ڕ ێبەر ئەحمەد: داعش ب دووماهی نەهاتییە و گەفێن وێ یێن ماین
وەزیرێ ناڤخوە یێ حوكمەتا هەرێما كوردستانێ ڕاگەهاند، بڕیاریا ڤەكێشانا هێزێن هەڤپەیمانان ژ ئیراقێ پتر یا سیاسییە نەك ئەمنی، و دوپاتی ل سەر وێ چەندێ كر كو هێشتا مەترسییا ڤەگەڕیانا داعشێ مایە و چەند گەفێن دی یێن وەك مادەیێن بێهۆشكەر بەرۆكێ وەلاتی گرتییە.
ڕێبەر ئەحمەد، وەزیرێ ناڤخوە یێ حوكمەتا هەرێما كوردستانێ، د پانێلەكا دیدارا «مێری» دا ل باژێڕێ هەولێرێ، ڕۆناهی ئێخستە سەر پرسا ڤەكێشانا هێزێن هەڤپەیمانان ب سەرۆكاتییا ئەمریكا و چەند پرسێن دی یێن گرنگ یێن گرێدای ب ئاسایشا ناڤخوەیی و دەڤەرێ.
وەزیرێ ناڤخوە ئاماژە ب وێ دا، سەدەمێ هاتنا هێزێن هەڤپەیمانان بۆ ئیراقێ ل سالا 2014 دزڤڕیتەڤە بۆ پێدڤی و داخوازەكا فەرمی یا حوكمەتا فیدرالی ژ جڤاكا نێڤدەولەتی. ئەو چەندە بەرچاڤكر، پشتی ڤەكێشانا هێزێن ئەمریكی ل سالا 2011، ئیراق بۆ ڕووبڕووبوونا گەفێن داعشێ پێدڤی ب پشتەڤانیێ هەبوو، ل سەر وی بنیاتی هەڤپەیمانییەكا نێڤدەولەتی ب سەركرداتییا ئەمریكا و پشكدارییا چەند وەلاتێن ئۆرۆپایێ هاتە پێكهینان داكو پشتەڤانییا پێدڤی، ئەسمانی و هەوالگریێ پێشكێشی دەزگەهێن ئەمنی بكەن.
ڕێبەر ئەحمەد سوپاسییا ڕۆلێ هێزێن هەڤپەیمانان كر ل سەر ئاستێ جڤاكی، دیزگەهێن حكومی و دەزگەهێن ئەمنی و لەشكەری، وگۆت: «وان ئەزموونەكا بلند پێشكێشی ئیراقێ كر و پشكداری د بەڕەڤانیكرن ژ وەلاتی دا كر».
باسی وێ چەندێ كر، ب هەڤكارییا هەڤپەیمانان و ب تایبەت پشتەڤانییا وان یا ئەسمانی، هێزێن پێشمەرگەی و لەشكەرێ ئیراقێ شیان داعشێ بشكێنن ، هەكە ئەو پشتەڤانییا ئەسمانی نەبایە، ڕەوش ب ڤی شێوەیێ ئەڤرۆ نەدبوو.
ڕێبەر ئەحمەد ڕەتكر كو مەترسیێن داعشێ ب دووماهی هاتبن و گۆت: «داعشا ئەڤرۆ ژ یا بەری سالا 2014بهێزترە و گەف هێشتا مەترسیدارە».
دیاركر ژی كو بیروباوەرێن توندڕەوی هێشتا ل ئیراقێ ماینە و دەلیڤە بۆ ڤەگەڕیانا داعشێ یا گونجایە هەكە حوكمەت خزمەتگوزارییان باشتر نەكەت و ڕێزێ ل جوداهییا پێكهاتەیان نەگریت. دوپاتی ژی ل سەر وێ چەندێ كر، ئەڤ ڤەكێشانە بەرپرسیارەتییەكا مەزن دئێخیتە سەر ملێن ئیراقێ.
ل دۆر بزاڤێن بۆ دەركرنا وان هێزان، ڕێبەر ئەحمەد ڕاگەهاند، چوونە دەرڤە یان ڤەكێشانا هێزێن هەڤپەیمانان ل سەر داخوازا ئیراقێ، پتر بڕیارەكا سیاسییە نەك ئەمنی. پرسیارا وێ چەندێ ژی كر، ئەرێ دەزگەهێن لەشكەری و ئەمنی یێن ئیراقێ بەرهەڤن بۆ ڕووبڕووبوونا ئاستەنگان؟ د بەرسڤێ ڕۆهنكر، هەرچەندە ڕەوشا جودایە ژ سالا 2014، لێ بێگومان هێشتا دەزگەهێن ئەمنی و لەشكەری پێدڤی ب وێ پشتەڤانیێ هەیە، هەكە پرسیار ژ دەزگەهێن ئەمنی بهێتە كرن، بەرسڤەكا جودا دێ هەبیت ژ وان سیاسەتمەدارێن كو گڤاشتن بۆ چوونە دەرڤەیا هەڤپەیمانان كرین.
وەزیرێ ناڤخوە یێ هەرێما كوردستانێ ڕۆناهی ئێخستە سەر گەفێن نوو یێن ل سەر ئیراقێ، و گۆت: بتنێ داعش مەترسی نینە، بەلكو تاوانێن سنوربەزین، تاوانا ڕێكخستی، گەندەلی و مادەیێن بێهۆشكەر ئاستەنگێن مەزنن. ل ڤی بواری دیاركر، كارتێكرنا مادەیێن بێهۆشكەر مەزنترە ژ تیرۆرێ، ژ بەركو ب شێوەیەكێ پلەبەندی خێزانێ و جڤاكی وێران دكەت.
د پشكەكا دی یا ئاخڤتنێن خوەدا، ڕێبەر ئەحمەد هۆشداریدا ل سەر نەمانا وان شیانێن كو د ڕێكا هەڤپەیمانان ڤە دگەهشتنە دەزگەهێن ئەمنی. باسی وێ چەندێ كر، پێشنیاز هەبوو بۆ حوكمەتا فیدرالی كو ڕێككەفتنا دوو قۆلی ل گەل ئەمریكا و وەلاتێن ئۆرۆپایێ ئیمزا بكەت، لێ ئەڤ بژاردە نەهاتە ل بەرچاڤ وەرگرتن.
وەزیرێ ناڤخوە دوپاتی ل سەر پێدڤییا وان ڕێككەفتنان كر و ڕاگەهاند، دۆسییا ئەمنی ل ناڤخوە پارچە پارچە نابیت و ئیراق نەشێت ژ مامەلێن هەرێمی و نێڤدەولەتی دابڕیت، بەلكو پێدڤی ب مەشق، پشتەڤانییا هەوالگری و پرچەككرنێ هەیە و دەستئێخستنا ڤان تشتان ساناهیتر بوو بوو ژ نەچاركرنا هەڤپەیمانان بۆ چوونە دەرڤە ژ ئیراقێ.
