سه‌ربه‌ست مسته‌فا:خوه‌ڤه‌كێشانا هنده‌ك لایه‌نان چو كاریگه‌ریێ ل سه‌ر ئه‌نجامدانا هه‌لبژارتنان ناكه‌ت
ئه‌ڤرۆ:
سه‌رۆكێ به‌رێ یێ كۆمسیۆنا بلند یا سه‌ربخوه یا هه‌لبژارتنان ل ئیراقێ دیاركر، كۆمسیۆنا هه‌لبژارتنان دێ به‌رهه‌ڤێ بۆ ئه‌نجامدانا هه‌لبژارتنان یێن كرین و خوه‌ڤه‌كێشانا هنده‌ك لایه‌نان ژی چو كاریگه‌ریێ ل سه‌ر ئه‌نجامدانا هه‌لبژارتنان ناكه‌ت. دیاركر ژی پاشخستنا هه‌لبژارتنان ب دو رێیان دبیت، ئه‌وژی كۆمسیۆنا هه‌لبژارتنان بریارێ ل سه‌ر بده‌ت، یان ژی ب بریاره‌كا سیاسی بهێنه پاشخستن، ئه‌گه‌ر نه هه‌لبژارتن ناهێنه پاشخستن.
سه‌ربه‌ست مسته‌فا، سه‌رۆكێ به‌رێ یێ كۆمسیۆنا بلند یا سه‌ربخوه یا هه‌لبژارتنان ل ئیراقێ گۆت” ئه‌وێن خوه ژ هه‌لبژارتنان ڤه‌دكێشن، ب رێیا راگه‌هاندنێ به‌حسێ وێ چه‌ندێ دكه‌ن، نه‌كو ب فه‌رمی و ب رێیا كۆمسیۆنا هه‌لبژارتنان، كو هیچ كاریگه‌ریه‌ك نابیت، چونكی به‌ربژارێن وان ل كۆمسیۆنێ خوه نه‌ڤه‌كێشایه و كۆمسیۆنێ ژی ناڤێن هه‌موو به‌ربژاران یێن راگه‌هاندین، له‌وما ئه‌و دێ مینیت ل ده‌مێ ده‌نگدانێ كو داخوازێ ژ خه‌لكێ خوه بكه‌ن نه‌چنه سه‌ر سندوقێن ده‌نگدانێ، پشتی هه‌لبژارتنان هه‌كه ئێكی سه‌ركه‌فتن ب ده‌ستڤه‌ئینا، مافێ وی بچیته جڤاتا نوونه‌ران، له‌وما هه‌كه هه‌لبژارتن بهێنه پاشخستن، پێدڤیه بریاره‌كا سیاسی بۆ بهێته دان، به‌لێ لایه‌نێن مه‌زن هه‌تا نوكه ل گه‌ل ئه‌نجامدانا هه‌لبژارتنانه، له‌وما وێ خوه‌ڤه‌كێشانێ هیچ كاریگه‌ریه‌ك نابیت”.
سه‌ربه‌ستی به‌حس ل وێ چه‌ندێ ژی كر” دبیت هه‌كه ده‌نگده‌رێن لایه‌نان پشكداریێ نه‌كه‌ن، وی ده‌می دێ كاریگه‌ری ل سه‌ر رێژا پشكداریا ده‌نگده‌ران هه‌بیت، ئه‌گه‌ر نه كۆمسیۆنا هه‌لبژارتنان ناڤێن هه‌موو به‌ربژاران یێن دیزاینكرین و بۆ چاپكرنێ یێن هنارتین، له‌وما ب زه‌حمه‌ته هه‌لبژارتن بهێنه پاشخستن”.
زێده‌تر رۆهنكر” ب دو رێیان دشیاندایه هه‌لبژارتنێن جڤاتا نوونه‌ران بهێنه پاشخستن، یا ئێكێ كۆمسیۆن به‌حس ل وێ چه‌ندێ بكه تكو نه‌شێت هه‌لبژارتنان ئه‌نجام بده‌ت، یان ژی بریاره‌كا سیاسی بهێته دان و هه‌لبژارتن بهێنه پاشخستن، ئه‌گه‌ر نه كۆمسیۆنێ هه‌موو كارێن خوه یێن تمامكرین و وێ خوه‌ڤه‌كێشانێ هیچ كاریگه‌ری نابیت”.
