پێدڤیە عیراق نەچیتە د ناڤ ھەڤپەیمانیا ئیسلامی یا دژی داعشێ دا
ئەڤرۆ نيوز:
سیاسەتمەدارەکێ کورد دیارکر کو پێکئینانا ھەڤپەیمانیەکا نوو ب ناڤێ ئیسلامێ ب سەرکێشیا سعودیێ ژبۆ ناڤبرنا داعشێ دێ تیرۆرەکا نوو ل دەڤەرێ دروست کەت و دڤی واری دا پێدڤیە عیراق نەچیتە د ھەڤپەیمانیا نوو دا.
دکتۆر مەحمود عوسمان سیاسەتمەدارێ کورد دیارکر کو پێکئینانا ھەڤپەیمانیێن نوو ل عیراقێ و سووریێ، دێ ململانێیێن تایفەگەری پتر کەت و گوت ” پێکئینانا ھەڤپەیمانیا ئیسلامی ژبۆ ناڤبرنا داعشێ ب سەرۆکاتیا سعودیێ کو د ژ ٢٤ وەلاتان پێکدھێت، دێ بیتە سەدەم کو بەرەیێن جودا جودا و دژی ھەڤدو ل دەڤەرێ بناڤێ شەرێ داعشێ بھێنە دروستکرن و دێ جۆرەکێ دی یێ تیرۆرێ دەرکەڤیت و یا ژ ھەمووان دیارتر ھەڤپەیمانیا تورکیا و سعودیێ یە ب ھەڤکاریا ئەمریکا ژلایەکی ڤە، و ھەڤپەمانیا ئیرانێ و سووریێ و حزبواللایە ب پشتەڤانیا روسیا ژلایەکێ دی ڤە، کو ئەوان دڤێت عیراقێ ژی بێخنە دناڤ ھەڤپەیمانیا دویێ دا، دیارە ژی کو ئەڤ ھەردو ھەڤپەیمانیە ل سەر بناغێ سیاسی و بەرژەوەندیێن نێڤدەولەتی ھاتینە دامەزراندن دناڤا عیراقێ و سووریێ دا، ئەڤ چەندە ژی دێ ململانیێن تایفەگەری پتر کەتن”.
عوسمانی زێدەتر گوت” زێدەباری کو شەرێ ھەڤپەیمانیێ بەرامبەر داعشێ دێ ھێتە د رۆژەڤێ دا، د ھەمان دەم دا دێ ھندەک شەرێن دی ژی دروست بن، ئەو ژی شەرێ تورکیا ل گەل پەکەکێ، و یێ سعودیێ ل گەل حوسیان … ھتد ، و ئەڤ یەک ژی دێ دەڤەرێ پتر بەر ب شەر و ئالۆزیان بەت و دبیت گورانکاریێن جوگرافی و دیموگرافی ل دەڤەرێ دروست ببن”.
مەحمود عوسمان د پەیچێ خوەیێ تایبەت دا دیار دکەت ژی کو ئەوی پێ باش نینە عیراق بچیتە دناڤا وان ھەردو ھەڤپەیمانیان و گوت” ھەکە عیراق بچیتە دناڤ ئێک ژ وان ھەڤپەیمانیان دا، ل وی دەمی دێ زیانێن مەزن بۆ عیراقێ ھەبن و گەلێ کوردستانێ ژی د ناڤەراستا ئەوان ململانێیان دایە و دێ ئێکسەر کارتێکرنێ ل رەوشێن وان کەت، لەوما پێدڤیە ھەموو لایەک بەرژەوەندیێن بەرتەنگێن حزبی بدەنە لایەکی و ل گۆرەی بەرژەوەندیێن نەتەوی و نیشتمانی بچن و کار بکەن کو ئاریشێن خوە ب دانوستاندن چارە بکەن، داکو د ھەڤگرتی بن ل سەر ئاستێ باشوورێ کوردستانێ”.
ل دوماھیێ گۆت ” ھەتا کو ئەم بکارین مفای ژ ڤان گورانکاریێن بھێت وەربگرین، ھەر چ نەبیت بلا نەھێلین زیانێن وان ھەڤپەیمانیان بگەھنە گەلێ کورد کو ئەڤ یەک ژی بەرپرسیارەتیەکا مەزن و دیرۆکی یە ل سەر ملێن لایەنێن سیاسی یێن کوردستانی”.