆ بكار خستنا پرۆژه‌یێ 300 مێگاواتی یێ كاره‌با هه‌لمی ل خه‌بات كۆ ژلایێ وه‌زاره‌تا كاره‌بێ و دو كۆمپانیێن كوریا باشورڤه هاتیه بجهكرن، ئه‌ڤ پرۆژه‌یه پرۆژه‌یه‌كێ ستراتیژیه هه‌روه‌كو مه گوهداریا وه‌زیرێ كاره‌بێ و پارێزگارێ هه‌ولێرێ كری كۆ شیانێن به‌رهه‌م ئینانا 300 مێگاواتێن كاره‌بێ هه‌یه كۆ 10% یا به‌رهه‌مێ كاره‌بێ زێده دكه‌ت، پیرۆزباهیێ ل هه‌وه و ده‌ستخوشیێ ل وه‌زاره‌تا كاره‌بێ و كۆمپانیا كوریا باشوور دكه‌م، هیڤیدارم به‌رده‌وام بین بۆ ئه‌وێ چه‌ندێ پێكڤه ب شیێن كارێن باشتر ئه‌نجام بده‌ین.
سه‌رۆكێ حوكمه‌تا هه‌رێما كوردستانێ ئه‌و چه‌نده ژی راگه‌هاند ئه‌ڤه پرۆژه‌یێ دوێ یه یێ ستراتیژی كۆ ل ئه‌ڤێ هه‌فتیی وه‌ك حوكمه‌ت ده‌ستپێكری بۆ بجهكرنێ و بكار خستنێ، ئه‌ڤه‌ژی ئه‌وێ چه‌ندێ ده‌ر دئێخیت زێده‌باری ره‌وشا نه‌هاریكار یا ئابووری كوردستان كه‌تیێ، نه راوه‌ستاین ژ بجهكرنا ئه‌وان پرۆژه‌یێن خزمه‌تگۆزاری ژ ده‌ستپێكا كابینا حوكمه‌تێ كۆ مه سوزدا بوو، دێ به‌رده‌وام بین ژی.
مه‌سرور بارزانی سه‌رۆكێ حوكمه‌تا هه‌رێما كوردستانێ ئه‌و چه‌نده‌ژی راگه‌هاند راسته ئه‌ڤ ئێسگه‌هه ل خه‌باته به‌لێ به‌رهه‌می وێ بۆ هه‌موو كوردستانێ یه، به‌لێ جهێ دلخوشیی یه د ئه‌ڤان كاودانێن كورونایێ دا نه كۆمپانی و نه حوكمه‌ت ژ بجهكرنا پرۆژه‌ی نه راوه‌ستیان، گرنگیا به‌رهه‌مئینانا كاره‌بێ دزانین چه‌ند پێدڤیه بۆ گه‌هاندنا خزمه‌تگۆزاریان بۆ وه‌لاتیان و پێشخستنا ژێرخانا ئابوورا كوردستانێ له‌ورا ژ ده‌ستپێكێ وه‌ره گرنگییه‌كا زۆر ب به‌رهه‌م ئینانا كاره‌بی هاتیه دان، ئه‌ڤ پرۆژه‌یه ل كابینا به‌رێ ده‌ستبكاركرنێ كر بوو ئه‌ڤێ كابینا نوو ژی درێژه ب ئه‌وی پرۆژه‌یی دا نوكه به‌رهه‌مێ وی هات.
ل سه‌ر گرنگی و پێدڤیا وه‌لاتیان ب كاره‌بێ سه‌رۆكێ حوكمه‌تێ راگه‌هاند دزانین ژێرخانا ئابووری، دروستكرن و به‌رهه‌مئینان و گه‌هاندن و بكارئینانا كاره‌بێ هه‌می دگرنگن پیكڤه گریداینه، له‌ورا مه داخاز ژ وه‌زاره‌تا كاره‌بێ لایه‌نێن په‌یوه‌ندیدار كریه پێداچوونێ د تورا گشتی دا بكه‌ن ژ به‌رهه‌م ئینان و گه‌هاندن و بكارئینانێ، زۆر ئه‌رك دكه‌ڤته سه‌ر ملێن وه‌لاتیان راسته خودان مافن، به‌لێ خودان ئه‌ركن ژی كۆ ئێك ژ ئه‌ركێ وان گرنگی دانه ب كاره‌بێ ب هه‌ده‌ر نه‌ده‌ن، هه‌كه پێگیربوونا وه‌لاتیان ل گه‌ل لایه‌نێن په‌یوه‌ندیدارێن حوكمه‌تێ هه‌بیت، دێ شیێن به‌رهه‌م هه‌بیت و داخازا چاره‌كرنه‌كا نێزیك بۆ هه‌رتمیا پێدانا كاره‌بێ ب وه‌لاتیان بهێته‌دیتن، كوردستان ژ ژماره‌یا بكارئینه‌رێن كاره‌بێ و زێده‌بوونا كارگه‌هان و كۆمپانیان وه‌كریه پێدڤیێن كاره‌بێ زێده بن، به‌ری نوكه مه پێدڤی ب گازوایلێ بوو نوكه بزاڤان دكه‌ین و مفایی ژ غازا سرۆشتی ب بینین و به‌رهه‌مێ غازا سروشتی زێده بكه‌ین تاكو شیانێن هه‌رێما كوردستانێ ژ پێدانا كاره‌بێ هه‌ین، ب شیێن بجهـ بكه‌ت، پشت راستم ل ده‌مه‌كێ زوو دا ئه‌نجامێ ئه‌ڤێ چه‌ندی بده‌ستڤه هێت و وه‌لاتی ژی مفایی ژێ بینین.
