پێدڤییە زانكۆیێن مە بناغەیێ هاریكارییا هەڤپشك ل گەل زانكۆ و ناڤەندێن زانستی یێن پێشكەفتی ل دەرڤە دانن
دوهی شەمبیێ 7/9/2024، مەسرور بارزانی، سەرۆكێ حوكمەتا هەرێما كوردستانێ، بەرێ بنیاتێ زانكۆیا نێڤدەولەتییا بریتانی ل هەولێرێ دانا و پاشی ب شێوەیەكێ فەرمی ئەو زانكۆیە ڤەكر.
سەرۆكێ حوكمەتا هەرێما كوردستانێد پەیڤەكێ دا د رێورەسمێن ڤەكرنا ئەوێ زانكۆیێدا گۆت » ڤەكرنا ئەڤێ زانكۆیێ، ڤەكرنا دەرگەهێ ئەزموونێن مەزن و شێوازێ خواندنا زانكۆیێن بریتانییە بۆ هەرێما كوردستانێ».
ڤەكرنا زانكۆیا نێڤدەولەتییا بریتانی ل هەولێرێ، وەكو سەرۆكێ حوكمەتا هەرێما كوردستانێ باس كری» دێ كاریگەرییەكا بەرچاڤ د پێشئێخستنا ئاستێ خواندنا بلند ل هەرێما كوردستانێ كەت و د هەمان دەمدا دەلیڤەیەكا گونجایتر دێ پەیداكەت بۆ پێشكەفتن و بەفرەهبوونا پەیوەندیێن هەرێما كوردستانێ و بریتانیا د بوارێن كەلتووری، زانستی و ئابووری».
مەسرور بارزانی د پەیڤا خوە دا ئاماژەكر» وەلاتێ مە ژ روویێ ژێدەرێن مرۆڤی یێ زەنگینە و مە جڤاكەكێ گەنج یێ هەی، لەوما دڤێن وەبەرئێنانێ ل سەر گەنجێن خوە بكەین و پێبگەهینین تاكو كارامەتر د ئاڤاكرنا داهاتییەكێ گەشتر ل وەلاتێ مە پشكدار بن».
سەرۆكێ حوكمەتا هەرێمێ رۆهنكر ژی» ئێك ژ رێكێن وەبەرئێنانێ ل سەر گەنجان و شیانێن وان، پێگەهاندنا وانە، ژ روویێ زانستی و ئەكادیمی، لەوما ب ڤەكرنا هەر زانكۆیەكا ئاست بلند، هیڤی و ئومێدا مە بۆ پاشەڕۆژەكا گەشتر زێدەتر دبیت».
مەسرور بارزانی ئاماژەكر» زانكۆیا نێڤدەولەتییا بریتانی ل هەولێرێ دێ كاریگەری و جهێ دەستێ وێ د بوارێن پێگەهاندنا پسپۆر و شارەزایێن كارامەدا دیار بیت. دەرچوویێن ئەڤێ زانكۆیێ، دێ رۆل و پێگەهێ خوە د پڕۆسەیا ئاڤەدانكرن و پێشئێخستنا وەلاتیدا هەبیت».
سەرۆكێ حوكمەتا هەرێما كوردستانێ ل دۆر ڤەكۆلینێن زانستی خویاكر» دێ گاریكەرییا مەزن هەبیت بۆ بەرچاڤرۆهنییا مە د دانانا پلان و بەرنامەیێن مە دا بۆ پاشەڕۆژێ».
مەسرور بارزانی باس ل ئەوێ چەندێ ژی كر كو ژ دەمێ بوویە سەرۆكێ كابینەیا نەهێ یا حوكمەتا هەرێما كوردستانێ « من هەست ب كێماسیێ كریە، د گەلەك بوارێن ڤەكۆلین و پێزانین و داتایێن هوور ل بەردەست نینن، لەوما ژ نوكە و پێڤە پێدڤییە زانكۆیێن مە هاریكار بن و بناغەیێ هاریكارییا هەڤپشك ل گەل زانكۆ و ناڤەندێن زانستی یێن پێشكەفتی یێن ژ دەرڤە دانن، تاكو د بوارێن پێدڤی یێن جودا جودا دا وەكو چاندن، پیشەسازی، ئابووری، ئاڤ، ژینگەه و سەقای ڤەكۆلینێن هەڤپشك بكەن. زانكۆیێن بریتانیا ژی ژ ئەڤی ئالی ڤە ئەزموونەكا گەلەك باش یا هەی و ئەڤ زانكۆیە ژی دێ شێت پڕەكا باشتر بیت بۆ پێشئێخستنا ئەڤێ بواری».
سەرۆكێ حوكمەتا هەرێما كوردستانێ بەری زانكۆیا نێڤدەولەتییا بریتانی ل هەولێرێ ڤەكەت. بەرێ بنیاتی پۆندەكی ل سنوورێ زانكۆیێ دانا. ژ بلی ئەڤێ چەندێ رووبەرەكێ بەرفرهە یێ زانكۆیێ بۆ كەسكاتیێ هاتیە تەرخانكرن و مفای ژ وزەیا نوو هاتیە وەرگرتن».
مەسرور بارزانی گۆت » ئەڤ پێنگاڤە جهێ دلخوەشیێ نە و نیشانا ئەوێ چەندێیە رێڤەبەرێن ئەڤێ زانكۆیێ د خەما ژینگەهێ دانە و ل دووڤ شیان و بەرپرسیارەتییا خوە، كار بۆ روو ب رووبوونا كاریگەرییێن نەرینی یێن گوهۆڕینا سەقای دكەن».
سەرۆكێ حوكمەتا هەرێمێ هیڤی خواست، زانكۆیێن هەرێما كوردستانێ رۆلێ خوە د دیتنا چارەسەرییان بۆ ئاستەنگێن ژینگەهێ بگێرن و گۆت » هیڤیدارم قوتابیێن مە یین ئەزیز ل ئەڤێ زانكۆیێ و هەموو زانكۆیێن دی، هەردەم مفای ژ ئەوان دەلیڤەیان وەربگرن، كو ئەڤ زانكۆیە بۆ وان پەیدا دكەت بۆ ئەوێ چەندێ ب رێكا زانستی و فێربوونێ شیانێن خوە بلند بكەن، تاكو بشێن كاریگەرتر خزمەتا كوردستانێ و وەلاتێ خوە بكەت و نموونەیەكا گەش و بلند یا پاشەڕۆژا گەلێ مە بن».
