ڤیان سەبری: پرۆژە قانوونا بودجەیا ئیراقێ د قۆناغا دووماهیێ دایە
ئەڤرۆ
سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ، دووپاتی ل وێ چەندێ كر كو پرۆژە قانوونا بودجەیا گشتی یا ئیراقێ د قۆناغا دووماهیێ دایە و و ل دەمەكێ نێزیك دێ هێتە پەسەندكرن, هەڤدەم هنارتنا مووچەیێ مووچەخۆرێن هەرێما كوردستانێ ژ ئالیێ حوكمەتا ئیراقێ ڤە دووپاتكر.
ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ گوت» پێشبینی دهێتە كرن ل دووماهیا ڤێ مەهێ بودجەیا گشتی یا ئیراقێ ژ ئالیێ جڤاتا نوونەران ڤە بهێتە پەسەندكرن و هیچ كێشەیەك بۆ پشكا بودجەیا هەرێما كوردستانێ دروست نەبوویە».
هەروەسا گوت ژی» ئالیێن كوردی ل لژنەیا دارایی یا جڤاتا نوونەرێن ئیراقێ ئێك دەنگن و هەتا نوكە پرۆسە گەلەك ب باشی یا بڕێڤە دچیت».
سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ باس ل وێ چەندێ ژی كر كو» هەتا نوكە فراكسیۆنێن كوردی ئێك دەنگن، هەكە برگەیەك هەبیت و ب دلێ وان نەبیت، پێدڤیە ب هەمان شێوە ب ئێك دەنگی بڕیارێ ل سەر بدەت و دەرباز بكەن».
سەبارەت مادەیا 12, ژ پشكا بودجەیا هەرێما كوردستانێ، ڤیان سەبری گوت» ئەو مادەیە ب شێوازەكێ گشتی دەستنیشانكرنا پشكا هەرێما كوردستانێ یە د پرۆژە قانوونا بودجەی دا».
خویاكر ژی» مادەیا 12 ژ دو برگەیان پێك دهێت، وەكو كورد مە پێشنیاز كریە ب شێوازەكێ دی بهێتە داڕێشتن، كو ب دلێ وەلاتیێن هەرێما كوردستانێ بیت».
ڤیان سەبری باس ل وێ چەندێ ژی كر» ل گەل حوكمەتا ئیراقا فیدرال ل سەر هنارتنا پەترۆلێ گەهشتینە ڕێككەقتنێ و تنێ هندەك كێشەیێن تەكنیكی د ناڤبەرا ئیراقێ و توركیا دا ماینە، پێدڤیە ئیراق زوو چارەسەر بكەت ل گەل توركیا».
ئاماژەكر» هنارتنا مووچەیێ مووچەخۆرێن هەرێما كوردستانێ ل ستوویێ حوكمەتا فیدرالی دایە ژ ئەگەرێ درەنگ پەسەندكرنا بودجەی و دووبارە هنارتنا پەترۆلێ».
ڤیان سەبری ئەوژی ڕاگەهاند» دەستوور وەكو هەرێما كوردستانێ مامەلە ل گەل هەرێمێ دكەتنەكو وەكو پارێزگە لەوما پێدڤیە ئەڤ چەندە ژی د بودجەی و قانوونان دا رەنگڤەدەت».
سەبارەت ب پارێزگەهبوونا هەلەبجە، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ ڕۆهنكر» ئەندامێن جڤاتا نوونەرێن ئیراقێ دژی ب پارێزگەهبوونا هەلەبە نینن، بەلێ پێدڤیە دەنگێ دووماهیێ ل سەر بهێتە دان كو هەلەبجە ببیتە پارێزگەها 19 ل ئیراقێ».
