ژمارا ئاوارێن ل هه‌رێمێ هاته ئاشكه‌را كرن
ئه‌ڤرۆ نيوز:
رێڤەبەرێ کۆچ و کۆچبەران ل ھەرێما کوردستانێ راگەھاند، ژ سالا 2005 و ھەتا نھا مەھا پێنچ ژ سالا 2016، نێزیکی ملیۆنەک و 680 ھزار ئاواران قەستا ھەرێما کوردستانێ کرینە و پتریا وان نھا ل کەمپان دا دژین و گۆت: ھژمارەکا مەزن یا ئاوارە و پەنابەران ژی چووینە دەرڤەی وەلاتی و پشتی ھینگی ڤەگەریانەڤە بۆ ھەرێما کوردستانێ و ھندەک ژی ڤەنەگەریاینە.
شاکر یاسین، رێڤەبەرێ کۆچ و کۆچبەران ل ھەرێما کوردستانێ دیارکر، ژ مەھا شەش یا سالا 2015 و ھەتا نھا نێزیکی 250 ھزار پەنابەرێن سۆریا ھاتینە ھەرێما کوردستانێ و لێ ئاکنجی بووینە و ژ ڤی سەرجەمی ژی ھەتا نھا نێزیکی سێ ھزار پەنابەرێن کوردێن سۆریا بۆ باژێرێ خوە یێ کۆبانێ ڤەگەریاینەڤە و گۆت: 40% ژ پەنابەرێن سۆری نھا ل ناڤ کەمپان دژین و 60% ل ناڤ چو کەمپان دا ناژین.
ناڤبری ئاماژە دا وێ چەندێ، نھا ل ھەرێما کوردستانێ نێزیکی شەش ھزار پەنابەرێن کوردێن ئیرانێ ھەنە کو ھەموو ژی بەری سالا 1991 ھاتنە دناڤ ھەرێمێ دا و پتریا وان ل پارێزگەھا سلێمانیێ دئاکنجی نە و گۆت ژی: ھەروەسا 12 ھزار پەنابەرێن کوردێن تۆرکیا ل ھەرێمێ ھەنە کو پتریا وان ل مەخموور و دھۆکێ دژین.
رێڤەبەرێ کۆچ و کۆچبەران ل ھەرێما کوردستانێ ئاماژە ب وێ چەندێ کر، ھەتا نھا ل ھەرێما کوردستانێ نێزیکی 40 کەمپان بۆ ئاوارە و پەنابەران ھاتینە درۆستکرن و ھندەک ژ وان ب شێوەیەکێ ستاندارد ھاتینە دروستکرن و گۆت: ھژمارا ئاوارێن نھا ل ھەرێما کوردستانێ دژین کو ژ سالا 2005 و ھەتا 2016 تەڤلی ھەرێما کوردستانێ بووین دگەھیتە ملیۆنەک و 680 ھزار ئاواران کو ژ وان ژی پتر ژ 75% د ناڤ کەمپان دا دژین و 25% ژ دەرڤەی کەمپان دژین.
ئەو چەندە ژی دیار کر کو نھا رەوشا ھندەک پەنابەرێن ھەرێما کوردستانێ گەلەک یا باش بووی و ھندەک ژ وان پارچە ئەرد و 20 ملیۆن دینار بۆ ئاڤاکرنا ئەردێ خۆ ژ حوکمەتا ھەرێما کوردستانێ وەرگرتینە و گۆت ژی: ھەتا نھا نێزیکی 890 ھزار پەنابەران ب رێیێن نە قانوونی بەر ب دەرڤەی وەلاتی چووینە.