جڤاتا وەزیران: دڤێت 14.14% ببیتە بناغەیێ دیاركرنا پشكێن هەرێمێ د بودجەیا گشتی یا فیدرال دا
جڤاتا وەزیرێن هەرێما كوردستانێ دوپات دكەت كو ڕێژەیا ڕاستەقینە یا ئاكنجییێن هەرێما كوردستانێ 14.14% یە، دڤێت ئەڤ ڕێژەیە ببیتە بناغەیێ دیاركرنا پشكێن هەرێمێ د بودجەیا گشتی یا فیدرال دا. هەروەسا مووچە و شایستەیێن دارایی یێن فەرمانبەران، پێشمەرگە، خانەنشینان و كەسوكارێن شەهیدان و زیندانییێن سیاسی و مفادارێن چاڤدێرییا جڤاكی ل هەرێما كوردستانێ، ل گەل پلێن وەزیفی و تەرخانكرییێن دارایی ب وەكهەڤی بهێنە دابینكرن، ب هەمان پێڤەرێن هەڤكیفێن وان ل پشكێن دی یێن ئیراقێ و بێ گرێدانا وان ب ناكوكییان ڤە و بێ دانانا كوتوبەندێن نەدادی، ئەڤە ژی ب پشتبەستن ب دەستووری، یاسایێ و بڕیارێن پێگیركەر یێن دادگەها بلند یا فیدرالی.
ل ڕۆژا چارشەمبی 14ی چریا ئێكێ 2026، ب سەرۆكاتییا مەسرور بارزانی سەرۆكێ حوكمەتا هەرێما كوردستانێ و ب بەرهەڤبوونا قوباد تالەبانی، جێگرێ سەرۆكێ حوكمەتێ، جڤاتا وەزیرێن هەرێما كوردستانێ كۆمبوو.
د تەوەرێ ئێكێ یێ كۆمبوونێ دا، دووماهی پێشهات و ئەنجامێن دانوستاندنێن د ناڤبەرا شاندێ حوكمەتا هەرێما كوردستانێ و حوكمەتا فیدرال دا، سەبارەت ب ماف و شایستەیێن دارایی یێن هەرێما كوردستانێ د چارچۆڤەیێ بەرهەڤكرنا ڕەشنڤیسێ یاسایا بودجەیا گشتی یا فیدرالا ئیراقێ بۆ سالا 2027 هاتنە پێشبەری جڤاتا وەزیران.
د ڤی واریدا، شاندێ دانوستاندنكارێ حوكمەتا هەرێمێ، ڕاپۆرتەك ل سەر ئەنجامێن كۆمبوونێن دووماهیێ ل گەل وەزارەتا دارایی یا فیدرال و ئەو دەق و پێشنیازێن هەتا نها هاتینە پێشكێشكرن، بەرچاڤكرن. پشتی دانوستاندن و هەلسەنگاندنا ئەنجامێن دانوستاندنان، جڤاتا وەزیران تێبینی و دلتەنگییێن خوە ل سەر هندەك دەق و ئاڕاستەیێن پێشنیازكری دەربڕین و دوپاتی ل سەر پێدڤییا ل بەرچاڤ وەرگرتنا ماف و شایستەیێن دەستووری و دارایی یێن هەرێما كوردستانێ كر.
جڤاتا وەزیران دوپات كر كو ڕێژەیا ڕاستەقینە یا ئاكنجییێن هەرێما كوردستانێ، ب گۆرەی ئەنجامێن سەرژمێرییا گشتی یا ئاكنجییان ل سالا 2024، دبیتە 14.14% و دڤێت ئەڤ ڕێژەیە ببیتە بناغەیێ دیاركرنا پشكێن هەرێمێ د بودجەیا گشتی یا فیدرال دا.
هەروەسا جڤاتا وەزیران دوپاتی ل سەر وێ چەندێ كر كو مووچە و شایستەیێن دارایی یێن فەرمانبەران، پێشمەرگە، خانەنشینان و كەسوكارێن شەهیدان و زیندانییێن سیاسی و مفادارێن چاڤدێرییا جڤاكی ل هەرێما كوردستانێ، ل گەل پلێن وەزیفی و تەرخانكرییێن دارایی ب وەكهەڤی بهێنە دابینكرن، ب هەمان پێڤەرێن هەڤكیفێن وان ل پشكێن دی یێن ئیراقێ و بێ گرێدانا وان ب ناكوكییان ڤە و بێ دانانا كوتوبەندێن نەدادی، ئەڤە ژی ب پشتبەستن ب دەستووری، یاسایێ و بڕیارێن پێگیركەر یێن دادگەها بلند یا فیدرال.
جڤاتا وەزیران پشتەڤانییا خۆ بۆ شاندێ دانوستاندنكارێ حوكمەتا هەرێما كوردستانێ دیاركر و دوپاتی ل سەر بەردەوامبوونا دانوستاندنان ل گەل حوكمەتا فیدرال كر، ب ئارمانجا گەهشتن ب ڕێككەفتنەكا دادی و دەستووری، كو ماف و شایستەیێن هەرێما كوردستانێ و وەلاتییێن وێ بپارێزیت و چارەسەرییەكا بەردەوام و بنەجه و دادی بۆ كێشەیێن دارایی دابین بكەت.
