مه‌سرور بارزانى: ئه‌گه‌رێن زانینا سه‌رهلدانا دیاردا داعش پێدڤى ب ده‌مێ زێده‌تره
ئه‌ڤرۆ نیوز:
مه‌سرور بارزانى شیره‌تكارێ جڤاتا ئاسایشا هه‌رێما كوردستانێ د چارچوڤێ پێشوازیكرنێ دا ل شانده‌كێ بلند یێ سه‌ربازى یێ بریتانیا ب سه‌رۆكاتیا جه‌نه‌رال تۆم بێكت مه‌زنه شیره‌تكارێ وه‌زاره‌تا به‌ڕه‌ڤانیێ بۆ رۆژهه‌لاتا ناڤین، داخوازا ده‌ستپێكرنا دانوستاندێن ئاشتیانه ل گه‌ل به‌غدا كر ب مه‌ره‌ما ئاڤاكرنا باوه‌ریه‌كێ بۆ وێ چه‌ندێ دووماهى ب ناكۆكیێن دیرۆركى بینن و هه‌ردو ئالى ب یه‌كسان ل گه‌ل هه‌ڤدو وه‌ك دو هه‌ڤسوو بژین.
جه‌نه‌رال تۆم بێكت دوپاتى ل سۆز و پیگیربوونا وه‌لاتێ خوه كر بۆ دابینكرنا ته‌قه‌مه‌نى و چه‌كێ پێدڤى بۆ شه‌رێ دژى تیرۆرێ كر و گۆت:(پشكداریا كارا یا هه‌وه د ڤى شه‌رێ جیهانى دا گه‌له‌كێ كاریگه‌ر و گرنگ بوو و وه‌كر كو ل سه‌رانسه‌رى جیهانى په‌سنا گه‌لێ كوردستانێ و پێشمه‌رگه‌ى بهێته كرن).
مه‌سرور بارزانى راگه‌هاند، شكه‌ستنا سه‌ربازى یا داعشێ یا ب ساناهى یه، لێ نه‌هێلانا وان فاكته‌رێن كو بووینه ئه‌گه‌رێ سه‌رهلدانا دیاردا داعش و هه‌ڤشێوێن وێ كار و ده‌مێ زێده‌تر دڤێت. له‌ورا دڤێت هه‌ڤپه‌یمانیا نێڤده‌وله‌تى د هه‌موو واران دا یا هه‌ڤكار بیت بۆ وێ چه‌ندێ ئه‌ڤ كێشه‌یه د بنه‌ره‌ت دا بهێته چاره‌كرن و فاكته‌رێن سه‌رهلدانا وێ نه‌هێلیت
