نەبوونا سەنتەرێن ئۆتیزمێ بارێ خێزانێن ئامێدیێ گرانكریە
مەحمود نهێلی:
خێزانێن خودانێن پێدڤیێن تایبەت
و نەخۆشێن ئوتیزمێ دناڤ دا هەین، گازندا ژ نەبوونا بنگەهێن تایبەت ب نەخوەشیێن ئوتیزمێ دكەن و رێڤەبەرێ چاڤدێری و خێزانی ل ئامێدیێ ژی تەكەز دكەت كو وان بزاڤێن زۆر كرینە بۆ ڤەكرنا بنگەهەكی و رازیبوونێن دەسپێكی ژی یێن هەین.
رێڤەبەرێ چاڤدێری و گەشەپێدنا خێزانی ل ئامێدیێ بۆ رۆژناما ئەڤرۆ دیاركر، چەندین سالە رازیبون هاتیەكرن ل سەر ڤەكرنا سەنتەرەكی تایبەت ب نەخۆشێن ئوتێزمێ ل دەڤەرێ لێ ژبەر قەیرانا ئابووری یا هەرێم تێدا دەرباز بوویی ئەڤ یەكە نەهاتیە ئەنجامدان و گۆت: نەبوونا چ سەنتەرێن تایبەت بۆ نەخۆشێن ئوتێزمێ ل دەڤەرداریا ئامێدیێ ، دبیتە بارگرانیەك بۆ خێزانێن ئەڤ كەسە دناڤ دا هەی كو رۆژانە یان حەفتیانە سەرا ڤان بنگەهان ب دەن ل دهوكێ.
مافپەروەر كارگەر عەبدوللا، رێڤەبەرێ چاڤدێری و گەشەپێدنا خێزانی ل ئامێدیێ بۆ رۆژناما ئەڤرۆ دیاركر، زێدەباری هەژمارەكا زۆرا نەخوشێن ئوتێزمێ زكماكی و یێن لەشی نە، لێ هندەك ژ وانا ژی یێن دەرونی نە و پێدڤی ب چارەسەریێ هەنە، ژ بەر وێ یەكی ژی سەنتەرەكی تایبەت ب ڤی نەخوەشیێ كارەكی فەرە، ژبەر كو هەموو خێزانێن خودان پێدڤیێن تایبەت نەشێن سەرەدانا سەنتەرێ پارێزگەهێ بكەن.
ناڤهاتی ئاشكرا كر، كو ئەردێ پێدڤی ژی بۆ چێكرنا ڤی سەنتەری هاتیە تەرخانكرن و تارادەیەكی كادر ژی بۆ هاتیە دابینكرن، لێ ژ بەر رەوشا ئابوری و ئەو پرۆژە تا نوكە نەهاتیە بجهئینان.
ناڤهاتی ئاشكرا كر، تا نوكە پتر ژ 100 كەسێن توش بووی ب ڤێ نەخوەشیێ ل دەڤ وان هاتینە توماركرن، لێ ژ بەر ئەگەرێن جڤاكی و نەبوونا چ سەنتەرێن تایبەت و نەبوونا باوەریێ و شارەزایێ ل سەر ڤێ نەخۆشیێ گەلەك خێزانان ناڤێن نەخۆشێن خوە تومار نەكرینە.
