سەرۆكێ هەرێمێ و سەرۆكێ حوكمەتا هەرێمێ پیرۆزباهیێ ل ڕۆژا زمان و كەلتوورێ توركمانی دكەن
ب هەلكەفتا ڕۆژا زمان و كەلتوورێ توركمانی، سەرۆكێ هەرێما كوردستانێ، نێچیرڤان بارزانی و سەرۆكێ حوكمەتا هەرێما كوردستانێ، مەسرور بارزانی دو پەیامێن پیرۆزباهیێ بەلاڤكرن.
نێچیرڤان بارزانی، سەرۆكێ هەرێما كوردستانێ د پەیاما خوە دا دبێژیت» ڕۆژا زمان و كەلتوورێ توركمانی ل هەموو خووشك و برایێن توركمان ل هەرێما كوردستانێ پیرۆز دكەم، هەموو پشتەڤانیەكێ ل مافێن پێكهاتەیێ توركمان و هەموو پێكهاتەیێن نەتەوەیی و ئایینی یێن كوردستانێ دوپات دكەین و هەموویان پشتڕاست دكەین كو هەرێما كوردستانێ دێ هەردەم ب وەلاتێ پێكڤەژیانێ بۆ هەموویان مینیت».
ژ ئالیێ خوەڤە مەسرور بارزانی، سەرۆكێ حوكمەتا هەرێما كوردستانێ گوت « ڕۆژا زمان و كەلتوورێ توركمانی پیرۆز بیت، و ب ڤێ هەلكەفتێ پێگیریا حوكمەتا هەرێمێ ب پاراستنا مافێن هەموو پێكهاتەیان و پێشڤەبرنا كەلتوورێ پێكڤە ژیانا ئاشتیانە د ناڤبەرا پێكهاتەیێن كوردستانێ دوپات دكەین».
د ڕوونشتنا پەرلەمانێ كوردستان ل 25/12/2019 ڕۆژا 25/2 وەكو ڕۆژا ڕۆژنامەگەریا توركمانی و ڕۆژا 17/11 وەكو ڕۆژا فەرمی یا زمان و كەلتوورێ توركمانی هاتە دیاركرن و ب پتریا دەنگان هاتە پەسەندكرن.
