فازل میرانی: بەرسڤێن ئەرێنی بۆ دەستپێشخەرییا سەرۆك بارزانی هاتینە و دڤێت ململانێ ب دووماهی بهێن
فازل میرانی، بەرپرسێ دەستەیا كارگێڕییا مەكتەبا سیاسییا پارتی دیموكراتی كوردستانێ، د داخۆیانییەكێ دا ئاشكرا كر، كو پشكەك ژ ئالیێن سیاسی یێن هەرێما كوردستانێ، بەرسڤا ئەرێنی بۆ دەستپێشخەرییا سەرۆك بارزانی هەبوویە.
ل رۆژا 26 گولانا 2026ێ، ب هەلكەفتا جەژنا قوربانی، سەرۆك بارزانی داخواز ژ ئالیێن سیاسی یێن كوردستانێ كر، كو بەرژەوەندیێن خەلكێ كوردستانێ بكەنە پێش هەر تشتەكێ دی، و دەست ژ ململانێیێن بێ ئەنجام و خۆخۆریێ بینن، كو دەمەكە پڕۆسەیا سیاسی یا هەرێمێ پەكخستییە، و پشتی جەژنێ ل گەل هەڤدو كۆم ببن.
فازڵ میرانی د داخۆیانییەكا رۆژنامەڤانی دا گۆت: «هندەك ئالییان بەرسڤا ئەرێنی دایە دەستپێشخەرییا سەرۆك بارزانی، ئەم هیڤیداریین هەموو ئالی بەرژەوەندیێن نیشتمانی بكەنە پێشییا بەرژەوەندیێن كەسی، چونكو بتنێ ب ڤی شێوەی ئەم دشێین دوماهیێ ب كێشەیێن پەككەفتی بینین».
میرانی دوپاتی ل سەر بەرپرسیارییا هێزێن سیاسی ل هەمبەر گەلێ كوردستانێ كر و دیار كر، كو ئەركێ وانە قەرەبوویا چاكییا ڤی گەلێ دلسۆز بكەن و ئاسایش و ئارامیێ بۆ وان دابین بكەن، د هەمان دەم دا هیڤییا ئاشتی و پاراستنا وەلاتی خواست.
ئەڤ پەیاما فازل میرانی د دەمەكێ دایە، كو پتر ژ سالەك و حەفت مەهان ب سەر هەلبژارتنێن خولا شەشێ یا پەرلەمانێ كوردستانێ دا دەرباز بووینە، لێ هەتا نها هەرێم د چاڤەڕێیا رێككەفتنا دووماهیێ د ناڤبەرا هێزێن سەرەكی دایە.
