راسته دانا سێ نمران بۆ دەرچوویێن 12 ئامادەیی نامینن؟
ئەڤرۆ نيوز:
ھەردو وەزارەتێن خواندنا بلند و ڤەکۆلینێن زانستی و پەروەردێ یێن حوکمەتا ھەرێما کوردستانێ پێکڤە بریار دایە کو دانا سێ نمران بۆ دەرچوویێن 12 ئامادەیی بھێنە ڕاگرتن.
عەباس ئەکرەم، پەیڤدارێ وەزارەتا خواندنا بلند و ڤەکۆلینێن زانستی ئاشکرا کر، د کۆمبوونا ھەڤپشک یا ھەردو وەزارەتێن خواندنا بلند و پەروەردێ دا بڕیار ھاتیە دان، دانا سێ نمرێن زێدە بۆ دەرچوویێن 12 ئامادەیی بھێنە ڕاگرتن و گۆت: “ئەڤ بڕیارە بۆ سالا بھێت یا خواندنێ ئەڤ بڕیارە بکەڤیتە د وارێ ب جھئینانێ دا، ئانکو ئەڤ سالە دەرچووێن پۆلا 12 ئامادەیی یێن سالا خواندنێ 2015 – 2016 دێ سێ نمرێن خوە یێن زێدە وەرگرن، لێ ئەڤە دێ بیتە دووماھی سال نمرێن زێدە بۆ قوتابیان بھێنە دان”.
عەباس خویا ژی کر، بڕیار ھاتیە دان کو وزەزارەتا پەروەردێ قوتابیان ل دۆر نەمانا سێ نمرێن زێدە ئاگەھدار بکەت و بۆ خەندان گۆت: “ئارمانج ژ ڤێ بڕیارێ بلندکرنا ئاستێ زانستی و شیانێن قوتابیانە”.
وەکو دیار سالانە وەزارەتا خواندنا بلند و ڤەکۆلینێن زانستی ب ھەماھەنگی ل گەل وەزارەتا پەروەردێ سێ نمرێن زێدە ددەنە وان دەرچوویێن پۆلا 12 ئامادەیی یێن ل خۆلا ئێکێ ژ ئەزموونێن گشتی دەردچن.
د نوکە دا قوتابیێن پۆلا 12 ئامادەیی چاڤەرێی ڕاگەھاندنا نمرێن خوە دکەن ژ لایێ وەزارەتا پەروەردێ ڤە، د ڤی واری ژی دا وەزیرێ پەروەردێ ڕاگەھاندیە کو د ڤێ حەفتیێ دا نمرە دێ ھێنە ڕاگەھاندن.
