پارێزگارێ دهۆكێ دوپاتیێ ل خورتكرنا پەیوەندیان ل گەل كۆمارا ئیسلامی یا ئیرانێ دكەت
سیاسەتمەدارێن کورد سوپاسیا هەلوەستێ سەرۆک بارزانی ل دۆر رۆژئاڤایێ کوردستانێ دکەن و داخواز ژ هەر دو جڤاتێن کوردی یێن رۆژئاڤایێ کوردستانێ دکەن پرسێن هەی د ناڤبەرا خوە دا چارەسەر بکەن دا دەلیڤەیا دیرۆکی ژ دەستێ کوردان نەچیت.
سینان چیفتیورەک ئەندامێ پەرلەمانێ تورکیا سەر ب فراکسیۆنا دەم پارتی دیار کر، سەرەدانا نوونەرێ سەرۆک بارزانی بۆ رۆژئاڤایێ کوردستانێ پێنگاڤەکا دیرۆکی یە، بەری نها ژی سەرۆک بارزانی گەلەک بزاڤ کرن دا کورد ل رۆژئاڤایێ کوردستانێ پرسێن هەی د ناڤبەرا خوە دا چارەسەر بکەن و نها ژی سەرۆک بارزانی دەست ب بزاڤەکا مەزن یا کری و گۆت: (هەر کەس دزانیت دڤێت کورد ل رۆژئاڤایێ کوردستانێ پرسێن هەی د ناڤبەرا خوە دا چارەسەر بکەن، ب تایبەتی ژی گرنگە هەر دو جڤاتێن کوردی یێن رۆژئاڤایێ کوردستانێ پشتی سەرەدانا نوونەرێ سەرۆک بارزانی دەست ب قۆناغەکا نوو بکەن، ئەو یەک ژ بۆ پاشەرۆژا کوردان ل سووریێ گەلەک گرنگە و دڤێت هێزێن سیاسی یێن کورد ل رۆژئاڤایێ کوردستانێ دەلیڤەیا دیرۆکی کو نها بدەستڤە هاتیە ژ دەست نەدەن).
ل ئالیێ فەیسەل یوسف پەیڤدارێ ئەنجوومەنێ نشتیمانی یێ کوردی ل سورویێ ژی دیار کر، سەرەدانا نوونەرێ سەرۆک بارزانی بۆ رۆژئاڤایێ کوردستانێ دەستپێکەکا نوو یە و دێ بیتە ئەگەرێ چارەسەرکرنا پرسێن هەی ل رۆژئاڤایێ کوردستانێ و گۆت: (کۆمبوونا مە وەکو ئەنجوومەنێ نشتیمانی یێ کوردی ل گەل نوونەرێ جەنابێ سەرۆک بارزانی گەلەک باش دەرباز بوو، وەکو ئەنجوومەنێ نشتیمانی یێ کوردی ل سووریێ ئەم جارەکا دی دوپات دکەین کو بەرژەوەندیێن نشتیمانی یێن گەلێ کورد ل سووریێ ژ بۆ مە بەری هەر تشتەکێ نە و ئەم بەرهەڤین هەموو پرسێن هەی ب رێیا دانوستاندنان چارەسەر بکەین).
هەر سەبارەت ب سەرەدانا نوونەرێ سەرۆک بارزانی بۆ رۆژئاڤایێ کوردستانێ و دیدارێن وی ل گەل مەزلوم عەبدی فەرماندارێ گشتی یێ هێزێن سووریا دیموکرات و ئەنجوومەنێ نشتیمانی یێ کوردی ل سووریێ، ئیلهام ئەحمەد بەرپرسا پەیوەندیێن دەرڤە یا رێڤەبەریا خوەسەر ل لەندەن بۆ دەزگەهێن راگەهاندنێ دیار کر، سەرەدانا نوونەرێ سەرۆک بارزانی بۆ رۆژئاڤایێ کوردستانێ و ئەو کۆمبوونێن هاتنە کرن گەلەک گرنگن و گۆت: (ئەم نها د قۆناغەکا نوو داینە و بێگومان قۆناغا نها بۆ کوردێن سووریێ گەلەک گرنگە، سەرەدانا نوونەرێ سەرۆک بارزانی و پشتەڤانیا سەرۆک بارزانی یا بۆ ئێکەتیا هێزێن کوردی ل رۆژئاڤایێ کوردستانێ گەلەک گرنگە و ئەم دێ د دەمەکێ نێزیک دا مزگینیەکا خوەش ل دۆر ئێکەتیا هێزێن کوردی دەینە گەلێ خوە).
سەبارەت ب پاشەرۆژا سووریێ ژی ئیلهام ئەحمەد دیار کر، کوردان دڤێت سیستەمێ نوو یێ سووریێ فیدرالی بیت، نابیت سیستەمێ سووریێ جارەکا دی ببیتە ناڤەندی، دڤێت کورد و هەموو پێکهاتەیێن دی یێن ل سووریێ بگەهنە مافێن خوە، پڕانیا وەلاتێن جیهانێ ژی پشتەڤانیێ ل سیستەمەکێ فیدرالی بۆ سووریێ دکەن.
