سێ رێڤەبەریێن نوو دێ ھێنە ڤەکرن
ئەڤرۆ نیوز:
پشتی جڤاتا وەزیران ل رێکەفتی 7/7/2013 بریار دای کو شێلادزێ ببیتە ناحیەک سەر ب قەزا ئامێدیێ ڤە و ل رێکەفتی 18/12/2013 بریار کەفتیە د وارێ بجھئینانێ دا و نھا پتری ژ 41 ھزار کەسان وەک ئاکنجی ل ڤێ ناحیێ دژین، لەورا بریار ھاتیە دان کو چەندین فەرمانگەھێن دی یێن حکوومی ل ڤێ ناحیێ بھێنە ڤەکرن.
ئەیسەر جەرجیس رێڤەبەرێ ناحیا شێلادزێ بۆ رۆژناما ئەڤرۆ دیار کر کو زێدەباری ھەبوونا 12 فەرمانگەھێن حکوومی، لێ ژبەر زێدەبوونا ھژمارا ئاکنجیێن ناحیا شێلادزێ ب فەر دیت داخواز بکەن کو چەندین فەرمانگەھێن دی یێن حکوومی ل ناحیێ بھێنە ڤەکرن و گۆت “ژ بەر پێدڤیا خەلکێ ڤێ دەڤەرێ ب ڤان فەرمانگەھان مە داخواز کریە رێڤەبەریێن سەخبرێریکرنا ئاڤێ، ھوبا چاندنێ، پشکا دارایی بھێنە ڤەکرن، کو ئەڤ فەرمانگەھە ھەتا نھا ل ناحیا شێلادزێ نەبووینە”.
رێڤەبەرێ ناحیا شێلادزێ خویا ژی کر کو ل سەر ڤەکرنا پشکا دارایی رازیبوون ھاتیە دان و بریارە ئەڤ پشکە ھەر د ناڤ ئاڤاھیێ رێڤەبەریا ناحیا شێلادزێ ب خوە دا بھێتە ڤەکرن و گۆت “ئەم دێ چاڤەرێ دیارکرنا رازیبوونێ بین بۆ پشکێن دی ژی داکو پتر خزمەتا دەڤەرێ بھێتە کرن و ھەموو جاران پێدڤیێن وان ھەر د سنوورێ ناحیێ ب خوە دا بھێنە دابینکرن”.