حوکمەت دێ بھایێ گوشتێ سۆر ئەرزان کەت
ئەڤرۆ نیوز:
حوکمەتا ھەرێما کوردستانێ ل بەرە بھایێ گوشتێ سۆر ل بازاڕێن ھەرێما کوردستانێ ب شێوەیەکێ بەرچاڤ بھێتە ئەرزانکرن و رێڤەبەرێ گشتیێ سامانێ ئاژەلی ژی ئیماژە بڤێ چەندێ دکەت، حەفتیا بۆری ب نڤیسارا فەرمی داخواز ژ وەزیرێ چاندنێ کریە و بھایەکێ نوو ل سەر بەرھەمێ گوشتی بھێتە دانان، ھەروەسا دبێژیت، رێژەیەکا زۆرا ئاژەلی ب رێیا قانوونی و نەقانوونی دھێتە ھەرێما کوردستانێ و بەرھەمێ زێدە ھەیە.
رەمەزان محەمەد، رێڤەبەرێ گشتیێ سامانێن ئاژەلی ل حوکمەتا ھەرێما کوردستانێ بۆ رۆژناما ئەڤرۆ گۆت” ئەم نەشێین ب ھیڤیا بەرھەمێ نافخۆیی گوشتی بۆ وەلاتیێن ھەرێما کوردستانێ بەرھەم بینین، لەوڕا ئەم نەچارین رێکێ بدەین ژدەرڤە ئاژەل و بەرھەمێ گوشتی بھێتە ناڤا ھەرێما کوردستانێ، ھەتاکو پێدڤیێن وەلاتیان ژ گوشتی بھێتە تژیکرن، ئەڤەژی لگورەی داخوازیێن پارێزگەھێن ھەرێما کوردستانێ و ھەیڤانە ھەر پاریزگەھەک دخوازێ دکەت لگورەی پێدڤی بەرھەم بھێتە ھەرێما کوردستانێ، ئەڤ ئاژەلێن ل سەر خواستا پارێزگەھان دھێنە ھەرێما کوردستانێ ھەموو گورەی رێنمایێن وەزارەتا چاندنێ یە، مخابن ژدەرڤەی ئەڤێ پڕۆسێ رێژەیەکا زۆرا ئاژەلی ب شێوەیەکێ نەقانوونی دھێتە ھەرێما کوردستانێ و ناھێتە کۆنتڕۆلکرن، ب ئەگەرێ ھاتنا ھژمارەکا زۆرا ئاژەلی بۆناڤا سینورێن کوردستانێ، بازاڕی ئاژەلی ھاتیە تێکدان، رۆژانە ل سەرانسەری ھەرێما کوردستانێ ل سەر جادە و بازاڕێن مللی و دەروازەیێن باژێڕا ئاژەل ب شێوەیەکێ نە ساخلەمی و نەقانوونی دھێنە سەربڕین، بکارئینانا گوشتی ل سەر رێیێن سەرەکی کاریگەری ل سەر ساخلەمیا وەلاتیان ھەیە، چونکو ب ھزاران ترۆمبێل ل سەر ئەڤان جادەیان دەرباز دبن و ئەگەرن بۆ پیسبوونا گوشتێ سەر جادێ و ناڤا کۆلانا”.
رەمەزانی گۆتژی” ئەگەرێ ئەرزانبوونا بھایێ گوشتێ سۆر بۆ ھاتنا رێژەیەکا زۆرا ئاژەلی ڤەدگەڕیت ب تایبەتی ل وەلاتێ سووریا، ئەڤ گوشتێ ل سەر رێیا دھێتە فرۆتن راستە بھایێ وی یێ ئەرزانە، چونکو ئەگەر ئاژەل بێنە سەربڕخانێ بھایەک دچیتە سەر، ئەگەر بھێتە بازاڕیژی بھایێ وی گرانتر دبیت، ژبەرکو دوکان کریارەیەکا زۆر دەت و یێ ل سەر جادێ چو کرێ و سەربڕخانە نینن، پێدڤیە ئێک بھا بۆ گوشتی بھێتە دیارکرن و گوشت بھێتە ئەرزانکرن، مە ل رێڤەبەرایەتیا گشتیا سامانێن ئاژەلی نڤیسارەکا فەرمی دایە وەزیرێ چاندنێ و چاڤەڕێی بەرسیڤی دکەین، نابیت ل جھەکی کیلۆیا گوشتی ب 10 ھزار دیناران بیت و ل ھندەک جھا کیلۆ ب 15 ھزار دیناران بیت، مە تنێ پێشنیارکریە بھایێ گوشتی بھێتە ئەرزانکرن و فەرە چاڤدێریا بازرگانی پێداچوونێ بکەت ل سەر بھایێ گوشتی و بھایەکێ نوو ئەرزان بھێتە دانان ل سەر گوشتی، دڤێت لیژنەکا تایبەت بزانیت ئێک کیلۆیا گوشتی ب چەندێ یە ل سەر گۆشتفڕۆشان و رێژەیەکا قازانجی بۆبھێتە دیارکرن، خویایە نوکە ئاژەل یێ زۆرە و خەلکی پارە نینە، چارەسەر ئەرزانکرنە و حەفتیانە بھایێ نوو لسەر گوشتی بھێتە دانان”.