ھەشت وەلاتیێن کورد ھاتنە رەڤاندن
ئه‌ڤرۆ نيوز:
سەرکردەیەکێ پارتی دیموکراتی کوردستان ل بەغدا ئاشکرا کر، ھژمارەک خەلکێ نەنیاس گەفان ل کوردێن ئاکنجیێن بەغدا دکەن و داخوازا چۆلکرنا بەغدا دکەن ژ لایێ وەلاتیێن کوردڤە، ھەروەسا دیار کر، د دەمێ دو حەفتیان دا ھەشت وەلاتیێن کورد ھاتینە رەڤاندن.
مەحەمەد ئەمین دەلۆ، بەرپرسێ لقێ پێنج یێ پارتی دیموکراتی کوردستان ل بەغدا بۆ رۆژناما ئەڤرۆ گۆت” ئەڤە چەند رۆژەکە گەف ل کوردێن بەغدا دھێنەکرن و ب رێیا ھژمارا تەلەفۆنێن نەنیاس ڤە و ھندەک جاران ژی ب رێیا ھنارتنا نامان گەف ل وەلاتیێن کورد یێن ئاکنجیێن بەغدا دھێتەکرن، مە دووڤچوون بۆ ڤێ پرسێ کریە، بەلێ ژێدەرێ ئەڤان گەفان دیارنینە کینە، تنێ ئەم دزانین خەلکێ نەنیاسن ئەڤان گەفا ل کوردان دکەن، د نامەیێن خوەدا بۆ وەلاتیێن کورد گۆتنە دڤێت بەغدا بجە پھێلن و ڤەگەڕنە ھەرێما کوردستانێ، بۆ ڤێ مەرەمێ مە رەوتا سەدر ئاگەھدار کریە و وان ژی تەکەز کریە، دژی ھەر گەفەکێ نە ل سەر وەلاتیێن کورد ل بەغدا.
مەحەمەد ئەمینی گۆت ژی” ھژمارەک ژ ڤی خەلکێ گەفان ل وەلاتیێن کورد دکەنە بزاڤێن رەڤاندنا کوردان ژی ددەن، تنێ د دەمێ دو حەفتیان دا ھەشت وەلاتیێن کورد ل بەغدا ھاتینە رەڤاندن و چارەنڤیسێ وان ژی دیار نینە، نوکە مە لژنەیەکا عەشایەری پێکئینایە بۆ زانینا چارەنڤیسێ وان وەلاتیێن کورد و پشتی سەرەدانا مە بۆ نک بالێ موقتەدای ھەتا رادەیەکی ئەڤ گەفە کێم بووینە و د دەمێ دو رۆژێن بۆری دا گەفکرن ل کورددان کێم بوویە.