باسكێ سەدری: پشكدارییێ د وێ حوكمەتەكێ دا ناكەین یا کو چارچۆڤەیێ هەماهەنگیێ تێدا بیت
باسكێ نیشتمانیێ شیعی (باسكێ سەدری یێ بەری) ب سەرۆكایەتییا موقتەدا سەدر، بەرسڤا داخۆیانیێن نوری مالكی، سەرۆكێ هەڤپەیمانییا دەولەتا قانوونی دا كو تێدا راگەهاندبوو چارچۆڤەیێ هەماهەنگیێ دێ د حوكمەتا داهاتییا ئیراقێدا دا بەردەوام بیت هەكە هات وباسكی سەدری ژی دناڤدا بیت.
باسكێ نیشتمانیێ شیعی ( باسكێ سەدری یێ بەرێ ) د بەرسڤا مالكی دا دیاركر كو زڤرینا باسكێ نیشتمانیێ شیعی بۆ مەیدانا سیاسی د قۆناغا بهێت دا، رامانا وێ ئەو نینە كو دێ هەڤپشكێ ئالیێن چارچۆڤەیێ هەماهەنگیێ بیت د حوكمەتا داهاتیدا یان ژی ببیتە هەڤپیمانێ وێ پشتی هەلبژارتنێن ئۆكتۆبەرا 2025 یێن جڤاتا نوونەرێن ئیراقێ».
سەركردەیەكێ باسكێ نیشتمانیێ شیعی دیاركر كو هەلوەستێ سەدرییان یێ خوەجهە ئەوژی رەتكرنا هەر جۆرە هەڤپەیمانییەكێ یە ل گەل ئالیێن چارچۆڤەیێ هەماهەنگیێ، بەلێ دبیت هندەك ئالیێن چارچۆڤەیێ هەماهەنگیێ پشكەك بن ژ پڕۆژیێ سەدری یێ پێكئینانا حوكمەتەكا زۆرینەیا نیشتمانی، بەلێ یا بەرئاقل نینە ئەم پشكەك بین ژ هەر حوكمەتەكێ كو چارچۆڤەیێ هەماهەنگیێ پێكهێنەرێن وێ یێ سەرەكی بیت».
ئەڤ داخۆیانییا سەركردەیەكێ سەدری د دەمەكیدا دهێت كو ژێدەرێن سیاسی ئاماژێ دكەن كو پترییا ئالیێن سیاسی ژ پێكهاتەیێن جودا نوونەرێن خوە بۆ باژێرێ نەجەفێ هنارتینە بۆ زانینا هەلوەستێ موقتەدا سەدر، سەرۆكێ باسكێ نیشتمانیێ شیعی، ژ پشكداریێ یان نە پشكداریێ د هەلبژارتنێن داهاتی یێن جڤاتا نوونەرێن ئیراقێدا.
موقتەدا سەدر ل خزیرانا 2022 داخواز ژ هەموو پەرلەمانتارێن باسكێ خوە د جڤاتا نوونەرێن ئیراقێدا كو هەژمارا 73 پەرلەمانتار بوون دەست ژ كارێ پەرلەمانتاریێ بكێشن و بڕیارا خوەڤەكێشانێ ژ پڕۆسەیا سیاسی ل ئیراقێ و نە پشكداریكرنێ د هەر هەلبژارتنەكا داهاتیدا كر تاكو هەڤپشك نەبیت ل گەل سیاسەتمەدارێن گەندەل ل دووڤ گۆتنا وی.
