سەرۆك بارزانی د سالڤەگەرا 47 ێ یا شۆڕەشا گۆلانێ دا: هیڤیدارم ئالیێن سیاسی ب گیانەكێ نیشتمانپەروەرانە و برایانە گرفتان چارەسەر بكەن
سەرۆك مەسعود بارزانی، ب هەلكەفتا سالڤەگەرا 47 یا دەستپێكرنا شۆڕەشا گۆلانێ پەیامەك بەلاڤكر و سەرەرای پیرۆزباهیێ، ڕۆناهی ئێخستە سەر ناكۆكیێن سیاسی ل هەرێما كوردستانێ و ڕاگەهاند» د ڤێ هەلكەفتا پیرۆز دا دووپاتیێ ل وێ چەندێ دكەم كو بەرژەوەندیا كوردستانێ ل سەر هەموو بەرژەوەندیەكا دی یە و هیڤیدارم ئالیێن سیاسی بشێن ناكۆكیێن سیاسی دەرباز بكەن و هەموو ب گیانەكێ نیشتمانپەروەرانە و برایانە گرفتان چارەسەر بكەن».
سەرۆك بارزانی گوت ژی» پیرۆزباهیێ ل گەلێ كوردستانێ و هەموو وان قەهرەمان و پێشمەرگە و خەباتكاران دكەم كو ڕۆل د شۆڕەشا گۆلانێ دا هەبوو. پێزانینێن من بۆ فیداكاری و خۆڕاگریا گەلێ كوردستانێ هەیە كو د قۆناغەكا هەستیار دا پشتەڤانێ شۆڕەشا گولانێ و پێشمەرگەی بوو».
سەرۆك بارزانی باس ل وێ چەندێ كر» ساخكرنا ڤێ هەلكەفتێ ل دەڤەرا بالەكایەتی ڕامانا تایبەت یا خوە هەیە، دەڤەرا بالەكایەتی دەڤەرەكا خودان شەهیدە كو ژ پێخەمەت شۆڕەشێ قوربانیەكا مەزن دایە، بەردەوام ل بن فشارا شەڕی و تۆپبارانكرنا دوژمنی بوو و ب هزاران پێشمەرگە و ئاوارە حەواندینە و كەلهە و سەنگەرێ سەركردایەتیا شۆڕەشێ بوو. هەروەسا دەڤەرا بالەكایەتی د شۆڕەشا گۆلانێ دا ژی خالا دەستپێكا شۆڕەش و قوربانیدانا گەلێ كوردستانێ بوو. ئێكەمین شەهیدێ شۆڕەشا گۆلانێ ژی، شەهید سەید عەبدوللا بوو كو ڕۆلێ وێ دەڤەرا سەربلندا كوردستانێ یە. ئەم ب هەموو شێوەیەكی قەردارێن خەلكێ خەباتكەرێ دەڤەرا بالەكایەتی نە».
سەرۆك بارزانی دیاركر كو شۆڕەشا گۆلانێ قۆناغەكا هەرە گرنگ یا بزاڤا ڕزگاریخوازا كوردستانێ یە و هەلگرا وێ پەیامێ بوو كو» سەرەرای هەبوونا پێلانگیریێ و گەف و ب هێزبوونا و ئاستەنگێن مەزن، بەلێ ئیرادەیا بەردەوامیێ و شۆڕەشێ د ناخێ مرۆڤێ كوردستانی دا هەر یا زیندی یە. شۆڕەشا گۆلانێ، تەحەداكرنا هەموو وان دیكتاتۆر و ستەمكار و دوژمنان بوو كو وەسا دانابوو، ب نسكۆیا شۆڕەشا ئەیلوولێ ئێدی هەتا هەتایێ دێ دووماهی ب شۆڕەش و بەرخودانا گەلێ كوردستانێ هێت، بەلێ شۆڕەشا گۆلانێ ئەو خەونا نەحەزان ژناڤبر و گەلێ كوردستانێ د خەباتا خوە دا بەردەوام بوو و سەرشۆری و شكەستن بۆ دوژمنان بوو».
